မေမြို့မှာ ဒီလိုပဲ ရှိတယ်

Tuesday, July 17, 2012



မန်းသားလေး


ကျေးရွာအုပ်ချုပ်ရေးမှုးအဖြစ် ကိုယ့်ကိုယ်ကိုယ် ခန့်ထားသူ တဦးက မေမြို့ဒေသခံများကို စိတ်ဆင်းရဲအောင် လုပ်ဆောင်နေပါတယ်လို့ ဒေသခံတချို့က ဧရာဝတီကို ပြောပါတယ်။

မေမြို့ သို့မဟုတ် ပြင်ဦးလွင်မြို့ ထုံးဘိုကျေးရွာအုပ်စုဝင် ထုံးကွင်းကျေးရွာ ဥက္ကဋ္ဌ ဦးဌေးလှိုင် ဆိုသူက အများသုံး ဘုံပိုင် ရေတွင်းနှစ်တွင်းကို မသုံးရဆိုပြီး ပိတ်လိုက်တယ်လို့ ဆိုပါတယ်။ ၄င်းအပြင် ရွာသားများ အားကစားပြုလုပ်သည့် ဘောလုံးကွင်းကိုလည်း ခြံစည်းရိုးများ ခတ်ကာ ပိတ်ထားပါသေးတယ်။

ဦးဌေးလှိုင်ဆိုသူမှာ နိုင်ငံတော်က တရားဝင်ခန့်အပ်ထားတဲ့ ကျေးရွာအုပ်ချုပ်ရေးမှုး မဟုတ်ဘဲ ၄င်းနှင့် ခင်မင်သူ လူကြီးများနဲ့ ပူးပေါင်းကာ အုပ်ချုပ်ရေးမှုး အသွင် ဖန်တီးနေခြင်း ဖြစ်ကြောင်း ဒေသခံပြည်သူများက ပြောနေကြပါတယ်။

ကျေးရွာတရွာလုံးကိုလည်း ၄င်းနံမည်ပေါက်နှင့် လန-၃၉ ရှိထားတဲ့အတွက် တအိမ်လုံးနှင့် တရွာလုံးကို ၄င်းက ပိုင်ဆိုင်ကြောင်း ဒေသခံပြည်သူတွေကို ပြောဆိုကာ မြေများသိမ်းဆည်းမှုများ ပြုလုပ်မှုများ လုပ်ဆောင်နေတယ်လို့ အဲဒီကျေးရွာမှာ နေထိုင်တဲ့လူတွေက ပြောပါတယ်။

‘‘ကျေးရွာတရွာလုံးကို သူနံမည်ပေါက်နဲ့ မြေတွေ ပိုင်တယ်ပေါ့။ အဲဒီအတွက် ဒီရွာကို သူပိုင်ဆိုင်တယ် ဆိုပြီး ရွာသူ၊ရွာသားတွေကို စုခေါ်ပြီး သူက ပြောတာပါ။ ကျွန်တော်တို့က မြေစာရင်းရုံး သွားပြီး ကြည့်တော့ အဲဒီရုံးက လူကြီးတွေက တရွာလုံး သူ့နံမည်ပေါက် မပြောနဲ့ သူပိုင်တဲ့ မြေတကွက်တောင် နာမည်ပေါက်နဲ့ မရှိဘူး ဆိုပြီး ပြောလွှတ်လိုက်ပါတယ်” ဟု ဒေသခံတဦးက ပြောသည်။

သက်ဆိုင်ရာတာဝန်ရှိလူကြီးတွေကို တိုင်တဲ့အခါမှာလည်း ဦးဌေးလှိုင်က ငွေကြေးများသုံးကာ အမှု ပိတ်ထားသည့်အတွက်ကြောင့် မည်သူမှ လာရောက် စစ်ဆေးမေးမြန်း အရေးယူမှု မရှိဘူး လို့ ဆိုပါတယ်။

၎င်းကို တိုင်တန်းသည့် လူများကိုလည်း အပြစ်အမျိုးမျိုးရှာကာ အာဏာပိုင်လူကြီးများနှင့် ပေါင်းပြီး ဖမ်းဆီးအရေးယူမှုများ ပြုလုပ်နေတယ်လို့ ကြားရပါတယ်။

‘‘သူ့ကိုတိုင်တဲ့ လူလေးယောက်ကို နေထိုင်တဲ့ မြေနေရာက သစ်တောပိုင် ဆိုပြီး ဖမ်းဆီးသွားပါတယ်။ တကယ်တော့ အဲဒီနေရာက ဓါးမဦးချ နေထိုင်လာတဲ့ မြေပါ။ နှစ်၂၀လောက် ရှိပါပြီလို့” ထုံးကွင်း ကျေးရွာသားတဦးက ပြောပါတယ်။

ဦးဌေးလှိုင်ဆိုသူက ဘုံဘိုင်ရေတွင်းနှစ်တွင်းကို ပိတ်ထားသည့် အတွက် ဒေသခံများမှာ ရေသုံးစွဲမှု မပြုရသည်မှာ ၆လခန့် ရှိပြီ ဖြစ်တယ်လို့သိရပါတယ်။ ယင်းကိစ္စအတွက် မည်သူ့ကို တိုင်တန်းရမည်ကို မသိဘဲ ကျေးရွာသူ ကျေးရွာသားများ ဒုက္ခရောက်နေကြပါတယ်။

လက်ရှိတွင်လည်း ၄င်းကို တိုင်ကြားထားသူ ၇၀ အထိ ရှိကြောင်း၊ ၎င်းတို့ကို အမျိုးမျိုး ပြဿနာရှာနေသည့်အတွက် ဧရာဝတီသတင်းဌာနကို ဖွင့်ချခြင်း ဖြစ်ကြောင်း ပြောဆိုသွားကြပါတယ်။

0 comments :

Post a Comment

 
Copyright © 2014 Irrawaddy Publishing Group. All Rights Reserved