ပုသိမ်မြို့သည် တကမ္ဘာလုံးလိုက်နာရန် ပြဋ္ဌာန်းထားသည့် အပြည်ပြည်ဆိုင်ရာ လူ့အခွင့်အရေး ကြေညာစာတမ်းကြီးကို မြန်မာနိုင်ငံတွင် ပထမဆုံး စိုက်ထူသည့်မြို့ ဖြစ်လာသည်။
ဒေသခံ တက်ကြွလှုပ်ရှားသူတချို့က ပုသိမ်မြို့ လူစည်ကားသည့် နေရာတခုတွင် အပြည်ပြည်ဆိုင်ရာ လူ့အခွင့်အရေး ကြေညာစာတမ်း ဆိုင်းဘုတ်ကြီးတခုကို တနင်္လာနေ့တွင် စိုက်ထူလိုက်ကြသည်။
ဆိုင်းဘုတ်ထောင်ခွင့် ပြုရန် ပုသိမ်မြို့နယ် အထွေထွေအုပ်ချုပ်ရေးဌာန၊ တိုင်းဒေသကြီး လွှတ်တော်၊ မြန်မာနိုင်ငံ လူ့အခွင့်အရေး ကော်မရှင်တို့ကို ဧပြီလ ၂၄ ရက်နေ့က စာတင်ခဲ့ပြီးဖြစ်သည်ဟု လူ့အခွင့်အရေး ကာကွယ်မြှင့်တင်သူများ ကွန်ရက်(HRDP) က ပြောသည်။
အကြောင်းတစုံတရာပြန်ကြားမှု မရှိသည့်အတွက် သဘောတူသည်ဟု မှတ်ယူကာ ဆိုင်းဘုတ်ထောင်ခြင်းဖြစ်ကြောင်း HRDP၏ ပုသိမ်မြို့နယ်တာဝန်ခံ ကိုသက်လွင်က ပြောသည်။
“ဒါက လွန်ခဲ့တဲ့ ၁၀ စုနှစ်ကျော်လောက်ကတည်းက မက်ခဲ့တဲ့ ကျနော်တို့အိပ်မက်တွေကို အခုချိန်မှာ အကောင်အထည် ဖော်လိုက်ရတာ အင်မတန် ၀မ်းသာပါတယ်။
ဒါဟာ မြန်မာနိုင်ငံမှာ ပထမဆုံးထောင်တဲ့ လူ့အခွင့်အရေး ကြေညာစာတမ်းဆိုင်းဘုတ် ဖြစ်ပါတယ်” ဟု သူက ဧရာဝတီကို ပြောသည်။
![](http://4.bp.blogspot.com/-aWWasAryIQA/UdvZXk2NzTI/AAAAAAAAjrs/BhMGMSRYgPg/s1600/salai+08+%28Custom%29.jpg)
ဆိုင်းဘုတ်တင်ပွဲကို ပုသိမ်မြို့ ကမ်းနားလမ်း ကျောက်ငူရပ်ကွက် အမှတ် (၆) အလယ်တန်းကျောင်းရှေ့တွင် ပြုလုပ်ရာ ပုသိမ်အခြေစိုက် လူ့အခွင့်အရေးလှုပ်ရှားသူများ၊ ကွန်ရက်များနှင့် စိတ်ပါဝင်စားသည့်ပြည်သူများ တက်ရောက်ခဲ့ကြသည်။
“အရင်တုန်းက လူ့အခွင့်အရေးကြေညာစာတမ်းကို ကျနော်တို့ကိုယ်တိုင် စာအုပ်ကလေးနဲ့ဝေတော့ ပြည်သူတွေက ဖတ်လိုက်၊ ဘုရားစင်ပေါ်တင်ထားလိုက်နဲ့ သိမ်းခဲ့တယ်။
အခုကျတော့ ဈေးသွားရင်း၊ ကျောင်းသွားကြိုရင်း အချိန်မရွေး တပိုဒ်ချင်းစီပဲဖတ်သွားဦးတော့ သူတို့တွေ မှတ်မိပြီး အကျိုးရှိမယ်လို့ မျှော်လင့်ပါတယ်”ဟု HRDP အဖွဲ့ဝင် ကိုဝင်းနိုင်က ပြောသည်။
