ဘာသာပြန်သူရဲ့ ဒုက္ခ

ဖြစ်မှဖြစ်ရလေ ဘာသာပြန်ဆရာရယ် လို့ပဲ ညည်းရတော့မလား မသိပါဘူး။

ဖေဖော်ဝါရီ ၁၃ ရက်နေ့ ရက်စွဲနဲ့ ထုတ်ဝေတဲ့ မြန်မာအစိုးရရဲ့ ဝါဒဖြန့်သတင်းစာတွေထဲမှာပေါ့ဗျာ။ မြန်မာဘာသာနဲ့ ရေးထားတဲ့ “ရန်ကြီးအောင်” ဆိုသူရဲ့ ဆောင်းပါးတပုဒ်ကို ဖတ်မိပါတယ်။

ဒီလိုဆိုတော့ ဧရာဝတီ ပရိသတ်တွေက ပြောဦးမယ်။ ကိုတာတေ တယောက် ရှာရှာဖွေဖွေ အားအားယားယား မဟုတ်တာတွေ ရှာကြံရေးတဲ့ ဆောင်းပါးကိုပဲ အချိန်ကုန်ခံ ဖတ်ရ သလားလို့ ...။ ဖတ်ရပါတယ်။ ဘာကြောင့်ဆို တခါတလေကျရင် အဲဒီ သတင်းစာ ဆောင်းပါးတွေကို ဖတ်ပြီး ချဲဂဏန်း တွက်သလို ပြောင်းပြန်လှန်သင့်လှန်ပြီး အဓိပ္ပာယ် ကောက်ရတယ်၊ တခါတလေကျတော့ ကိုတာတေတို့ မသိသေးတာတွေ အဲဒီဆောင်းပါးတွေက ရေးပြသဗျ (တခါတလေ သူတို့ပေါင်သူတို့ လှန်ထောင်းမှန်းမသိ ထောင်းပြထားတာတွေကျ ဟာသ တပုဒ်လိုတောင် ရယ်ရသေး)

ထားပါတော့ ရန်ကြီးအောင်ရဲ့ ဆောင်းပါးကိုပဲ ပြောပါရစေ။ ခုတလောမှာ ဒေါ်အောင်ဆန်းစုကြည်နဲ့ အနောက်၊ အမေရိကန်၊ ဥရောပ နိုင်ငံတွေရဲ့ ပိတ်ဆို့မှု အကြောင်းကို အပ်ကြောင်းထပ်အောင် ဝေဖန်ပြောဆိုမှုတွေချည်း ဆက်တိုက်ဆိုသလို ရေးနေတာ တွေ့ကြရမှာပါ။ အဲဒီလို ရေးခြင်းအားဖြင့် ဆန်ရှင်ဆိုတဲ့ ပိတ်ဆို့မှုကို စစ်ဗိုလ်ချုပ်၊ စစ်ဗိုလ်ပြုတ်တွေ ဘယ်လောက်ထိ ဆတ်ဆတ်ခါ နာနေ၊ ထိနေတယ်ဆိုတာ ကိုတာတေ့ထက် ပါးတဲ့ ပရိသတ်က ပိုသိမယ် ထင်ပါတယ် (ဦးတေဇကြီးတောင် တန်ပြန်ဆန်ရှင် ဘာညာ အော်သေးတာလေ - ဒါက စကားချပ်ပါ)

ဒီ ၁၃ ရက်နေ့ ဆောင်းပါးကလည်း အဲဒီလိုပဲ ပိတ်ဆို့မှုကို မမှုပါဘူးဆိုပြီး တကယ်တမ်းမှာ မှုနေတဲ့ ပုဆိုးခြုံထဲက လက်သီးပြ ဆောင်းပါး တပုဒ်ပါပဲ။ မကြာသေးခင်ကမှ ဒေါ်အောင်ဆန်းစုကြည်နဲ့ NLD က ပိတ်ဆို့မှုနဲ့ ပတ်သက်လို့ ကြေညာချက်တစောင် ထုတ်ပြန်လိုက် ပြန်တော့ ပိုပြီး ဆတ်ဆတ်ခါ နာကုန်ကြတာပေါ့လေ ...။

