၁၀ ပါတီကို ဦးသိန်းစိန် ဘာပြောသလဲ

~

မနေ့က ကြေးမုံသတင်းစာမှာ တွေ့ရတဲ့ သတင်း ဖြစ်ပါတယ်။
ပါတီ ၁၀ ခုကို ခေါ်ပြီး ဦးသိန်းစိန် လက်ချာပေးချက်တွေ နဲ့ တွေ့ဆုံပွဲ တက်ရောက်သူများ စာရင်းကို ဖတ်ရမှာပါ။

ဦးသိန်းစိန် ပြောကြားချက်တွေကတော့ အစုံပါပဲ။
NLD, ဒေါ်အောင်ဆန်းစုကြည်၊ ကေအိုင်အေ၊ စီးပွားရေး၊ ပြည်ပရောက် မြန်မာပြည်သားများ၊ နိုင်ငံခြားရင်းနှီးမြှုပ်နှံမှု၊ စိုက်ပျိုးရေး၊ စားနပ်ရိက္ခာ၊ စက်မှု စသဖြင့် ပါဝင်ပါတယ်။ စိတ်ဝင်စားစရာ ကောင်းပါတယ်။ သတင်းသမားတွေအတွက်လည်း ကိုးကားစရာ ဖြစ်ပါလိမ့်မယ်။

မိမိတို့အစိုးရသည် တိုင်းပြည်အကျိုးစီးပွားအတွက် လုပ်ကိုင်ဆောင်ရွက်နေခြင်းဖြစ်
ရဲရဲတင်းတင်း ဝေဖန်အကြံဉာဏ်ပေးရန်နှင့် အချို့ကိစ္စများတွင် ထိတွေ့ဆက်ဆံ ပူးပေါင်းဆောင်ရွက်ရန် ဖိတ်ခေါ်

နေပြည်တော် ဇူလိုင် ၁၈

ပြည်ထောင်စု သမ္မတ မြန်မာနိုင်ငံတော် နိုင်ငံတော်သမ္မတ ဦးသိန်းစိန်သည် ယနေ့ နံနက် ၉ နာရီတိတိတွင် နေပြည်တော် ပုဗ္ဗသီရိမြို့နယ် စက်မှုလယ်ယာစနစ် တောင်သူပညာပေး ဧက ၅ဝဝ စိုက်ခင်းရှိ အစည်းအဝေးခန်းမ၌ ဒီမိုကရေစီ မိတ်ဆွေပါတီများအဖွဲ့မှ ပါတီ ဥက္ကဋ္ဌများနှင့် အထွေထွေ အတွင်းရေးမှူးများနှင့် တွေ့ဆုံ ဆွေးနွေးသည်။

ရှေးဦးစွာ နိုင်ငံတော်သမ္မတသည် အစည်းအဝေးခန်းမသို့ရောက်ရှိပြီး တက်ရောက်လာကြသူများအား ရင်းနှီးခင်မင်စွာ လိုက်လံနှုတ်ဆက်သည်။

ထို့နောက် တက်ရောက်လာကြသူများက နိုင်ငံတော်သမ္မတအား တစ်ဦးချင်းမိတ်ဆက်ကြသည်။

ယင်းနောက် နိုင်ငံတော်သမ္မတက ဆွေးနွေးပြောကြားရာတွင် '' ယနေ့တွေ့ဆုံဆွေးနွေးရာ၌ မိမိတို့၏ မူဝါဒသဘောထားနှင့် တိုင်းပြည်နှင့် ပြည်သူလူထုအတွက် ယနေ့လုပ်ကိုင်နေသည့် အခြေခံလုပ်ငန်းများကို ရှင်းလင်း ပြောကြားလိုပါကြောင်း၊

ယခုတွေ့ဆုံမှုမှာ ပထမဆုံးအကြိမ် တွေ့ဆုံခြင်းဖြစ်ပြီး နောင်အခြေအနေပေးပါက မကြာခဏ တွေ့ဆုံကြရန် ဖိတ်ခေါ်လိုပါကြောင်း၊

မိမိတို့သည် တစ်နိုင်ငံတည်းတွင် အတူနေထိုင်ကြသည့် တစ်လှေတည်းစီး တစ်ခရီးတည်း အတူသွားနေကြသူများဖြစ်ကြောင်း၊

