ပိတ်လှောင် ခိုင်းစေခံထားရသော မြန်မာ အလုပ်သမားများ လွတ်မြောက်

ပိတ်လှောင်ထားတဲ့ စက်ရုံထဲက ထွက်နေကြစဉ် (ဓာတ်ပုံ - Manager Online)


ထိုင်းနိုင်ငံ ဘန်ကောက်မြို့မှာရှိတဲ့ တရုတ်လင်မယားပိုင် အထည်ချုပ်စက်ရုံကို မနေ့က ထိုင်းရဲတွေ ဝင်ရောက်စီးနင်းပြီး ပိတ်လှောင် ခိုင်းစေခြင်းခံထားရတဲ့ မြန်မာအလုပ်သမား ၆၀ ဦးကို ဝင်ရောက် ကယ်တင်ခဲ့ပါတယ်။

အဲဒီစက်ရုံက အလုပ်သမားတဦး လွတ်မြောက်လာပြီး သတင်းပေးရာကနေ အဲဒီလို ဝင်ရောက် ကယ်တင်နိုင်တာ ဖြစ်ပါတယ်။

တလကို လစာ ဘတ် ၇ ထောင်ပေးမယ် ပြောပြီး ဘတ် ၂၀၀ သာရကြောင်း၊ တနေ့လျှင် အလုပ် ၁၆ နာရီ လုပ်ရကြောင်း မြန်မာအလုပ်သမားများတွေက ပြောပါတယ်။

ပိုင်ရှင် တရုတ်မကတော့ မြန်မာအလုပ်သမားတွေဟာ သူတို့ကို ဘတ် ၁ သောင်းခွဲစီ အကြွေးပေးစရာရှိလို့ လခလျှော့တာလို့ အကြောင်းပြပါတယ်။ ပိတ်လှောင်ထားတယ် ဆိုတာကိုတော့ ထိုင်းရဲတွေကို ဝန်ခံပါတယ်။ အလုပ်ထွက်ထွက်သွားတတ်လို့ အဲလို ပိတ်လှောင်ထားတာလို့ ပြောပါတယ်။

တရုတ်လင်မယားကို အလုပ်သမား အက်ဥပဒေနဲ့ အရေးယူမယ်လို့ ထိုင်းအာဏာပိုင်တွေက ပြောပါတယ်။

လောလောဆယ်မှာ လွတ်မြောက်လာတဲ့ အလုပ်သမားတွေကို မြန်မာအဖွဲ့အစည်းတခုဖြစ်တဲ့ ထိုင်းနိုင်ငံရောက် မြန်မာနိုင်ငံသားများအသင်း (BAT) က အကူအညီပေးနေတယ်လို့ သိရပါတယ်။

(သတင်း အပြည့်အစုံဖတ်ရန်)

Ref: Bangkok Post, Manager Online