သန္ဓေဆောင်ကာလ ၀မ်းကြာတိုက်အလွန်

photo: www.health.indiamart.com

"---ကိုယ်ဝန်ဆောင်ထားချိန်မှာ ရိုးစင်းတဲ့ အပြောင်းအလဲကလေးတွေ လုပ်aပးလိုက်ရင် မွေးလာမယ့်ကလေးမှာ ဆီးချိုဖြစ်နိုင်ခြေ လျော့သွားမယ်---"

ကျွန်ုပ်တို့ဘဝကို ဤသို့ဖြစ်လာစေရန် မည်သည့် အရာက စေစားပါသနည်း။ အချို့သူတို့သည် ဘာကြောင့် စိုးရိမ်သောက များကြပါသနည်း။ အဝလွန်ကြပါသနည်း။ ပန်းနာရင်ကျပ်ဖြစ်ကြပါသနည်း။ အချို့သူတို့သည် ဘာကြောင့် နှလုံးရောဂါ၊ ဆီးချိုရောဂါဖြစ်လွယ်ကြပါသနည်း။

သန္ဓေတည်စဉ်က ဆက်ခံရရှိသော မျိုးဗီဇအရ၊ ကလေးငယ်ဘဝတွင် ဖြတ်သန်းတွေ့ထိခဲ့ရသော ပတ်ဝန်းကျင်အရ၊ အတွေ့အကြုံအရ၊ အထူးသဖြင့် ပထမ သုံးနှစ်အရွယ် ဘဝအခြေအနေများအရ လူကြီးဘဝတွင် စားသောက်မှု၊ ကျန်းမာရေးလေ့ ကျင့်ခန်းပြုလုပ်မှုစသော ကျွန်ုပ်တို့ ရွေးချယ်သော ကျင့်သုံးသော လူမှုဘဝပုံစံအရ ကျွန်ုပ်တို့ဘဝ သည် ဖြစ်ပေါ်လာရပေသည်။

ဤအချက်များအပြင် ကျွန်ုပ်တို့ဘဝကို ထုဆစ်ပုံ ဖော်ပေးသော၊ သင် မထင်မှတ်ထားသော အခြား အကြောင်းတရား များရှိနေသေးပေသည်။ သန္ဓေသား ဘဝပင်ဖြစ်ပါသည်။ အမိဝမ်းတွင်းရှိနေစဉ် ရရှိသော အစားအစာ၊ ညစ်ညမ်း အဆိပ်သင့် မှု၊ ဆေးဝါးစားသုံးမှုနှင့် ရောဂါကပ်ငြိမှုများ၊ မိခင်၏ ကိုယ်ဝန်ဆောင်ထားစဉ် ကျန်းမာမှု၊ ရောဂါစွဲကပ်မှု၊ စိတ်ဖိအားနှင့် စိတ်ဓာတ် အခြေအနေ၊ ဤအချက်များအားလုံးသည် မွေးဖွားလာ မည့် ကလေးဘဝကို လူငယ်ဘဝကို ယနေ့အထိ ဘဝကို ပုံဖော်ပေးပေသည်။

သုတေသီတို့က ကိုယ်ဝန်ဆောင်နေစဉ် ကိုးလ တည်းဟူသော ပဋိသန္ဓေကာလသည် ကျွန်ုပ်တို့၏ဘဝကို ပုံဖော်ပေးသောကာလ၊ ဦးနှောက်ဆက်ကြောင်းများ တည်ဆောက်မှုအပေါ်၊ နှလုံး၊ အသည်း၊ ပန်ကရိယတို့အလုပ် လုပ်မှုအပေါ် လွှမ်းမိုးစေသော အရေးအကြီးဆုံးကာလ ဟုယူဆကြသည်။ သန္ဓေသားဘဝတွင် ရင်ဆိုင်ကြုံ တွေ့ရသော အခြေအနေများသည် ကျွန်ုပ်တို့၏ ရောဂါ ကူးစက်လွယ်မှု၊ ခန္ဓာကိုယ်အတွင်း ဇီဝဓာတုဖြစ်စဉ်၊

နှစ်ခြိုက်မှု၊ မှတ်ဥာဏ်နှင့် စိတ်ခံစားတတ်မှုတို့ကို ပုံဖော်ထု ဆစ်ပေသည်။ လွန်ခဲ့သောဆယ်နှစ်အတွင်း စမ်းသပ်တွေ့ရှိမှုများတွင် ကင်ဆာရောဂါ၊ နှလုံးသွေးကြောဆိုင်ရာရောဂါ၊ ဓာတ်မတည့်ခြင်း၊ ပန်းနာ ရင်ကျပ်ဖြစ်ခြင်း၊ သွေးတိုးခြင်း၊ ဆီး ချိုခြင်း၊ အဝလွန်ခြင်း၊ စိတ်ရောဂါ ဖြစ်ခြင်းနှင့် အသက်ကြီးခြင်းနှင့် ဆိုင်သော အဆစ်ရောင်ခြင်း၊ အရိုးပွ ခြင်းနှင့် မှတ်ဥာဏ်ဆိုင်ရာ ဆုတ်ယုတ်ခြင်းတို့သည် သန္ဓေသားဘဝ နှင့်ဆက်စပ်မှုရှိကြောင်း ဖော်ပြခဲ့ ကြသည်။

သန္ဓေသားသည် ဤကိုယ်ဝန်ဆောင်ဘဝအခြေအနေများကို ပတ်ဝန်းကျင်လောက၏ သတင်း အချက် အလက်များ၊ ပြင်ပလောက၏ ပုံရိပ်များအဖြစ် လက်ခံမှတ်ယူထားသည်။ မိခင်ဝမ်းတွင်း သန္ဓေသား ဘဝတွင် လက်ခံ မှတ်ယူထားမှုများ သည် ကြည်နူးဖွယ် ဂီတသံစဉ်များ မဟုတ်ပေ။ အသက်ရှင်နေနိုင်ရေးအတွက် အရေးကြီးလှသော ဘဝအဖြေ များဖြစ်သည်။ သူသည် ကြွယ်ဝစွာ မွေးဖွားလာမည်လား။ ချို့တဲ့စွာ မွေးဖွားလာမည်လား။ လုံခြုံဘေးကင်းစွာ မွေးဖွားလာမည်လား။ အန္တရာယ် ကြားတွင် မွေးဖွားလာမည်လား။ အသက်ရှည်ကျန်းမာစွာနေထိုင်ရမည်လား။ ရောဂါထူပြောလျက် အသက် တိုရမည်လား။

