HIV နှင့် နေထိုင်သူတို့ရဲ့ အသံများ

 ~



HIV ပိုး ကူးစက်ခံထားရသူများအား ခွဲခြားနှိမ်ချဆက်ဆံမှုသည် လူမှုပတ်ဝန်းကျင်၌သာမက ဝန်ထမ်းတချို့ကြားတွင်ပါ ရှိနေခြင်းကြောင့် လုပ်ငန်းခွင်အတွင်း ဝန်ထမ်းများလိုက်နာရမည့် ကျင့်ဝတ်ဆိုင်ရာညွှန်ကြားချက်တရပ် ထုတ်ပြန်ပေးရန်  HIV နှင့်နေထိုင်သူများကွန်ရက်က  အစိုးရကို တောင်းဆိုလိုက်သည်။


ရန်ကုန်တွင် ပြုလုပ်သည့်  ဆွေးနွေးပွဲ (ဓာတ်ပုံ - မြတ်စုမွန်/ဧရာဝတီ)

တနင်္လာ နှင့် အင်္ဂါနေ့က ရန်ကုန်မြို့တွင် ပြုလုပ်သည့် HIV နှင့် နေထိုင်သူများ၏ ၇ကြိမ်မြောက် တွေ့ဆုံ ဆွေးနွေးပွဲတွင် ပြည်နယ်နှင့်တိုင်းများမှ တက်ရောက်လာသည့် ကိုယ်စားလှယ် ၂ဝ၅ဦးက အထက်ပါအချက် အပါအဝင် တောင်းဆိုချက် ၆ရပ်ကို ထုတ်ပြန်ခဲ့သည်။

“ဆေးရုံမှာ ခွဲစိတ်ကုသမှုလုပ်ရတယ်ဆိုရင် HIV ပိုး ရှိတဲ့လူကို အခြားသူထက် ကုန်ကျစရိတ် ၂ ဆ တောင်းတာမျိုးရှိနေတယ်” ဟု မကွေးတိုင်းကိုယ်စားလှယ်တဦးက ဆွေးနွေးပွဲတွင် ပြောပြသည်။ 

ထို့ပြင် အစိုးရဆေးရုံတွင် HIV ပိုးရှိပြီး ဆေးရုံတက်ရောက်သူများအား လေကောင်းလေသန့် မရသော နေရာများတွင် နေရာချထားခြင်း၊ ဆေးရုံအိမ်သာသို့သွားသည့်လမ်းတွင် နေရာချထားခြင်းစသည့် ခွဲခြားမှုများ၊ လျှို့ဝှက်အပ်သည့် ဓာတ်ခွဲခန်းအဖြေများကို လျှို့ဝှက်မထားခြင်းတို့ကို ကြုံတွေ့နေရကြောင်း တက်ရောက်လာသူများက ဆွေးနွေးခဲ့ကြသည်။

ညွှန်ကြားချက်ထုတ်ပြန်ပေးပါက ခွဲခြားဆက်ဆံမှုများ လျော့ကျလာမည်ဟု ယုံကြည်ကြောင်းလည်း ယင်းထုတ်ပြန်ချက်တွင် ဖော်ပြထားသည်။

မြန်မာနိုင်ငံရှိ HIV ကူးစက်ခံထားရသူများအကြားတွင် အရည်အသွေးပြည့်မီသော ဝန်ဆောင်မှုများ ပိုမိုရရှိစေရန် လိုအပ်နေခြင်း၊ 
HIV ကြောင့် အလုပ်အကိုင်အခွင့်အလမ်း ထိခိုက်ခြင်းနှင့် လုပ်ငန်းခွင်အတွင်း နစ်နာ ဆုံးရှုံးခြင်း စသည့် အခက်အခဲများရှိနေကြောင်းလည်း တက်ရောက်လာသူများ၏ ဆွေးနွေးချက်အရ သိရသည်။

လူတိုင်း ဆေးဝါးရရှိရေးအတွက် မြို့နယ်အဆင့် ART စင်တာများ တိုးချဲ့ခြင်းကို စီစဉ်ဆောင်ရွက်ရာတွင် HIV ပိုးရှိသူတို့၏ ကိုယ်စားလှယ်များ ပါဝင်ခွင့်ရရန်လည်း တောင်းဆိုထားသည်။ဆွေးနွေးပွဲသို့ တက်ရောက်လာသူတို့က  ဆေးဝါးနှင့်ကျန်းမာရေးဝန်ဆောင်မှုပေးနေသည့် ဌာနများ၊ အဖွဲ့အစည်းများတွင် ဆေးဝါးထုတ်ယူနေသူတို့၏ ARV ဖိုင်များ ပျောက်ဆုံးနေခြင်း၊
ဆေးရုံများတွင် HIV ပိုးရှိသူတို့ကို ကိုးပေပတ်လည် အခန်းကျဉ်းထဲတွင် စုပြုံနေရာချထားသကဲ့သို့ နှစ်သိမ့်ဆွေးနွေး ပညာပေးမှုပိုင်း အားနည်းနေခြင်း၊
စသဖြင့် အခက်အခဲများ တွေ့နေရကြောင်း ဆွေးနွေးခဲ့ကြသည်။