မိမိတို့တွင် အေးချမ်းသာယာဖွံ့ဖြိုး တိုးတက်သည့် လူ့ဘောင်သစ်တစ်ရပ် ထူထောင်ရန်ဟူသည့် တူညီသည့် ရည်မှန်းချက်ရှိကြပါကြောင်း၊

နိုင်ငံရေးတွင် မတူညီသည့် ကွဲပြားခြားနားမှုများ၊ မတူညီသည့် အတွေးအခေါ်အယူအဆများ ရှိကြမည်ဖြစ်သော်လည်း တိုင်းပြည်အတွက် အကျိုးရှိစေမည့် ဘုံအကျိုးစီးပွားကို အားလုံး ဝိုင်းဝန်း ပူးပေါင်း ဆောင်ရွက်ကြရန် မေတ္တာရပ်ခံလိုပါကြောင်း၊

မိမိတို့နိုင်ငံသည် ဒီမိုကရေစီအတွေ့အကြုံ နည်းသေးသည့် နိုင်ငံဖြစ်သဖြင့် ခြေလှမ်းတိုင်းကို သတိထား လျှောက်လှမ်းနေရပါကြောင်း၊

မိမိတို့အစိုးရသည် တိုင်းပြည်အကျိုးစီးပွားအတွက် လုပ်ကိုင် ဆောင်ရွက်နေခြင်းဖြစ်ရာ ထိုသို့ဆောင်ရွက်မှုများကို ရဲရဲတင်းတင်းဝေဖန်၍ အကြံဉာဏ်များပေးကြပါရန်နှင့် အချို့ကိစ္စများတွင် ထိတွေ့ဆက်ဆံ ပူးပေါင်းဆောင်ရွက်ကြပါရန် ဖိတ်ခေါ်အပ်ပါကြောင်း။

မိမိတို့သည် အမိုးတစ်ခုတည်းအောက်မှာ အတူနေထိုင်ကြသူများဖြစ်ပြီး မိမိတို့နိုင်ငံကို နိုင်ငံသားအားလုံးက ပိုင်ဆိုင်ကြပါကြောင်း၊

အားလုံးသည် မိမိနိုင်ငံကောင်းစားရေးအတွက် မိမိတတ်နိုင်သည့်ဘက်မှ ကြိုးပမ်းဆောင်ရွက်နေကြသူများဖြစ်၍ ဒီမိုကရေစီနိုင်ငံတော်သစ်ကို တည်ဆောက်နေသူများအဖြစ် ခံယူကြစေလိုပါကြောင်း။

မိမိတို့ ယနေ့ဆောင်ရွက်နေသည့် နိုင်ငံရေး၊ စီးပွားရေးအခြေအနေများကို ပြောကြားရလျှင် မိမိတို့သည် ပြည်သူက ရွေးချယ်ထားသည့် အစိုးရဖြစ်၍ ပြည်သူ့ဆန္ဒကို ဖြည့်ဆည်းပေးရန် ဆောင်ရွက်နေပါကြောင်း၊

ပြည်သူအားလုံး၏ တူညီသည့်ဆန္ဒ၊ တူညီသည့် ရည်မှန်းချက်မှာ နိုင်ငံတော်တည်ငြိမ်အေးချမ်းရေးနှင့် ပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရန်ပင်ဖြစ်ပါကြောင်း၊

နိုင်ငံတည်ငြိမ်အေးချမ်းရေးအတွက် ဆောင်ရွက်ရာတွင် နိုင်ငံရေးတည်ငြိမ်အေးချမ်းရန်နှင့် တစ်နိုင်ငံလုံးအတိုင်းအတာနှင့် ငြိမ်းချမ်းရေးရရှိရန် ဟူသည့် အပိုင်းနှစ်ပိုင်းရှိပြီး ယင်းကဏ္ဍနှစ်ခုမှာ တစ်ခုနှင့်တစ်ခု ဆက်စပ်ပတ်သက်နေပါကြောင်း။

နိုင်ငံရေးတည်ငြိမ်အေးချမ်းရန်အတွက် NLD ပါတီနှင့် ဒေါ်အောင်ဆန်းစုကြည်တို့နှင့် ထိတွေ့ဆက်ဆံ၍ နိုင်ငံရေး တည်ငြိမ်မှုကို တည်ဆောက်နိုင်ခဲ့ပါကြောင်း၊

