ပီကင်း ကိုလိုနီလက်သစ်ဝါဒီ

ကြည်မောင်သစ်၊ ဇွန် ၁၃၊ ၂၀၁၁

မြောက်ကိုရီးယားအာဏာရှင် ကင်ဂျုံအီးလ် …

အီရန်အာဏာရှင်နိုင်ငံမှ နိုင်ငံခြားရေးဝန်ကြီး …

အာဏာရှင်လောင်း သိန်းစိန် …

ထိုထို ၃ ဦးတို့သည် ကမ္ဘာ့အာဏာရှင်တို့၏ ဗဟိုချက်မ၊ တနည်းအားဖြင့် ကမ္ဘာ့အာဏာရှင်တို့ မဖြစ်မနေ ဦးတိုက်ရမည့် ပီကင်းနေပြည်တော်သို့ ရှေ့ဆင့်နောက်ဆင့် အသီးသီး လာရောက်သွားခဲ့ကြသည်။ ထိုသတင်းများကို အများသူငှာတုိ့ တွေ့မြင်၊ ကြားသိကြပြီးဖြစ်သည်။

အထက်ဖော်ပြပါ ပီကင်းသို့ လာရောက် ဦးတိုက်ကြကုန်သော အာဏာရှင် ၃ ဦးအပါအ၀င် ကမ္ဘာအရပ်ရပ်မှ အာဏာရှင်အပေါင်းတို့သည် ဒီမိုကရေစီနှင့် လူ့အခွင့်အရေးအတွက် အသက်ကိုပင်လျှင် အရင်းတည်ပြီး အံတု တောင်းဆို တိုက်ပွဲဝင်နေကြသော နိုင်ငံအသီးသီးမှ ပြည်သူတို့နှင့် ကမ္ဘာ့ပြည်သူတို့ကို ဖြိုခွင်းနိုင်ရန် ပီကင်းမှတပါး တခြားအားကိုးမှီခိုစရာ မရှိတော့ပြီ။

ပီကင်းကလည်း သူ့ကို ဆည်းကပ်သူများ သက်ဆိုးရှည်မှသာ ထိုသူများကို လည်ဂုတ်ဆွဲပြီး ခြယ်လှယ်ကြီးစိုး အမြတ်ထုတ်နိုင်မည်ဖြစ်၍ ထိုဆည်းကပ်သူများကို အာဏာလက်လွတ်ပြီး ပြည်သူ့ခုံရုံး အတင်ခံရမည့်ဘေးမှ ကယ်တင်ရန်၊ သံတမန်ရေး၊ စီးပွားရေး၊ စစ်ရေးအရ အစွမ်းကုန် အကာအကွယ်ပေးခဲ့သည်။ အထူးသဖြင့် ကုလသမဂ္ဂ လုံခြုံရေးကောင်စီ၏ “ကြီး” ၅ “ကြီး” အဖွဲ့ဝင်တိုင်း၌ ထားရှိရမည့် ဂုဏ်သိက္ခာကိုမျှ မစောင့်ထိန်းတော့ဘဲ ဗီတို တချက်လွတ်အာဏာကို အရှက်အကြောက် အလျဉ်းကင်းမဲ့စွာ အလွဲသုံးစားပြုပြီး ကမ္ဘာ့အာဏာရှင် အမျိုးမျိုးတို့ ကျူးလွန်ခဲ့သည့် ပြစ်မှုမျိုးစုံကို အကာအကွယ် ပေးလျက်ရှိလေသည်။


ထိုကြောင့် ကမ္ဘာ့အာဏာရှင် အမျိုးမျိုးတို့က ပီကင်းသခင်ကြီးများ အားကိုးဖြင့် သူတို့အာဏာယစ်ပလ္လင်ကို ခြိမ်းခြောက်လာသူ မည်သူ့ကိုမဆို ဖမ်းချင်တိုင်းဖမ်း၊ ချုပ်ချင်တိုင်းချုပ်၊ သတ်ချင်တိုင်းသတ်လျက် ရှိသည်မှာ ယနေ့မီဒီယာများတွင် မတွေ့ချင်အဆုံး၊ မကြားချင်အဆုံး ဖြစ်နေသည်။ မြန်မာနိုင်ငံကို ကြည့်ပါ။

