အမွှေးတိုင်၊ ကုသိုလ် နဲ့ အကုသိုလ်

~

ဖိုးဆွေ (သစ်လုပ်ငန်း) ~

"စင်စစ် အမွှေးတိုင်ဖြင့် ပူဇော်ခြင်းသည် မြန်မာ့ရိုးရာ ပူဇော်မှု မဟုတ်ပါ။ အိမ်နီးချင်း တိုင်းပြည်ကြီးနှစ်ခုမှ ကူးစက်လာခြင်း ဖြစ်ပါသည်"

               အမွှေးတိုင်ဟု အများက ခေါ်ကြပါသည်။ နံ့သာတိုင်ဟုလည်း ဆိုကြသည်။ ရနံ့တိုင်ဟုလည်း ဆိုနိုင်ပါသည်။

            ထေရဝါဒဗုဒ္ဓ ဘာသာဝင်များအတွက် သမ္မာအာဇီဝဟူသော စကားတစ်ရပ်ရှိပါသည်။ မိမိ၏အသက် မွေးဝမ်းကျောင်းသော လုပ်ငန်းသည် သမ္မာအာဇီဝဖြစ်ရန် လိုပါသည်။ သေစေတတ်သော လက်နက်၊ ဓား၊ လှံ၊ အဆိပ်၊ အရက်သေစာ၊ မူးယစ်ဆေးတို့ ပြုလုပ် ရောင်းဝယ်ခြင်းသည် သမ္မာအာဇီဝ၏ ဆန့်ကျင်ဘက် မိစ္ဆာဇီဝ၊ မသင့်သော ရှာမှီးခြင်း၊ မသင့်သော အသက်မွေးဝမ်းကျောင်းမှု ဖြစ်ပါသည်။ ထေရဝါဒ ဗုဒ္ဓဘာသာဝင်တို့သည် မရှောင်ကြဉ်နိုင်သေးသော်ရှိစေ၊ သိထား နားလည်ထားရန်မူ လိုပါသည်။

               ထေရဗုဒ္ဓဘာသာတွင် ငါးပါးသီလသည် အခြေခံသီလ ဖြစ်ပါသည်။ ခါးဝတ်ပုဆိုးကဲ့သို့ မြဲရမည့်သီလ ဖြစ်ပါသည်။ ငါးပါးသီလသာမြဲပါက စားဝတ်နေရေးကို တရားတော်က အာမခံပါသည်။ ငါးပါးသီလမြဲပါလျက် ငတ်မွတ် ခေါင်းပါး ချို့တဲ့နေသူကို တွေ့နိုင်ခဲမည် ထင်ပါသည်။ ထေရဝါဒ ဗုဒ္ဓဘာသာဝင်များအား ငါးပါးသီလနှင့်အညီ စီးပွားရှာကြပါ။ မုချ အကျိုးစီးပွား ဖြစ်ထွန်းပါလိမ့်မည်ဟု ထောက်ခံချက် ပြုလိုပါသည်။

မုသာဝါဒ အစတည်
               အမွှေးတိုင်လုပ်ငန်း အကြောင်းကို ဆွေးနွေးပါမည်။ ရှင်မတောင် အစစ်သာ သုံးသည်ဟု ကြော်ငြာသံကို နေ့စဉ်လိုလို ကြားနေရပါသည်။ လက်တွေ့တွင် အမွှေးတိုင် လုပ်ငန်းအတွက် အညာဒေသမှ အဘိုး၊ အဘေးတို့ စိုက်ပျိုးခဲ့သော မန်ကျည်းပင်များ ခုတ်လှဲခံနေရသည့် သတင်းကို အမြဲလိုလို ကြားနေရသည်။ မည်သည့်ဒေသမှ မည်သည့် သနပ်ခါးခြံမှ သနပ်ခါးပင်များကို မည်သည့် သနပ်ခါးလုပ်ငန်းက ခြံလုံးဖြတ်ဝယ်ယူသွားသည်ဟု သတင်းစကား တစ်ခါမျှ မကြားခဲ့ရပေ။ မည်သည့် အမွှေးတိုင် လုပ်ငန်းရှင်သည် မိမိလုပ်ငန်းတွင် ကုန်ကြမ်းအဖြစ် အသုံးပြုရန်အတွက် သနပ်ခါးခြံမည်မျှ စိုက်ပျိုးထားသည်။ သနပ်ခါးခြံမည်မျှ ပိုင်ဆိုင်ထားသည်ဟု သတင်းစကားမကြားဖူးပါ။ သနပ်ခါးခြံစိုက်ထား၊ ပိုင်ဆိုင်ထားပါလျှင်လည်း ထိုသနပ်ခါးပင်များသည် သနပ်ခါးအဖြစ် ရောင်းချရန်သာဖြစ်ဖွယ်ရှိပါသည်။ အမွှေးတိုင် လုပ်ငန်းအတွက်မူ မဖြစ်တန်ရာပေ။ စင်စစ်မူ မန်ကျည်းသားကို အမှုန့်ကြိတ်ကာ အမွှေးနံ့များ ပက်ဖျန်းလျက် အမွှေးတိုင်ဟူ၍ ဖြစ်လာရပေသည်။ မန်ကျည်းသားကို ရှင်မတောင်ပါဟု ကြော်ငြာလိုက်ခြင်းဖြင့် အမွှေးတိုင် လုပ်ငန်းတွင် မုသာဝါဒ ပါဝင်လာခဲ့သည်ဟုဆိုပါက ဖိုးဆွေလွန်တယ်ဟု ပြောကြမည်လား။
ရေးသာရေးနေရသည်၊ မန်ကျည်းပင်များက ကျန်မှ ကျန်သေးရဲ့လားဟု စိုးရိမ်မိပါသည်။

