တိုယိုတာကားကို မြန်မာတွေအကြိုက်ဆုံးလို့ စစ်တမ်းတခု ဆို

Thursday, October 16, 2014

  မြန်မာနိုင်ငံ ကား ဈေးကွက်တွင် တိုယိုတာ အမှတ်တဆိပ်ကားက ဈေးကွက်ဝေစု ၅၃ ရာခိုင်နှုန်းဖြင့် လူကြိုက် အများဆုံး ဖြစ်နေကြောင်း အွန်လိုင်း အခြေပြု မော်တော်ယာဉ် ရောင်းဝယ်ရေးလုပ်ဆောင်နေ သည့် Motors.com.mm က စစ်တမ်းထုတ်ပြန်ထားသည်။ 



“ကျနော်တို့ မြန်မာနိုင်ငံမှာက ကားဈေးကွက်မှာ ဂျပန်ကားက လူကြိုက်အများဆုံး၊ အဲဒီထဲက တိုယိုတာ ကားအမျိုး အစားက လူကြိုက်အများဆုံး ဖြစ်ပြီး ၅၃ ရာခိုင် နှုန်းနဲ့ပထမ အဆင့်ရှိတယ်” ဟု ၄င်းကုမ္ပဏီ၏ လူထုဆက်ဆံရေး တာဝန်ခံ ကိုဖြိုးပြည့်စုံလွင် က ဧရာဝတီကို ပြောသည်။

မြန်မာ ကားဈေးကွက်အတွင်း လူကြိုက်အများဆုံး ဒုတိယနေရာတွင် ဈေးကွက် ဝေစု ၁၁ ရာခိုင်နှုန်းဖြင့် ဟွန်ဒါ ကား အမျိုးအစားနှင့် တတိယနေရာတွင် ဈေးကွက်ဝေစု ၈ ရာခိုင်နှုန်းဖြင့် နစ်ဆန်းကား တို့ 
ဖြစ်ကြောင်း သူက ဆက်ပြောသည်။ 

၂၀၁၂ ခုနှစ်က မြန်မာနိုင်ငံတွင် ကုမ္ပဏီတခုအဖြစ် စတင် တည်ထောင်ခဲ့သော Motors.com.mm သည် ဂျာမနီနိုင်ငံ အခြေစိုက် အွန်လိုင်းအခြေပြု စီးပွားရေးလုပ်ငန်းကြီးတခုဖြစ်သည့် Rocket Internet ၏ လုပ်ငန်းခွဲ တခုဖြစ်ပြီး စစ်တမ်းကို ၄ လလောက်အချိန်ယူ၍ လုပ်ဆောင်ခဲ့ခြင်းဖြစ်ကာ အောက်တိုဘာလ ၁၃ ရက်နေ့က စစ်တမ်းကို ထုတ်ပြန်ခဲ့ခြင်း ဖြစ်ကြောင်း သိရသည်။

 မြန်မာနိုင်ငံ ကားဈေးကွက်တွင် ၈၅ ရာခိုင်နှုန်းမှာ ဂျပန်နိုင်ငံလုပ်ကားများဖြစ်ပြီး လူကြိုက်အများဆုံး
ဖြစ်ကာ တောင် ကိုရီးယား နိုင်ငံ လုပ်ကားများသည့် ဈေးကွက်အတွင်း ဈေးကွက် တွင်း ၁၀ ရာခိုင်နှုန်းနှင့် ဒုတိယ လူကြိုက်အများဆုံး ဖြစ်ကြောင်းလည်း အဆိုပါ စစ်တမ်းအရ သိရသည်။ 



Motors.com.mm ၏ မြန်မာနိုင်ငံဆိုင်ရာ မန်နေဂျာ မစ္စတာ Sascha Pasqual Woelk ကလည်း မြန်မာ များအနေဖြင့် ဂျပန် ကားအမှတ်တံဆိပ်ဖြစ်သည့် တိုယိုတာကားအမျိုးအစားများသည် ဆန်းသစ်သောဒီဇိုင်း၊ အပိုပစ္စည်းအလွယ် တကူ ရရှိနိုင်မှု၊ ဘက်စုံ အသုံးတည့်မှု၊ ဈေးနှုန်းသင့်တင့်မျှတမှုတို့ကြောင့် လူကြိုက်များ
ကြောင်း မှတ်ချက်ပြု ပြောသည်။ 

 “တိုယိုတာ ကားတွေက အကြမ်းခံတယ်၊ ကားအတွင်း ပိုင်း ဖွဲ့စည်းပုံကလည်း မြန်မာနိုင်ငံရဲ့ ပတ်ဝန်း ကျင်၊ ရေမြေ ရာသီဥတုနဲ့လည်း ကိုက်ညီတယ်၊ ယာဉ်အပိုပစ္စည်း အတွက်လည်း စိတ် မပူရဘူး။ ဒါကြောင့် မြန်မာပြည်သူတွေ ကြိုက်နှစ်သက်ပြီး ဈေးကွက်ဝေစုအများကြီးရလို့ မြန်မာကား ဈေးကွက်ကို ဦးဆောင်နိုင်တာလို့ ထင်ပါတယ်” ဟု သူက ဆိုသည်။ 

