Generation Wave လျှို့ဝှက်မနေတော့

(ဓာတ်ပုံ - GW ဖေ့စ်ဘုတ်)

Generation Wave (GW) တည်ထောင်ခြင်း ၄ နှစ်မြောက်မွေးနေ့ကို အောက်တိုဘာ ၉ ရက်နေ့က စမ်းချောင်းမြို့နယ် ဗဟိုလမ်း၊ သီရိမင်္ဂလာရန်အောင် ကျောင်းတိုက်မှာ ပြုလုပ်ခဲ့ပြီး မြေပေါ်နိုင်ငံရေး၊ လူမှုရေးလုပ်ငန်းတွေကို ထင်ထင်ပေါ်ပေါ် လုပ်ကိုင်မယ်လို့ GW အဖွဲ့က ပြောဆိုလိုက်ပါတယ်။

“အစပထမတုန်းကတော့ ကျနော်တို့ရဲ့ မတူတဲ့သဘောထား အမြင်တွေကို ရှင်သန်ခွင့် မပေးတဲ့အတွက်ကြောင့်မို့လို့ ကျနော်တို့တွေ မှန်တာတွေကို လုပ်နေပေမယ့်လည်း ပုန်းလျှိုးကွယ်လျှိုနဲ့ လုပ်ခဲ့ကြရပါတယ်။ ဒါပေမယ့် အခုချိန်မှတော့ လက်ရှိ အစိုးရသစ်အနေနဲ့ လက်ခံနားလည်ပေးမယ်လို့ ထင်မြင်ယူဆတဲ့ အတွက်ကြောင့်မို့လို့ ကျနော် Generation Wave ကို ပေါ်ပေါ်တင်တင်နဲ့ စတင်ရပ်တည်ပါပြီ” လို့ Generation Wave တည်ထောင်သူတဦးဖြစ်တဲ့ အဆိုတော် ကိုဇေယျသော်က ပြောပါတယ်။

လူငယ်များနဲ့ ဖွဲ့စည်းထားသည့်အတွက် GW အနေဖြင့် လူငယ်တွေရဲ့အကျိုးကို အဓိက ရှေးရှုလုပ်ဆောင်သွားမည်ဟု ကိုဇေယျာသော်က ဆိုပါတယ်။

“ကျနော်တို့နိုင်ငံက ပြောင်းလဲမှုအစလို့လည်း ပြောလို့ရပါတယ်။ ကျနော်တို့ လူငယ်တွေရဲ့ အခွင့်အရေးတွေအတွက် လုပ်ခွင့်ရတဲ့ အစပဲရှိပါသေးတယ်။ ဒါကြောင့် ကျနော်တို့ ရပိုင်ခွင့်တွေ တောင်းဆိုချင်တာကြောင့် အခုလို ပေါ်တင်လှုပ်ရှားဖို့ ဆုံးဖြတ်လိုက်တာပါ” လို့ GW တည်ထောင်သူ နောက်ထပ်တဦးဖြစ်တဲ့ ကိုဝင်းထွဋ်က ပြောပါတယ်။

တနိုင်ငံလုံးအတိုင်းအတာနဲ့ ပြောင်းလဲဖို့အတွက် အများကြီး လိုအပ်နေသေးတာကြောင့် GW အနေနဲ့ မြန်မာပြည်သူတွေအကျိုးအတွက် တဖက်တလမ်းက တောင်းဆိုပေးသွားမှာ ဖြစ်တယ်လို့ သူက ဆက်လက်ပြောပါတယ်။

ယနေ့လူငယ်များဟာ ၁၉၈၈ အရေးအခင်းနဲ့ ၁၉၉၆ အရေးအခင်းများမှာ စစ်တပ်ရဲ့ အကြမ်းဖက် နှိမ်နင်းမှုတွေကို အသက်ငယ်သေးတာကြောင့် မမြင်ဘူးပဲ ကြားဖူးရုံ ရှိခဲ့ပေမယ့် ၂၀၀၇ ရွှေဝါရောင်တော်လှန်ရေးမှာ စစ်တပ်ရဲ့ အကြမ်းဖက်မှုကို မျက်ဝါးထင်ထင် မြင်ခဲ့ရကြောင်း၊ ဒါကြောင့် ရွှေဝါရောင်တော်လှန်ရေး အပြီးမှာ မတရားမှုတွေကို တောင်းဆိုဖို့ Generation Wave အမည်နဲ့ လူငယ်တွေ ဖွဲ့စည်းခဲ့ခြင်းဖြစ်ကြောင်း အဖွဲ့ဝင်တဦးဖြစ်တဲ့ ကိုချမ်းဦးသာက ပြောပြပါတယ်။

“၂၀၀၇ ရွေဝါရောင် တော်လှန်ရေးဟာ လူငယ်တွေအပေါ်ကို အများကြီး အကျိုးသက်ရောက်မှုရှိခဲ့ပါတယ်။ စစ်အာဏာရှင်ရဲ့ ရက်စက်မှုတွေကို ကျနော်တို့ မျက်ဝါးထင်ထင် မြင်ခဲ့ကြရသလို အာဏာရှင်စနစ်အပေါ် မုန်းတီးမှုနဲ့ ဒီမိုကရေစီလိုလားမှုတွ မြင့်တက်လာပါတယ်။ ပြီးတော့ Generation Wave လို လူငယ်လှုပ်ရှားမှု အဖွဲ့တွေလည်းပေါ်ပေါက်လာပြီး နိုင်ငံရေး လူမှုရေတွကို တက်တက်ကြွကြွ လုပ်ဆောင်လာကြပါတယ်” လို့ ကိုချမ်းဦးသာက ဆက်ပြောပါတယ်။

ရွှေဝါရောင်တော်လှန်ရေးအပြီး အောက်တိုဘာ ၉ ရက်မှာ စတင်ဖွဲစည်းခဲ့တဲ့ Generation Wave အဖွဲ့ဝင် ၁၅ ယောက်ခန့် ဖမ်းဆီးခံရပြီး နှစ်ရှည်ထောင်ဒဏ်များ ကျခံနေဆဲဖြစ်ပါတယ်။ ပြည်တွင်းမှာ အဖွဲ့ဝင်များ ဖမ်းဆီးခံရမှုကြောင့် အဖွဲ့ဝင်တချို့ ပြည်ပထွက် လှုပ်ရှားခဲ့ကြပါတယ်။

တည်ထောင်သူ အဖွဲ့ဝင်တဦးဖြစ်တဲ့ အဆိုတော်ဇေယျာသော် မနှစ်က ပြန်လည် လွတ်မြောက်လာပြီးနောက်ပိုင်း လှုပ်ရှားမှုများကို လူသိရှင်ကြား စတင်လုပ်ဆောင်လာတာ ဖြစ်ပါတယ်။

ကိုဆောင်း