သန္ဓေသားဘဝ သုတေသနများသည် ကျန်းမာမှုနှင့် ရောဂါဘယဖြစ်မှုတို့ မည်သို့စတင်ခဲ့သည်၊ လူ့ အရည် အသွေးများသည် မည်သည့်အချိန်တွင် စတင်ဖွံ့ဖြိုးလာသည်ကို အတွေးဟောင်းများကို တော်လှန်၍ ထုတ်ဖော် ပေးလျက်ရှိသည်။ ကိုယ်ဝန်ဆောင် ဘဝကို သိပ္ပံပညာ၏ ရှေ့တန်းသို့ ပို့ပေးခဲ့သည်။ အမေရိကန် ပြည်ထောင်စု အမျိုးသား ကျန်းမာရေး သိပ္ပံ - National Institutes of Health-NIH သည် ဆယ်စုနှစ် များစွာကြာမည့် မမွေးဖွားမီကာလ သုတေသနကို လုပ်ဆောင်လျက်ရှိသည်။ ဤအခြေအနေများသည် ဇီဝဗေဒ၏ ပြင်ပနယ်ပယ်မှ ပုဂ္ဂိုလ်များ၏ အတွေးအယူများကိုလည်း ပြောင်းလဲစေခဲ့သည်။ စီးပွားရေး ပညာဖြင့် နိုဘယ်ဆုရ - Amartya Sen သည် သူငယ်ချင်း တစ် ယောက်နှင့်ပူးတွဲ၍ လူထု၏ကျန်းမာရေးနှင့် ကုန်ထုတ်စွမ်းအားအတွက် သန္ဓေသားဘဝ၏ အရေးကြီးပုံအကြောင်းကို စာအုပ်ရေးသားခဲ့သည်။ ဆင်းရဲချို့တဲ့သော ကိုယ်ဝန်ဆောင်ဘဝ အတွေ့အကြုံများ သည် အသက်ကြီးလာသောအခါ ရောဂါမျိုးစုံ ဖြစ်ရမှုမျိုးစေ့ကို ချပေးခဲ့သည်ဟု သူက ရေးသားခဲ့သည်။ ရောဂါမျိုးစုံမှ ကာကွယ်ရေး၊ ပြည်သူ့ဘဝ ကျန်းမာရေး နှင့် အဝလွန်ခြင်း၊ နှလုံးရောဂါ ဖြစ်ခြင်းတို့မှ ကာကွယ်နိုင် ရန်အတွက် မမွေးဖွားမီကိုယ် ဝန်ဆောင်ဘဝကပင် စတင်စောင့်ရှောက်ရမည်ဟု ရေးသားခဲ့သည်။

လွန်ခဲ့သော နှစ်နှစ်ဆယ်ခန့်က ဗြိတိသျှသမားတော် ဒေးဗစ်ဘတ်ကာ David Barker သည် ဗြိတိန်နိုင်ငံ၏ ဆင်းရဲသော ဒေသများတွင် နှလုံး ရောဂါဖြစ်ပွားမှုများနေသည်ကို သတိပြုမိခဲ့သည်။ နှလုံးရောဂါသည် အထိုင်များသော၊ လှုပ်ရှားမှုနည်းသော ချမ်းသာသူများသာ ဖြစ်လေ့ရှိရာ ဆင်းရဲသော ရပ်ကွက်တွင် အဖြစ် များနေမှုအတွက် အံ့အားသင့်ခဲ့ရ သည်။ သူသည် နှလုံးရောဂါဖြစ်သူ များကို မွေးဖွားစ အခြေအနေအထိ ပြန်လှန်လေ့လာခဲ့သည်။ နှလုံးရောဂါ ဖြစ်သူများသည် ကိုယ်ဝန်ဆောင်စဉ် က အာဟာရ ချို့တဲ့မှုကို ပြသသည့် မွေးစက ကိုယ်အလေးချိန်မပြည့်သူ များဖြစ်နေသည်ကို တွေ့ရှိခဲ့ရသည်။ အာဟာရ ပြည့်ဝစွာ မရသော သန္ဓေသားသည် ရသမျှ အာဟာရကို ဦး နှောက်သို့ ဦးစားပေး၍ ပေးပို့ခဲ့ရရာ အခြားအစိတ်အပိုင်းတို့သည် အာဟာရ မပြည့်မဝဖြစ်ခဲ့ရသည်။ သို့ဖြင့် ကာလကြာသော် အားနည်းနေသော နှလုံးသားဖြစ်လာရသည်။ Barker သည် သူ့တွေ့ရှိချက်များကို သူငယ်ချင်းများအား ပြောပြသောအခါ နှလုံး ရောဂါဟူသည် မျိုးဗီဇနှင့် သက်ကြီး ဘဝ လူနေမှုပုံစံအရသာ ဖြစ်ပွားရသည်ဟုဆိုကာ သရော်ခဲ့ကြသည်။

Barker သည် ယခု အသက် ၇၂ နှစ်ရှိပြီဖြစ်ပြီး ဗြိတိန်နိုင်ငံ၊ ဆောက်သမ်တန် တက္ကသိုလ်နှင့် သြရီဂွန် ကျန်းမာရေးနှင့် သိပ္ပံတက္ကသိုလ်တို့ တွင် ပါမောက္ခတာဝန် ထမ်းဆောင်လျက်ရှိသည်။ Barker သည် ထောင် ပေါင်းများစွာသော နှလုံးရောဂါနှင့် မွေးဖွားစ ကိုယ်အလေးချိန် လျော့ နည်းမှု ဆက်စပ်နေပုံသာဓကတို့ဖြင့် သူ၏ တွေ့ရှိချက်ကို ဆုပ်ကိုင်ထားခဲ့သည်။ နှစ်များစွာ ကြာမြင့်အောင်ပင် Barker Hypothesis ဟု လူသိများခဲ့သည်။

"---ကိုယ်ဝန်ဆောင်စဉ်က ကိုယ်အလေးချိန် အတိုးလွန်သူတို့၏ ကလေးများသည် ကိုယ်ဝန်ဆောင်စဉ် သာမန်မျှသာ ကိုယ်အလေးချိန်တိုးသူတို့၏ ကလေးများထက်ပို၍ အဝလွန်လာနိုင်ကြောင်း တွေ့ရှိခဲ့သည်---"

အချိန်ကြာလာသည်နှင့်အမျှ အယူအဆတို့သည် ပြောင်းလဲလာသည်။ ဘော့စတွန်ရှိ ဘရစ်ဟမ်နှင့် အမျိုးသမီးဆေးရုံ- Brigham and Women's Hospital မှ ကပ်ရောဂါ ဗေဒပညာရှင် Janet Rich Edwards သည် Barker ၏အယူအဆကို ချေဖျက်နိုင်ရန် ပြင်း ပြင်းထန်ထန် ကြိုးပမ်းခဲ့သည်။ Janet က သင်ရဲ့ ပစ္စက္ခစွန့်စားရတဲ့ အခြေအနေတွေက သင့်ကိုရောဂါ ဖြစ်စေတာပါ။ သန္ဓေသားဘဝက ဖြစ်ပျက်မှုတွေကြောင့် မဟုတ်ပါဟု ပြောခဲ့သည်။ Janet သည် သူနာပြု ၁၂ဝဝဝဝ ကို အခြေခံသော သူနာပြုများ၏ ကျန်းမာရေး လေ့လာမှုစစ်တမ်းကို ဆန်းစစ်ခဲ့သည်။ သူနာပြုတို့၏ အရွယ်ရောက် ဘဝလူမှုနေထိုင် မှုပုံစံ၊ လူမှုစီးပွားရေး အခြေအနေများကို လေ့လာ သုံးသပ်ခဲ့ရာ မွေးကင်းစ ကိုယ်အလေးချိန်နည်းမှုနှင့် နှလုံးရောဂါ ဆက်စပ်မှုသည် ပို၍ပင် ခိုင်မာလာခဲ့သည်။ သူမသည် ဆန်းစစ်မှုများကို အကြိမ် ၂ဝ ကျော် ပြုလုပ်ခဲ့ရာ Barker အယူအဆ သည် ပြည်သူ့ ကျန်းမာရေးအတွက် အရေးကြီးသော အချက်ဖြစ်ကြောင်း ထပ်မံတွေ့ရှိခဲ့ပေသည်။