ထို့အပြင် တောင်ကိုရီးယားနိုင်ငံလုပ် ဟွန်ဒိုင်း ကားအမျိုးအစားကလည်း ဈေးကွက်ဝေစု ၇ ရာခိုင်နှုန်းဖြင့် စတုတ္ထ နေ ရာ လူကြိုက်များပြီး ဂျပန်နိုင်ငံလုပ် မစ်ဆူဘီရှီ ကားအမျိုးအစားက ဈေးကွက်ဝေစု ၆ ရာခိုင်နှုန်း
ဖြင့် ပဉ္စမနေရာတွင် ရှိကြောင်း ၄င်းတို့၏ စစ်တမ်းက ဆိုသည်။ 

ဂျပန်နိုင်ငံလုပ် စူဇူကီး၊ ဥရောပ၊ အမေရိက၊ တရုတ်နိုင်ငံလုပ် ကားအမှတ်တဆိပ်များ၊ တောင်ကိုရီးယား
နိုင်ငံ လုပ် ကီယာ ကားအမျိုးအစားထို့မှာ ဈေးကွက်ဝေစု ၃ ရာခိုင်နှုန်းစီဖြင့် ဆဌမနေရာတွင် ရပ်တည်နေ
ကြောင်းလည်း သိရသည်။ 


မာဇဒါ၊ ဒိုင်ဟတ်ဆု ကားအမျိုးအစားများက ဈေးကွက်ဝေစု ၂ ရာခိုင်နှုန်းဖြင့် သတ္တမနေရာတွင် ရှီပြီး တိုယိုတာ လုပ်ငန်းခွဲ လက်စ်ဇက်ဇ်ကားနှင့် အိဆုဇူးတို့က ဈေးကွက် ဝေစု ၁ ရာခိုင်နှုန်းတို့ဖြင့် အဆင့် ၈ နေရာတွင် ရှိကြောင်းလည်း စစ်တမ်းက ဆိုသည်။ 

မြန်မာနိုင်ငံတွင်းရှိ မော်တော်ယာဉ်အရောင်းပြခန်းများ၊ မော်တော်ယာဉ်တင်သွင်းသူများနှင့် တစ်သီး ပုဂ္ဂလ မော်တော် ယာဉ်ရောင်းဝယ်သူများ၏ ၉၅ ရာခိုင်နှုန်းကျော်နှင့် ချိန်ဆက်ထားကာ လုပ်ငန်း လည် ပတ်နေသော Motors.com.mm အနေဖြင့် ယခုကဲ့သို့ မြန်မာ ကားဈေးကွက်တွင် လူကြိုက်အများဆုံး ကားများအား စစ်တမ်း ထုတ်ပြန်ခြင်းကြောင့် ကား ၀ယ်ယူ၊ ရောင်းချမည့်သူများအား အထောက် အကူဖြစ် မည်ဟု မျှော်လင့်ထားသည်ဟု သိရသည်။

မြန်မာနိုင်ငံတွင် ယခင်စစ်အစိုးရက ကားတင်သွင်းမှု ပါမစ်များကို ကန့်သတ်ထိန်းချုပ်ထားခြင်းနှင့် ကား တင်သွင်းမှု အပေါ် အခွန်ကောက်ခံမှု များလွန်းသည့်အတွက် ကားဈေး နှုန်းလည်း မြင့်မားခဲ့ပြီး ယခုအခါ ကားပါမစ်တင်သွင်းမှု ဖြေလျှော့ပေးမှု၊ အခွန်လျှော့၍ ကောက်ခံမှု၊ မြန်မာနိုင်ငံသားများအနေဖြင့် ကား တင်သွင်းမှုဆိုင်ရာ ပိုမိုသိရှိလာ၍ ကားဈေးနှုန်း ကျဆင်းလာနေကြောင်းလည်း ကိုဖြိုးပြည့်စုံလွင်က ရှင်းပြသည်။ 

ယာဉ်အိုယာဉ်ဟောင်းများကို အစိုးရက သိမ်းဆည်းပြီး ကားတင်သွင်းခွင့်ပေးသည့် ပါမစ်များ ထုတ်ပေး
ခြင်း၊ နိုင်ငံခြား ကား ကုမ္ပဏီများ မြန်မာနိုင်ငံတွင် လာရောက်၍ ပြခန်းများ ဖွင့်လှစ် ခွင့်ပေးခြင်း၊ ပုဂ္ဂလိက ကား တင်သွင်းခွင့်များ ရရှိလာခြင်း၊ ငြိမ်းချမ်းရေးအတွက် လက်နက်ကိုင် အဖွဲ့များအား ကား တင်သွင်းခွင့် ပါမစ်များ ပေးခြင်းများ ယခု အစိုးရ လက်ထက်တွင် ဆောင်ရွက်ပေးနေသည်။ 

သို့သော် ကားတင်သွင်းမှုများအား ယခုနောက်ပိုင်း ကန့်သတ်မှု တချို့လည်း ရှိနေကြောင်း သိရသည်။ 

“ဂျပန်က တိုက်ကြေ ကားဆို တင်သွင်းခွင့်ပိတ်ထားတယ်။ နောက် အခုနောက်ပိုင်း မြန်မာနိုင်ငံက လက်ျာ ကပ် မောင်း ဆိုတော့ သင့်တော်တဲ့ လက်ဝဲမောင်း ကားပဲ တင်သွင်းခွင့်ပေးတယ်”ဟု ရန်ကုန်မြို့နေ ပုဂ္ဂလိက ကားအရောင်းအ၀ယ် လုပ်ကိုင်နေသူ ဦးမောင်မောင်က ပြောသည်။ 











0 comments :

Post a Comment

 
Copyright © 2014 Irrawaddy Publishing Group. All Rights Reserved