နိုင်ငံတ၀ှမ်း ဖမ်းထားသည့် နိုင်ငံရေး အကျဉ်းသားများက ၂၂၀၀ ကျော်၊ တိုင်းရင်းသား လူမျိုးစုငယ်များ၏ ဒေသအသီးသီးတွင် သတ်ဖြတ်၊ မုဒိန်းကျင့်၊ ရွာမီးရှို့နေကြသည့် ပြည်တွင်းစစ် …။ ကလေးစစ်သား၊ အဓမ္မလုပ်အားပေး၊ ပေါ်တာအထမ်းသမား၊ လူသားစင်စစ် မိုင်းရှင်းကိရိယာ၊ ထိုထို မနှစ်မြို့ဖွယ်ရာတို့ကို စစ်အာဏာရှင်တို့၏ ပြယုဂ်များအဖြစ် အထင်အရှား တွေ့နေရသည်။ ဖော်ပြခဲ့သော မြန်မာပြည်သူတို့၏ ဘ၀ထက် မြောက်ကိုရီးယား ပြည်သူတို့၏ဘ၀က ပို၍ပင်ဆိုးနိုင်ပါသေးသည်။

ယနေ့ အာဖရိက မြောက်ပိုင်းနှင့် အရှေ့အလယ်ပိုင်းက လစ်ဗျားအာဏာရှင် ကဒါဖီ၊ ဆီးရီးယားအာဏာရှင် ဘာရှား အာဆပ်၊ ယီမင်အာဏာရှင် ဆာလပ်တို့က အာဏာရှင်စနစ်ဖျက်သိမ်းရေး တိုက်ပွဲဝင် အဖိနှပ်ခံပြည်သူများကို နေ့စဉ်နှင့်အမျှ ပစ်သတ်နေကြသည်။

ထိုတိုက်ပွဲဝင် အဖိနှိပ်ခံပြည်သူတို့၏ အသက်စွန့် ရုန်းကန်လှုပ်ရှားမှုများကို တချိန်က “ကမ္ဘာ့အဖိနှိပ်ခံ ပြည်သူတို့၏ ခေါင်းဆောင်” ဟူ၍ ရင်ကော့ပြခဲ့ကြသော ပီကင်း “ကွန်မြူနစ်” ခေါင်းဆောင်ကြီးများက ၀တ္တရားမဲ့၊ တာဝန်မဲ့၊ ပြောင်ပြောင်တင်းတင်း ကျောခိုင်းလျက်ရှိလေသည်။ တိုက်ပွဲဝင် ပြည်သူများဘက်မှ စစ်ရေး၊ သံတမန်ရေး၊ နိုင်ငံရေးတို့ဖြင့် ကူညီကာကွယ်ပေးနေကြသော ယူအက်စ်၊ အီးယူတို့ကို စစ်ရေးအရ ရင်မဆိုင်ရဲ၍ ရင်မဆိုင်ဘဲနေသော်လည်း အာဏာရှင်များကို သံတမန်ရေးအရ အစွမ်းကုန် အကူအညီပေးလျက်ရှိနေသည်။

အာဏာရှင် ကဒါဖီတယောက် ယနေ့အခြေအနေလောက် မဆိုးမီ အရေးအခင်းကာလ အစောပိုင်းက တရုတ်ပြည်မှ ကိုယ်စားလှယ်အဖွဲ့တဖွဲ့သည် ကတိုက်ကရိုက် တက်သုတ်နှင်ပြီး ကဒါဖီနှင့်တွေ့ဆုံရင်း စီးပွားရေးစာချုပ် ချုပ်ဆိုသည့်သတင်းကို မီဒီယာများတွင် တွေ့ခဲ့ကြရသည်။ ပီကင်း ကွန်မြူနစ်ခေါင်းဆောင် သခင်ကြီးများကား မသူတော်အာဏာရှင်ချင်း ၀ံသာနုစိတ်ဓာတ် အပြည့်အ၀ထား၍ နိုင်ငံအရပ်ရပ်မှ အနုစား၊ အရင့်စား အာဏာရှင်များကို ကာကွယ်ကူညီနေခြင်းပါတကား။

စင်စစ် အာဏာရှင်စနစ် ကျင့်သုံးလိုသဖြင့် “ကွန်မြူနစ်” ဆိုင်းဘုတ် မဖြုတ်သေးသည်ကလွဲ၍ ကွန်မြူနစ်အနံ့အသက် အငွေ့ လုံးဝမရှိတော့သည့် အတုအယောင် “ကွန်မြူနစ်” များသာ ဖြစ်နေပါပေါ့လား။ အံ့သြကုန်နိုင်ဖွယ် “ကွန်မြူနစ်” ကြီးများပါပေ။