ပြည်တွင်းလက်နက်ကိုင် ပဋိပက္ခများ ချုပ်ငြိမ်းပြီး ထာဝရငြိမ်းချမ်းရေးရရှိရန်အတွက် အပိုင်းသုံးပိုင်းခွဲ၍ ဆောင်ရွက်ခဲ့ရာတွင် ပထမအဆင့်အနေဖြင့် နှစ်ဖက်အပစ်အခတ်ရပ်စဲရေးကို ဆောင်ရွက်ပြီး ဒုတိယအဆင့်အနေဖြင့် ထိတွေ့ဆက်ဆံဆွေးနွေး၍ ယုံကြည်မှု တည်ဆောက်ခဲ့ပါကြောင်း၊

ဤသို့ဆွေးနွေးရာတွင် အခြေခံမူ(၈)ချက်ချမှတ်၍ ဆွေးနွေးညှိနှိုင်းခဲ့ရာယခုအခါ တိုင်းရင်းသားလက်နက်ကိုင် အဖွဲ့အစည်း (၁၁)ဖွဲ့အနက် (၁ဝ)ဖွဲ့နှင့် အထိုက်အလျောက် သဘောတူညီချက်များ ရရှိနေပြီဖြစ်ကြောင်း၊

ကျန်ရှိသည့် ကေအိုင်အေအဖွဲ့နှင့်လည်း ထိတွေ့ ဆက်ဆံမှုများ ဆောင်ရွက်လျက်ရှိပါကြောင်း၊

လက်နက်ကိုင်ပဋိပက္ခများ ဖြစ်ပွားနေ၍ ကချင်ပြည်နယ်သည် နိုင်ငံ အတွင်း ထိခိုက်နစ်နာဆုံးရှုံးမှု အများဆုံးပြည်နယ်ဖြစ်နေရကြောင်း၊

ဒေသခံ တိုင်းရင်းသားများမှာ မိမိတို့အိုးအိမ်နှင့် အလုပ်အကိုင်တို့ကို စွန့်ခွာ၍ ဘေးကင်းရာတွင် ခိုလှုံနေကြရသဖြင့် လုပ်အားများဆုံးရှုံးရသကဲ့သို့ ၎င်းတို့၏ သားသမီးများ မှာလည်း ပညာသင်ကြားခွင့်မရဖြစ်နေရကြောင်း၊

ကချင်ပြည်နယ်၏ ဆုံးရှုံးမှုများသည် မိမိတို့နိုင်ငံ၏ ဆုံးရှုံးမှုများပင်ဖြစ်ကြောင်း၊

နှစ်ဖက်တွေ့ဆုံဆွေးနွေးခြင်းဖြင့် မကြာမီတွင် ကေအိုင်အေအဖွဲ့နှင့် ငြိမ်းချမ်းမှု တည်ဆောက်နိုင်လိမ့်မည်ဟုမျှော်လင့်ပါကြောင်း။

ပြည်သူတို့လိုလားချက် ဆန္ဒတစ်ခုဖြစ်သည့် နိုင်ငံတော်၏ လူမှုစီးပွားဘဝဖွံ့ဖြိုးရေးဆောင်ရွက်ရာတွင် ပြည်သူများ စားရေးဖူလုံမှုကို ဦးစားပေးဆောင်ရွက်နေကြောင်း၊

မိမိတို့နိုင်ငံသည် စိုက်ပျိုးရေးနိုင်ငံဖြစ်သည့်အတွက် လက်ရှိလူဦးရေ သန်း ၆ဝ အတွက် စားနပ်ရိက္ခာဖူလုံသော်လည်း နောင်နှစ်ပေါင်း (၃ဝ/၄ဝ) တွင် တိုးတက်လာနိုင်သည့် လူဦးရေ သန်း ၁ဝဝ အတွက် စားနပ်ရိက္ခာ လုံခြုံရေး (Food Security) ကို ထည့်သွင်းစဉ်းစား ဆောင်ရွက်နေပါကြောင်း၊

တောင်သူလယ်သမားများဘဝ တိုးတက်မြင့်မားရေးအတွက် လယ်ယာလုပ်ငန်းခွင် ပြုပြင်ပြောင်းလဲရေးနည်းလမ်းငါးသွယ်ဖြင့် ဆောင်ရွက်လျက်ရှိကြောင်း၊

