တင်ဗညို(ဧရာ)
![](http://4.bp.blogspot.com/-meM0XqTyrq8/T8sT2kAUhuI/AAAAAAAAYNE/fJupphgLP3Y/s400/534335_304037103016370_1355875878_n3.jpg)
ဘိုကလေးမြို့ကို ဖြတ်ကျော်လို့ တောင်ဘက်စူးစူးရှိ ကပ္ပလီပင်လယ်ပြင်ထဲအထိ စီးဝင်သွားတဲ့ ဂုံညင်းတန်းမြစ်ကြီးရဲ့ မြစ်ဆုံထိပ်မှာ အင်မတန်ကြီးမားလှပတဲ့ ညို့ညို့မှိုင်းမှိုင်းနဲ့ ကျွန်းကြီးတစ်ကျွန်းဟာ ဘိုကလေးမြို့ရဲ့ ကျက်သရေဆောင် မိန်းမလှ ကျွန်းညိုကြီးပါပဲ။ အဝေးကမြင်တွေ့ရတဲ့အခါ စိမ်းညို့မှိုင်းပြီး မြင့်မြင့်မားမားပေါက်နေတဲ့ ပင်လယ်ရေငန်ကြိုက်အပင်တွေကြောင့် တောင်မြင့်မြင့်တစ်လုံးလို့ ထင်မှတ်မှားလောက်ပါတယ်။ ပင်လယ်ရေငန် ကြိုက်တဲ့အပင်တွေဟာလဲ အပြိုင်အဆိုင် အစီအရီ အကိုင်းချင်းယှက်၊ အခက်ချင်းဝေ အရွက်ချင်းဆက်နေတာကို မြင်တွေ့ကြရသူတွေအဖို့ ရင်ကို အေးမြလန်းဆန်းစေပါတယ်။
မြစ်ဝကျွန်းပေါ်ဒေသ ဒီရေတောကြီးတွေဟာ အမြဲစိမ်းလန်းနေတဲ့အတွက် ရှုမောမဆုံးနိုင်အောင် မြင်ရသူရဲ့ နှလုံးသည်းစိုင်ကို ဆွဲကိုင်ညှို့ယူဖမ်းစားနိုင်စွမ်းရှိပါတယ် လို့ တစ်ချိန်ကရောက်ဖူးသူတိုင်း၊ မြင်ဖူးတွေ့ဖူးသူတိုင်းက ပြောစမှတ်ပြုရတဲ့ ကျွန်းကြီးတစ်ကျွန်းပါ။ ဘိုကလေးမြို့ရဲ့ ကျက်သရေဆောင်ကျွန်းကြီးလို့ ပြောရရင်လဲ မမှားပါဘူး။ ဘိုကလေးမြို့ကို လာရောက်လည်ပတ်သူတိုင်း ဒီကျွန်းကြီးရဲ့ ရာဇဝင်သမိုင်း အကြောင်းတွေကို မေးကြမြန်းကြ စုံစမ်းကြ၊ ကိုယ်တိုင် သွားရောက်ကြည့် ရှုခံစားကြနဲ့။ ပြီးတော့ ကျွန်းကြီးရဲ့ မြောက်ဘက်အတွင်းမှာ လွန်စွာဘုန်းတန်ခိုးကြီးတဲ့ မျောက်တစ်ရာ စေတီတော်မြတ်လဲ တည်ရှိနေတာဆိုတော့ ကျွန်းကြီးရဲ့ သာယာလှပမှုတွေကိုလဲခံစားရင်း ဘုရားလဲဖူးရင်းဆိုပြီး လာရောက်ကြသူတွေနဲ့ အလွန်ကိုစည်ကားလှပါတယ်။
"---တစ်နေ့ကို ဓားအလက်တစ်ရာလောက်က အမြဲလိုလို လှဲနေမယ်ဆိုရင် နောင်နှစ်အနည်းငယ်အတွင်းမှာ လွင်တီးခေါင်ကွင်းပြောင်ပြောင်ဘဝကို မလွဲမသွေ ရောက်သွားနိုင်ပါတယ်---"