အမှန်စင်စစ်ကား ပီကင်းသခင်ကြီးများသည် ကိုလိုနီလက်သစ်ဝါဒီများသာ ဖြစ်သည်။ ခေတ်သစ် နယ်ချဲ့သမားများသာ ဖြစ်သည်။ အဘယ်ကြောင့် ဤသို့ အမှတ်တံဆိပ် ခတ်နှိပ်လေသနည်း။ အနက်အဓိပ်ပါယ် ဖွင့်ဆိုလေသနည်း။

ကိုလိုနီနယ်ချဲ့တို့သည် ကုန်ကြမ်းရရှိရေးနှင့် ကုန်ချောရောင်းချရေးအတွက် လက်လှမ်းမှီသမျှ နိုင်ငံများ၏ အချုပ်အခြာအာဏာကို သိမ်းပိုက်ပြီး လက်အောက်ခံ ကိုလိုနီနိုင်ငံများအဖြစ် ဖန်တီးခဲ့ကြသည်။ ကိုလိုနီနိုင်ငံများအား လွတ်လပ်ရေးပေးရပြီးသော အခါ၌လည်း ယင်းနိုင်ငံများ၏ ကုန်ကြမ်း၊ ကုန်ချောဈေးကွက်ကို ဆက်လက်၍ လက်ဝါးကြီးအုပ် ချုပ်ကိုင်ရန် ကြိုးပမ်းသောစနစ်ကို ကိုလိုနီလက်သစ်ဝါဒဟု ခေါ်ဆိုသည်။ ဤကား ပီကင်း ကွန်မြူနစ်ရင့်မာကြီးများ ဖွင့်ဆိုခဲ့ဖူးသော အဓိပ္ပာယ်တည်း။

ယနေ့မြန်မာနိုင်ငံသည် သာတူညီမျှ အပြန်အလှန် ကောင်းကျိုးပြုသည့် မိတ်ကောင်းဆွေကောင်းအဖြစ် ပီကင်းသခင်ကြီး “ကွန်မြူနစ်” တို့က အသိအမှတ်ပြု ဆက်ဆံသော ဆွေမျိုးပေါက်ဖော်နိုင်ငံ ဟုတ်ပါ၏လော။ သို့မဟုတ် ပီကင်းသခင်ကြီး ကိုလိုနီ လက်သစ်ဝါဒီတို့ အနိုင်ကျင့်၊ ဖိနှိပ်၊ ချယ်လှယ်သမျှ ခံနေရသော နိုင်ငံလော။ ဆန်းစစ်ကြည့်ကြပါစို့။

မိုးရေချိန်လက်မ ၈၀ ထက်မနည်းသော မြန်မာနိုင်ငံမြောက်ပိုင်း ကချင်ပြည်နယ်ရှိ စိမ်းစိုမဲမှောင်နေသော သစ်တောကြီးများမှာ ပျောက်ကွယ်ကုန်ကြပြီ။ တောင်ကတုံးကြီးများသာ ကျန်တော့သည်။ ဤသစ်တောကြီးများက်ို ခုတ်ယူသယ်ဆောင်သွားကြပါပြီ။ တရားခံလက်သည် သည်ကား … “ပီကင်း ကိုလိုနီလက်သစ်ဝါဒီ” …။

မြန်မာနိုင်ငံတွင် သဘာဝပတ်ဝန်းကျင် ပျက်စီးကုန်တော့မည်ကို “သိ, သိ” ကြီးနှင့် ..၊ ဧရာဝတီမြစ်ဆုံ၊ ချင်းတွင်း၊ ရွှေလီ၊ သံလွင်မြစ်ရိုးတလျှောက်တွင် ရေအားလျှပ်စစ် ဆည်တမံများကို တခုပြီးတခု စာနာစိတ်မထားဘဲ ဆောက်လုပ်၍ လျှပ်စစ်ဓာတ်အားများ သယ်ယူနိုင်ရန် ကြိုးပမ်းဆောင်ရွက်နေကြပါပြီ။ တရားခံလက်သည် သည်ကား…. “ပီကင်း ကိုလိုနီလက်သစ်ဝါဒီ” …။

