ပြည်တွင်းအပြောင်းအလဲနဲ့ ပြည်ပအခြေစိုက်မီဒီယာ

(Financial Times မှာ ဂွင် ရော်ဘင်ဆင် ရေးသားတဲ့ Myanmar’s dissident media feels pinch amid reforms ကို ဆီလျော်အောင် ဘာသာပြန်ပါတယ်)

ပြည်တွင်းက လွတ်လပ်တဲ့မီဒီယာတွေ ရက်ရက်စက်စက် နှိပ်ကွပ်ခံနေရချိန်မှာ မြန်မာ့နိုင်ငံရေးနဲ့ သက်ဆိုင်တဲ့ကိစ္စတွေကို အကျဉ်းထောင်အခြေအနေကနေ တိုင်းရင်းသားပဋိပက္ခတွေအထိ ရဲရဲရင့်ရင့် ရေးသားနေတာမို့ ဧရာဝတီမဂ္ဂဇင်းကတော့ ယုံကြည်စိတ်ချရတဲ့ သတင်းတင်ပြမှုတွေကြောင့် ကျော်ကြားလာခဲ့ပါတယ်။

၁၉၈၈ ခုနှစ် ဒီမိုကရေစီ တောင်းဆိုအုံကြွမှုကို စစ်တပ်က အကြမ်းဖက်ဖြိုခွဲခဲ့ပြီးတဲ့နောက် နိုင်ငံကနေ ထွက်ခွာလာခဲ့ကြတဲ့ တက်ကြွလူငယ်တွေက ဧရာဝတီကို ထူထောင်ခဲ့ကြတာပါ။ ထိုင်းနိုင်ငံမှာ အခြေပြုတဲ့ ဧရာဝတီဟာ မြန်မာပြည် အပြောင်းအလဲတွေအတွက် ဆက်တိုက်လှုံ့ဆော်ခဲ့ပြီး သြဇာရှိတဲ့ သတင်းဌာနတခု ဖြစ်လာခဲ့ပါတယ်။ အခုဆိုရင် နိုင်ငံရေးအကျဉ်းသား လွှတ်ပေးမှုကနေ ဆင်ဆာလျှော့ချမှုအထိ ပြီးတော့ လွတ်လပ်တဲ့ ရွေးကောက်ပွဲကျင်းပမယ်ဆိုတဲ့ ကတိကဝတ် စသဖြင့် ဧရာဝတီက လှုံ့ဆော်ခဲ့တဲ့ အပြောင်းအလဲတွေဟာ မြန်မာပြည်မှာ ဖြစ်ပေါ်နေကြပါပြီ။

သံခင်းတမန်ခင်းအရ အထီးကျန်ဖြစ်နေရာကနေ နိုင်ငံတကာ မိသားစုထံ ပြန်ဝင်လာတဲ့ မြန်မာအစိုးရရဲ့ လုပ်ရပ်ကို ကမ္ဘာကြီးက ကြိုဆိုနေချိန်မှာတော့ ဧရာဝတီက သူ့ရဲ့ပုံနှိပ်မဂ္ဂဇင်းကို နောက်ဆုံးအကြိမ်အဖြစ်နဲ့ ဒီတပတ်ထဲမှာ ထုတ်ဝေပါတော့မယ်။ ဧရာဝတီဟာ ကိုယ့်ရဲ့အောင်မြင်မှုကြောင့် ကိုယ်ကိုယ်တိုင် ဒုက္ခရောက်ရပြီလို့ ဆိုနိုင်ပါတယ်။

တကြိမ်မှာ အုပ်ရေ ၅၀၀၀ လောက်ပဲထုတ်ဝေပြီး မှာယူခ တနှစ်စာ ဒေါ်လာ ၅၀ ပဲကျပေမယ့် ဧရာဝတီမဂ္ဂဇင်းဟာ “နိုင်ငံတကာရဲ့ မြန်မာပြည်ဆိုင်ရာမူဝါဒတွေကို ကိုင်လှုပ်တဲ့နေရာမှာ နှစ်ပေါင်း ၂၀ ကျော် အထောက်အကူပေးနိုင်ခဲ့ တယ်၊ ဒီ့အတွက် ကျနော်တို့ ဂုဏ်ယူတယ်” လို့ မဂ္ဂဇင်းရဲ့ စီမံအယ်ဒီတာ ကိုကျော်စွာမိုးက ဆိုပါတယ်။