                 မိမိစိုက်ပျိုးထားသည်လည်း မဟုတ်သော၊ မိမိပိုင်ဆိုင်သည်လည်း မဟုတ်သော၊ အများပြည်သူအားလုံး ပိုင်ဆိုင်သော အဘိုးအဘေးတို့က အရိပ်ခိုရန် စိုက်ပျိုးခဲ့သော အပင်များကို မိမိတစ်ဦးတည်း အကျိုးစီးပွားအတွက် ခုတ်ယူခြင်းသည် ခိုးယူခြင်း မမည်ပါသလော။

               မြန်မာအမျိုးသမီးများသည် သနပ်ခါးလိမ်းရာတွင် အခေါက်ကိုသာ လိမ်းကြပေသည်။ အသားတုံးကို လိမ်းကြသည် မဟုတ်ပေ။ မိခင်သည် ဟင်းကောင်းချက်သောအခါ ယင်း လိမ်းပြီး သနပ်ခါးသားများကို စုဆောင်း၍ ထင်းအဖြစ် သုံးတတ်သည်။ အဘွားသည် တစ်ခါတရံ သနပ်ခါး ရှားပါးချိန်တွင် ခြေထောက်လိမ်းရန်အတွက် သနပ်ခါး အသားကို သွေး၍ လိမ်းတတ်သည်ကို မှတ်မိပါသည်။ ထိုသို့ အခေါက်သုံးပြီး လိမ်းပြီး သနပ်ခါးအသားများကို အမွှေးတိုင်လုပ်ငန်းတွင် အသုံးပြုရန် ဝယ်ယူသည်ဟုလည်း မကြားဖူးခဲ့။ မကြုံဖူးခဲ့ပါပေ။

                 အကယ်၍ အမွှေးတိုင်ကို အစားအသောက်များကဲ့သို့ ဓာတ်ခွဲစမ်းသပ်ခဲ့ပါက ရှင်မတောင်ကို တွေ့ရမည်လား။ မန်ကျည်းသားကို တွေ့ရမည်လား။ ထုတ်လုပ်သူများ အသိဆုံး ဖြစ်ပေမည်။

အဘိုး၊ အဘေးတို့ ကုသိုလ်
                   မန်ကျည်းပင်များသည် အဘိုး၊ အဘေးတို့က သား၊ မြေး၊ မြစ်များ အရိပ်ခိုရန်၊ နားနေရန်၊ အပန်းဖြေရန်၊ အသီးစားရန်၊ အရွက်စားရန်၊ အစေးကို၊ အခေါက်ကို အသုံးပြုရန် စိုက်ပျိုးခဲ့ကြခြင်း ဖြစ်ပါသည်။ ထိုမန်ကျည်းပင်များသည် အမွေအနှစ်တန်ဖိုး၊ သဘာဝပတ်ဝန်းကျင်တန်ဖိုး၊ လူမှုရေးတန်ဖိုး ကြီးလှပါသည်။ ယနေ့ ပြန်စိုက်သည်ပင် ဆိုစေဦး၊ ယနေ့ခေတ် ရာသီဥတု၊ မိုးလေဝသအခြေအနေတွင် သည်လို မန်ကျည်းပင်မျိုး အစား ပြန်ရနိုင်ဖွယ် မရှိပါ။ အမွှေးတိုင် လုပ်ငန်းရှင်များသည် မန်ကျည်းပင် မည်မျှစိုက်ပျိုးခဲ့ကြပြီနည်း။

