Pages

Saturday, September 1, 2012

ငြိမ်းချမ်းရေးကြောင့် ကားအစီးငါးရာ ဒုက္ခရောက်

.


ပြည်တော်မြင့် ~

ဒီမနက် တွေ့ရတဲ့ မြ၀တီမြို့တွင်းတနေရာ (ဓာတ်ပုံ- ဧရာဝတီ)

ဒီနေ့ ကရင်ပြည်နယ် မြ၀တီကနေတဆင့် အနယ်နယ်အရပ်ရပ်ကို ထွက်ခွာကြမဲ့ ခရီးသည်တင်ကားနဲ့ ကုန်တင်ကားကြီး အစီးရေ ၅၀၀ ကျော်လောက် မြ၀တီမြို့ထဲမှာ ၃ နာရီနီး ပါးပိတ်မိသွားပါတယ်။

မြန်မာအစိုးရနဲ့ငြိမ်းချမ်းရေးဆွေးနွေးဖို့ ဘားအံသွားမယ့် KNU အဖွဲ့ရဲ့ယာဉ်တန်းအတွက် ကားလမ်း ယာယီ ပိတ်လိုက်တာကြောင့် ကားတွေ ရာနဲ့ချီ အခုလို ဒုက္ခရောက်ရတာပါလို့ ကုန်တင်ကားမောင်းတဲ့လူတွေက ပြောပါတယ်။

၁၂ ဘီးကားမောင်းသူတဦးက “မြ၀တီအထွက်ဂိတ်ဖြစ်တဲ့ တံတားကျိုးဂိတ်ကိုပုံမှန် ၆ နာရီမှာဖွင့်တယ်။ ဒီနေ့ ကားအဆင်းနေ့မှာ KNU အဖွဲ့ ဘားအံသွားတဲ့ယာဉ်တန်း ရှိလို့ မနက် ၆ နာရီက ၉ နာရီအထိ ကားထွက်ဖို့ စောင့်ခဲ့ရတယ်။ အမှန်က ကျွန်တော်တို့ကားတွေကို ဂိတ်ဖွင့်ချိန်မှာ လွှတ်လိုက်ပြီး ၉ နာရီကျမှ ပြန်ပိတ်လိုက်လည်း ရတာပဲ။ အခုတော့ အားလုံး ဒုက္ခဖြစ်ကြရတယ်” လို့ ပြောပါတယ်။

မြ၀တီကအထွက် တောင်ပေါ်လမ်းဟာ ကား ၂စီး ရှောင်လို့မရလောက်အောင် ကျဉ်းမြောင်းပါတယ်။ ဒါကြောင့် ဒီနေ့လို "ကားအဆင်းနေ့တွေ"မှာ မြ၀တီကနေ ထွက်တဲ့ကားတွေပဲ ရှိပါတယ်။ မနက်ဖြန်လို "အတက်နေ့"တွေမှာတော့ မြ၀တီကိုလာမယ့်ကားတွေပဲ ရှိပါတယ်။

အတက်နေ့၊ အဆင်းနေ့ ဆိုပြီး ကန့်သတ် သွားလာနေရတဲ့ လမ်းရဲ့ အခြေအနေကလည်း ကျင်းတွေချိုင့်တွေနဲ့ပါ။

ကုန်သည်တဦးပြောတာက -
“ထိုင်းမှာဆိုရင် မြ၀တီ-ကော့ကရိတ်ခရီးမိုင် ၄၀ လောက် ဆိုရင် သူတို့ဆီမှာ အလွန်ဆုံး တနာရီပဲ။ ဒီမှာက ၃ နာရီလောက်အချိန်ကုန်တယ်။ နောက်ပြီး ဟုတ်တိပတိလမ်းပြင်တာ မရှိပေမဲ့ လမ်းကြေးကောက်တာကတော့ မတန်တဆပဲ။ ဒီလမ်းပိုင်းမှာတာဝန်ယူ ထားတဲ့ AK ကုမ္မဏီကတော့ ပိုက်ဆံပဲကောက်ပြီး လမ်းအပေါက်တွေကိုမြေကြီးနဲ့ပဲ လိုက်ဖာနေတော့ ဒီလမ်းကြောပြန်ကောင်းဖို့ ဆိုတာ မဖြစ်နိုင်တော့ဘူး”

VIP ယာဉ်တန်း ဆိုတာတွေကြောင့်လည်း အပြောင်းအလဲကြီးတွေ ဖြစ်ရပါတယ် တဲ့။

“ဒီလမ်းမှာ အဆိုးဆုံးပြဿနာက လူကြီးယာဉ်တန်း၊ VIP ယာဉ်တန်း လာပြီ ဆိုရင် ရှိသမျှကားတွေ အကုန်ရပ်ပဲ။ တချို့ဆိုရင်တောထဲမှာပဲ မကြာခဏညအိပ်ရတယ်” ဆိုပြီး အဲဒီကုန်သည်က ဆက်ပြီး ရင်ဖွင့်ပါတယ်။
ဒေသခံတွေပြောဆိုချက်အရ ဆိုရင် VIP ယာဉ်တန်းထဲ ပါဝင်တဲ့ ကားတွေဟာ အရေးပါသလို ဒီလမ်းမကြီးမှာ သွားလာနေတဲ့ ကားတွေကလည်း သူ့နည်းသူ့ဟန် အရေးကြီးနေကြတာပဲ မဟုတ်ပါလား။

မြ၀တီ-ကော့ကရိတ်လမ်းအကြောင်း ပြန်ဆက်ရမယ် ဆိုရင် ~
ထိုင်း-မြန်မာနယ်စပ်ရဲ့အဓိက နယ်စပ်ကုန်သွယ်ရေးလမ်းကြောဖြစ်တဲ့ မြ၀တီ-ကော့ကရိတ်လမ်းကြောကို အစိုးရက စနစ်တကျပြင်ပေးတာ တခါမှ မရှိသေးဘူးလို့လည်း ဒီလမ်းကြောမှာ ယာဉ်မောင်းသက်တမ်း ၂၀ ရှိပြီး ဖြစ်တဲ့ ဦးစိုးမောင်က ပြောပါတယ်။

ကုန်ဈေးနှုန်းတက်ရတဲ့အကြောင်းရင်းတခုထဲမှာ ဒီလမ်းအခြေအနေဆိုးချက်လည်း ပါဝင်တယ်လို့ ဆိုကြပါတယ်။

သစ်သီးကုန်သည်ဒေါ်လုံးက ထိုင်းကုန်တွေ အဆမတန် ဈေးတက်ခြင်းဟာ လမ်းခရီးကြမ်းတမ်းမှုကြောင့် ကုန်စည်စီးဆင်းမှုနှောင့်နှေးခြင်း၊ လမ်းခရီးမှာ အာဏာပိုင်များက စာရင်းမရှိ အင်းမရှိ ဂိတ်ကြေး နဲ့ လမ်းတံတားကြေးများကောက်ခံခြင်းတို့ကြောင့်ဖြစ်တယ်လို့ ပြောပါတယ်။


.

1 comment:

  1. ဟဟဟ
    ငြိမ်းချမ်းရေး
    ကရင်ပြည်နယ်သားတွေ ခံနေရတာကြာပြီး
    အဆန်းမဟုတ်ပါ
    လေးတန်းလောက် ပဲ တတ်တဲ့ တော်လှန်းရေးသမားတွေ
    စစ်သားသာ အတော်ဆုံးဆိုတဲ့ လူတွေ VIP ဖြစ်နေတယ်ဆိုတော့ ဒီလောက်တော့ရှိမှာပေါ့

    ReplyDelete