ရုပ်ရှင်မင်းသားတယောက်အနေနဲ့လည်း အောင်မြင်ချင်ပါတယ်

သရုပ်ဆောင် အဆိုတော် စိုင်းစိုင်းခမ်းလှိုင် (ဓာတ်ပုံ-ယုမွန်ကျော်/The Irrawaddy)

သရုပ်ဆောင်လောကမှာရော အဆိုလောကမှာပါ ပရိတ်သတ်ရဲ့အားပေးမှုတွေကို အခိုင်အမာရရှိလာနေတဲ့ တနည်းအားဖြင့် သရုပ်ဆောင်အဆိုတော် တောင်ကြီးသားလေးတဦးကို သိကြမယ် ထင်ပါတယ်။ သူ   ကတော့ စိုင်းစိုင်းခမ်းလှိုင် ပါ။ သူအခုလို အောင်မြင်တဲ့အနုပညာရှင်တဦးဖြစ်လာဖို့ကို ကြိုးပမ်းရုန်းကန်ခဲ့ရတာလည်း မနည်းမနှောပါပဲ။ သရုပ်ဆောင်ထက် စီးရီးခွေထုတ်ပြီး သီဆိုတဲ့အခါကျမှ ပရိသတ် လက်ခံအားပေးမှု အများကြီး ရလာခဲ့တဲ့သူ၊ သရုပ်ဆောင်ဘက်မှာ ထိပ်ဆုံးရောက်အောင် အောင်မြင်မှု မရှိခဲ့ပေမယ့် ဂီတဘက်ကို ဖန်တီးမှု ပြုလုပ်တဲ့အခါမှာတော့ အောင်မြင်မှုတခုကို ရလာခဲ့တဲ့သူ ချောကလက်ရောင် ရေခဲမြစ် တေးစီးရီးကစလို့ အခုနောက်ဆုံးထွက်ရှိခဲ့တဲ့ ဒိတ်ဒိတ်ကြဲ တေးစီးရီးထိ သူရဲ့ အောင်မြင်မှုကို တားဆီးထားလို့ မရဘူးဆိုတာ သက်သေပြနိုင်ထားတဲ့ သူတယောက်လည်းဖြစ်ပါတယ်။ ကဲ .. အဆိုတော် သရုပ်ဆောင် စိုင်းစိုင်းခမ်းလှိုင်ရဲ့လက်ရှိ သူ လှုပ်ရှားဖြစ်နေတဲ့ အနုပညာတွေအကြောင်းနဲ့ပတ်သက်လို့ ဧရာဝတီသတင်းထောက် ယုမွန်ကျော်က မေးမြန်းဖြစ်ထားတဲ့ အမေးအဖြေ အနည်းငယ်ကို ကောက်နှုတ်ဖော်ပြပေးလိုက်ပါတယ်။

မေး ပရိသတ်အားပေးမှုအများကြီး ရခဲ့တဲ့ ဒိတ်ဒိတ်ကြဲ တေးစီးရီးထွက်ပြီးနောက်ပိုင်း ဂီတနဲ့ပတ်သတ်လို့ သီချင်းတွေ ထွက်တာ သိပ်မတွေ့ရတော့ဘူး။ နောက်ထပ်လုပ်မယ့် သီချင်းတွေက ဒိတ်ဒိတ်ကြဲရဲ့ Quality ကို မမီမှာဆိုတဲ့ စိုးရိမ်မှုရှိလို့လား။

ဖြေ အရိုးသားဆုံးဝန်ခံရရင်တော့ ကျနော် ဒိတ်ဒိတ်ကြဲအခွေ ထွက်ပြီးတဲ့နောက်မှာ ရုပ်ရှင်ရိုက်လိုက်တာ ကျနော် အခု ရုံမတင်ရသေးတာတွေရောနဲ့ဆိုရင် ခြောက်ကားလောက်ရှိတယ်။ အခုလာမယ့် ဇန်န၀ါရီ ၂၀၁၆ခုနှစ်မှာ ကျနော်ရဲ့ ရုပ်ရှင်ကားကြီးတကား ပထမဦးဆုံးတင်ပါမယ်။ သီချင်းကတော့ ရေးတော့ရေးဖြစ်ပါတယ်။ ဒါပေမယ့် ရုပ်ရှင်တွေ တောက်လျောက်ရိုက်နေတဲ့အတွက် သီချင်းဘက်မှာခါတိုင်းထက် အားနည်းသွားပါတယ်။ ဒါကြောင့် အခု ၂၀၁၅ခုနှစ် နှစ်ကုန်ပိုင်းကစပြီး လုံးဝကားတွေမရိုက်တော့ဘဲ သီချင်းတွေပဲ လုပ်နေပါတယ်။