NLD ရဲ့ ကြေညာချက်ကို အဲဒီ ရန်ကြီးအောင် က ခြုံပြီး ဒီလို နားလည်ပါသတဲ့ ...“ပိတ်ဆို့မှုတွေကို အနောက်နိုင်ငံတွေက သူတို့ဟာသူတို့ ချမှတ်ခဲ့တာဖြစ်ပြီး ဒီပိတ်ဆို့မှုတွေ လျော့ချင်ရင်တော့ အဲဒီ ပိတ်ထားတဲ့ နိုင်ငံတွေက ပြောသလို လိုက်နာ၊ ပြောင်းလဲမှုတွေလုပ် ... ၊ အနောက်နိုင်ငံတွေကတော့ ပိတ်ဆို့မှု တိုးဖို့၊ လျှော့ဖို့ ပြောင်းလဲဖို့ NLD နဲ့ ဆွေးနွေးပါ” ဆိုပဲ ... ကိုတာတေလည်း မြန်မာလိုတော့ သေသေချာချာ ဖတ်တတ်တယ် လို့တော့ ကိုယ့်ကိုယ်ကိုယ် ထင်တာပဲ ... ဒေါ်အောင်ဆန်းစုကြည်နဲ့ NLD ရဲ့ ကြေညာချက်ကို ဖင်ပြန်ခေါင်းပြန် သေသေချာချာ ဖတ်ကြည့်ပါတယ်။ NLD နဲ့ ဆွေးနွေးပါလို့ ပြောထားတာ မဟုတ်ပါဘူး။ ပိတ်ဆို့မှုတွေ တိုးဖို့ လျှော့ဖို့ ကိစ္စ ညှိနှိုင်းဆွေးနွေး မှုတွေ လုပ်ဖို့အတွက် NLD က တောင်းဆိုပါတယ် လို့ ရေးထားတာပါ။ ရန်ကြီးအောင်က မြန်မာလို သေချာ မဖတ်တတ်ဘဲ ရမ်းတုတ်ထားတာ ထင်ပါရဲ့။ ဒါက တကတ်ပေါ့လေ။

အဲ ... ရန်ကြီးအောင်က မြန်မာလို သေချာ မတတ်တဲ့အပြင် ရှိသေးသဗျ။ အဲဒီ “ပိတ်ဆို့မှု၊ ဒေါ်စုကြည်နှင့် NLD”်ဆိုတဲ့ ဆောင်းပါးကို သိုးဆောင်းဘာသာနဲ့ အဲဒီနေ့ထုတ် “နယူးလိုက်ထ်အော့ဖ် မြန်မာ” ဆိုတဲ့ သတင်းစာမှာ ပါလာသေးတယ်။ ဘာသာပြန်သူကတော့ နှစ်ယောက်ပါ ... YM+ST တဲ့ ... ဘယ်သူတွေလည်းတော့ သိဘူးနော်။ သို့သော် ....

ရန်ကြီးအောင် ဆောင်းပါးကို ကိုတာတေက သေချာ ဖတ်ကြည့်လိုက်တော့ ... အပေါ်က ဘယ်သို့ဘယ်ညာ ပိတ်ဆို့မှုတွေကို မမှုတဲ့အကြောင်း၊ မြန်မာပြည်ကြီးက တိုးတက်ပြောင်းလဲနေပြီဖြစ်တဲ့အကြောင်း၊ ဒီလို တိုးတက် ပြောင်းလဲနေတာတွေကို ဒေါ်အောင်ဆန်းစုကြည်နဲ့ NLD က သိလျက်နဲ့ ဖြစ်စေ မသိလို့ဖြစ်စေ ဆက်ပြီး လမ်းလွှဲလိုက်နေဦးမယ်ဆိုရင် .... “သမိုင်းရဲ့ ဂိတ်ဆုံးကို ဦးတည်သွားဖွယ်သာ ရှိကြောင်း” ဆိုပြီး သတိပေး လိုက်တယ်ဆိုပဲ။

အဲသမှာ ကိုတာတေက လျှာက ခပ်ရှည်ရှည်ဆိုတော့ မြန်မာလို ဖတ်ရတာ အားမရဘဲ အင်္ဂလိပ်လိုပါ အဘိဓာန်ကြီး ချပြီး ဖတ်မိတယ်။ အင်္ဂလိပ်လို “သမိုင်းရဲ့ဂိတ်ဆုံးကို” ဘယ်လိုများ ဦးတည်မလဲ လို့ပေါ့။ အမယ် တွေ့ပါပြီ ... စာလုံးမည်းကြီးတွေနဲ့ “They will meet their tragic ends” တဲ့ဗျာ ...။ ကိုတာတေလည်း ဘယ်ရမလဲ အဘိဓာန် ပေါင်းစုံလှန်ပြီး ရှာကြည့်တာပေါ့။ မြန်မာလို ဘာသာပြန်ကြည့်လိုက်တော့ ကိုတာတေ တောင် ငိုချင်သလို ဖြစ်သွားတယ်။ NLD အနေနဲ့ “အလွမ်းဇာတ်သိမ်းနဲ့ ကြုံရမယ်” ... တဲ့။ လွမ်းစရာ လေးပါလားနော်။ သမိုင်းလည်း မပါ၊ ခဝဲခြံလည်းမပါ၊ အင်းစိန်အနံ့တော့ နည်းနည်းပါသလားလို့ ... (ဘာသာ ပြန်တဲ့သူအတွက်ပြောတာပါ) ဂိတ်လည်းမဆုံးဘူး ဆိုတော့ ပတ်စီးရမယ် ထင်တယ်။