အမေရိကန်တို့သည် ပို၍ ခန္ဓာကိုယ်ကြီးထွားလာ ကြသည်။ သူတို့၏ကိုယ်အလေးချိန်တိုးမှုသည် ငယ်စဉ်ကပင် စတင်ခဲ့သည်။ ဟားဘတ်ဆေးတက္ကသိုလ်ကပြုလုပ်ခဲ့သော သုတေသနတစ်ရပ်တွင် မိခင်တစ်ယောက်၏ ကိုယ်ဝန်ဆောင်စဉ် ကိုယ်အလေးချိန်တိုး မှုသည် မွေးဖွားလာမည့်ကလေးအား အသက်သုံးနှစ်မှစ၍ ကိုယ်အလေးချိန် ပိုလွန်စေမည့် အန္တရာယ်ရှိသည်ဟု အကြံပြုခဲ့သည်။ ထို့နောက် မွေးဖွားလာသည့်ကလေးငယ်တို့၏ အရွယ်ရောက်ချိန်ကို ဆက်လက်သုတေသနပြုခဲ့သည်။ သုတေသနအရ ကိုယ်ဝန်ဆောင်စဉ်က ကိုယ်အလေးချိန် အတိုးလွန်သူတို့၏ ကလေးများသည် ကိုယ်ဝန်ဆောင်စဉ် သာမန်မျှသာ ကိုယ်အလေးချိန်တိုးသူတို့၏ ကလေးများထက်ပို၍ အဝလွန်လာနိုင်ကြောင်း တွေ့ရှိခဲ့သည်။

ကလေးတို့သည် မိခင်တို့၏အစားစားမှုပုံစံကို အတု ယူနိုင်ပေသည်။ အဝလွန်မှုကို မျိုးဗီဇအရ ဆက်ခံ ရရှိနိုင်ပေသည်။ အဘယ်ကြောင့် သန္ဓေသားဘဝအခြေ အနေကို အကြောင်းဟုဆိုနိုင်ပါသနည်း။ သုတေသီတို့ သည် အဝလွန်သော မိခင်တို့၏ ကလေးတို့ကို ထိုမိခင်တို့ အဝမလွန်စေရန် ခွဲစိတ်ကုသမှုအောင်မြင်ပြီးနောက် မွေးဖွားသော ညီ၊ ညီမတို့နှင့် နှိုင်းယှဉ်ဆန်းစစ်ခဲ့သည်။ ၂ဝဝ၆ ခုနှစ် သုတေသနတွင် အဝမလွန်စေရန် ခွဲစိတ် ကုသထားသူတို့၏ ကလေးများသည် မိခင်တစ်ဦးတည်းက အဝလွန်စဉ်က မွေးဖွားခဲ့သည့် ကလေးတို့ထက် အဝလွန်နိုင်မှု ၅၂ ရာခိုင်နှုန်း လျော့နည်းသည်ကို တွေ့ရှိခဲ့ရသည်။ ၂ဝဝ၉ ခုနှစ်တွင် ပြုလုပ်သော ဒုတိယ သုတေသနအရ မိခင်တို့ကိုယ်အလေးချိန် လျော့ကျပြီး နောက် မွေးဖွားသော မွေးစကိုယ် အလေးချိန်ပို၍နည်း သောကလေးတို့သည် အဝလွန်နိုင်ခြေ သုံးချိုးတစ်ချိုး အထိလျော့ကျသွားကြောင်း တွေ့ရှိခဲ့ရပေသည်။

အဝလွန်မှုကို ခွဲစိတ်ကုသပြီးနောက် မွေးဖွားသော ကလေးတို့သည် အဝလွန်စဉ်ကမွေးဖွားသော အစ်ကို၊ အစ်မတို့ထက် အဆီနှင့် ကာဘိုဟိုက်ဒရိတ်တို့ကို ပို၍ကျန်းမာစေသောနည်းလမ်းများဖြင့် အသုံးပြုနိုင်ကြ သည်ဟု နယူးယောက်ရှိ ဆန်နီဒေါင်းစတိတ် ဆေးဗဟို ဌာနမှ ခွဲစိတ်ကုသရေးနှင့် ဆေးဝါးပါမောက္ခ John Kral ကပြောပြခဲ့သည်။ သူတို့၏ခန္ဓာ တွင်း ဇီဝဓာတုဖြစ်စဉ်တို့သည် သန္ဓေ သားဘဝအတွေ့အကြုံတို့ဖြင့် ပုံမှန် ဖြစ်ကြရပေသည်။ သန္ဓေသားဘဝ အတွေ့အကြုံဟူသည် ဗီဇပြင်ပတွင် ပုံစံသစ်ပြုပြင်ခြင်း- Epigenetic Modification ဟု သိရှိကြသည်။ ဗီဇမျိုးစေ့တို့ကို မပြောင်းလဲစေဘဲ ပတ် ဝန်းကျင်လွှမ်းမိုးမှုများကြောင့် ဗီဇမျိုးစေ့တို့၏ အပြုအမူတို့အပေါ် အကျိုးသက်ရောက်စေခြင်းပင်ဖြစ်သည်။ အဝလွန်မှုကို မိခင်ထံမှ ဆက်ခံယူရာတွင် သန္ဓေသားဘဝ ပတ်ဝန်းကျင်သည် မျိုးဗီဇထက်ဖြစ်စေ၊ အစာစားပုံအလေ့အထကို အတု ယူမှုထက်ဖြစ်စေ ပို၍အရေးကြီးပါသည်ဟု Kral ကပြောပြသည်။ အဝ လွန်မှုကို အမွေဆက်ခံစေရန်အတွက် မိခင်သည် ကိုယ်ဝန်ဆောင်ဘဝတွင် ကျန်းမာခြင်းနှင့်ပြည့်စုံသော ကိုယ် အလေးချိန်တွင် ထိန်းသိမ်းထားရန် လိုအပ်ပေသည်။

