ဒီနေ့ ကျရောက်တဲ့ နိုင်ငံတကာရွှေ့ပြောင်းအလုပ်သမားများနေ့ လမ်းလျှောက် ချီတက်ပွဲနဲ့ ဟောပြောပွဲတွေကို မြန်မာအလုပ်သမားတွေ သောင်းနဲ့ချီရှိတဲ့ ထိုင်း-မြန်မာနယ်စပ် မဲဆောက်မှာ ပြုလုပ်ခဲ့ကြပါတယ်။အလုပ်သမား ၅၀၀ နီးပါး တက်ရောက်ခဲ့တဲ့ဒီပွဲကို မြန်မာ အလုပ်သမားအရေး ဆောင်ရွက်နေကြတဲ့ မဲဆောက် အခြေစိုက် မြန်မာနဲ့ထိုင်း အဖွဲ့အစည်းတွေက ကျင်းပခဲ့ ကြတာပါ။
ပညာပေးဟောပြောပွဲ၊ ပျော်ပွဲရွှင်ပွဲ ကျင်းပတဲ့ မြူနီစပယ်အားကစားကွင်းမှာ မဲဆောက်မြို့နယ် အုပ်ချုပ်ရေးရုံးက လုံခြုံရေးဌာန တာဝန်ခံ Mr Akkaphan Phoonsri တက်ရောက် ဖွင့်လှစ်ပေးခဲ့ပါတယ်။
မဲဆောက်အပါအ၀င် တာ့ခ်ခရိုင် ၉ မြို့နယ်မှာ မြန်မာရွှေ့ပြောင်း အလုပ်သမား ၄ သိန်းနီးပါးရှိ တဲ့အထဲက ထက်ဝက် နီးပါးဟာ မဲဆောက်မြို့နယ်ထဲက စက်ရုံ အလုပ်ရုံနဲ့ စိုက်ပျိုးရေး လုပ်ငန်းခွင်ထဲမှာ ရှိနေကြပါတယ်။
မဲဆောက်ဒေသမှာ ထိုင်းအလုပ်သမားဝန် ကြီးဌာနက တရားဝင် သတ်မှတ်ပေးထားတဲ့ အနိမ့်ဆုံး တနေ့လုပ်အားခက ၁၆၂ ဘတ်ဖြစ်ပါတယ်။
ဒါပေမဲ့ လက်ရှိ လုပ်ငန်းခွင်ဝင်နေကြတဲ့ မြန်မာအလုပ်သမားတွေကို လုပ်ငန်းရှင်တွေပေးတာ က တနေ့ကို ဘတ် ၆၀ ကနေ ဘတ် ၁၀၀ အများဆုံးလို့ မဲဆောက်မှာအခြေ စိုက်ပြီး မြန်မာ အလုပ်သမား အရေး ဆောင်ရွက်နေတဲ့ ဦးမိုးကြိုးက ဧရာဝတီကို ပြောပါတယ်။
မဲဆောက်မှာ တရားဝင်အ လုပ်ရုံစက်ရုံ ၂၀၀ နီးပါး ရှိတဲ့အနက် နေ့စားလုပ်ခကို အစိုးရ သတ်မှတ်ထားတဲ့အတိုင်း ၁၆၂ ဘတ် အပြည့်အ၀ ပေးတာက - စက်ရုံ ၄ ခုပဲ ရှိတာပါ။
အဲဒီထဲမှာ တီကေဖက်ရှင်၊ တော့ဖောင်း အထည်ချုပ်စက်ရုံတို့ ပါပါတယ်။
မဲဆောက်မှာနိုင်ငံတကာရွှေ့ပြောင်းအလုပ်သမားနေ့အခမ်းအနားလုပ်လာတာ ဒီနှစ်ပါ ဆိုရင် ၈ ကြိမ်ရှိသွားပါပြီ။
ဒီနေ့ လမ်းလျှောက်ချီတက်ပွဲကို တက်ရောက်ခဲ့တဲ့ မယ်ပ အထည်ချုပ်စက်ရုံက မသန်းသန်းရီက -မြန်မာ အလုပ်သမားတွေက အလုပ်ရှင်တွေဆီကနေ လုပ်အားခ အပြည့်အ၀ နဲ့ တခြား အလုပ်သမား ခံစားခွင့်တွေ တောင်းဆိုနေပေမဲ့ ဒီနေ့အထိ ဘာမှ ထူးခြားလာတာ မရှိသေးဘူး။ မဲဆောက်က မြန်မာအ လုပ်သမားတွေရဲ့ ဘ၀က ဒုံရင်းပဲ လို့ ပြောပါတယ်။
ပုံစာ - မဲဆောက် နိုင်ငံတကာ ရွှေ့ပြောင်း အလုပ်သမားများနေ့ ဓာတ်ပုံများ။
ဓာတ်ပုံ - ဧရာဝတီ။
No comments:
Post a Comment