လမ်းပမ်းဆက်သွယ်မှုများကို လက်ဝါးကြီးအုပ်၍ စစ်တွေရေနက်ဆိပ်ကမ်း တည်ဆောက်ခြင်း၊ စစ်တွေမှ ကူမင်းသို့ ရေနံပိုက်လိုင်းနှင့် ကားလမ်း၊ မီးရထားလမ်း သွယ်တန်းတည်ဆောက်ခြင်း၊ ယူနယ်ပြည်နယ်မှ အိန္ဒိယသမုဒ္ဒရာသို့ ထွက်ပေါက်ဖောက်လုပ်ခြင်းတို့ကို ဆောင်ရွက်နေပါပြီ။ တရားခံ လက်သည်သည်ကား … “ပီကင်း ကိုလိုနီလက်သစ်ဝါဒီ” …။

ကမ်းလွန်နှင့်ကုန်းတွင်းတွင် ရေနံနှင့်ဓာတ်ငွေ့ …၊ ကြေးနီ၊ သတ္တု၊ ယူရေနီယံနှင့် ရွှေငွေကျောက်စိမ်း၊ သိမ်းကြုံးတူးဖော်ခြင်းကို ကုမ္ပဏီကြီးများ ဖွင့်လှစ်ပြီးဆောင်ရွက်နေသည်။ တရာခံလက်သည် သည်ကား … “ပီကင်း ကိုလိုနီလက်သစ်ဝါဒီ”

“ပီကင်း ကိုလိုနီလက်သစ်ဝါဒီ” ကြီးများက မြန်မာပြည်ထွက် အဖိုးတန်ရှားပါးပစ္စည်းများကို လက်ဝါးကြီးအုပ် အချောင်နှိုက်ကာ ရယူနေရာ၊ ဘာများ ကျန်ပါသေးသနည်း။ တခုတော့ ကျန်ပါသေးသည်။ ဤသည်ကား ဣတ္ထိလိင် အမသတ္တ၀ါတည်း။

တရုတ်ပြည်၌ လူဦးရေကန့်သတ်ရေး မူဝါဒအရ ကျားသတ္တ၀ါကများပြီး မသတ္တ၀ါက နည်းပါးလျက်ရှိရာ ရွှေကိုယူသည်၊ ငွေကိုယူသည်၊ ပြီးတော့လူကိုပါ ယူသည်ဟူသော ကိုလိုနီစနစ်၏ သရုပ်သကန်ကား တကျော့ပြန်၍ “တရုတ်ဟန်” ဖြင့် ပေါ်လာပြန်ပြီ။

“ယူ” လို့ရတာဟူသမျှကို သိမ်းကြုံးယူသွားပြီးသည်၏ တဖက်တွင် “သွင်း” လို့ရတာဟူသမျှကို သိမ်းကြုံး သွင်းလာပြန်သည်။ သိမ်းကြုံးသွင်းလာသည်များကား လက်ညှိုးထိုး၍ မလွဲနိုင်အောင် များပြားလှသည်။ တရုတ်လုပ် စက်ပစ္စည်း၊ အိမ်ဆောက်ပစ္စည်း၊ အီလက်ထရောနစ်နှင့် လျှပ်စစ်ပစ္စည်း၊ အ၀တ်အထည်၊ စားသောက်ကုန်၊ နို့မှုန့်အတု၊ ဆေးဝါးအညံ့စားနှင့် အတု …။ ထိုမျှနှင့် အားမရနိုင်သေးသဖြင့် ကြက်ဥအတု စသည့် ယူနန်ပြည်နယ် ထုတ်ကုန်ပစ္စည်းများ မမြင်ချင့်အဆုံး မြင်နေရသည်မှာ ဈေးတကာနယ်အနှံ့ ကျယ်ပျံ့လှသည်။ နောက်ထပ်သွင်းစရာဟူ၍ ရှိပါသေး၏လော။

အချုပ်ကိုဆိုရသော် ယနေ့ခေတ်သစ်၌ နိုင်ငံရေးအောက်စည်း ရောက်ရှိနေသူ အာဏာရှင်များကို နိုင်ငံရေး ရုပ်သေးများအဖြစ် ဖန်တီး၍ ခေတ်သစ် ကိုလိုနီစနစ်ကို ကျင့်သုံးဖန်တီးနေသူတို့ကား အခြားသူများ မဟုတ်ချေ။ ကွန်မြူနစ်အမည်ခံ “ပီကင်း ကိုလိုနီလက်သစ်ဝါဒီ” များပင် ဖြစ်ပေသတည်း။

(ရေးသားပေးပို့သူ၏ အာဘော်အတိုင်း ဖြစ်ပါသည်။)