ရမည်းသင်းမြို့နယ် အတွင်းရှိ မိုးထိမိုးမိ ရွှေလုပ်ကွက်ဆန္ဒပြ အလုပ်သမားခေါင်းဆောင်တွေ နဲ့ ကုမ္ပဏီတာဝန်ရှိတဲ့ GM ဦးထွန်းအောင်စိုး ခေါင်းဆောင်တဲ့ ရှယ်ယာ မန်ဘာများက ညှိနှိုင်းမှုတွေ ပြုလုပ်ခဲ့ပေမယ့် ဒီနေ့မှာညှိနှိုင်းလို့ မရဘူးဖြစ်နေပါတယ်။
မန္တလေးတိုင်း၊ ရမည်းသင်းခရိုင်းအတွင်မှာ မိုးထိ မိုးမိဒေသမှာ ရှိတဲ့ ရွှေတူးလုပ်ငန်းကိုလုပ်ကိုင်နေတဲ့ အသေးစား တစ်ပိုင် တစ်နိုင် လုပ်ငန်းများ ကို နိုင်ငံတော်မှလေလံအောင်ထားတဲ့ အမျိုးသားကြီးပွားတိုးတက်ရေးအုပ်စု ကုမ္ပဏီက လုပ်ငန်းများကို ၅-၅-၂၀၁၂ နေ့ မှစတင်ရပ်ဆိုင်းခိုင်းတဲ့အတွက် လုပ်ငန်းများပြန်လည် လုပ်ကိုင်နိုင်ရန် ဆန္ဒပြ တောင်းဆိုမှုတွေ ပြုလုပ် နေ တာဖြစ်ပါတယ်။
အသေးစားရွှေတူးတဲ့ လုပ်ငန်းရှင်တွေအနေနဲ့ ၁၆-၉-၂၀၁၁ နေ့ကစတင်တာ အမျိုးသားကြီးပွားတိုးတက်ရေးအုပ်စု ကုမ္ပဏီ က အကျိုးတူ ပူးပေါင်းဆောင်ရွက်မယ်လို့ စတင်ဖိတ်ခေါ်ကာ အစိုးရဆီကနေ လေလံအောင်တဲ့ ဧက ၆၁၀၅ မှာ အကျိုးတူ ပူးပေါင်းဆောင်ရွက်ခဲ့တာဖြစ်ပါတယ်။
အကျိုးတူ ပူးပေါင်းဆောင်ရွက်တယ်ဆိုတာမှာ ကုမ္ပဏီက ငွေအင်အား၊ လူအင်အား၊ စက်ပစ္စည်းတစုံတစ်ရာ စိုက်ထုတ်ပေး တာ မဟုတ်ပဲ အသေးစာလုပ်ငန်းရှင်တွေအနေနဲ့ လုပ်ငန်းဖြစ်မြောက်ရေးအတွက် အားလုံး အရင်းအနှီး မတည်ကာ လုပ် ဆောင် လာခဲ့ရတာဖြစ်ပြီး၊ အခုလိုလုပ်ငန်းတွေ အောင်မြင်ခါနီး အချိန်မှာ (တစ်ချို့လုပ်ငန်းတွေအောင်မြင်နေ) အကြီးစား မိုင်းတွင်းတွေ ရွှေလုပ်ငန်းတွေ လုပ်မယ်ဆိုတဲ့ အကြောင်းပြချက်နဲ့ လုပ်ငန်းရှင်တွေကို လုပ်ငန်းတွေ ရပ်ဆိုင်းဖို့ အမိန့်ပေး တဲ့ အတွက် အခုလိုဆန္ဒပြကြတာပါ။