သန္ဓေသားဘဝသိပ္ပံပညာသည် ရောဂါများကို ရိုးရာအမွေအဖြစ် ဆက် ခံထားရသည်ဟု ယုံကြည်နေသူများ အတွက် မျှော်လင့်ချက်ကိုလည်းပေးနိုင်ခဲ့သည်။ ယခုအခါ အမေရိကန် ပြည်ထောင်စု အနောက်တောင်ပိုင်း ဆော့မြစ်နှင့် ဂီလာမြစ်သီးသန့်နယ်မြေ တွင် နေထိုင်ကြသည့် မက္ကဆီကို အနောက်မြောက်ပိုင်း၊ အရီဇိုးနားနှင့် ဆိုနိုရဇာတိ ပီမာအင်ဒီးယန်းမျိုးနွယ် Pima Indians တို့သည် ကမ္ဘာတွင် အမှတ်-၂ ဆီးချိုရောဂါဖြစ်ပွားမှု အများဆုံးလူမျိုးဖြစ်သည်။ ပီမာတို့၏ ဆီးချိုရောဂါဖြစ်ပွားမှုသည် မျိုးဗီဇကြောင့်ဟု သံသယရှိခဲ့ကြသည်။ သို့သော် ၁၉၆၅ ခုနှစ်မှ စတင်ခဲ့သည့် ပီမာအများအပြား ပါဝင်သည့် သုတေသနက ဆီးချိုရောဂါဖြစ်ရခြင်းသည် ကိုယ်ဝန်ဆောင်စဉ် အတွေ့အကြုံ အခြေအနေများအရ ဖြစ်သည်ဟု ညွှန် ပြခဲ့သည်။ ကိုယ်ဝန်ဆောင်နေစဉ် ဆီးချိုဖြစ်နေသည့် မိခင်၏ သွေးဖိအား မြင့် သကြားဓာတ်သည် သန္ဓေသား၏ဖွံ့ဖြိုးနေသည့် ဇီဝဓာတုဖြစ်စဉ်ကို ဖျက်ဆီးပစ်ကာ ဆီးချိုနှင့်အဝလွန်မှု ဖြစ်စေရန် လမ်းပြောင်းပေးလိုက်ကြ သည်။

ကိုလိုရာဒိုနှင့် ဒင်ဗာတက္ကသိုလ် ၏ကပ်ရောဂါဗေဒပါမောက္ခလည်း ဖြစ်၊ သုတေသန၏ခေါင်းဆောင်လည်းဖြစ်သော Dana Dabelea က လွန်ခဲ့တဲ့နှစ် ၃ဝ အတွင်းက သန္ဓေသားဘဝမှာ မိခင်ရဲ့ဆီးချိုရောဂါဖြစ်မှုဟာ ပီမာကလေးတွေကို ဆီးချိုရောဂါဖြစ်စေခဲ့တယ်။ ဒါကြောင့် ပီမာမျိုးနွယ်တွေမှာ ဆီးချိုရောဂါ အဖြစ်များခဲ့ရတယ်ဟု ပြောပြခဲ့သည်။

"---ယာဉ်နှင့် ဆက်နွယ်သည့် အဆိပ်ငွေ့များရှူရသူမိခင်တို့၏ ကလေးများသည် လမစေ့မီ မွေးဖွားခြင်း၊ ကိုယ်အလေးချိန် မပြည့် ခြင်း၊ နှလုံးပုံပျက်ခြင်း စသော ဆိုးရွားသည့် အခြေအနေများနှင့် မွေးဖွားလာရ---"

အမေရိကန်ပြည်ထောင်စု၊ လတ်စ်ဗေဂတ်ပြည်နယ်၊ နီဗားဒါး တက္ကသိုလ်မှ ဆေးဝါးဆိုင်ရာ မနုဿ ဗေဒ ပညာရှင် Daniel Benyshek သည် အရီဇိုးနားဒေသမှ အမေရိကန် မျိုးနွယ်စုများကို တွေ့ဆုံမေးမြန်းခဲ့ သည်။ သူတို့ ကိုယ်ဝန်ဆောင်ထားစဉ် အခြေအနေတွေကြောင့် ကလေး မှာ ရောဂါဖြစ်နိုင်ပုံတွေကို သိလာရတာဟာ လူတွေရဲ့ ဓလေ့စရိုက်တွေကို ပြောင်းလဲစေနိုင်တယ်။ ဆီးချိုရောဂါဟာ သန္ဓေသားဘဝက အခြေခံရခဲ့တယ် ဆိုတာကို မျိုးနွယ် စုတွေ သိလာကြတော့ မတူ ကွဲပြားတဲ့ တုံ့ပြန်မှုတွေကို တွေ့လာရတယ်။ ကိုယ်ဝန်ဆောင်ထားချိန်မှာ ရိုးစင်းတဲ့ အပြောင်းအလဲကလေးတွေ လုပ်aပးလိုက်ရင် မွေးလာမယ့်ကလေးမှာ ဆီးချိုဖြစ်နိုင်ခြေ လျော့သွားမယ် ဆိုတာကို သိလာကြတော့ သူတို့မှာ မျှော်လင့်ချက်တွေရှိလာတယ်။ ကိုယ်ဝန်ဆောင်ထားစဉ်မှာ ဂရုစိုက်နေထိုင် စားသောက်ပြီး ဆီးချိုရောဂါကွင်း ဆက်ကိုဖြတ်ဖို့ စိတ်အားထက်သန် လာကြတယ်။ သူတို့ဟာ အစားကို စနစ်တကျစားကြတယ်။ လေ့ကျင့်ခန်းတွေ လုပ်ကြတယ်။ အမြဲမလုပ်နိုင်ပေမယ့် ကိုယ်ဝန်ဆောင်ချိန်ကိုးလ မှာတော့ မွေးလာမယ့်ကလေးကို ရောဂါကင်းစင် ကျန်းမာစေဖို့အတွက် လုပ်နိုင်ရမယ်''ဟု ပြောလာကြသည်။

လေထုညစ်ညမ်း အဆိပ်သင့်မှု

ကိုလံဘီယာတက္ကသိုလ် ကလေးများ ပတ်ဝန်ကျင် ကျန်းမာရေးဗဟိုဌာန ၏ဒါရိုက်တာ Frederica Perera သည် လွန်ခဲ့သော နှစ်သုံးဆယ်က အရွယ်ရောက်သူများ၏ ပတ်ဝန်းကျင် သဘာဝနှင့် ကင်ဆာဖြစ်မှုတို့ကို ဦးဆောင် သုတေသနပြုခဲ့သည်။ ထို အချိန်ကစ၍ သူသည် ပတ်ဝန်းကျင် ညစ်ညမ်းအဆိပ်သင့်မှု၏ သန္ဓေသား တို့အပေါ် လွှမ်းမိုး သက်ရောက်မှုတို့ ကို စိတ်ဝင်စားစွာ လေ့လာခဲ့သည်။ Parera သည် နယူးယောက်ဝန်းကျင် မှကလေးများအား ပို၍ကျန်းမာသော ဘဝဝန်းကျင်ကို ပေးလိုသည့်ဆန္ဒပြင်း ပြခဲ့သည်။ သူသည် ကလေးမွေးပြီး လျှင်ပြီးချင်း ဓာတ်ခွဲခန်းသို့ဆောင် ယူကာ သွေးစစ်ဆေးခဲ့သည်။ စစ်ဆေးချက်အဖြေကိုကြည့်ပြီး တစ်ခုခုတော့ မှားနေပြီဟု ထင်ခဲ့သည်။ ရောဂါ လုံးဝ ကင်းစင်နေရမည့် မွေးစကလေးတွင် အဆိပ်သင့်မှုများကို တွေ့နေရသည်။