အဲဒီလို လာရောက်ကြသူတွေဟာ မိန်းမလှကျွန်းကြီးရဲ့အကြောင်းကို သူပြောလူပြောနဲ့ ကြားဖူးကြတော့ ရေငန်ပိုင်သခင်နတ်ဦးရှင်နေတဲ့ ကျွန်းကြီးပဲဆိုပြီး သစ်ရွက်တစ်ရွက် သစ်ခက်တစ်ခက်ကိုတောင် မဆွတ်ရဲ မခူးရဲခဲ့ကြပါဘူး။ အဲ့ဒီအချိန်ကဆိုရင် တကယ်ကို လှတဲ့ကျွန်းကြီးပါ။ ကမ်းခြေတစ်လျှောက်သဘာဝအတိုင်း ပေါက်နေတဲ့ ကန့်မလာနဲ့ လမုပင်လေးတွေဆို လူကိုယ်တိုင် တိုင်းတာပြီးစိုက်ထားသလို၊ တစ်ပင်နဲ့တစ်ပင် အကွာအဝေးတူညီစွာနဲ့ ပေါက်နေတာဟာ အလွန်ကိုလှတာပါ။ လမုပွင့်နီနီလေးတွေနဲ့ အစီအရီ တန်းလို့ပေါက်နေတဲ့ လမုပင်ပျိုကလေးတွေဆိုရင် အမြင့်တူဆိုက်တူ ရွယ်တူတွေဖြစ်တော့ သင်္ကြန်အလှမဏ္ဍပ်က လှပျိုဖြူကလေးများလို ကြည့်မြင်ရသူအဖို့ လွန်စွာပဲ ပီတိဖြစ်ရပါတယ်။ ကန့်မလာသီး၊ လမုသီးတွေမှည့်တဲ့ ဝါဆိုဝါခေါင်လတွေမှာလဲ ဘယ်လိုလူမျိုးကမှ တစ်လုံးတစ်လေဆိုပြီး ခူးဆွတ်မစားရဲကြပါဘူး။ ကြွေသီးကိုသာ ကောက်ယူစားကြတာပါ။ ရေပြည့်ချိန်မှာတော့ ကန့်မလာသီးနဲ့ လမုသီးကိုကြိုက်တဲ့ ငါးတန်တွေက အပင်တွေရဲ့ အောက်ကစောင့်ပြီး စားကြပါတယ်။
Google Map မှာ တွေ့ရတဲ့ မိန်းမလှကျွန်း ကမ်းခြေ တနေရာ
အဲဒီတော့ ဒီကျွန်းကြီးဟာ တဖြည်းဖြည်းနဲ့အပင်တွေပိုကြီးလာပြီး အုပ်အုပ်ဆိုင်းဆိုင်း မှိုင်းမှိုင်းညို့ညို့နဲ့ လှချင်တိုင်းလှနေတော့တာပါပဲ။ မိန်းမလှကျွန်းကြီးကိုဖြတ်ပြီး အရှေ့ကမ်းဘက်ကိုသွားရင် အမာမြို့နဲ့ ဂေါ်ဒူကျေးရွာ၊ အနောက်ကမ်းဘက်ကိုသွားရင် ကဒုံကနိရွာကြီးနဲ့ အေရာရွာကို ရောက်နိုင်ပါတယ်။ အဲဒီမြို့ရွာတွေကို သွားလာကြတဲ့သူတွေက ကျွန်းကြီးကိုကြည့်ပြီး ပီတိဖြစ်ကြတယ်။ တစ်မျိုးလဲ ခံစားကြရတယ်။ တချို့က ကျွန်းကြီးကိုမြင်ရတာ စိတ်ထဲမှာတစ်မျိုးကြီးပဲ၊ လွမ်းသလိုလို အားငယ်သလိုလို ကြည်နူးသလိုလို ပြီးတော့ ကြောက်သလိုလိုလဲ ခံစားကြရတယ်လို့ အထက်အညာမြို့ရွာ တွေကလာကြသူတွေက ပြောပြဖူးပါတယ်။ အဲ့ဒီလို မြင်တွေ့ခဲ့ရဖူးသူတို့ရဲ့စိတ်မှာ ရသစုံခံစားချက်တွေ ဖြစ်ပေါ်ရတဲ့အကြောင်းက တခြားမဟုတ်ပါဘူး။ ကျွန်းကြီးရဲ့ အမည်ကြောင့်လို့ ပဲထင်မိပါတယ်။ ကျွန်းကြီးရဲ့အမည်က မိန်းမလှကျွန်းညိုကြီးလို့ ခေါ်ဆိုနေကြတာကြောင့်ပါ။