ကိုကျော်စွာမိုးရဲ့အစ်ကိုဖြစ်သူ ဧရာဝတီ အယ်တီတာချုပ် ကိုအောင်ဇော်ကတော့ ဧရာဝတီဟာ မကြာခင်က ဖြစ်ခဲ့တဲ့ နိုင်ငံထဲက အပြောင်းအလဲတွေကြောင့် အကျိုးလည်းရှိသလို ထိခိုက်မှုလည်း ရှိတယ်လို့ပြောပါတယ်။ “မြန်မာပြည်မှာ စစ်မှန်တဲ့အပြောင်းအလဲ ဖြစ်နေပြီဆိုရင် အဲ့ဒါဟာ ကျနော့်တို့အတွက်လည်း ကြီးမားတဲ့ အသွင်ကူးပြောင်းမှုတရပ် ဖြစ်တယ်” လို့ သူက ဆိုပါတယ်။

ငွေကြေးအခက်အခဲနဲ့ ကြုံတွေ့ရတာမို့ ဧရာဝတီပုံနှိပ်မဂ္ဂဇင်းဟာ ၂၀၁၀ ရွေးကောက်ပွဲအပြီးမှာ ရပ်တန့်လုနီးပါး ဖြစ်ခဲ့ရပါတယ်။ ရွေးကောက်ပွဲဟာ လိမ်ညာမှုတွေနဲ့ပြည့်နှက်နေတယ်၊ အတုအယောင်ဖြစ်တယ် စသဖြင့် ကျယ်ကျယ်ပြန့်ပြန့် ကန့်ကွက်ရှုတ်ချခဲ့ကြပေမယ့် ဒီရွေးကောက်ပွဲကပဲ အစိုးရအတိုက်အခံတချို့ကို လွှတ်တော် ထဲရောက်စေခဲ့တယ်။ ပြီးတော့ အပြောင်းအလဲရဲ့ ကနဦးအခြေအနေတွေကို “အားပေးအားမြှောက်” ပြုတဲ့အနေနဲ့ အလှူရှင်အဖွဲ့အစည်းတချို့ဟာ ပြည်တွင်းကအဖွဲ့တွေကို ပိုဦးစားပေးဖို့ ပြည်ပက ဧရာဝတီလိုမျိုးကို ငွေကြေး ဖြတ်တောက်တာတွေ ဖြစ်စေခဲ့တယ်လို့ သံတမန်တဦးက ရှင်းပြပါတယ်။

ပုံနှိပ်မဂ္ဂဇင်းဆက်ထုတ်ဖို့ ဆန္ဒပြင်းပြတဲ့ ညီအစ်ကိုနှစ်ယောက်ကတော့ မဂ္ဂဇင်းကို တလတကြိမ်ကနေ သုံးလတကြိမ် ပြောင်းထုတ်မယ်၊ တချိန်တည်းမှာလည်း ဧရာဝတီရဲ့ အွန်လိုင်းစာမျက်နှာတွေမှာ အကြောင်းအရာတွေတိုးချဲ့ပြီး အရှိန်မြှင့်မယ်လို့ ဆုံးဖြတ်ချက်ချခဲ့ပါတယ်။ ပြီးခဲ့တဲ့လတွေအတွင်းမှာ ဧရာဝတီ အွန်လိုင်းပရိသတ် အရေအတွက်ဟာ ဝေါကနဲ မြင့်တက်လာခဲ့ပါတယ်။ ဧရာဝတီရဲ့ ၂၀၁၁ ကိန်းဂဏာန်းတွေအရ အစိုးရက အွန်လိုင်းပိတ်ဆို့မှု ရုပ်သိမ်းလိုက်တဲ့ သြဂုတ်လကစပြီး ဝက်ဘ်ဆိုဒ်တွေကို လာရောက်ကြည့်ရှုသူ တလကို ၂ သန်းခွဲလောက်ရှိရကနေ ပြီးခဲ့တဲ့ လတွေမှာ ၆ သန်းနီးပါး ရှိလာတယ်လို့ သိရပါတယ်။