Parara နှင့်အဖွဲ့၏ ဆက်လက် သုတေသနပြုချက်များအရ ကိုယ်ဝန် ဆောင်ချိန်တွင် ယာဉ်နှင့် ဆက်နွယ်သည့် အဆိပ်ငွေ့များရှူရသူမိခင်တို့၏ ကလေးများသည် လမစေ့မီ မွေးဖွားခြင်း၊ ကိုယ်အလေးချိန် မပြည့် ခြင်း၊ နှလုံးပုံပျက်ခြင်း စသော ဆိုးရွားသည့် အခြေအနေများနှင့် မွေးဖွားလာရသည်ကို တွေ့ရှိခဲ့ကြရသည်။ ၁၉၉၈ ခုနှစ်တွင် ကိုယ်ဝန်ဆောင် ၅ဝဝ ကျော်အား အိပ်ချိန်မှလွဲ၍ မော် တော်ကားများမှ ထုတ်လွှတ်မီးခိုးတွင် ပါရှိသည့် ပိုလီဆိုက်ကလစ် အရိုမက် တစ်ဟိုင်ဒရိုကာဘွန် Polycyclic Aromatic Hydrocarbons (PAHs) ကို တိုင်းတာသည့် ကြောပိုးစက်ကလေး များကို တပ်ဆင်ပေးထားသည်။ စက်မှတ်တမ်းအရ ကိုယ်ဝန်ဆောင် အားလုံးသည် ရာနှုန်းပြည့် အဆိပ်သင့် ခဲ့ကြကြောင်း စစ်ဆေးတွေ့ရှိခဲ့ရသည်။

ထိုအမျိုးသမီးများက မွေးဖွားလာသည့် ကလေး ၄ဝ ရာခိုင်နှုန်းတွင် PAHs အဆိပ်သင့်မှုကြောင့် ကင်ဆာရောဂါ ဖြစ်နိုင်ခြေ အန္တရာယ် ပါရှိလာသည်ကို တွေ့ရှိခဲ့ရသည်။ ဆက်လက်သုတေသန ပြုမှုများအရ PAHs အဆိပ်ငွေ့ပြင်းသင့်သူ မိခင်တို့၏ ကလေးတို့သည် PAHs အဆိပ်ငွေ့ပျော့သင့် သူတို့၏ ကလေးများထက် အသက် သုံးနှစ်အရွယ်တွင် မှတ်ဥာဏ်ပေါ်မှု နောက်ကျခြင်း၊ အသက် ငါးနှစ်အရွယ်တွင် ကျောင်းစစ်ဆေးမှုများတွင် အမှတ်နိမ့်ခြင်း နှစ်ဆ များပြားသည်။ ကိုယ်ဝန်ဆောင်ထားစဉ် PAHs အဆိပ်ငွေ့ပြင်းသင့်သူ မိခင်များ၏ ကလေးတို့သည် PAHs အဆိပ် ငွေ့ပျော့သင့်သူတို့ မိခင်တို့၏ ကလေးများထက် ဥာဏ်ရည်စံနိမ့်ကျသည်ကို တွေ့ရှိခဲ့ရသည်။

ဤသုတေသနအဖြေများက အခြားအဆိပ်သင့်မှုတို့၏ ထိခိုက်မှုတို့ကိုလည်း သုတေသနပြုကြရန် တွန်းအားပေးခဲ့သည်။ ကျွန်ုပ်တို့သည် လူကြီးများအတွက် ပူပင်ခဲ့ရသည်။ ယခု သန္ဓေသားတို့အတွက် ပူပင်နေကြရပြီ ဟု Perera ကပြောသည်။ ထို့ကြောင့်ပင် နယူးယောက်တွင် ပြေးဆွဲနေသည့် ဘတ်စ်ကားများကို ပို၍ သန့် ရှင်းသော အင်ဂျင်ကို အသုံးပြုရန်၊ ယာဉ်အသုံးမပြုချိန်တွင် အင်ဂျင်ကို စက်ရပ်ထားရန် ညွှန်ကြားပြင်ဆင် စေခဲ့ရသည်။

ထိုသို့စည်းကမ်း သတ် မှတ်လုပ်ဆောင်ခဲ့မှုကြောင့် ကိုယ်ဝန်ဆောင်မိခင်တို့တွင် အဆိပ်သင့်မှု လျော့နည်းလာသည်ကို တွေ့ရှိလာရ သည်။ အကျိုးအဆက်အဖြစ် သန္ဓေသားတို့၏ ကျန်းမာရေးသည်လည်း တိုးတက် ကောင်းမွန်လာခဲ့ပေသည်။

စိတ်ဖိစီးမှု၏ ရင်းမြစ်

သုတေသီတို့သည် သန္ဓေသား ဘဝအတွေ့အကြုံများ၏ ကိုယ် လက်ကြံ့ခိုင်ကျန်းမာရေး အပေါ် သက်ရောက်မှုများကိုသာမက မှတ်ဥာဏ်၊ စိတ်စရိုက်၊ စိတ်ဖြူစင်မှုတို့ အပေါ် သက်ရောက်မှုတို့ကိုပါ သုတေသနပြုခဲ့ကြသည်။ ကိုယ်ဝန် ဆောင်ထားစဉ် ချို့တဲ့ခေါင်းပါးခဲ့သူ၊ စိတ်ဖိအားများပြားသူ မိခင်တို့၏ ကလေးများသည် စိတ်ကစဥ့်ကလျား ရောဂါဖြစ်မှု များပြားကြောင်း တွေ့ရှိခဲ့ရသည်။ စိတ်ကစဥ့်ကလျား ရောဂါသည် အကြောင်းများစွာရှိသော၊ ရှုပ် ထွေးသော စိတ်ကစဥ့်ကလျားဖြစ်မှု ဖြစ်သည်။

တရုတ်နိုင်ငံ၊ အန်ဟွီဒေသ တွင် နှစ် ၃ဝ ကြာ သုတေသနပြု ချက်အရ ကိုယ်ဝန်ဆောင်ထားစဉ် အခြေအနေများသည် ခိုင်မာစွာ သက် ရောက်မှုရှိကြောင်း တွေ့ရှိခဲ့ရသည်။ ထိုဒေသတွင် နေထိုင်သူတို့သည် နှစ်ဆယ်ရာစုအလယ် ခုန်ပျံကျော်လွှား တိုးတက်ရေးခေတ်တွင် အာဟာရ မပြည့်ဝမှုဒဏ်ကို ခါးစည်းခံခဲ့ကြရသည်။ ဆက်လက်၍ မော်စီတုန်း၏ အထိအခိုက် များပြားသော ခေတ်မီ တိုးတက်ရေး လှုပ်ရှားမှုများကို ဖြတ်သန်းကြရပြန်သည်။ ထိုခေါင်းပါးသော ခေတ်ကို ရင်ဆိုင်ရသည့်မိခင် တို့၏ ကလေးများသည် အခြား ကာလများထက် စိတ်ကစဥ့်ကလျား ဖြစ်မှု နှစ်ဆများပြားခဲ့သည်။

