ဟိုတုန်းကဆို သူ့လက်ရင်း ရဲဘော်ကြီးတွေ။ သူ့ပလ္လင် မြင့်သည်ထက် မြင့်စေဖို့ ပြည်သူတို့ရဲ့ အမုန်းတရားကို ဘေးချိတ်ပြီး သူ့ထက်ငါ အမှတ်ပိုလို့ရအောင် အစွမ်းရှိသမျှ တာဝန်ထမ်းဆောင်ခဲ့ကြတဲ့ ဗိုလ်ချုပ်ကြီးတွေ။ ထိုထို ဗိုလ်ချုပ်ကြီးတွေကို ပြေးလို့မြင်မိပါရဲ့။
ဗိုလ်ချုပ်ကြီး ရွှေမန်းတို့၊ သိန်းစိန်တို့၊ တင်အောင်မြင့်ဦးတို့၊ တင်အေးတို့၊ နောက် ဗိုလ်ချုပ်တွေ အများကြီးပေါ့ဗျာ။ သူတို့က တပ်ချုပ်ကြီးကို စစ်သွေးစစ်မာန်အပြည့်နဲ့ ရင်မြေကတုတ်ဟန်၊ လက်ဝဲလက်ယာ ရံနေကြတာကို ပြေးပြီးမြင်ယောင်မိတော့၊ လွမ်းသလိုလို၊ ဆွေးသလိုလို၊ ရယ်စရာဟာသလိုလို၊ခံစားမိတာအမှန်ပါခင်ဗျာ။
ကာယကံရှင်တွေရဲ့ ရင်ထဲမှာ ဘယ်လောက် ဆူလောင်ပွက်လော ရိုက်လိုက်ကြမလဲ ဆိုတာကို မသိနိုင်ပေမယ့် ကိုယ်ချင်းတော့ စာမိတယ်ဗျ။ ဒါပေမယ့် တပ်ချုပ်ကြီးကတော့ လူသေကောင် မျက်နှာနဲ့ မတုန်မလှုပ်ကျောက်ရုပ်။ သူ့အာဏာပလ္လင် ခိုင်မြဲတည်တံ့ရေးကိုသာ စိတ်ပိုင်းဖြတ်ထားပုံပါပဲ။သူ့မှာ လုပ်ဖော်ကိုင်ဘက်၊ ရဲဘော်ရဲဘက်၊ သေဖော်သေဘက်ရယ်လို့၊ သံယောဇဉ်တရား၊ သစ္စာမေတ္တာ အသည်းတွေ၊ နှလုံးတွေမရှိတာကတော့၊ မရှိ..မရှိ..မရှိလို့ကို မြည်နေတာ။
ဗိုလ်ချုပ်ကြီး ရွှေမန်းဆို သူတို့ကို စစ်တက္ကသိုလ်ကနေ မွေးထုတ်ပြုစုပျိုးထောင်ပေးခဲ့တဲ့ စစ်အာဏာရှင် လက်ရင်းဖခင်ကြီး ဗိုလ်နေ၀င်းကိုတောင် သေသည်အထိ အကျယ်ချုပ်ချခဲ့တယ်။ အဖိုးကြီး သေပြန်တော့လည်း ခွေးသေကောင်လင်းတဆွဲသလို ပုံစံမျိုးနဲ့ မသာချခဲ့တယ်။ စစ်ထောက်လှမ်းရေးမှူးချုပ်၊၀န်ကြီးချုပ် ဗိုလ်ချုပ်ကြီး ခင်ညွှန့်ကိုလည်း ပြောင်ပြောင်မြောက်မြောက်ဖမ်းပြီး ဖြုတ်၊ ထုတ်၊ ချုပ် လုပ်ခဲ့တယ်။
ဗိုလ်ရွှေမန်းက တပ်ချုပ်ကြီးအတွက် အဲဒီလိုပြောင်မြောက်တဲ့ အော်ပရေးရှင်းကြီးတွေ ဆင်နွှဲပြီး လက်စွမ်းကုန် အမှုတော်ထမ်းပေးခဲ့သော်လည်း တလောက ဗိုလ်ရွှေမန်းကို တပ်ချုပ်ကြီး ပေးလိုက်တဲ့ ဆုလဒ်ကတော့ အများအသိပါပဲဗျာ။