မိန်းမလှကျွန်းညိုကြီးကို ကြည့်ဖူး၊ မြင်ဖူးသူတိုင်းရဲ့စိတ်မှာ ရသစုံခံ စားချက်တွေ တကယ်ကိုဖြစ်စေခဲ့တာ အမှန်ပါ။ စက်လှေနဲ့သွားရင်ပဲဖြစ်ဖြစ်၊ ခရီးသည်တင် သင်္ဘောနဲ့သွားရင်ပဲဖြစ်ဖြစ်၊ ရေပြည့်ချိန်ဆိုရင် ကျွန်းကြီးရဲ့အနီးဆုံးကမ်းခြေကကပ်ပြီး သွားတတ်ကြပါတယ်။ အဲဒီအခါ ကျွန်းကြီးပေါ်က တောတိရစ္ဆာန်ကလေးတွေနဲ့ ငှက်မျိုးစုံကိုတွေ့မြင်ကြရတယ်။ ဒါ့အပြင် ကျွန်းကြီးရဲ့ အရှေ့အနောက်ပေါက်တဲ့ သောင်ချောင်း၊ ကျောက်ခဲချောင်း၊ ဖက်ခွံချောင်းတွေရဲ့ အဝမှာ မိကျောင်းကြီးတွေဟာ လေးငါးခြောက်ကောင်ပေါ်ပြီး ကူးနေတာလဲ တွေ့ကြရပါတယ်။ မိကျောင်းကြီးတွေနဲ့ မလှမ်းမကမ်းမှာ ပိုက်သမား တံငါသည်တွေ ငါးသားပုစွန် ရှာဖွေနေကြတာလဲ ရှိပါတယ်။ အဲဒီတံငါသမားတွေဟာ မိကျောင်းကြီးတွေကို အနှောင့်အယှက် မပြုသလို၊ မိကျောင်းကြီးတွေကလဲ တံငါသည်တွေကို အန္တရာယ် မပြုပါဘူး။ ရှေးလူကြီးသူမတွေရဲ့ ပြောစကားအရ ဆိုရင် တံငါကို မိကျောင်း မကိုက်၊ သူခိုးကို မြွေမကိုက် ဆိုသလိုပါပဲ။
မိန်းမလှကျွန်းညိုကြီးလို့ ခေါ်ဆိုကြတဲ့အတိုင်း ညို့မှိုင်းနေတာကတော့ အမှန်ပါ။ မိန်းမ၊ လှလှလေးတွေ မရှိပေမယ့် ချစ်စရာတောတိရစ္ဆာန် ကလေးတွေနဲ့ ငှက်ကျေးသာရကာ တွေကတော့ စုံလှပါတယ်။ တောပျော်သတ္တဝါလေးတွေဖြစ်တဲ့ တောဝက်၊ တောခွေး၊ ဒရယ်၊ ဆတ်၊ မျောက်၊ တောကြောင်၊ ဖျံ၊ လိပ်၊ ရောင်စုံမြွေမျိုးစုံ၊ ရောင်စုံငှက်မျိုးစုံဖြစ်တဲ့သိန်း၊ စွန်၊ ချိုးသိန်း၊ လင်းယုန်၊ ဒုန်း၊ ခရုစုတ်၊ ကြက်တူရွေး၊ သာလိကာ၊ ရေကြက်ဖမျိုးစုံ၊ ရေကြက်မ ပါးဖြူ၊ ပါးနီ၊ မျောက်နဲ့ ရိုးနီတို့အပြင် ဖွတ်နဲ့ခွေးအ တို့လဲ ရှိနေကြပါတယ်။ တောကြောင်ဆိုရင် ဝစိဖျောက်၊ ကြောင်မြင်း၊ ကြောင်နံ့သာနဲ့ဖျံဆိုရင် ဘဲလက်ဖျံနဲ့ ခွေးလက် ဖျံတို့ရှိကြပါတယ်။ သင်းခွေချပ်ကတော့ ရှားပါးသတ္တဝါဖြစ်ပါတယ်။ ဆေးဖက်ဝင်အပင်တွေဖြစ်တဲ့ တောတောင်နံကြီး၊ ဆေးသုံးခွအနီ၊ အနက်လဲလူ၊ တောရှောက်၊ သမန်းကျီးပေါင်း ဆင်တုံးမနွယ်၊ ရေချိုထွက်တဲ့ နွယ်နီ၊ နွယ်ဖြူနဲ့ ဓမင်းနွယ်တို့လဲ စုံလှပါတယ်။ နွယ်နီက