အစိုးရကို နိုင်ကျဉ်းအဖွဲ့တွေ ဝေဖန်ကန့်ကွက်

.


 အကျဉ်းသား ၂၇ ဦး နဲ့ ပတ်သက်ပြီး လွန်ခဲ့တဲ့ ရက်ပိုင်းအတွင်း ကြေးမုံ မြန်မာ့အလင်းပါ ထုတ်ပြန်ချက်ဟာ ယခင်အစိုးရရဲ့ ဥပဒေမဲ့လုပ်ရပ်တွေကို  ဆက်လက် အကာအကွယ်ပေးတဲ့သဘောဖြစ်နေကြောင်း
နိုင်ငံရေးအကျဉ်းသားအရေး ဆောင်ရွက်တဲ့ အဖွဲ့ ၂ ဖွဲ့က ပြောဆိုလိုက်ပါတယ်။

• အကျဉ်းထောင်အတွင်း သေဆုံးသူ နိုင်ငံရေးသမားတို့၏ ဓာတ်ပုံများ (Photo: Steve Tickner / The Irrawaddy)

မကြာသေးခင်က အစိုးရရဲ့ လွတ်ငြိမ်းချမ်းသာခွင့်မှာ မူးယစ်ဆေးဝါး နဲ့ ပတ်သက်ပြီး ထောင်ကျနေသူတွေ ပါဝင်နေတယ်လို့လည်း အဲဒီအဖွဲ့တွေက ဆိုပါတယ်။

ကန့်ကွက်နေတဲ့ကြားက လွှတ်ပေးလိုက်တာလို့ ဆိုတယ်။

အဖွဲ့ ၂ ဖွဲ့ရဲ့ ပူးတွဲ ထုတ်ပြန်ချက်ကို ဖော်ပြပေးလိုက်ပါတယ်။

• စည်သူလင်း

ဆက်စပ်သတင်းများ

      ILO ကို အီးမေးပို့တဲ့စစ်သား ထောင် ၁ဝ နှစ်ကျ 

http://blog.irrawaddy.org/2014/11/ilo.html

Remaining Political Prisoners Committed Other Crimes: Govt

http://www.irrawaddy.org/burma/remaining-political-prisoners-committed-crimes-govt.html

 နိုဝင်ဘာ ၁ ၊ ၂၀၁၄ နေ့စွဲဖြင့် အစိုးရထုတ်သတင်းစာများတွင် ပါရှိသည့် ‘နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)နှင့် နိုင်ငံရေးအကျဉ်းသားဟောင်းများအဖွဲ့ (FPPS) တို့၏ တင်ပြမှုအပေါ်စိစစ်ချက်အရ အခြားပြစ်မှုကျူးလွန်ခဲ့သူ ပြစ်ဒဏ်ကျခံဆဲ (၂၇)ဦး အမည်စာရင်း ‘ ထုတ်ပြန်ချက်အပေါ် သဘောထားကြေညာချက်
နေ့စွဲ။  ။နိုဝင်ဘာ ၃၊ ၂၀၁၄။

        နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP) နှင့် နိုင်ငံရေး အကျဉ်းသားဟောင်း များအဖွဲ့(FPPS) တို့သည် စတင်တည်ထောင်ချိန်မှစ၍ နိုင်ငံရေးအကျဉ်းသား တစ်ဦးချင်းစီ၏ အမှုဖြစ်စဉ်များ၊ အမှုတွဲဖိုင်များ၊ စီရင်ချက်များကိုရနိုင်သမျှလေ့လာစစ်ဆေးသုံးသပ်ပြီး၊ မိမိတို့ဖွင့်ဆိုထားသည့် နိုင်ငံရေးအကျဉ်း သား အဓိပ္ပါယ်ဖွင့်ဆိုချက်နှင့်အညီ နိုင်ငံရေး အကျဉ်းသားစာရင်းကို ပြုစုခဲ့ခြင်းဖြစ်သည်။
    
  လွတ်လပ်မျှတစွာ တရားစီရင်ခံရခြင်းရှိ မရှိ၊ ဥပဒေနှင့်အညီ မိမိကိုယ်ကိုယ် ခုခံကာကွယ်ပိုင်ခွင့်ရှိ မရှိ၊၄င်းတို့အပေါ်စွဲဆိုထားသည့်ရာဇဝတ်ပုဒ်မများအား အမှန်တကယ် ကျူးလွန်ခဲ့ခြင်းရှိ မရှိ ကိုလည်း ရနိုင်သမျှ လေ့လာစစ်ဆေးခဲ့ပြီးဖြစ်သည်။
 ထိုသို့ပြုစုထားသည့်စာရင်းအတိုင်း နိုင်ငံရေးအကျဉ်းသားများ အားလုံးအားခြွင်း ချက်  မရှိလွှတ်ပေးရန်လည်း အကြိမ်ကြိမ် တောင်းဆိုတင်ပြခဲ့ပါသည်။
     