"---ကိုယ်ဝန် ဆောင်ထားစဉ် ချို့တဲ့ခေါင်းပါးခဲ့သူ၊ စိတ်ဖိအားများပြားသူ မိခင်တို့၏ ကလေးများသည် စိတ်ကစဥ့်ကလျား ရောဂါဖြစ်မှု များပြားကြောင်း တွေ့ရှိခဲ့ရသည်---"

အလားတူပင် ၁၉၆၄ ခုနှစ်နှင့် ၁၉၇၆ ခုနှစ်များအတွင်းဂျေရုဆလင် မြို့တွင် မွေးဖွားခဲ့သူ ၈၈,ဝဝဝ ဦးကို သုတေသနပြုခဲ့ရာ အာရတ်၊ အစ္စရေး ခြောက်ရက်စစ်ပွဲ ကာလဖြစ်သော ၁၉၆၇ ခု၊ ဇွန်လတွင် ကိုယ်ဝန် နှစ်လသားရှိသော မိခင်တို့၏ ကလေးများသည် လူငယ်ဘဝတွင် စိတ်ကစဥ့်ကလျားဖြစ်မှု များပြားကြောင်း တွေ့ရှိခဲ့ရသည်။

ကိုလံဘီယာတက္ကသိုလ်၊ စိတ် ပညာဌာန ပါမောက္ခ Catherine Monk က ပို၍ စိတ်တုန်လှုပ်ဖွယ် ပြောဆိုခဲ့သည်။ ကိုယ်ဝန်ဆောင်မိခင်ရဲ့ စိတ်အခြေအနေဟာ မွေးဖွားလာတဲ့ ကလေးရဲ့ စိတ်ဓာတ်ဖွံ့ဖြိုးမှုအပေါ် သက်ရောက်မှုရှိတယ်လို့ ပြညွှန်ခဲ့ တယ်။ မိခင်ရဲ့ စိတ်ဓာတ်ရေးရာကို သန္ဓေသားဆီကို လွှဲပို့နိုင်ပါသလား။ ပို့နိုင်ရင် ဘယ်လိုပို့ပါသလဲ။ ဒီလို လွှဲပို့မှုဟာ သန္ဓေသားရဲ့ဖွံ့ဖြိုးမှုအပေါ် သက်ရောက်မှု ရှိပါသလား ဆိုတဲ့ မေးခွန်းတွေ အများကြီး ထွက်လာတယ်။ ဒီမေးခွန်းတွေရဲ့ အဖြေကို ကျွန်မတို့ ကြိုးစားရှာနေပါတယ်ဟု ပြောသည်။

စင်စစ် Monk နှင့်အဖွဲ့သည် သန္ဓေသားကို ခွဲစိတ်စားပွဲပေါ်တင်၍ စမ်းသပ်ခဲ့သည်ဟု ဆိုရမလိုဖြစ်သည်။ သူတို့သည် စိတ်ဓာတ်ကျနေသော၊ သောကဖိစီးနေသော ကိုယ်ဝန်ဆောင် မိခင်များနှင့် ပုံမှန်စိတ်အခြေအနေတွင်ရှိသော ကိုယ်ဝန်ဆောင်မိခင်များကို ဓာတ်ခွဲခန်းထဲသို့ခေါ်၍ အသက်ရှူ နှုန်း၊ နှလုံးခုန်နှုန်း၊ သွေးဖိအားနှင့် အာရုံကြောများနိုးကြားမှုတို့ကို စစ်ဆေးသည်။ တစ်ချိန်တည်းမှာပင် သန္ဓေသားများ၏ နှလုံးခုန်နှုန်းတို့ကိုလည်း စစ်ဆေးမှတ်တမ်းယူသည်။ ထို့နောက် ကိုယ်ဝန်ဆောင်များအား ခက်ခဲသော စိတ်လေ့ကျင့်ခန်းများပြုလုပ်စေသည်။ အမျိုးသမီးအားလုံးပင် လေ့ကျင့်ခန်းများကြောင့် ဖိစီးမှုခံခဲ့ရကြောင်း ဇီဝကမ္မ လက္ခဏာများ ပြခဲ့ကြသည်။ သို့သော် စိတ်ဖိစီးမှုခံနေရသော စိတ်သောကရောက်နေသော အမျိုးသမီးတို့၏ သန္ဓေသားများတွင်သာ အနှောင့်အယှက် ရှိခဲ့ကြောင်း တွေ့ရှိခဲ့ရသည်။

ဤတွေ့ရှိချက်က သန္ဓေသားတို့သည် စိတ်ဖိစီးမှုအပေါ် ခံစားလွယ်မှုရှိနေကြောင်းပြသခဲ့သည်။ Monk က ''ဒါဟာမိဘဆီက ဆက်ခံယူတဲ့ ဗီဇ မျိုးစေ့ကြောင့်လဲဖြစ်နိုင်တယ်။ ဒါမှ မဟုတ် မိခင်ရဲ့စိတ်လှုပ်ရှားမှုတွေက ပုံဖော်ပေးလိုက်တာလဲဖြစ်နိုင်တယ်'' ဟုပြောသည်။ အမျိုးသမီးများ၏ နှလုံးခုန်နှုန်း၊ သွေးဖိအား၊ ဖိအား ဟိုမုန်းများ၏ အဆင့်တို့သည် ကိုယ် ဝန်ဆောင်ကာလအတွင်း အမိဝမ်းတွင်း အခြေအနေအပေါ် သက်ရောက်မှုများရှိသည်။ ဤသည်မှာ လူ့ဘဝ၏ ပထမဆုံးပတ်ဝန်းကျင်အပေါ် လွှမ်းမိုးမှုနှင့် ဖွံ့ဖြိုးမှုအားပုံဖော်မှုလည်း ဖြစ်ပေသည်။

သန္ဓေသားဘဝတွင် ကွဲပြားမှု များသည် မွေးဖွားပြီးကာလများအထိ ဆက်လက်သွားကြောင်း၊ နှလုံးခုန်နှုန်း စသော အခြေခံဇီဝကမ္မ ပုံစံ တို့သည် စိတ်လှုပ်ရှားမှုပုံစံကွဲပြားမှု နှင့် ပေါင်းစပ်နေကြောင်း မွန့်က တွေ့ရှိခဲ့သည်။ စိတ်လှုပ်ရှားမှုပုံစံ ကွဲပြားမှု ၏ ရင်းမြစ်သည် မိခင်ဝမ်းမှ အခြေစခဲ့ဖွယ်ရှိသည်ဟု မွန့်က်က ပြောခဲ့သည်။

