စိတ်ဝေဒနာရှင် ခုန်ချခဲ့သော နေရာနှင့် အခင်းဖြစ်ပွားသည့် တိုက်ခန်း (ဓာတ်ပုံ - ကျော်ကျော်ဦး)
စမ်းချောင်းမြို့နယ် မြေနီကုန်းဈေးလမ်းအတွင်း စိတ်ရောဂါခံစားနေရ နေသူတဦးက အသက် ၄ နှစ်အရွယ် ၎င်း၏ တူဖြစ်သူကို ဓားဖြင့် လည်ပင်းလှီးဖြတ်သတ်ကာ ခြောက်ထပ်တိုက်ပေါ်မှ ခုန်ချခဲ့သည့် ဖြစ်ရပ် ဖြစ်ပွားခဲ့သည်ဟု ယင်းမိသားစုဝင်များက ပြောသည်။
“ကျွန်မသားက မြေးရဲ့ လည်ပင်းကို ဓားနဲ့လှီးနေတာ ကြည့်ပြီး ပတ်ဝန်းကျင်ကို အော်ခေါ်ပြီး အကူအညီ တောင်းရတယ်။ ကလေး လည်ပင်းလဲပြတ်သွားရော ကျမကို ဓားနဲ့ လိုက်ထိုးတယ်” ဟု စိတ်ဝေဒနာရှင်၏ မိခင်ဖြစ်သူက ဆိုသည်။
ဇန်န၀ါရီ ၁၅ ရက် နံနက် ၁၀ နာရီဝန်းကျင်က ဦးလေးဖြစ်သူ စိတ်ရောဂါဝေဒနာရှင်သည် စိတ်ဖောက်ပြန်ကာ တူဖြစ်သူ၏ လည်ပင်းကို အသီးအရွက်လှီး ဓားဖြင့် ပိုင်းဖြတ်ပြီး ခြောက်ထပ်တိုက် နောက်ဖေးပြူတင်းပေါက်မှ ခုန်ချခဲ့သဖြင့် အောက်တွင် ဒဏ်ရာအပြင်းအထန် ရရှိ သေဆုံးသွားခဲ့ကြောင်း စမ်းချောင်း ရဲစခန်းမှ စုံစမ်းသိရသည်။
“တိုက်ပေါ်က ကျကျခြင်း မသေသေဘူး။ အရိုးတွေကျိုးပြီး ဒဏ်ရာအပြင်းအထန်ရနေတယ်။ ၁၀ မိနစ်လောက်နေမှ သေသွားတယ်။ ကလေးကတော့ ခေါင်းတခြား ကိုယ်တခြားပဲ” ဟု အနီးပတ်ဝန်းကျင်ရှိ မျက်မြင်သက်သေ တဦးက ပြောသည်။
အခင်းမဖြစ်ပွားခင် အသက် ၃၀ ၀န်းကျင်ရှိ စိတ်ဝေဒနာရှင်သည် ရုပ်ရှင်ထိုင်ကြည့်နေပြီး ၎င်း ဘေးတွင် အသက် ၄ နှစ်အရွယ် တူဖြစ်သူသည် ဆော့ကစားနေကြောင်း၊ ဦးမြင့်သိန်း မိခင်သည် နောက်ဖေးတွင် ဟင်းချက်နေကြောင်း သိရသည်။
သေဆုံးသူ ဝေဒနာရှင်သည် စိတ်ရောဂါ ခံစားနေရသောကြောင့် စိတ်ရောဂါကု ဆေးရုံတွင် ထားရှိထားပြီး ၎င်းကို နေအိမ်သို့ ပြန်ခေါ်ထားသည်မှာ တလခန့်သာရှိကြောင်း၊ စိတ်ရောဂါကု ဆေးရုံက စိတ်ဝေဒနာရှင် ဖြစ်ကြောင်း လက်မှတ် ထုတ်ပေးထားသူဖြစ်ကြောင်း ၎င်း၏ မိခင်ဖြစ်သူကပြောသည်။
၎င်း စိတ်ဝေဒနာရှင်သည် ပထမတခါလည်း စိတ်ဖောက်ပြန်၍ အိမ်ပေါ်မှ ခုန်ချခဲ့ဖူးသေးကြောင်း သိရသည်။
အခင်းဖြစ်ပွားသည့် နေအိမ် ၆ လွှာတွင် ၎င်းမိသားစု ငှားရမ်းနေထိုင်သည်မှာ ၂ လခန့်သာ ရှိသေးကြောင်း၊ ကလေးသုံးဦးနှင့် ၎င်းတို့၏မိခင်၊ အဘွားဖြစ်သူ၊ စိတ်ဝေဒနာရှင် စုစုပေါင်း မိသားစု ၆ ဦးနေထိုင်ကြကြောင်း သိရသည်။ သေဆုံးသူ ကလေး၏ မိခင်နှင့် စိတ်ဝေဒနာရှင်မှာ မောင်နှမ အရင်းဖြစ်သည်။
ယင်းဖြစ်စဉ်နှင့် ပတ်သတ်ပြီး စမ်းချောင်းရဲစခန်းမှ ဥပဒေပုဒ်မ ပ/ ၂၅၊ ၁/၂၀၁၁ တို့ဖြင့် အမှုဖွင့် အရေးယူ ထားကြောင်း သိရသည်။
မိုးယံ
0 comments :
Post a Comment