အနီရောင်အပွင့်လေးတွေ၊ နွယ်ဖြူက အဖြူရောင်အပွင့်ကလေးတွေကို တစ်နှစ်လုံးမှာမှ ဝါဆိုလ တစ်လတည်းမှာသာ ပွင့်တတ်ပါတယ်။ အပွင့်က ပိတောက်လို အဆုပ်လိုက်၊ အခက်လိုက်ပွင့်လို့ အလွန်မွှေးပြီးလှပါတယ်။ နွယ်နီတစ်လံလောက်ကို ဖြတ်ယူပြီး ရေပုံးထဲကိုစိုက်ထောင်ထားလိုက်ရင် လူတစ်ယောက် ကောင်းကောင်း သောက်လို့ရတဲ့ ရေချိုတစ်ခွက်ရပါတယ်။ အလွန်ကိုအေးမြတဲ့ ရေပါလို့ သောက်ဖူးသူ တစ်ဦးက ပြောပြဖူးပါတယ်။
အဲဒါက လွန်ခဲ့တဲ့နှစ်ပေါင်း ၄ဝ လောက်က အခြေအနေပါ။ သစ်ကြီးဝါးကြီးတွေ၊ တောပျော်တိရစ္ဆာန်လေးတွေ၊ ဆေးဖက်ဝင်အပင်တွေ၊ ကျေးငှက်သာရကာမျိုးစုံနဲ့ အလွန်လှပသာယာခဲ့တဲ့ မိန်းမလှကျွန်းညို ကြီးပါ။ ဒီကနေ့ မိန်းမလှကျွန်းကြီးရဲ့ အခြေအနေကိုဆက်ပြီး ကြည့်ကြပါဦးမယ်။
"---အပင်မြင့်မြင့်တွေ ကမ်းစပ်က ကာရံနေပေမယ့် အတွင်းပိုင်းမှာတော့ ရှင်းလင်းလို့နေပါပြီ---"
ဧရာဝတီတိုင်း မြစ်ဝကျွန်းပေါ် ဒေသကြီးတစ်ခုလုံးမှာ၊ ပင်လယ်ဒီရေတောကြီး၊ အမြဲစိမ်းသစ်တောကြီးဆိုလို့ ဘိုကလေးမြို့နယ်ထဲက မိန်းမလှကျွန်းညိုကြီး တစ်ကျွန်းသာ၊ အကြီးမားဆုံးနဲ့ အလှပဆုံးကျွန်းကြီးအဖြစ် နှစ်ပေါင်းများစွာကတည်းက တည်ရှိနေခဲ့တာပါ။ နှစ်ပေါင်းများစွာကြာမြင့် အောင်တည်တံ့ခဲ့တဲ့ အဲဒီကျွန်းကြီးကို အရင့်အရင် အစိုးရမင်းတွေ လက်ထက်ကတည်းက ပိတ်တောအဖြစ် သတ်မှတ်ခဲ့ကြတာပါ။ ဒီကနေ့အထိလဲ ပိတ်တော(သစ်မခုတ်ရတော) အဖြစ် သတ်မှတ်ထားဆဲပါ။ ဒါပေမယ့် သစ်တောကြီးရဲ့တောင်ဘက်၊ မြောက်ဘက်နဲ့ အနောက်ခြမ်းလောက်မှာသာ အပင်မြင့်မြင့်တွေ ကမ်းစပ်က ကာရံနေပေမယ့် အတွင်းပိုင်းမှာတော့ ရှင်းလင်းလို့နေပါပြီ။ မြစ်ဝကျွန်းပေါ်ဒေသအတွင်းမှာရှိတဲ့ မြို့ကြီး မြို့ငယ်နဲ့ ရွာကြီးရွာငယ်တွေက သစ်ခိုးခုတ်သူတွေဟာ ကျွန်းကြီးရဲ့ အတွင်းကို ဝင်လို့ရတဲ့ ချောင်းငယ်ပေါင်းစုံကနေ ခိုးဝင်ကြလေရဲ့။