ကိုယ်ဝန်ဆောင်မိခင်တစ်ဦး၏ စိတ်ခံစားမှု အခြေအနေသည် ကလေး၏ နောင်တွင် စိတ္တဇဝေဒနာဖြစ်မှု အပေါ် လွှမ်းမိုးမှုရှိနိုင်သည်။ လူအချို့ သည် မျိုးဗီဇအရ စိတ်ဖိစီးမှုနှင့် စိုးရိမ်သောကရောက်မှု ဖြစ်လွယ်ကြသည်။ စိတ်မကျန်းမာသော မိဘတို့၏ ကလေးများသည်လည်း စိတ်မကျန်းမမာဖြစ်ရန် အလားအလာ ပို၍များပြားသည်။ ကိုယ်ဝန် ဆောင်ထားရစဉ် ပတ်ဝန်းကျင် အခြေအနေတို့သည် မွေးဖွားလာသည့် ကလေးတွင် စိတ်မကျန်းမမာ ဖြစ်စေရန် တတိယအကြောင်းဖြစ်သည်။ ဤ သုတေသနတို့က လူ့ဘဝကို ပုံဖော်ထုဆစ်ပေးသည့် အဦးဆုံး အကြောင်းတို့ကို ထုတ်ဖော်ပြပေးပေသည်။

အနာဂတ်အတွက်ပြင်ဆင်ခြင်း

ဟားဗတ်တက္ကသိုလ် ဆေးဝါး ပါမောက္ခ Matthew Gillman သည် လွန်ခဲ့သော ဆယ်နှစ်က ကလေး ဘဝ အတွေ့ အကြုံတို့သည် အနာဂတ် ဘဝကျန်းမာရေးအပေါ် သက်ရောက် မှုကို သိရှိနိုင်ရန်အတွက် ဘော်စတွန် ဒေသမှ ကလေး ၂,ဝဝဝ ကျော်ကို သန္ဓေသားဘဝအထိ ခြေရာကောက် ဆန်းစစ်ခဲ့သည်။ သို့သော် David Barker ၏ သုတေသနသည် သူတို့ ကိုအံ့အားသင့်စေခဲ့သည်။ ကြီးပြင်းလာသောဘဝ၏ ကျန်းမာရေးသည် စင်စစ်မည်သည့်အချိန်က စတင်ခဲ့လေ သနည်း။ မမွေးဖွားမီကပင် စတင်ခဲ့ လေမည်လောဟု စဉ်းစားကာ သူ၏ သုတေသနကို သန္ဓေသားဘဝမှ စတင်ခဲ့သည်။ သူ၏ သုတေသနကို ရင်ကျပ်ခြင်း၊ ဓာတ်မတည့်ခြင်း၊ အဝ လွန်ခြင်းနှင့် နှလုံးရောဂါတို့သည် သန္ဓေသားဘဝမှ စတင်အခြေချခဲ့ကြောင်း ပြဆိုခဲ့ပေပြီ။ ထို့အတူပင် ကိုယ်ဝန်ဆောင်ထားစဉ် အခြေအနေတို့သည် ဦးနှောက်ဖွံ့ဖြိုးမှုအပေါ် လွှမ်းမိုးမှုရှိကြောင်း ပြညွှန်းခဲ့ပြန်သည်။

ဤအဆိုကိုထောက်ခံသော အချက်အလက်များသည် ဆက်လက်ပေါ်ထွက်လာခဲ့သည်။ ယခုနှစ်တွင် ကိုယ်ဝန်ဆောင်မိခင် တစ်သိန်း သည် ကျန်းမာရေးနှင့် ရောဂါဘယ တို့ဖြစ်ပေါ်မှု၏ အခြေခံတရားတို့ကို ဖော်ထုတ်နိုင်ရန် အတွက် တမျိုးသားလုံးဆိုင်ရာကလေးများကျန်းမာရေး သုတေသန အစီအစဉ်တွင် ပါဝင်ခဲ့ကြသည်။ သုတေသနကို ပြည်ထောင်စု အစိုးရ ရန်ပုံငွေ ဖြင့် ဆောင်ရွက်ခြင်းဖြစ်ပြီး၊ လူအများကို လွှမ်း ခြုံကာ ကျန်းမာခြင်းနှင့် ရောဂါဘယ ဖြစ်ပွားခြင်း၏ အရင်းအမြစ်များကို ရှာဖွေ ဖော်ထုတ်ကြမည်ဖြစ်သည်။ သုတေသီတို့သည် အမျိုးသမီးများစွာကို တွေ့ဆုံကာ ကိုယ်ဝန်ဆောင် ထားစဉ်တွင် အနေအထိုင် အပြုအမူများကို မေးမြန်း မှတ်တမ်းတင်ကြသည်။ ဆံပင်၊ သွေး၊ သလိပ် နမူနာ တို့ကို စုဆောင်းစစ်ဆေးကြသည်။ နေအိမ်များရှိ သောက်ရေ သုံးရေ ဖုန်မှုန့်များကို စစ်ဆေးကြရသည်။ ထိုမိခင်တို့က မွေးဖွားလာသည့် ကလေးတို့ကို အသက် ၂၁ နှစ်အထိ ခြေရာကောက် စစ်ဆေး မှတ်တမ်း တင်ကြသည်။

"---မွေးစက ကိုယ်အလေးချိန် နည်းသူများသည် ဆီးချိုရောဂါဖြစ်ရန် အလားအလာများ လှပေသည်---"

သြရီဂွန်ပြည်နယ်တက္ကသိုလ် Linus Pauling Institute မှ သုတေ သီ Davnd Williams သည် ကိုယ်ဝန် ဆောင်စဉ် မိခင်စားသုံးခဲ့သော ဆေးဝါးတို့သည် မွေးဖွားလာသည့် ကလေးတို့အား မဖျားနာစေရန် ရောဂါမဖြစ် စေရန် ကာကွယ်ပေးမည်ဟု ယုံကြည် နေသည်။ Williams သည် ကိုယ်ဝန်ဆောင်ကြွက်များကို ဘရိုကိုလီခေါ် ဂေါ်ဖီပွင့်စိမ်း၊ ဂေါ်ဖီထုပ်တို့မှရရှိ သည့် ရောဂါ ကာကွယ် သတ္တိရှိ ဖိုင်တို ဓာတုပစ္စည်း - Phytochemical တို့ကို တိုက်ကျွေးသည်။ ဖိုင်တိုဓာတု ပစ္စည်း တိုက်ကျွေးသော ကြွက်တို့၏ ရင်သွေးငယ်ကြွက်တို့သည် ကင်ဆာရောဂါ ဖြစ်စေနိုင်သည့် ကာဆီနိုဂျင် တို့နှင့် ထိတွေ့ရစေကာမူ ကင်ဆာရောဂါကို ရင်ဆိုင် အန်တုနိုင်ခဲ့ကြ သည်။ ကြွက်ငယ်တို့သည် သန္ဓေသားဘဝ၏နောက်ပိုင်းတွင် ဖိုင်တု ဓာတုပစ္စည်း ထိုးမပေးခဲ့သော်လည်း အရွယ်ရောက်သည့်တိုင် ကင်ဆာ ရောဂါကို ကြံ့ကြံ့ခံနိုင်ခဲ့ကြသည်။ Williams သည် နောင်တစ်နေ့တွင် ကိုယ်ဝန်ဆောင်မိခင်များအား သင့်လျော်သော ဖြည့်စွက်အစာကျွေးခြင်းဖြင့် မွေးဖွားလာမည့် ရင်သွေးငယ်တို့အား ကင်ဆာရောဂါ မဖြစ်စေရန် ကာကွယ်ပေးနိုင်မည်ဟု မျှော်လင့်ကြိုး စားလျက်ရှိသည်။

