တိုင်းရင်းသားဒေသ ကျန်းမာရေးလုပ်ငန်း

 

လက်ရှိ ပြုလုပ်နေသည့် အပစ်အခတ် ရပ်စဲရေး၊ ငြိမ်းချမ်းရေး ဖော်ဆောင်မှုတွင် တိုင်းရင်းသားဒေသများအပါအ၀င် တမျိုးသားလုံးဆိုင်ရာ ကျန်းမာရေးမူဝါဒ ချမျတ်နိုင်ရေး ညှိနှိုင်းဆွေးနွေးပွဲတခုကို ထိုင်းမြန်မာနယ်စပ် မဲဆောက်မြို့တွင် ယနေ့မှစတင်ကာ နှစ်ရက်ကြာ ကျင်းပနေသည်။

နယ်စပ်အခြေစိုက် တိုင်းရင်းသား ကျန်းမာရေး ၀န်ဆောင်မှု အဖွဲ့များ၊ ဒေသတွင်းရှိ  နိုင်ငံတကာ NGO များ၊ မြန်မာနိုင်ငံနယ်စပ် ကျန်းမာရေးဌာနတချို့မှ တာဝန်ရှိသူများ တက်ရောက် ဆွေးနွေးကြသည်။

ဆွေးနွေးပွဲတက်ရောက်သည့် မယ်တော်ဆေးခန်းတာဝန်ခံ ဒေါက်တာစင်သီယာမောင်က -

“ရေရှည်မှာ ဒေသအသီးသီးက တန်းတူ ကျန်းမာရေးအခွင့် အရေးတွေ ရဖို့၊ လက်ရှိ နယ်စပ်ဒေသတွေမှာရှိတဲ့ ကျန်းမာရေးဌာန အဖွဲ့အစည်းတွေကို အသိအမှတ်ပြုဖို့၊ တမျိုးသားလုံးနဲ့ သက်ဆိုင်တဲ့ ကျန်းမာရေးမူဝါဒတွေကို ချမှတ်နိုင်ဖို့”  တိုင်းရင်းသား အဖွဲ့အစည်းတို့က ဗဟိုအစိုးရနှင့် ညှိနှိုင်းနိုင်ရေး အကြောင်းအရာကို အဓိက ဆွေးနွေးနေကြသည်ဟု ပြောသည်။
 (ဓာတ်ပုံများ - ပြည်တော်မြင့်/ဧရာဝတီ) တိုင်းရင်းသား ကျန်းမာရေး အဖွဲ့အစည်းများကလည်း  ဗဟိုအစိုးရနှင့် ငြိမ်းချမ်းရေး စကားပြောသည့်အခါ  ကျန်းမာရေးကဏ္ဍများကို  HCCG ၏ မူဝါဒများအတိုင်း ဆွေးနွေးသွားကြမည်ဟု ဧရာဝတီသတင်းဌာနကို သဘောထားပေးကြသည်။

နိုင်ငံတကာ NGO တခုမှ မြန်မာဆရာဝန်တဦးက -
  “ဒီလုပ်ငန်းစဉ်နဲ့ ပတ်သက်ပြီး တာဝန်ယူမယ့်သူတွေ အနေနဲ့ စနစ်တကျ လုပ်ဆောင်နိုင်ဖို့တော့ လိုပါလိမ့်မယ်။ ဒါမှ အများရဲ့ယုံကြည်မှုကို ရရှိမှာဖြစ်တယ်။ အဓိကအချက်ကဒါပဲ” ဟု မှတ်ချက်ပေးသည်။

၂၀၁၂ နှစ်ဆန်းပိုင်းက ပေါ်ပေါက်လာသည့် HCCG တွင် ပါဝင်သည့် အဖွဲ့များ

• မြန်မာနိုင်ငံဆေးပညာရှင်များအသင်း BMA
• နယ်လှည့် ကျောပိုးအိတ်ကျန်းမာရေးလုပ်သားများအဖွဲ့ BPHWT
• ကရင်ကျန်းမာရေးနှင့်ကယ်ဆယ်ရေးဌာန KDHW
• ကရင်နီနယ်လှည့်ကျန်းမာရေးစောင့်ရှောက်မှုကော်မတီ Kn MHC
• မယ်တော်ဆေးခန်း MTC
• မွန်အမျိုးသား ကျန်းမာရေးကော်မတီ MNHC
• အမျိုးသားကျန်းမာရေးနှင့်ပညာရေးကော်မတီ NHEC
• ရှမ်းကျန်းမာရေးကော်မတီ SHC

HCCG) အခြေခံမူများ

• တိုင်းရင်းဒေသကျန်းမာရေးဌာနများ၏ ဖွဲ့စည်းပုံနှင့် လုပ်ပိုင်ခွင့်များကိုထိန်းသိမ်းရန်၊
• နိုင်ငံတကာ အကူအညီပေးရေး အဖွဲ့များက လူထုအခြေပြုအဖွဲ့အစည်းများ၊ တိုင်းရင်းသားကျန်းမာရေးအဖွဲ့များနှင့် ပူးပေါင်းဆောင်ရွက်ရန်၊
• တမျိုးသားလုံးနှင့်ဆိုင်သည့် ကျန်းမာရေးမူဝါဒများကို ဖက်ဒရယ်ပြည်ထောင်စု စနစ်အတိုင်း ဆောင်ရွက်ရန်၊
• ကျန်းမာရေးမူဝါဒများသည် တိုင်းရင်းသားအဖွဲ့အစည်းများ၏ နိုင်ငံရေး၊ ငြိမ်းချမ်းရေး ဖြစ်စဉ်များနှင့် လိုက်လျောညီထွေမှုရှိရန်၊
• ဖွံ့ဖြိုးရေးအကူအညီများ လက်ခံဆောင်ရွက်ရာတွင် ဒေသခံများ၊ လူထု အခြေပြုအဖွဲ့အစည်းများ တည်ဆောက်ထားသော ကျန်းမာရေးစနစ်နှင့် လိုက်လျောညီထွေမှုရှိရန်၊
• ကျန်းမာရေး အစီအစဉ်များဆောင်ရွက်ရာတွင် တိုင်းရင်းသားအဖွဲ့အစည်းတို့၏ ခွင့်ပြုချက်ရယူရန်

• ဧရာဝတီ Facebook / ဧရာဝတီ Twitter

.