အဲ့ဒီလို တိုးတက်မှုတွေ ရှိလာပေမယ့်လည်း အရပ်သားအမည်ခံ မြန်မာအစိုးရက အပြောင်းအလဲတွေကို ရည်ရွယ် ချက်ရှိရှိနဲ့ ထုတ်ပြနေတာမို့ အလှူရှင်အဖွဲ့အစည်းတွေဟာ သူတို့ရဲ့ ငွေကြေးအကူအညီ ဦးစားပေးမှုကို လားရာ ပြောင်းသွားကြပါတယ်။ ဧရာဝတီရဲ့ အဓိကအလှူရှင်တွေထဲက အနည်းဆုံး ဥရောပအစိုးရနှစ်ရပ်ဟာ သူတို့ရဲ့ အကူအညီတွေကို ပြန်လည်ရုပ်သိမ်းသွားကြပါပြီ။

ဒိန်းမတ်နဲ့ နော်ဝေးအပါအဝင် ဥရောပနိုင်ငံတချို့ကတော့ ပြည်ပအင်အားစုတွေကို ထောက်ပံ့မယ့်အစား သူတို့ရဲ့ ငွေကြေးတွေကို ပြည်တွင်းက NGO တွေအတွက် တိုးမြှင့်သုံးစွဲခဲ့ကြပါတယ်။ အလှူရှင်အတော်များများက ပြည်ပအင် အားစုတွေကြားမှာရှိတဲ့ “တခြားသူအပေါ် မှီခိုလွန်းတဲ့စိတ်နေစိတ်ထား” အပေါ် ဝေဖန်ကြတယ်၊ ပြီးတော့ အဲ့ဒီအဖွဲ့တွေ အတွက် ငွေကြေးထောက်ပံမှုဆိုင်ရာ စည်းမျဉ်းစည်းကမ်းတွေကိုလည်း ပိုပြီးတင်းကျပ်လာနေကြတယ်လို့ ဗြိတိသျှ အစိုးရ အကူအညီပေးရေးအရာရှိတဦးက ပြောပါတယ်။

“အလှူရှင်တွေလည်း တဖြည်းဖြည်းနဲ့ ခြေကုန်လက်ပန်းကျလာပြီလေ၊ ကျနော်တို့လို အဖွဲ့မျိုးကိုပဲ ထောက်ပံ့နေရလုိ့ မဟုတ်ပါဘူး၊ အတိုက်အခံ လှုပ်ရှားမှုတခုလုံးကို ထောက်ပံ့နေရလို့ပါ” လို့ ကိုအောင်ဇော်က မှတ်ချက်ပေးပါတယ်။ “ဒါဟာလည်း လုံးလုံးအဆိုးချည်းမဟုတ်ပါဘူး၊ အခုလိုဖြစ်တာက ကျနော်တို့ကို ပိုပြီး လွတ်လွတ်လပ်လပ် ဖြစ်စေ လိမ့်မယ်၊ ပိုပြီးတော့လည်း အားကောင်းလာစေပါလိမ့်မယ်” လို့ သူက ဆိုပါသေးတယ်။

ပြည်ပအဖွဲ့အစည်းတွေကို ငွေကြေးလျှော့ချဖြတ်တောက်တဲ့ အလှူရှင်အဖွဲ့အစည်းတွေရှိသလို ဆက်လက်ထောက်ပံ့ နေတဲ့ အဖွဲ့အစည်းတွေလည်း ရှိကြပါတယ်။ အဲ့ဒီအထဲမှာ ပရဟိတလုပ်ငန်းတွေအတွက် မကြာသေးခင်က ရန်ကုန်မှာ ရုံးသွားဖွင့်ခဲ့တဲ့ အမေရိကန်သူကြွယ်ကြီး ဂျော့ခ်ျဆိုးရော့စ် (George Soros) ရဲ့ Open Society Foundations (OSF) လည်း အပါအဝင်ဖြစ်ပါတယ်။ ဧရာဝတီအတွက် OSF က ယခင်ထက် တိုးမြှင့်ထောက်ပံ့ခဲ့ပါတယ်။

“မကြာခင်က နိုင်ငံတွင်းမှာဖြစ်ပေါ်ခဲ့တဲ့ အပြောင်းအလဲတွေနဲ့အတူ မီဒီယာဟာလည်း တစုံတရာ ပိုလွတ်လပ်သလို ရှိလာပါတယ်၊ ဒါပေမယ့် မီဒီယာနဲ့ပတ်သက်တဲ့ ဥပဒေတွေကတော့ ဒီအတိုင်းရှိနေဆဲပဲ။ ဘာတခုမှ မရုပ်သိမ်း သေးဘူး” လို့ OSF ရဲ့ မြန်မာနိုင်ငံအစီအစဉ် ညွှန်ကြားရေးမှူး မော်ရင်းအောင်သွင် (Marueen Aung-Thwin) က ဆိုပါတယ်။

