BG အဖွဲ့ရဲ့ သွေးအကူအညီ စစ်ဆေးရုံကိုလည်း ရောက်ပါတယ်

ဟိန်းသူ

ဒေါ်အောင်ဆန်းစုကြည်ရဲ့ ၆၆ နှစ်ပြည့် မွေးနေ့ အထိမ်းအမှတ် သွေးလှူကြဖို့ လှုံ့ဆော်နေတဲ့ BG သွေးကူညီပေးရေးအဖွဲ့က ရန်ကုန်စစ်ဆေးရုံတွေကိုလည်း သွေး ထောက်ပံ့နေရတယ်လို့ ဆိုပါတယ်။

“အစောပိုင်းက အာဏာပိုင်တွေ တောက်လျှောက်လိုက်တယ်။ နှောက်ယှက်ဟန့်တားတာတွေ အများကြီး ကြုံခဲ့ရတယ်။ ကျနော်တို့က ပုံမှန် သွေးလှူမှုတွေ ပြုလုပ်လာခဲ့တော့ နောက်ပိုင်းမှာ အမှတ် ၁ စစ်ဆေးရုံတို့၊ အမှတ် ၂ စစ်ဆေးရုံတို့ကပါ သွေးလှမ်းတောင်းတဲ့ အဆင့်ထိ ဖြစ်လာခဲ့တယ်” လို့ အဖွဲ့ခေါင်းဆောင် ကိုညီညီက ပြောပြပါတယ်။

လာမယ့် ၁၉ ရက်နေ့မှာ ကျရောက်မယ့် မွေးနေ့အတွက် သွေးလှူတဲ့အစီအစဉ် ဒီကနေ့ အစပြုပါပြီ တဲ့။ သင်္ကန်းကျွန်း၊ စံပြဆေးရုံမှာပါ တဲ့။

“အမေစုကို အသက်ရာကျော်ရှည်စေချင်တဲ့အတွက် ကျနော်တို့က အခုလို့ ရည်ရွယ်ပြီး သွေးလှူဒါန်းပွဲ ပြုလုပ်ပေးတာပါ။ အမေစု မွေးနေ့ အထိ လှူဒါန်းသွားမှာပါ” လို့ ကိုညီညီက ရှင်းပြပါတယ်။

BG အဖွဲ့ နဲ့ အတူ ပုံမှန် သွေးလှူနေကျဖြစ်တဲ့ အသက် ၄၅ နှစ် ၀န်းကျင် ရှိပြီဖြစ်တဲ့ အမျိုးသမီးတဦးက ဒေါ်အောင်ဆန်းစုကြည် မွေးနေ့အတွက် ရည်ရွယ်ပြီး သွေးလှူခဲ့တာ ဒါဟာ သူ့အတွက် အကြိမ် ၄၀ မြောက်ဖြစ်တယ်လို့ ဆိုပါတယ်။

“ပြည်သူအတွက် အများကောင်းကျိုးအတွက် ဆောင်ရွက်နေတဲ့ အန်တီစုကို ဂုဏ်ပြုတဲ့အနေနဲ့ ရည်ရွယ်ပြီး လှူဖြစ်တာပါ” တဲ့။

BG က မန္တလေး၊ မကွေး၊ စစ်ကိုင်းနှင့် ကချင်ပြည်နယ် တို့မှာလည်း အဖွဲ့ခွဲတွေ ရှိတယ်၊ သွေးလှူဒါန်းပွဲတွေ တပြိုင်နက် လုပ်မယ်လို့ ဆိုပါတယ်။

တနိုင်ငံလုံး၊ တကမ္ဘာလုံးမှာ ရှိတဲ့ ဒေါ်အောင်ဆန်းစုကြည်ကို ချစ်မြတ်နိုးသူ အားလုံး သွေးလှူဒါန်းကြဖို့လည်း သူတို့က တိုက်တွန်းထားပါတယ်။

BG ကို ၈၈ မျိုးဆက် ကျောင်းသားခေါင်းဆောင် ကိုမင်းကိုနိုင်၊ ကိုကိုကြီး တို့ရဲ့ တိုက်တွန်းမှုကြောင့် ၂၀၀၆ မှာ ဖွဲ့ခဲ့တယ်၊ သွေး အကူအညီပေးဖို့ စာရင်းပေးထားသူ သွေးလှူရှင် အရေအတွက်ဟာ ရန်ကုန်တိုင်းအတွင်းမှာ ၃ သောင်း ကနေ ၄ သောင်းကြား ရှိတယ်လို့ သိရပါတယ်။

သွေးလှူဒါန်းလိုသူများ ဆက်သွယ်ရန်

ကိုညီညီ 09 4932 8055
ဒေါ်သီတာ 01 396 476

ကိုလင်းထက် 09 7312 5885
ကိုကောင်းထက်ကျော် 09 992 7082

ကိုသီဟန် 09 4930 8433
မထိုက် 09 7317 0165