ဆိုင်းဘုတ်တင်စဉ်က သက်ဆိုင်ရာနယ်မြေခံအသည်ကြီးရဲစခန်း၊ အထူးစုံစမ်းစစ်ဆေးရေး ဌာန၊ အထူးသတင်းထပ်ဖွဲ့နှင့် စစ်ဘက်ရေးရာထောက်လှမ်းရေး အဖွဲ့များက ဓာတ်ပုံရိုက်ခြင်း၊ ဗီဒီယိုမှတ်တမ်းတင်ခြင်းများ ပြုလုပ်ခဲ့ကြသော်လည်း တစုံတရာ ဟန့်တားပိတ်ပင် နှောင့်ယှက်ခြင်း မရှိခဲ့ကြောင်း သိရသည်။
လူ့အခွင့်အရေးကြေညာစာတမ်း ဆိုင်းဘုတ်ထောင်ကာ ပြည်သူများအား အသိပညာ ဖြန့်ဝေသကဲ့သို့ အစိုးရ၏ အုပ်ချုပ်ရေး ယန္တရားတွင် ပါဝင်ဆောင်ရွက်နေသည့် ၀န်ထမ်းများကိုလည်း လူ့အခွင့်အရေးဆိုင်ရာ အသိပညာများ ဖြန့်ဝေပေးလိုကြောင်း ပုသိမ် HRDP အဖွဲ့ဝင် ကိုဇော်မိုးက ပြောသည်။
“ကျနော်တို့ရဲ့ အဓိကရည်မှန်းချက်တွေထဲမှာ အစိုးရ၀န်ထမ်းတွေ၊ အထူးသဖြင့် ပြည်ထဲရေးဌာနပေါ့နော်။
ဥပဒေရေးရာမှာ လုပ်ဆောင်နေရတဲ့ အဲဒီဝန်ထမ်းတွေကို လူ့အခွင့်အရေးသင်တန်းတွေ ပို့ချဖို့၊ ဒေသဆိုင်ရာ အုပ်ချုပ်ရေးမှူးတွေကို လူ့အခွင့်အရေး သင်တန်းပေးတာတွေလုပ်ဖို့ ပါဝင်ပါတယ်။
အစိုးရသာ လက်ခံမယ်ဆိုရင် လူသားတိုင်း မွေးရာပါ ပိုင်ဆိုင်ခဲ့တဲ့ လူ့အခွင့်အရေးအကြောင်းတွေကို ၀န်ထမ်းတွေဆီ ဖြန့်ဝေ ပေးချင်ပါတယ်” ဟု သူက ပြောသည်။
သမ္မတဦးသိန်းစိန်ဦးဆောင်သည့် အစိုးရအနေဖြင့် ဒီမိုကရေစီလမ်းကြောင်းပေါ်သို့ သွားနေသော်လည်း အောက်ခြေအဆင့် အုပ်ချုပ်ရေးပိုင်းတွင် လူ့အခွင့်အရေးကို မသိ နားမလည်၍ ချိုးဖောက်မှုများ ရှိနေဆဲဖြစ်ကြောင်း ကိုသက်လွင်က ဆိုသည်။
“ဟိုတလောက ရေထဲမှာ လက်ထိပ်တန်းလန်းနဲ့သေခဲ့ရတဲ့ မသန်းသန်းအေးကိစ္စ ဆိုရင် တကယ်တော့ ဒေသခံဝန်ထမ်းတွေရဲ့ လူ့အခွင့်အရေး နားမလည်မှုကြောင့် ဖြစ်တဲ့ ပြဿနာလို့ ထင်မြင်ယူဆပါတယ်” ဟု သူက ပြောသည်။
ဧရာဝတီတိုင်းဒေသကြီးတွင် HRDP အဖွဲ့ဝင်များဖြင့် ပုသိမ်ဇုန်၊ ဘိုကလေးဇုန်နှင့် ဟင်္သာတဇုန်ဟူ၍ ဇုန် ၃ ခု ဖွဲ့စည်းကာ လူ့အခွင့်အရေးဆိုင်ရာကိစ္စများကို လိုက်ပါကူညီဆောင်ရွက်ပေးနေကြောင်း သိရသည်။
.
0 comments :
Post a Comment