မြန်မာ့အရေး စောင့်ကြည့်လေ့လာနေတဲ့ အခြားသူတွေကတော့ ဧရာဝတီရဲ့ ဇာတ်သိမ်းဟာ ပြည်တွင်း အဆက်အသွယ်ကောင်းတွေရှိပြီး အစိုးရလုပ်ရပ်တွေအပေါ် ဝေဖန်ထောက်ပြနေကြတဲ့ ပြည်ပအဖွဲ့အစည်းတွေရဲ့ တန်ဖိုးရှိတဲ့အခန်းကဏ္ဍကို အချိန်မတိုင်ခင် အဆုံးသတ်စေမယ့် အရိပ်အယောင်လားလို့ စိုးရိမ်နေကြပါတယ်။

ဧရာဝတီဟာ “သတင်းအချက်အလက်ရယူဖို့ သိပ်ကောင်းတဲ့နေရာတခုပါ” လို့ မြန်မာ့အရေးနဲ့ပတ်သက်ပြီး ထင်ရှားတဲ့ သုံးသပ်သူ၊ စာရေးဆရာ ဘာတ်တေးလ် လင့်တ်နာ (Bertil Linter) က ပြောပါတယ်။ “ပြည်ပမီဒီယာတွေ ပျောက် ကွယ်သွားမယ်ဆိုရင်တော့ တကယ့်ကိုဝမ်းနည်းစရာပါ။ မြန်မာပြည်ထဲမှာ “နွေဦး” လို့ခေါ်နေတဲ့အရာက ဘယ်လောက် ထိ ရေရှည်ခံမလဲဆိုတာ ဘယ်သူမှမသိပါဘူး။ အခြေအနေကလည်း ပြောင်းပြန်ပြန် မဖြစ်သွားနိုင်တာမျိုး မဟုတ်ဘူး” လို့ သူက ဆက်ပြောပါတယ်။

ဆင်ဆာဖြတ်တောက်မှုက အရင်ထက်စာရင် သက်သာသလိုရှိပေမယ့် လက်တွေ့မှာတော့ ဆက်ရှိနေဆဲဖြစ်တဲ့အပြင် သတင်းဂျာနယ်တွေအနေနဲ့ ရေးသားတဲ့အရာတွေကိုတင်ပြပြီး တရားဝင် အတည်ပြုချက်ယူနေရတုန်းပဲလို့ ရန်ကုန်အခြေစိုက် သတင်းထောက်တဦးက ဆိုပါတယ်။ “ကျနော်တို့ သိခဲ့သမျှတွေထဲက အပြင်းထန်ဆုံး ဆင်ဆာဖြတ်တောက်မှု တချို့ကို ဒီလိုအချိန်မျိုးမှာ ကျနော်တို့ ရင်ဆိုင်ကြုံတွေ့နေရတယ်။ ဖြစ်သင့်တာနဲ့ ဖြစ်နေတာက တကယ့်ကို တခြားစီပဲ” လို့ အခြားသတင်းထောက် တယောက်ကလည်း မှတ်ချက်ပေးပါတယ်။

ဧရာဝတီပုံနှိပ်မဂ္ဂဇင်းရဲ့နောက်ဆုံးအခြေအနေနဲ့ ပတ်သက်ပြီး “ဒီလိုအောင်မြင်ပြီး သြဇာရှိတဲ့ မဂ္ဂဇင်းမျိုးကို တဖြည်းဖြည်း ပျောက်ကွယ်သွားခွင့်ပြုရတာဟာ တကယ့်ကို ဝမ်းနည်းစရာ ကောင်းပါတယ်” လို့ ကိုကျော်စွာမိုးက ပြောပါတယ်။ “ဒီလို ပုံနှိပ်မဂ္ဂဇင်းမျိုးဟာ မြန်မာပြည်အတွက် အခုအချိန်မှာရော အနာဂတ်မှာပါ မရှိမဖြစ် လိုအပ်နေသေးတာပါ။ ဘယ်လိုဘဲဖြစ်ဖြစ် ကျနော်တို့မှာ ကျနော်တို့အလုပ်ကို ဆက်လုပ်ဖို့ အနိမ့်ဆုံးအားဖြင့် ဝက်ဘ်ဆိုဒ်တွေတော့ ရှိပါသေးတယ်” လို့ သူက ဆိုပါတယ်။