မေး သရုပ်ဆောင်မှုအပိုင်းမှာဆိုရင် ကိုစိုင်းစိုင်းကို အရင်ကထက် ပရိသတ်လက်ခံလာကြတယ်။ ဥပမာ ကျူးပစ်ရဲ့ ကျေးကျွန်များ ရုပ်ရှင်ကားကြီးမှာ ဆိုရင် သရုပ်ဆောင်တာ ကောင်းတယ်လို့ လက်ခံလာကြတယ်။ ကိုယ်ကိုကိုယ့်အနေနဲ့ဆိုရင်ရော သရုပ်ဆောင်တဲ့အပိုင်းမှာ ဘယ်လိုများ သုံးသပ်မိနေပါလဲ။

ဖြေ ပြောရရင်တော့ ခုချိန်ထိ ကိုယ့်ကားကိုယ် ပြန်ကြည့်လိုက်ရင်တော့ အမှားတွေ အများကြီးပဲ ၊ အိုက်တင်နဲ့ ပတ်သတ်တဲ့ အမှားတချို့ပေါ့လေ။ အဲဒါတွေ ကျနော်ပြန်တွေ့တယ်။ လိုနေပါသေးတယ်။ ပရိသတ်ကတော့ ကျနော်ကို ချစ်ခြင်းမေတ္တာနဲ့ လက်ခံအားပေးတယ်။ ပြီးတော့ ဇာတ်လမ်းကရော ဒါရိုက်တာကရော တင်ပြမှုကောင်းနေတဲ့ အချိန်မှာ ကျနော်ရဲ့ ဇာတ်ကောင်စရိုက်ကလည်း ဇာတ်ကားထဲမှာ မျောပါနေပြီးတော့ ပရိသတ် ကြည့်လို့ရှု့လို့အဆင်ပြေတယ်။ အဲဒီထက်ပိုပြီးတော့ ကျနော်ကိုယ်ကျနော် ပိုပြီလို့သုံးသပ်လို့မရသေးဘူး။ နောက်ကားတွေလည်း စောင့်ကြည့်ပြီး ကျနော်ကို အကဲဖြတ်ပေးပါဦး။ ကျနော်ကိုယ်တိုင်လည်း နောက်ကားတွေမှာ ကိုယ်ကိုကိုယ်ဘယ်လိုထပ်ထွက်လာမလဲလို့ ရင်ခုန်မျှော်နေတယ်။ သေချာတာကတော့ ကျနော် စိတ်ရောကိုယ်ရောနှစ်ပြီးတော့ ကြိုးစားထားပါတယ်။ ကျနော်အောင်မြင်ချင်ပါတယ် ရုပ်ရှင်မင်းသားတယောက်အနေနဲ့လဲ။

       သရုပ်ဆောင် အဆိုတော် စိုင်းစိုင်းခမ်းလှိုင်ရဲ့ အနုပညာလမ်းကြောင်းခရီးနဲ့ ပတ်သက်လို့ သူ့  ဘာတွေလုပ်နေလဲ ဘာတွေ လုပ်ဖြစ်သွားဦးမလဲ သူ့ရဲ့ အနုပညာဘ၀ကို သူ့ကိုယ်သူ ဘယ်လို သုံး   သပ်ဝေဖန်ထားလဲ သူဘာကြောင့်လူပျိုကြီးဖြစ်နေသလဲဆိုတာတွေကို ဧရာဝတီက နောက်ထပ်ဖော်ပြပေးသွားပါဦးမယ်။ 


ယုမွန်ကျော်