        အစိုးရသတင်းစာများတွင်ပါရှိသည့်ထုတ်ပြန်ချက်သည်အမျိုးသားပြန်လည်သင့်မြတ်ရေးကို ရှေးရှု သည့်အပြု သဘောထုတ်ပြန်ချက် မဟုတ်ကြောင်း အထင်အရှားတွေ့ရှိရသည်။
ထို့အပြင်ယခင်စစ်အစိုးရလက် ထက်က ဥပဒေမဲ့ လက်လွတ်စပယ်ဖမ်းဆီး၍ အဆမတန်ကြီးလေးသည့်ပြစ်ဒဏ်များချမှတ်ခဲ့သည်ကို သိလျက်နှင့် တမင်ဆက်လက်အကာအကွယ်ပေးနေသည့် လုပ်ရပ်တစ်ခုဖြစ်သည်။
 
     နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP)နှင့် နိုင်ငံရေးအကျဉ်းသားဟောင်း များအဖွဲ့(FPPS)တို့ အနေဖြင့်နိုင်ငံရေး အကျဉ်းသားများ လွတ်မြောက်ရေး အတွက် စဉ်ဆက်မပြတ်ကြိုး စားဆောင် ရွက်လျှက်ရှိရာ(၂၀၁၃)ခုနှစ်၊ဖေဖေါ်ဝါရီလတွင် နိုင်ငံတော်သမ္မတမှဖွဲ့စည်းပေးခဲ့သော လက်ကျန်နိုင်ငံရေးအကျဉ်း သား စိစစ်ရေးကော်မတီတွင်အခြားသော ကော်မတီဝင်များနှင့်အတူ အပြုသဘောဆောင်၍ တက်ကြွစွာ ပူးပေါင်း ပါဝင်ဆောင်ရွက်ခဲ့ပါသည်။
သို့ရာတွင်အစိုးရဘက်မှ အပြည့်အဝပူးပေါင်းဆောင်ရွက်ခြင်း မရှိသည်ကို တွေ့ရှိသည်။
 
     ကော်မတီ၏ထောက်ခံတင်ပြချက်ဖြင့် နိုင်ငံရေးအကျဉ်းသား(၃၀၀)ကျော်လွတ်မြောက်လာမှု အပေါ် တွင် မိမိတို့အနေဖြင့် ကြိုဆိုခဲ့ပါသည်။
သို့သော်လည်း မိမိတို့တင်ပြထားသည့် လက်ကျန်နိုင်ငံရေးအကျဉ်းသား (၃၀) ဦးအနက် (၃) ဦးမှာ လွတ်မြောက်ခဲ့ပြီး (၂၇) ဦး ကျန်ရှိနေသေးသည်ကို တွေ့ရပါသည်။
ထို့ကြောင့် ကျန်ရှိနေသော နိုင်ငံရေးအကျဉ်းသား (၂၇) ဦးအား ပြန်လည်စိစစ်၍ လွှတ်ပေးပါရန် ထပ်မံတင်ပြခဲ့ပါသည်။
အစိုးရမှ ကျန်ရှိနေသည့် (၂၇) ဦးမှာ နိုင်ငံရေးလှုပ်ရှားမှုနှင့်ပတ်သက်၍ ပြစ်ဒဏ်များကို ပယ်ဖျက်ခဲ့ပြီး ဖြစ်ကြောင်းနှင့် လက်ကျန်ပြစ်ဒဏ်များသည် သက်ဆိုင်ရာ တရားရုံးများ၏ ပြစ်ဒဏ်ချမှတ်မှုအတိုင်းသာ ဖြစ်သည်ဟု အစိုးရပိုင်သတင်းစာများတွင် ထုတ်ပြန်ကြေညာခဲ့ပါသည်။
   