ပထမတော့ ထင်လိုက်တယ် ဒီ ဘာသာပြန်ဆရာ အတော်နုတာပဲလို့ ... ကဗျာဆရာလား မသိဘူးပေါ့လေ။ သို့သော် ကိုတာတေ ကြားဖူးထားတဲ့ အစိုးရ သတင်းစာတိုက်တွေ အကြောင်းကလည်း ရှိသေးသကိုး ...။ ဘာလဲ ဆိုတော့ ... နေ့စဉ်ထုတ်သတင်းစာမှာထည့်မယ့် သတင်းတွေက အထက်ကလာတဲ့အကြောင်း၊ အထူးသဖြင့် မျက်နှာဖုံးသတင်းတွေ၊ နိုင်ငံတော်နဲ့ ဆိုင်တဲ့သတင်းတွေက အထက်ကလာတဲ့အတိုင်း သည်၊ ၏ မလွဲ ထည့်ရတဲ့ အကြောင်း၊ အဲဒီလို ထည့်ပြီးတဲ့အခါမှာလည်း အချော တစောင်ရိုက်ပြီးရင် နိုင်ငံတော် အကြီးအကဲ (အယ်ချုပ် မဟုတ်) ကို ပြရတယ် ဆိုတဲ့အကြောင်း၊ နိုင်ငံတော်အကြီးအကဲက ကြိုက်တော်မမူရင် ဟိုဟာဖြုတ်၊ ဒီဟာဖြည့်၊ အပေါ်အောက်လဲ (နာမည်တွေပြောပါတယ်။ နာမည်ကလည်း အပေါ်အောက် ထားတာ အရေးကြီး သတဲ့၊ ဘာလို့ဆို ဗိုလ်ချုပ်မှူးကြီး စိတ်တော်တွေ့တဲ့သူက အပေါ်၊ စိတ်တော်မတွေ့ရင်အောက်။ ဓာတ်ပုံလည်း အဲဂလိုပဲ) အဲလို စိတ်ကြိုက်တွေ့မှ အယ်ချုပ်က ထပ်စစ် ... ပြီးမှ ပြည်သူလူထုအတွက် ရိုက်ရတာတဲ့။

ဒီတော့ “သမိုင်းရဲ့ ဂိတ်ဆုံး” ကို “tragic ends” လို့ ဘာသာပြန်တဲ့ကိစ္စ နိုင်ငံတော် အကြီးအကဲက မမြင်လိုက်တာ မဖြစ်နိုင်ဘူး၊ သူက အင်္ဂလိပ်စာ မတတ်သည့်တိုင် သူ့ဘေးနားက အင်္ဂလိပ်လို တတ်တဲ့သူက ပြောမှာပဲ။ နောက်တချက် ဖြစ်နိုင်တာကတော့ မြန်မာလိုတမျိုး၊ အင်္ဂလိပ်လိုတမျိုး လုပ်တဲ့ ကိစ္စပဲ။ မြန်မာပြည်မှာ ဥပဒေ နှစ်မျိုးရှိတယ်၊ လိုရင်တမျိုး၊ မလိုရင်တမျိုး ဆိုတာလိုပဲ ... မြန်မာ သတင်းစာ မှာလည်း House style နှစ်မျိုးရှိတယ်လို့ ပြောရမယ် ထင်တယ်။ မြန်မာလိုကျ တမျိုး၊ အင်္ဂလိပ်လိုကျ တမျိုးပေါ့။

မြန်မာသတင်းစာက မြန်မာတွေပဲ ဖတ်တာဆိုတော့ ရေးချင်တာကို ရေးချင်သလို ရေး၊ သတင်းသမား လိုက်နာရမယ့် စည်းကမ်းတွေ ဘာတွေ ဒီမြန်မာတွေ နားလည်တာ မဟုတ်ဘူး၊ ချကွ ဆိုပြီး ရေးထုတ်လိုက်တယ်။

အင်္ဂလိပ်လိုကျတော့ သံအရာရှိတွေ၊ နိုင်ငံခြားသားတွေ ဖတ်တာဆိုတော့ နိုင်ငံတကာကို ပြောချင်တာလေးတွေ ဖုံးဖုံးဖိဖိ အိနြေ္ဒရရနဲ့ ဓာတ်ကြမ်းမတိုက်ဘဲ ... တောင်းပန်သလိုလို ... ဘီလူးတယောထိုးတာလိုလို ပျော့စိစိ လုပ်တယ် ... ။ သြော် ... တတ်လည်း တတ်နိုင်ပါ့။

ဒါပေမယ့်ပေါ့လေ ... ကိုတာတေကတော့ ဘန်ကီမွန်းကြီးစကား ငှားသုံးရတော့မှာပဲ ... စိုးရိမ်တယ် လို့။ ဘာသာပြန်တဲ့သူအတွက် စိုးရိမ်မိတယ်။ ဘာကြောင့်လဲဆိုတော့ မြန်မာပြည်ရဲ့ ဥပဒေ နှစ်မျိုးကြောင့်ပါပဲ။ လိုတမျိုးအချိန်ကျ အိုကေပေမယ့်၊ မလိုတမျိုးအချိန်ကျ ... အင်း သမိုင်းရဲ့ ဂိတ်ဆုံးတင်မကဘဲ အင်းစိန်ရဲ့ ဂိတ်ဆုံးကိုပါ မျက်စောင်းထိုးနိုင်တယ် မဟုတ်လား ...။

ရန်ကုန်သားတာတေ