ထို့ပြင် နိုင်ငံကြီးပွားချမ်းသာရေးအတွက် စိုက်ပျိုးရေးနိုင်ငံအဆင့်မှ စက်မှုနိုင်ငံဖြစ်အောင်ပြောင်းလဲကြရမည် ဖြစ်ကြောင်း၊

စက်မှုနိုင်ငံအဖြစ် ပေါ်ထွန်းလာရေးအတွက် နိုင်ငံ၌ သယံဇာတများ ပိုင်ဆိုင်ပြီးဖြစ်သော်လည်း အရင်းအနှီးနှင့် နည်းပညာများ လိုအပ်လျက်ရှိကြောင်း၊

သို့ဖြစ်၍ နိုင်ငံခြား ရင်းနှီးမြှုပ်နှံမှုများကို ယနေ့ဖိတ်ခေါ်လျက်ရှိကြောင်း၊ နိုင်ငံခြားရင်းနှီးမြှုပ်နှံမှုများ လာရောက်လုပ်ကိုင်ပါက မိမိတို့ တိုင်းရင်းသားများ၏ အကျိုးစီးပွား၊ မိမိတိုင်းပြည် ဂုဏ်သိက္ခာနှင့် မိမိနိုင်ငံ၏ အချုပ်အခြာအာဏာတို့ကို မထိခိုက်စေရေး၊ သဘာဝပတ်ဝန်းကျင် မပျက်ယွင်းစေရေးတို့ကို အလေးထားဆောင်ရွက်သွားမည်ဖြစ်ကြောင်း၊

ရင်းနှီးမြှုပ်နှံရာတွင်လည်း လုပ်ငန်းလေးမျိုးခွဲခြားထားပြီး
ပထမဦးစားပေးအနေဖြင့် မိမိတို့ နိုင်ငံသားများ အလုပ်အကိုင်ရရှိရေးအတွက် နည်းပညာနည်းပါးပြီး အလုပ်အကိုင် အခွင့်အလမ်းများစွာ ပေးနိုင်သည့် စက်မှု လုပ်ငန်းများ၊
ဒုတိယအနေဖြင့် ရော်ဘာ၊ သစ်စသည့် သဘာဝ ထွက်ကုန်များကို Value Added တန်ဖိုးမြင့် ကုန်ချောများ
ထုတ်လုပ်သည့် လုပ်ငန်းများ၊
တတိယမှာ အဖိုးတန်သတ္တုများ ထုတ်လုပ်ခြင်း လုပ်ငန်းနှင့်
စတုတ္ထအဆင့်အနေဖြင့် IT နှင့် Telecommunication လုပ်ငန်းများ ထူထောင်ရန်ဖြစ်ကြောင်း။

လက်ရှိအချိန်တွင် နိုင်ငံ၏ ဆင်းရဲမှုနှုန်းမှာ ၂၆ ရာခိုင်နှုန်းရှိနေပြီး ၂ဝ၁၅ ခုနှစ်၌ ၁၆ ရာခိုင်နှုန်းထိ လျော့ကျစေရန် ရည်မှန်းချက် ချမှတ်ဆောင်ရွက်နေကြောင်း၊

အခြားနိုင်ငံများတွင် သွားရောက် လုပ်ကိုင်နေကြသည့် မိမိတို့နိုင်ငံသားများ မိမိနိုင်ငံသို့ပြန်လည်၍ အလုပ်လုပ်ကိုင် နိုင်ရေးအတွက်လည်း အလုပ်အကိုင် အခွင့်အလမ်းများဖန်တီးပေးရန် စီစဉ်ဆောင်ရွက်နေပါကြောင်း။

နိဂုံးချုပ်အနေဖြင့် ဒီမိုကရေစီစနစ် ရှင်သန်ခိုင်မာရေးသည် တိုင်းပြည် တည်ငြိမ်အေးချမ်းမှုနှင့် ဆက်စပ်နေပါကြောင်း၊

ယင်းအချက်(၂)ချက် ယှဉ်တွဲ တည်ရှိနေပါမှလည်း ပြည်သူတို့၏ လူမှု စီးပွားဘဝ ဖွံ့ဖြိုးတိုးတက်နိုင်မည်ဖြစ်ကြောင်း၊