                  မန်ကျည်းပင်နှင့် ပတ်သက်၍ ဒေါ်ဒေါ်မာ၏ ၁၂ ပွဲဈေးသည်နှင့် ကျွန်မတို့အညာ စာအုပ်မှ စာတစ်ပိုဒ်ကို ဖော်ပြလိုပါသည်။

                  ဒါကြောင့်အရိပ်ရတဲ့ သစ်ပင်စိုက်တဲ့ အလှူမျိုးလုပ်သူရှိတယ်။ ရှင်သန်နေပြီး အပင်တွေကို ရေလောင်းတဲ့လူတွေရှိတယ်။ သစ်ကိုင်းချိုင်တာ၊ သစ်ပင်ခုတ်တာကို ကျွန်မတို့ လူတွေက ဝါသနာမပါဘူး။ မပါရုံမက ငရဲကြီးတယ်တောင် ထင်ပါတယ်။ အရိပ်ခိုကိုးရတာ အဖိုးတန် မှန်းသိကြတာကိုး။

"အမွှေးတိုင်လုပ်ငန်းသည် ကြွပ်ကြွပ်အိတ်ကဲ့သို့ပင် သဘာဝ ပတ်ဝန်းကျင်အပေါ် ဆိုးဆိုးရွားရွား ဆိုးကျိုးသက်ရောက်စေသော လုပ်ငန်းဖြစ်ပါသည်"

                သစ်ပင်ရိပ်ကောင်းကောင်း အောက်တွင် သောက်ရေအိုးစင်တည်၍ ရေဒါနပြုကြသည်။ တတ်နိုင်လျှင် ဝါးကြမ်းခင်းကလေး ခင်းပေးထားတတ်သည်။ ဒေါ်ဒေါ်မာက ဒီလို ရေးခဲ့ပြန်ပါသည်။

                  အဲ- အကြောင်းအမျိုးမျိုးကြောင့် ဒီသစ်ပင်ကြီး ခုတ်လှဲခံရတယ်။ ဒါမှ မဟုတ် စီးပွားရေး အလွန်ကျပ်တည်း ဆင်းရဲပြီး ကြံရာမရ အတိဒုက္ခရောက်နေသူတစ်ဦးဦးက သောက်ရေအိုးပေါ်က အိုးဖုံး ပန်းကန်ပြားကလေးကို ယူသွားတယ်ဆိုရင်ဖြင့် ရေအလှူရှင် စိတ်ဆင်းရဲရပြီပေါ့။

                    အဘိုး၊ အဘေးတို့ လုပ်အား ကုသိုလ်ပြုစိုက်ပျိုးထားသော အပင်များကို ခုတ်လှဲခြင်းသည် အဘိုး၊ အဘေးတို့၏ ကုသိုလ်ကို ဖျက်ဆီးခြင်းပင် ဖြစ်ပေသည်။ ကုသိုလ်ကို ဖျက်ဆီးခြင်းသည် မည်သည့် အဓိပ္ပာယ်သက်ရောက်ပါသနည်း။ ကိုယ်တိုင်ကုသိုလ် မပြုနိုင်လျှင် ရှိစေဦး၊ သူတစ်ပါးပြုထားသည့် ကုသိုလ်ကိုမူ မဖျက်ဆီးသင့်ပါပေ။

                    မန်ကျည်းပင်သည် အရွက်နုချိန်မှစ၍ အသီးများ ရင့်မှည့်သည်အထိ အရွက်နုကိုစားလိုက်၊ အဖူးကို သုပ်စားလိုက်၊ အသီးနုဘဝတွင် စားလိုက်၊ အသီးရင့်ဘဝတွင် စားလိုက်ဖြင့် အရိပ်ပေးသည်သာမက စားစရာပေးသော၊ ငွေပေးသောအပင်ဖြစ်သည်။ မန်ကျည်းမှည့်သည် မြန်မာ့မီးဖိုဆောင်တွင် မရှိမဖြစ်ဟင်းမယ်ဖြစ်သည်။ မန်ကျည်းဖျော်ရည်သည် ကျန်းမာရေးအတွက် မကြာခဏ သောက်သုံးသင့်သော ဖျော်ရည်ဖြစ်သည်။ မန်ကျည်းသီးမှည့်သည် မြန်မာ့စီးပွားရေးတွင် အရေးပါသော ကုန်စည်ဖြစ်သည်။ မန်ကျည်းပင်များ လျော့နည်းသွားခြင်းသည် ဒေသ စီးပွားရေးအား လျော့သွားခြင်း ဖြစ်သည်။ ယခုမူ စီးပွားရေးတန်ဖိုး၊ လူမှုရေး တန်ဖိုးကြီးလှသော မန်ကျည်းပင်များသည် မျိုးသုဉ်းမည့် အန္တရာယ် သင့်နေပါပြီ။