ဆန္ဒပြတဲ့နေရာမှာ ပါဝင်တဲ့ သူတွေကတော့ အသေးစား လုပ်ငန်ရှင်တွေ၊ မိုင်းတွင်းလုပ်သား (ဇုန် ၁၂ ဇုန်မှ) (ဒေသခေါ် အင်း လုပ်သားတွေ) နဲ့ ဒီဒေသမှာ ဈေးရောင်း၊ ဆိုင်ကယ်အငှားလိုက်နဲ့ အငှား အထမ်းသမား (အင်းတွေက ထွက်တဲ့ဗြုန်း အိတ် ထမ်း) တဲ့ လူတွေ၊ ပြီးတော့ရွှေကျင်တဲ့အမျိုးသမီးတွေနဲ့မိသားစုတွေပါဝင်နေတာဖြစ်ပါတယ်။
အကျိုးတူပူးပေါင်းဆောင်ရွက်မယ်လို့ စတင်ကာ ကုမ္ပဏီက ဖိတ်ခေါ်စဉ်က သူတို့ငါးနှစ် လေလံအောင်ထားတာ ခင်ဗျားတို့ နဲ့ ငါးနှစ်လက်တွဲသွားမယ်၊ နောက် ဒီထက်အဆင်ပြေရင် နောင်နှစ်ပေါင်းများစွာ လက်တွဲသွားမယ်လို့ မက်လုံး ပေးထားခဲ့ တာပါ။
အမျိုးသားကြီးပွားတိုးတက်ရေးကုမဏီက အစိုးရဆီကနေ ၅ နှစ်လေလံ မှာ ရွှေတန်ချိန် ၅ ဒသမ ၅၇၇ တန်ပေးဆောင်ရ မယ် ဆိုပြီးလေလံအောင်ခဲ့တာဖြစ်ပါတယ်။
အကျိုးတူပူးပေါင်းဆောင်ရွက်တဲ့ လုပ်ငန်းရှင်အသေးစားတွေကိုတော့ သူတို့ မိုင်း (ဒေသခေါ် အင်း၊ Adit) တွေကထွက် တဲ့ ဗြုန်း(ရွှေပါတဲ့ကျောက်) ကို တစ်ဝက်ခွဲပေးရတာပါ။
အခုလိုလုပ်ငန်းတွေကိုရပ်ဆိုင်းဖို့ ကုမဏီက အမိန့်ထုတ်ပြန်လိုက်တဲ့အတွက်ကြောင့် ဒီရွှေထွက်တဲ့ ဒေသကို မှိခို လုပ်ကိုင် စားသောက်နေတဲ့ မိုင်းလုပ်သားတွေရဲ့မိသားစု၊ ကျောင်းနေအရွယ်ခလေးငယ်တွေရဲ့ ဘ၀တွေဟာ မရေရာတဲ့ အနာဂါတ် တွေ၊ ရည်ရွယ်ချက်တွေ ပျောက်ဆုံး ကုန်တယ်လို့ ရွှေလုပ်ငန်းကို လုပ်ကိုင်နေတဲ့ မိုးထိမိုးမိ ဒေသက လူတွေ အားလုံးရဲ့ နှုတ်မှာ ကြားနေရပါတယ်။ အခုလုပ်ငန်းတွေ ရပ်ဆိုင်းနေတဲ့ အချိန်မှာလည်း သူတို့တွေရဲ့ စားဝတ်နေရေးတွေ ဒုက္ခရောက် နေကြပါတယ်။
ကုမဏီ က သတင်းဌာနတွေကို သတင်းစာရှင်းလင်းပွဲတစ်ခုပြုလုပ်ခဲ့ပါသေးတယ်။ အဲဒီရှင်းလင်းပွဲမှာတော့ ဒီလုပ်ငန်းတွေ ကို နားလိုက်ရတာဟာ ၀န်းကြီးဌာနရဲ့လမ်းညွှန်ချက်ကြောင့် ရပ်ဆိုင်းခဲ့ရတာဖြစ်ပြီး၊ နိုင်ငံတကာမိုင်း လုပ်ငန်းတွေလုပ်ကိုင် ဖို့ ရှိနေတာကြောင့် အခုလို ရပ်ဆိုင်းလိုက်ရတာဖြစ်တယ်လို့ ပြောကြားခဲ့ပါတယ်။
No comments:
Post a Comment