အစတုန်းကတော့ သူ့အထက်က တပ်ချုပ်ကြီးနဲ့ ဗိုလ်အေးတို့ နှစ်ယောက်ကလွဲပြီး တပ်မတော်သားအားလုံး၊ပြည်သူတရပ်လုံးကို အမိန့်ပေးညွှန်ကြားနေတဲ့သူ။
တပ်ချုပ်ကြီးရဲ့ အရိုက်အရာကို ဆက်ခံရမယ့်သူ။
အိမ်ရှေ့မင်းသားအဖြစ် သတ်မှတ်ခံထားရသူ။
တပ်ချုပ်ကြီးရဲ့ သစ္စာရေကို သောက်ထားတဲ့ အတွင်းလူ။
အနှီလူ ဗိုလ်ချုပ်ကြီး ရွှေမန်းကား ယခုတော့ ပုခုံးပေါ်က အခက်ကြီးတွေ၊ အပွင့်ကြီးတွေ အဖြုတ်ခံရပြီး ဦးရွှေမန်းဘ၀သို့ ရွေ့လျောသက်ဆင်းသွားရပြီ။ သူ့ကို ဟိုတုန်းက တပ်ချုပ်ကြီးရဲ့အပါးမှာ တွေ့နေကျ၊မြင်နေကျ။ ယခုမတွေ့ရ၊ မမြင်ရတော့ပါကလား။
ဗိုလ်ချုပ်ကြီး ရွှေမန်းရဲ့ နေရာမှာ ဒု ဗိုလ်ချုပ်ကြီး မင်းအောင်လှိုင်ကို အစားထိုးလိုက်ပြီ။ တပ်ချုပ်ကြီးက ကော်တင်လိုက်လို့ စင်ပေါ်ရောက်လာရပေမယ့် ကြည့်ရတာ သူ့ခမျာ ကုတ်ချောင်းချောင်းနဲ့ စိတ်မချမ်းသာစရာပါဗျာ။ ဗိုလ်မှူးအောင်လင်းထွဋ် ပြောတာကတော့ စစ်တက္ကသိုလ်မှာတုန်းက ဗိုလ်မင်းအောင်လှိုင်ကို ကြောင်ချီးလို့ခေါ်ကြသတဲ့။ ပျော့ပျော့နဲ့ နံတယ်ပေါ့ဗျာ။သူ့စိတ် သူ့စရိုက်ကိုတော့ ငယ်ပေါင်းတွေက ပိုသိကြမှာပါဗျာ။
မနေ့တနေ့ကတော့ ဗိုလ်ရွှေမန်းနဲ့ ဗိုလ်မင်းအောင်လှိုင်တို့ကို ယှဉ်ကြည့်မိတယ်။ ဗိုလ်မင်းအောင်လှိုင်ခမျာ မ၀ံ့မရဲနဲ့ခင်ဗျ။ ဒါကြောင့်မိုလည်း တပ်ချုပ်ကြီးက သူနဲ့ကပ်လျက်ဘေးမှာထားပြီး ပွဲထုတ် ရဲဆေးတင်ပေးနေတာပေါ့။
ထူးတာတစ်ခုကတော့ ဗိုလ်မင်းအောင်လှိုင်ခမျာ တပ်ချုပ်ကြီးရဲ့ အာဏာရှင်အသည်းနှလုံးကို အသည်းနာနေတာလား၊ နှလုံးနာနေတာလား၊ ကြောက်ရွံနေတာလားလို့ တွေးမိတယ်ခင်ဗျ။ ဘယ်လိုပဲဖြစ်ဖြစ် ဗိုလ်ချုပ်တို့၏ သင်္ခါရတရားကား မြန်ဆန်လွန်းရုံမက အကျလည်း နာလှတယ်လို့ ကျနော် မွန်ဇော်နိုင်က မှတ်ချက်ချလိုက်ချင်ပါတယ် ခင်ဗျား။
မွန်ဇော်နိုင်
0 comments :
Post a Comment