ထွက်လာသော အငွေ့များ
                   အမွှေးတိုင်လုပ်ငန်းရှင်များ၏ ကြိုးစားထုတ်လုပ်မှုကြောင့် အမွှေးတိုင်များ ရရှိလာပါသည်။ အမွှေးတိုင်များသည် သတ္တလောကကို အမွှေးတိုင် ထွန်းညှိလှူဒါန်းသူကို မည်သို့ အကျိုးပြုပါသနည်း။ ဓမ္မဓိဋ္ဌာန်ကျကျ ဆင်ခြင်ကြည့်စေလိုပါသည်။ အမွှေးတိုင်ကို ထွန်းညှိလိုက်သောအခါ ကာဘွန်ဒိုင်အောက်ဆိုဒ် အပါအဝင် အဆိပ်ငွေ့များစွာ ထွက်လာကြောင်းကို ဆောင်းပါး အစောင်စောင်ဖြင့် ရေးသား ထုတ်ဖော်ခဲ့ကြပြီး ဖြစ်ပါသည်။ အမွှေးတိုင် အငွေ့ရှူ မိသူများသည် ကင်ဆာစသော ရောဂါဆိုးများ ရရှိကြမည်ဖြစ်သည်။ သံဃာတော် တစ်ပါးပါးအား အမွှေးတိုင် ထွန်းညှိ၍ ပူဇော်ခဲ့သော် ထိုသံဃာအား ကင်ဆာစသည့် ရောဂါဆိုးရရှိအောင် ပြုသကဲ့သို့ဖြစ်ပေမည်။ အမွှေးတိုင် ထုတ်လုပ်သူများကို မေးကြည့်ချင်မိသည်။ မိမိထုတ်လုပ်သော အမွှေးတိုင်အငွေ့များကို မိမိကိုယ် တိုင်နေ့စဉ် ရှူပါမည်လား။

                    အဆိပ်ငွေ့များထွက်သည့် ပစ္စည်းများ ထုတ်လုပ် ရောင်းဝယ်နေသည့် လုပ်ငန်းကို သမ္မာအာဇီဝဟု ခေါ်ဆိုနိုင်ပါမည်လား။ မိမိကိုယ်ကို မိမိမည်သည့် အာဇီဝဖြင့် အသက်မွေးဝမ်းကျောင်းနေသည်ကို ဆင်ခြင်ကြည့်စေချင်ပါသည်။ မျက်မှောက်ဘဝတွင်သာမက သံသရာအထိ ဒုက္ခတွေ့ရမည့် အာဇီဝမျိုးဖြင့် အသက်မွေး ဝမ်းကျောင်း မပြုမိရန် အရေးကြီးပါသည်။

                  ထေရဝါဒဗုဒ္ဓဘာသာဝင်တို့ ဘုရားရှင်အား၊ ဆွမ်း၊ ရေချမ်း၊ ပန်းနံ့သာတို့ ကပ်လှူ ပူဇော်နေကြသည်မှာ သက်တော်ထင်ရှား ဘုရားရှင်အား ရည်မှန်း၍ ပူဇော်နေကြခြင်း ဖြစ်ပါသည်။ အမွှေးတိုင်ဖြင့် ဘုရားပူဇော် ခြင်းသည် ဘုရားရှင်အား အဆိပ်ငွေ့ဖြင့် ပူဇော်သကဲ့သို့ဖြစ်နေသည်ကို သတိမူမိစေလိုပါသည်။ အလှူခံ ပုဂ္ဂိုလ်အတွက် အကျိုးမဲ့ကိုဖြစ်စေသော၊ အလှူခံပုဂ္ဂိုလ်က မလိုအပ်သော ပစ္စည်းမျိုးကို လှူဒါန်းသင့်ပါသလား။ ထိုအလှူသည် ဒါန မြောက်ပါမည်လား။ အဆိပ်ငွေ့ဖြင့် ပူဇော်မိခြင်းကြောင့်တူသော အကျိုးပေးမည်ကိုလည်း စိုးရိမ်မိပါသည်။