သစ်ခိုးခုတ်တဲ့သူတွေဟာ လွန်ခဲ့တဲ့ အနှစ်၂ဝ ကျော်လောက်က စလို့ တောကြီးထဲကို နည်းလမ်း အသွယ်သွယ်နဲ့ ဝင်ရောက်ခိုးခုတ်နေ ကြတာဖြစ်ပါတယ်။ ကျွန်းကြီးထဲကို အရှေ့ဘက်ကဝင်မလား၊ အနောက်ဘက်ကဝင်မလား။ အရှေ့ဘက်ကဝင်ရင် စိန်ခိုချောင်း၊ ဓမင်းထောင်ချောင်း၊ လဗတစ်ပင်၊ မိကျောင်း ခေါင်းပုတ်၊ ထော်ပိုင်၊ ခေါင်းကိုးလုံးချောင်းနဲ့ မျောက်တစ်ရာချောင်း။ အနောက်ဘက်ကတော့ သောင်ချောင်း၊ ပက်ခွံချောင်း၊ ကျောက်ခဲချောင်း၊ ချောင်းစောက်၊ သပြေချောင်း၊ ဗြူးချောင်း၊ ပိုးလောင်းလေး၊ ပိုးလောင်းကြီး၊ ဗျိုင်းချောင်း၊ လဗတစ်ပင်နဲ့ ကြောင်ဒေါက်ချောင်း တို့ဖြစ်ကြတယ်။ တကယ်တော့ သစ်ခိုးခုတ်သူတွေဟာ အနောက်ဘက်ချောင်းတွေက အဝင်များကြပါတယ်။
ပိတ်တောဖြစ်ပါလျက်နဲ့ အရှေ့ဘက်ခြမ်းမှာ တောပြုန်းနေပြီဆိုတာကလဲ အံ့သြစရာပါပဲ။
၂ဝဝ၈ ခုနှစ်က နာဂစ်မုန်တိုင်းကြီးကလဲ မွှေလိုက်တော့ အပင်ကြီးငယ်တွေဟာ တစ်ပင်ပေါ်တစ်ပင်ထပ်လို့ အလဲလဲအပြိုပြို ဖြစ်ခဲ့ပြန်ပါတယ်။ အဲ့ဒီအခါ အနီးပတ်ဝန်းကျင်ရွာတွေဟာလဲ မုန်တိုင်းကြီးရဲ့ဒဏ်ကြောင့် ရွာလုံးကျွတ်၊ အိမ်လုံးကျွတ် ပျက်ခဲ့ကြလေတော့ အသက်မသေဘဲကျန်ရှိတဲ့ ခိုကိုးရာမဲ့ပြည်သူတွေအတွက် နေအိမ်ကလေးတွေပြန်ဆောက်နိုင်ဖို့ မိန်းမလှကျွန်းကြီးအတွင်း လေလှဲပင်တွေကို ခုတ်ယူကြဖို့ ခွင့်ပြုခဲ့ကြောင်းသိရပါတယ်။
"---မြစ်ဝကျွန်းပေါ်ဒေသ တစ်ခွင်လုံးမှာ အလှပဆုံး၊ အသာယာဆုံး အကြီးမားဆုံး ကျွန်းကြီးတစ်ကျွန်းဟာ အသိမဲ့တဲ့ စီးပွားရှာသမား အရူးတွေရဲ့ ဓားအောက်မှာ ပျောက်ဆုံးကုန် ခန်းသွားရမယ်ဆိုရင်---"
အခုတော့ ပိုလို့ခုတ်လို့ကောင်း နေကြပါပြီ။ လေလှဲလို့လဲတဲ့ အပင်ရော၊ လေမလှဲဘဲ လူလှဲတဲ့အပင်ရော ခုတ်လိုက်ကြတဲ့အတွက် ကျွန်းကြီးရဲ့အတွင်းမှာ ရှင်းသွားခဲ့ပါပြီ။ တောတိရစ္ဆာန်ကလေးတွေဆိုရင်လဲ တောဝက်လောက်နဲ့ ခွေးအလောက်သာ ကျန်ရှိပါတော့တယ်။ အတော်ကလေး ရှားပါးသွားခဲ့ပါပြီ။ မိန်းမလှကျွန်းညို ကြီးနဲ့အတူ ဘေးမဲ့တောဖြစ်တဲ့ ဗြုန်းမွေးကျွန်းလဲ အတူတူဖြစ်ခဲ့ပါပြီ လေလှဲလို့ ပြိုလဲခဲ့ရတဲ့အပြင် လူကလဲလှဲဆိုတော့ ပိုဆိုးသထက် ဆိုးခဲ့ပါတော့တယ်။ တစ်နေ့ကို ဓားအလက်တစ်ရာလောက်က အမြဲလိုလို လှဲနေမယ်ဆိုရင် နောင်နှစ်အနည်းငယ်အတွင်းမှာ လွင်တီးခေါင်ကွင်းပြောင်ပြောင်ဘဝကို မလွဲမသွေ ရောက်သွားနိုင်ပါတယ်။