   မိမိတို့အနေဖြင့် ထိုသူများသည် အခြားပြစ်မှုများကို အမှန်တကယ်ကျူးလွန်ခြင်း ရှိ၊ မရှိဆိုသည်ကို ပြန်လည်စိစစ်ပေးသင့်ကြောင်းကို ကော်မတီထံ တင်ပြခဲ့သလို အခြားပြစ်ဒဏ်များသည်လည်း
 နိုင်ငံရေးအရ ဆက်စပ်၍ စွပ်စွဲခံထားရခြင်း၊ ကြီးလေးသော ပြစ်ဒဏ်များကို ချမှတ်ထားခံရခြင်း၊ အမှန်တကယ် မကျူးလွန်သော ပြစ်မှုများ ရှိနေခြင်း၊ လွတ်လပ်မျှတစွာ တရားစီရင်ခံရမှု မရှိခြင်း စသည်တို့ကို လေ့လာ တွေ့ရှိခဲ့ပါသည်။
ထို့အပြင်အချို့သည် အပစ်အခတ်ရပ်စဲရေး သဘောတူလက်မှတ်ရေးထိုးပြီး ငြိမ်းချမ်းရေးအတွက် အစိုးရနှင့် ဆွေးနွေးနေသော အဖွဲ့အစည်းများမှ အဖွဲ့ဝင်များဖြစ်သည်ကို တွေ့ရှိရသည်။
   
   လက်ကျန်နိုင်ငံရေးအကျဉ်းသား စိစစ်ရေးကော်မတီတွင်လည်း နိုင်ငံရေးအကျဉ်းသားကိုစိစစ်ရန်အတွက် အဓိပ္ပာယ်ဖွင့်ဆိုရာတွင် နိုင်ငံရေးနှင့် ဆက်စပ်၍ ပြစ်ဒဏ်ခံနေရသူများကို သတ်မှတ်ရန်ပြောဆိုခဲ့သော ကြောင့် မိမိတို့အနေဖြင့် ထိုအဓိပ္ပါယ်နှင့် ကိုက်ညီသောသူများကိုသာ စိစစ်၍ တင်ပြခဲ့ခြင်းဖြစ်သည်။
 
     လက်ကျန်နိုင်ငံရေးအကျဉ်းသားစိစစ်ရေးကော်မတီမှ သမ္မတထံသို့တင်ပြခဲ့သော နိုင်ငံရေးအကျဉ်းသား စာရင်းများတွင် မိမိတို့သတ်မှတ်ထားသော နိုင်ငံရေး အကျဉ်းသားစာရင်းများထဲတွင် မပါဝင်ဘဲ မူးယစ်ဆေးဝါး နှင့်ပတ်သက်၍ ပြစ်ဒဏ်ကျခံနေရသူများကို မိမိတို့ ကန့်ကွက်နေသည့်ကြားမှ ထည့်သွင်းလွှတ်ပေးခဲ့သည်ကို တွေ့ ရှိရသည်။
 
     အစိုးရသတင်းစာပါထုတ်ပြန်ချက်သည် မိမိတို့ နှစ်ဖွဲ့ကိုသာ ဦးတည်ထားသည်ကို တွေ့ရှိ ရသည်။
ဤသည်မှာ အစိုးရဘက်မှ မိမိတို့နှစ်ဖွဲ့၏ လုပ်ဆောင်ချက်များအပေါ် မနှစ်သက်မလိုလားသည့် သဘောဟု ယူဆသည်။
 
    မိမိတို့အနေဖြင့်အဂတိတရားကင်းစွာဖြင့် ရနိုင်သမျှ သတင်းအချက်အလက်များကို အမှားအနည်းဆုံး ဖြစ်စေရန် နိုင်ငံရေးအကျဉ်းသားစာရင်းကို ပြုစုခဲ့ခြင်းဖြစ်ပြီး အစိုးရသတင်းစာ၏ ထုတ်ပြန်ချက်ပါ(၂၇)ဦးအားလည်း နိုင်ငံရေးအကျဉ်းသားများအဖြစ် ဆက်လက်အတည်ပြုသွားမည်ဖြစ်ကြောင်း ထုတ်ပြန်ကြေညာလိုက်သည်။
   
         ၎င်းတို့အား နိုင်ငံရေး အကျဉ်းသားများအဖြစ်အသိအမှတ်ပြုပြီး အမြန်ဆုံး လွှတ်ပေးရန်လည်း ထပ်မံ၍ အလေးအနက် တောင်းဆိုလိုက်သည်။

 လုပ်ငန်းကော်မတီဝင်များ၏ နိုဝင်ဘာ ၂ရက်၊၂၀၁၄ ခုနှစ် အစည်းအဝေးဆုံးဖြတ်ချက်အရ-
-နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)။
-နိုင်ငံရေးအကျဉ်းသားဟောင်းများအဖွဲ့ (FPPS) ။

ဆက်သွယ်ရန်-

ကိုတိတ်နိုင် (AAPP) ဖုန်း။      ။+၆၆-၀၈၁၂၈၇၈၇၅၁၊
ကိုဘိုကြည် (AAPP) ဖုန်း။        ။၀၉-၄၂၅၃၀၈၈၄၀၊
ကိုရဲအောင် (FPPS) ဖုန်း။                ။၀၉-၄၉၅၉၀၄၉၅၊