ယင်းအချက်များမှာ မိမိတို့ အစိုးရ ကြိုးပမ်းဆောင်ရွက်နေသည့် လုပ်ငန်းများဖြစ်ပြီး ပူးပေါင်းဆောင်ရွက်နိုင်သည့် လုပ်ငန်းများတွင် ပါဝင်ပူးပေါင်း ဆောင်ရွက်ရန် ဖိတ်ခေါ်တိုက်တွန်းပါကြောင်းဖြင့် ပြောကြားသည်။

ထို့နောက် တက်ရောက်လာကြသည့်

အမျိုးသားဒီမိုကရေစီ အင်အားစုပါတီ(NDF) ဥက္ကဋ္ဌ ဦးခင်မောင်ဆွေ၊ ပါတီခေါင်းဆောင် ဒေါက်တာသန်းငြိမ်း၊

ဒီမိုကရက်တစ်ပါတီ(မြန်မာ) ဥက္ကဋ္ဌ ဦးသုဝေ၊ အထွေထွေအတွင်းရေးမှူး ဒေါ်သန်းသန်းနု၊

ဒီမိုကရေစီနှင့် ငြိမ်းချမ်းရေးပါတီ (DPP) ဥက္ကဋ္ဌ ဦးအောင်သန်း၊ အထွေထွေအတွင်းရေးမှူး ဦးမျိုးညွန့်၊

ညီညွတ်ရေးနှင့် ငြိမ်းချမ်းရေးပါတီ (PUP) အထွေထွေအတွင်းရေးမှူး ဦးထွန်းရွှေ၊

ပြည်ထောင်စုဒီမိုကရေစီပါတီ (UDP) ဥက္ကဋ္ဌ ဦးသောင်းဝင်း၊

ရခိုင်တိုင်းရင်းသားများ တိုးတက်ရေးပါတီ (RNDP) အထွေထွေအတွင်းရေးမှူး ဦးဦးလှစော၊

ရှမ်းတိုင်းရင်းသားများ ဒီမိုကရက်တစ်ပါတီ (SNDP) ဥက္ကဋ္ဌ ဦးစိုင်းအိုက်ပေါင်း၊

မွန်ဒေသလုံးဆိုင်ရာ ဒီမိုကရေစီပါတီ (AMRDP) ဒုတိယဥက္ကဋ္ဌ ဦးနိုင်လှအောင်၊

ချင်းအမျိုးသားပါတီ (CNP) ဥက္ကဋ္ဌ ဦးဇန်ကျင်ဖုံ(ခ) ဇိုဇမ်နှင့်

ဖလုံစဝေါ် ဒီမိုကရက်တစ်ပါတီ (PSDP) ဥက္ကဋ္ဌ ဦးစောသိန်းအောင်တို့က

နိုင်ငံရေး၊ စီးပွားရေး၊ ပြည်တွင်းငြိမ်းချမ်းရေးနှင့် ဒေသဖွံ့ဖြိုးရေးဆိုင်ရာ ကိစ္စရပ်များကို ဆွေးနွေးကြသည်။

ဆွေးနွေးချက်များနှင့် စပ်လျဉ်း၍ နိုင်ငံတော်အစိုးရ၏ ကဏ္ဍအလိုက် ဆောင်ရွက်နေမှုများနှင့် ဆက်လက် ဆောင်ရွက်ရန် စီစဉ်ထားရှိမှုတို့ကို
စက်မှုဝန်ကြီးဌာန ပြည်ထောင်စုဝန်ကြီး ဦးစိုးသိန်းနှင့်
ရထားပို့ဆောင်ရေး ဝန်ကြီးဌာန ပြည်ထောင်စုဝန်ကြီး ဦးအောင်မင်းတို့က ပြန်လည်ဆွေးနွေးကြပြီး နိုင်ငံတော်သမ္မတက ဖြည့်စွက် ရှင်းလင်းဆွေးနွေးသည်။

ထို့နောက် နိုင်ငံတော်သမ္မတက တက်ရောက် ဆွေးနွေးကြသူများအား ကျေးဇူးတင်စကား ပြောကြားပြီး ဆွေးနွေးပွဲကို မွန်းလွဲ ၁ နာရီတွင် ရုပ်သိမ်းလိုက်သည်။

ယင်းနောက် နိုင်ငံတော်သမ္မတနှင့် အဖွဲ့ဝင်များသည် တက်ရောက်လာကြသူများနှင့်အတူ မှတ်တမ်းတင်ဓာတ်ပုံ ရိုက်ကြသည်။ (သတင်းစဉ်)


~