  ပြည်မြို့တွင်  CD4 စက်၏အဖြေမှန်ကန်မှုမရှိခြင်း၊ မော်လမြိုင်မြို့တွင် ဒုတိယအဆင့် ဆေးသောက်သုံးနေသူ(Second Line) များ အတွက် ဆေးဝါး ပြတ်လပ်နေခြင်း၊
 သာယာဝတီမြို့တွင် HIV ကူးစက်ခံထားရသူ ၃ဝဝ ကျော်ရှိနေသော်လည်း National AIDS Program Team မရှိခြင်း စသည့် အခက်အခဲများကိုလည်း အသေးစိတ် ဆွေးနွေးခဲ့ကြသည်။

• ကျန်းမာရေးဌာနကိုယ်စားလှယ်၏ ပြောဆိုချက်

ဆွေးနွေးပွဲသို့တက်ရောက်လာသည့် ကျန်းမာရေးဦးစီးဋ္ဌာန၊ National AIDS Program မှ ဒေါက်တာမျိုးသန့်ကလည်း ကျန်းမာရေးဝန်ကြီးဋ္ဌာနဘက်မှ ပြင်ဆင်ထားမှု အခြေအနေများကို ရှင်းပြခဲ့သည်။

“သက်ဆိုင်ရာ ပြည်နယ်နဲ့တိုင်းတွေမှာ HIV ပိုး စစ်ဆေးခြင်း၊ နှစ်သိမ့်ဆွေးနွေးပညာပေးလုပ်ငန်းတွေ ပိုလုပ်သွားဖို့ ဆောင်ရွက်နေပါတယ်။
အခု ကျန်းမာရေးဝန်ကြီးဋ္ဌာန ဘတ်ဂျက်နဲ့ CD4 စက် အလုံး ၄ဝ မှာထားတယ်” ဟု ဒေါက်တာမျိုးသန့်က ပြောသည်။

“HIV ပိုးစစ်တဲ့ စက်တွေကို ကျယ်ကျယ်ပြန့်ပြန့်ရှိလာအောင် လုပ်မယ်။
ကျေးလက်ဒေသတွေမှာ သားဖွားဆရာမတွေကတောင် စစ်နိုင်အောင် သူတို့ကို သင်တန်းတွေပေးမယ်”

ဒေါက်တာမျိုးသန့်၏ပြောကြားချက်အရ မြန်မာနိုင်ငံတွင် ARV Centre ပေါင်း ၅၅ ခုက  ARV ဆေး လိုအပ်နေသူများ၏ ၄၃% ကို
ဆေးပေးနေကြောင်း၊  ၂ဝ၁၆ တွင် ၈၅% အထိ ပေးနိုင်ရန် မျှော်မှန်းထားကြောင်း သိရသည်။

• MPG ကွန်ရက်အကြောင်း

နှစ်ရက်ကြာဆွေးနွေးပွဲကို မြန်မာနိုင်ငံ HIVနှင့် နေထိုင်သူများကွန်ရက်(MPG) က ဦးဆောင် ကျင်းပခဲ့ခြင်းဖြစ်သည်။

MPG သည် ၂ဝဝ၅ တွင် စတင်ခဲ့သည့် လူမှုရေးအဖွဲ့အစည်းဖြစ်ပြီး၊ နယ်အသီးသီးမှ ကိုယ့်အားကိုယ်ကိုးအဖွဲ့ပေါင်း ၁၅၉ ဖွဲ့ဖြင့် ကွန်ရက်ချိတ်ဆက်ထားကာ လက်ရှိတွင် ကွန်ရက်ဝင်ပေါင်း ၉,ဝဝဝ နီးပါး ရှိကြောင်း သိရသည်။

• ကိန်းဂဏန်းများ

 မြန်မာနိုင်ငံတွင်  HIV ပိုး ကူးစက်ခံထားရသူ အရေအတွက်မှာ ၂ဝ၁၃ တွင် ၁၉၈,၈၁၁ ဦးရှိပြီး၊ ART ဆေးဝါးလိုအပ်သူ ၁၂၅,ဝ၄၃ ဦး ရှိနိုင်ကြောင်း၊
ယခုနှစ်တွင် ARV ဆေးဝါး လိုအပ်သူများ၏ ၄၉ ရာခိုင်နှုန်းအား ဆေးဝါးပေးနိုင်ရန် လျာထားကြောင်း
 မတ်လတွင် ပြုလုပ်ခဲ့သည့် ကျန်းမာရေးဦးစီးဋ္ဌာန National AIDS Program နှစ်ပတ်လည် အစည်းအဝေး ထုတ်ပြန်ချက်အရ သိရသည်။

မြတ်စုမွန် ~ 

• ဧရာဝတီ Facebook / ဧရာဝတီ Twitter

.