သန္ဓေသား လွယ်ထားစဉ်ကာလ သုတေသနတို့ သည် အရွယ်ရောက်ပြီးသူများကိုလည်း အကျိုးပြု နိုင်သည်။ ဟားဗတ်တက္ကသိုလ် မှ ပါမောက္ခ Mary Elizabeth Patti သည် သူမ၏ သက်ကြီးလူနာများအား ၄င်းတို့မွေးစဉ်က ကိုယ်အလေးချိန်ကို အမြဲမေးမြန်းလေ့ရှိသည်။ လက်ရှိ ကျန်းမာရေး အခြေအနေများကို မမေးဘဲ မွေးစအကြောင်းများကိုသာမေးသဖြင့် လူနာများအတွက် ထူးဆန်းနေကြသည်။ သို့သော် မွေးစက ကိုယ်အလေးချိန် နည်းသူများသည် ဆီးချိုရောဂါဖြစ်ရန် အလားအလာများ လှပေသည်။ မွေးစက ကျန်းမာရေး အခြေအနေများသည် အနာဂတ်ဘဝကို လွှမ်းမိုးနေပေသည်။

ဆောက်သမ်ပတန်တက္ကသိုလ် - Mary Elizabeth Patti ပါမောက္ခ Keth Godfrey ခေါင်းဆောင်သည့် သုတေသနတစ်ခုကို Diabetes ဂျာနယ်တွင် မကြာမီ ပုံနှိပ် ဖော်ပြမည်ဖြစ်သည်။ သုတေသနမိခင်လောင်း၏ အစာ စားသောက်မှု ညစ်ညမ်းသော ပတ်ဝန်းကျင်တွင် နေထိုင်ရမှု သို့မဟုတ် စိတ်ဖိစီးခံရမှုတို့သည် သန္ဓေသား၏မျိုးဗီဇ ဒီအင်အေ- DNA ကို ပြောင်းလဲစေနိုင်သည်။ ထိုပြောင်းလဲမှုသည် မွေးဖွားလာမည့် ရင်သွေးအား အဝလွန်စေနိုင်သည်ဟုဆိုသည်။

သုတေသီတို့သည် သန္ဓေသားဘဝ၏ အချင်းအသား အစမှ သန္ဓေသားပုံဖော်သည့် DNA တို့ကို စစ်ဆေး ခဲ့ကြသည်။ မိခင်လောင်း၏ ကာဘိုဟိုက်ဒရိတ် နိမ့်သော အချိုနှင့် ကစီဓာတ်များသော အစားအစာတို့ကို စားသုံးမှုသည် ကလေး၏ ထို DNA တို့ကို ပြောင်းလဲ စေကြောင်း၊ ထို အပြောင်းအလဲသည် ကလေးအား အဝလွန်စေကြောင်းတွေ့ရှိခဲ့ကြသည်။ သုတေသီတို့က မိခင်လောင်းတို့၏ လူမှုဘဝပုံစံသည် မွေးဖွားလာမည့် ကလေး၏ကျန်းမာရေးကို ရေရှည်လွှမ်းမိုးနိုင်သော ကြောင့် သုတေသန၏ အဖြေများကို အလေးထား၍ လိုက်နာကြရန် အကြံပေးထားသည်။

ဗြိတိန်နိုင်ငံ၊ အောက်လန်တက္ကသိုလ်မ Dr. Paul Hofman က မိခင်လောင်း၏ ပေါ့ပါးသော ကိုယ်လက်လှုပ်ရှားမှုသည်ကလေး၏ အနာဂတ် ကျန်းမာရေးကို ကောင်းမွန်စေကြောင်း အဝလွန်သော မိခင်လောင်းတို့သည် ကျန်းမာရေးကို ထိခိုက်စေသည့် အဆီပို များဖြင့် ဝနေသော ကလေးကို မွေးဖွားလေ့ရှိကြောင်း၊ မွေးဖွားစကလေး၏ ကိုယ်အလေးချိန်ကို ထိန်းသိမ်းပေးခြင်းသည် ကလေး၏ကျန်းမာရေး အန္တရာယ်တို့ကို လျော့ပေါ့စေကြောင်းပြောကြားခဲ့သည်။

ကိုယ်လက်လှုပ်ရှားမှု ပြုလုပ်သော မိခင်တို့သည် ပျမ်းမျှ ကိုယ်အလေးချိန် ဝ.၃၂ ပေါင်း လျော့နည်းသော သို့သော် အရပ်ရှည်သော ကလေးတို့ကို မွေးဖွားနိုင်ခဲ့ကြသည်။ လျော့သွားသော ဝ.၃၂ ပေါင်သည် အဝလွန်စေသည့် အဆီပိုများ လျော့သွားခြင်းဖြစ်၍ ကလေး၏ ကျန်းမာရေးကို ပိုမိုကောင်းမွန်စေကြောင်း ဒေါက်တာ Hofman က ပြောကြားခဲ့သည်။

လူသားတစ်ယောက်၏ဘဝကို သန္ဓေသားဘဝကပင် စတင်ထုဆစ်ခဲ့ရသည်။ သန္ဓေသားကို အနီးကပ်ဆုံး စောင့်ရှောက်နေသူမှာ မိခင်သာဖြစ်သည်။ သန္ဓေသားဘဝ တစ်လျှောက်လုံး မိခင်နှင့် အသွေးချင်း၊ အသားချင်း၊ စိတ်ချင်း ဆက်သွယ်နေရသည်။ မိခင်၊ မိခင်ဘဝ၊ မိခင် ၏ ပတ်ဝန်းကျင်သည် ရင်သွေးငယ်၏ဘဝကို ထုဆစ် ပုံဖော်နေပေသည်။

ပုခက်လွှဲသော မိခင်၏လက်သည် ကမ္ဘာကို စိုးမိုးသည်ဟု ဖွင့်ဆိုခဲ့သော ရှေးပညာရှင်များသည် အမြော်အမြင်ကြီးမားလှသည်။ မိခင်တို့သည် အနာဂတ်လူသား၊ အနာဂတ်ခေတ်၊ အနာဂတ်ကမ္ဘာကို ပုံဖော်ထုဆစ်နေ သူများဖြစ်ပေသည်။ မိခင်များကို ကိုယ်ရောစိတ်ပါ ကျန်းမာကြံ့ခိုင်စေခြင်း၊ အသိသုတ ကြွယ်ဝစေခြင်း သည် အနာဂတ်လူသား၊ အနာဂတ်ခေတ်၊ အနာဂတ် ကမ္ဘာကိုပုံဖော်နေခြင်း၊ အနာဂတ်ကမ္ဘာကို တည်ဆောက်ခြင်းပင်ဖြစ်ပေသည်။

ဖိုးဆွေ (သစ်လုပ်ငန်း)

Ref : :
1. The wormb, Your Mother, Yourself by Annie Murphy Paul, Time , 4-10-2010.

2. Microsoft @Encarta @ 2009.

ညွှန်း - ဈေးကွက်ဂျာနယ် http://zaygwet.com/