လွန်ခဲ့တဲ့နှစ်ပေါင်း ၄ဝ လောက်က မိန်းမလှကျွန်းညိုကြီးနဲ့ ဒီကနေ့ မိန်းမလှကျွန်းညိုကြီးတို့ရဲ့ အခြေအနေဟာ အလွန့်အလွန်ကို ကွာခြားနေပါပြီ။ မြစ်ဝကျွန်းပေါ်ဒေသ တစ်ခွင်လုံးမှာ အလှပဆုံး၊ အသာယာဆုံး အကြီးမားဆုံး ကျွန်းကြီးတစ်ကျွန်းဟာ အသိမဲ့တဲ့ စီးပွားရှာသမား အရူးတွေရဲ့ ဓားအောက်မှာ ပျောက်ဆုံးကုန် ခန်းသွားရမယ်ဆိုရင် အလွန့်အလွန်ကို ဝမ်းနည်းစရာ ကောင်းလှပါတယ်။ အသိမဲ့လို့ ခုတ်ကြလုပ်ကြတဲ့ ပြည်သူတွေကို အပြစ်မဆိုသာပေမယ့် သူတို့တစ်တွေကို အသိတရားတွေရလာအောင် ပိတ်တောတစ်တောရဲ့ ဥပဒေတွေ၊ စည်းမျဉ်းစည်းကမ်းတွေကို နားလည်သဘောပေါက်အောင် သက်ဆိုင်ရာတာဝန်ရှိသူတွေအနေနဲ့ ပညာပေးစည်းရုံးနိုင်ဖို့ အထူးလိုအပ်လှပါတယ်။
တစ်ဘက်မှာ ပညာပေးစည်းရုံးတာတွေလုပ်သလို၊ တစ်ဘက်မှာလဲ ထိထိရောက်ရောက်တားမြစ် စောင့်ရှောက်မယ်ဆိုပါရင် မိန်းမလှကျွန်းညိုကြီးရဲ့ အနာဂတ်သာယာလှပစေရေးနဲ့ ရှေးယခင်ကလို စိမ်းစိမ်းစိုစို ညို့ညို့မှိုင်းမှိုင်းနဲ့ အပင်ချင်းယှဉ်၊ အကိုင်းချင်းဆက်၊ အခက်ချင်းဝေ၊ အရွက်ချင်းထပ်လို့ ပြွတ်သိပ်ရောနှောပြီး ပေါက်ရောက်နေကြတဲ့ ရေငန်ကြိုက် သဘာဝပေါက်ပင်ကလေးတွေနဲ့အတူ၊ တောတိရစ္ဆန်ကလေးတွေ၊ ကျေးငှက်သာရကာလေးတွေ မြူးတူးပျော်ရွှင်ချမ်းမြေ့စွာ နေနိုင်ရေးအတွက် နဂိုမူလအခြေအနေဆီကို ပြန်မရောက်သည့်တိုင်အောင် အလွန်နီးကပ်တဲ့ အခြေအနေဆီကိုတော့ ပြန်ရောက်နိုင်ပါလိမ့်မယ်လို့ မျှော်လင့်မိပါတယ်။
သက်ဆိုင်ရာတာဝန်ရှိသူတွေနဲ့ ဒီရေရောက်သစ်တောကြီးတွေကို ချစ်ခင်မြတ်နိုး တန်ဖိုးထားတတ်တဲ့ သူတွေကသာ ထိရောက်စွာကူညီပံ့ပိုး တွန်းအားပေးကြမယ်ဆိုရင် မိန်းမလှကျွန်းညိုကြီးဆိုတဲ့ အမည်နာမနဲ့ လိုက်လျောညီထွေ စိမ်းစိုညို့မှိုင်း၊ လန်းဆန်းပြီး သာယာလှပတဲ့ ကျွန်းကြီးမဟာအဖြစ် ယနေ့မှ နောင်နှစ်ပေါင်းများစွာ တည်တံ့နေဦးမှာဖြစ်ပါကြောင်း ရေးသား တင်ပြလိုက်ပါတယ်။
ဈေးကွက်ဂျာနယ် အင်တာနက်စာမျက်နှာ www.zaygwet.com တွင် ဖော်ပြထားသောဆောင်းပါး ဖြစ်သည်။
0 comments :
Post a Comment