တရုတ်က အကောင်အထည်ဖော်မယ့် “ရန်ကုန်မြို့တော်သစ်”

(Photo Credit: Picture Ninja)

“ရန်ကုန်မြို့တော်သစ်” အကောင်အထည်ဖော်ရေး စီမံကိန်းအတွက် တရုတ်ကုမ္ပဏီ Zhuhai Zhong Zhu Holding ကုမ္ပဏီနဲ့ မြန်မာအစိုးရတို့ အခု လဆန်းက နေပြည်တော်မှာ သဘောတူစာချုပ် လက်မှတ်ရေးထိုးခဲ့တယ်လို့ သိရပါတယ်။

နေပြည်တော်မှာ တရုတ်နိုင်ငံ ကွန်မြူနစ်ပါတီ ဗဟိုကော်မတီ နိုင်ငံရေး ဗျူရို အမြဲတမ်း ကော်မတီဝင်နဲ့ တရုတ်င်ငံရေး အတိုင်ပင်ခံ ကွန်ဖရင့်ရဲ့ (၁၁) ကြိမ်မြောက် အမျိုးသားကော်မတီ ဥက္ကဌ မစ္စတာ ကျာချင့်လင် ဦးဆောင်တဲ့ ကိုယ်စားလှယ်အဖွဲ့တွေ တွေ့ဆုံဆွေးနွေးပွဲ တက်ရောက်တဲ့ ခရီးစဉ်မှာ အဆိုပါ သဘောတူ တွေ စာချုပ်တွေ လက်မှတ်ထိုးခဲ့တာပါ။

လက်ရှိ ရန်ကုန်မြို့ဟာ လူဦးရေ ထူထပ်သိပ်သည်းလာခြင်း၊ မြို့တွင်းက ကားသွားလာတဲ့ အဓိက ပင်မလမ်းတွေ ကျဉ်းမြောင်းလာခြင်း၊ ယာဉ်ကြောပိတ်ဆို့မှု ပိုမိုကြုံတွေ့လာခြင်း စတဲ့ အကြောင်းရင်းတွေကြောင့် “ရန်ကုန်မြို့တော်သစ်” စီမံကိန်းကို ပြုလုပ်ဖို့ သဘောတူညီခဲ့တာ ဖြစ်တယ်လို့ Zhuhai Zhong Zhu Stock ကုမ္ပဏီနဲ့ နီးစပ်သူ စီးပွားရေးလုပ်ငန်းရှင်တဦးက ပြောပါတယ်။

အဆိုပါ စီးပွားရေးလုပ်ငန်းရှင်က “လက်ရှိ ရန်ကုန်မြို့မှာ လူနေသိပ်သည်းဆတွေက အရမ်းများလာတယ်။ လူတွေများလာသလို အဆောက်အအုံတွေကလည်း အထပ်မြင့် တွေဖြစ်လာတယ်။ မြို့လည်ကောင် တ၀ိုက်မှာ ပြည့်နေပြီ။ ဒီအတွက် မြို့စွန်မှာသွားပြီး စီမံကိန်းဖော်မယ်ဆိုရင် လမ်းပန်းဆက်သွယ်ရေးအရလည်း အလုပ်မဖြစ်ဘူး” လို့ ပြောပါတယ်။

“သူတို့ ပြောပုံအရ မြို့တော်သစ်နေရာကို အနီးဆုံး ရန်ကုန်တဖက်ကမ်း ဒလကို လုပ်မယ်။ ဒီအတွက်ကလည်း ၀န်ကြီးဌာန တခုတည်းနဲ့ မပြီးဘူး။ လျှပ်စစ်၊ အိုးအိမ်၊ စည်ပင်သာယာ၊ အဆောက်အအုံ၊ လမ်းတံတား ၀န်ကြီးဌာန အကုန်ပါမှာဆိုတော့ ၀န်ကြီးဌာတွေ အများကြီးနဲ့ ပေါင်းပြီး လုပ်ရမှာ” လို့ အဲဒီ စီးပွားရေးလုပ်ငန်းရှင်က ဆက်ပြောပါတယ်။

အဲဒီ စီမံကိန်းကို ၅ နှစ်အတွင်း အကောင်အထည်ဖော်ဖို့ သဘောတူညီ ထားပြီး လက်တလောမှာ တရုတ်ကုမ္ပဏီက ကနဦး လေ့လာရေးဆန်းစစ်မှု ပြုလုပ်တဲ့ အဆင့်ပဲရှိသေးကြောင်း၊ ဘယ်အချိန်မှာ စတင် အကောင်အထည်ဖော်မယ်ဆိုတာ မသိရသေးကြောင်း သိရှိရပါတယ်။

Zhuhai Zhong Zhu Holding ကုမ္ပဏီဟာ တရုတ်ပြည်မှာ နာမည်ကြီးကုမ္ပဏီတခုဖြစ်ပြီး ယင်းပိုင် လုပ်ငန်းစု အများအပြား ရှိပါတယ်။

နရီလင်းလက်