                     နေ့စဉ် အမွှေးတိုင် ထွန်းညှိပူဇော်သူသည် အမွှေးတိုင်မှ အငွေ့များကို အနည်းနှင့်အများ ရှူမိကြမည် ဖြစ်ပါသည်။ ထိုသူတို့သည် ကင်ဆာ စသော ရောဂါဆိုးများကို ဖိတ်ခေါ် ကြိုဆိုနေသူများဖြစ်ပေသည်။ မိမိကိုယ်ကို ကျန်းမာရေးထိခိုက်ခံလျက် ငွေကြေးအကုန်အကျခံလျက် ပြုလုပ်ရသော အလုပ်သည် ဒါနမမြောက်ပါက မျှော်လင့်မထားသည့် အကျိုးများ ပေးလာပါက များစွာ နစ်နာပါသည်။

အကာအကွယ်မဲ့ အပင်များ
                သစ်တောထဲရှိ အပင်များကို သစ်တောဦးစီးဌာနကဖြစ်စေ၊ အပူပိုင်းဒေသ စိမ်းလန်းစိုပြည်ရေးဌာနကဖြစ်စေ စောင့်ရှောက်ပါသည်။ မြို့လယ်မှ၊ ကားလမ်းဝဲ၊ယာမှ အပင်ကြီးများသည် ကာကွယ်စောင့်ရှောက်သူမဲ့သလိုဖြစ်နေပါသည်။ ကျွန်တော်တို့ မြန်မာလူမျိုးများကလည်း မိမိနှင့် တိုက်ရိုက်မသက်ဆိုင်ပါက ပြောဆိုပတ်သက်လိုခြင်း မရှိပေ။ မိမိကို ထိခိုက်လာလျှင်ပင် အတတ်နိုင်ဆုံး သည်းခံတတ်သူများဖြစ်ရာ မန်ကျည်းပင်ကြီးများသည် အကာအကွယ်မဲ့ ဖြစ်နေရပေသည်။

                  စင်စစ် ထိုအပင်ကြီးများကို ရပ်ရွာက ပိုင်ပါသည်။ အများနှင့် သက်ဆိုင်ပါသည်။ မည်သူတစ်ဦး တစ်ယောက်မျှ မိမိသဘောဖြင့် ခုတ်လှဲပိုင်ခွင့်မရှိပါ။ ဤသို့ စည်းမဲ့ကမ်းမဲ့ ခုတ်လှဲနေမှုများအား ရပ်ရွာက တားကြ၊ ဆီးကြစေလိုပါသည်။ ဝိသမသမားများသည် မိမိ၏ အတ္တအကျိုးကိုသာ ကြည့်ကြမည်ဖြစ်သည်။ အတ္တလွန်ကဲသူများကို အသိတရားဖြင့် ဆုံးမ၍ မရနိုင်ပါ။ ဥပဒေဖြင့်၊ စည်းကမ်းဖြင့် ကြပ်မတ် ထိန်းချုပ်ရပါမည်။

                  သစ်ပင်များကို အမျိုးမျိုး သုံးစွဲနေကြပါသည်။ ထင်းဆိုက်၍ ထမင်းချက်လျှင် ထင်းဟူသော သစ်သားသည် ထမင်းကျက်စေခြင်းဖြင့် အကျိုးပြုပါသည်။ အိမ်ရာဆောက် လုပ်နေထိုင်လျှင် ရာသီဥတုဒဏ်မှ ကာကွယ်ပေးခြင်းအကျိုးကို ရရှိပါသည်။ ထို့အပြင် သစ်သားအဖြစ်ဖြင့် သုံးစွဲထားသောကြောင့် ဖန်လုံအိမ် ဓာတ်ငွေ့များကို လေထုသို့ မရောက်စေဘဲ ကာဘွန်သိုမှီးထားခြင်း မည်ပါသည်။ ပရိဘောဂအဖြစ် သုံးစွဲခြင်းသည်လည်း အလားတူပင်ဖြစ်ပါ သည်။ အမွှေးတိုင်ပြုလုပ်ခြင်းမှာမူ မည်သည့်အကျိုးကျေးဇူးကိုမျှ ရှာဖွေမရရှိသည့်အပြင် အဆိပ်ငွေ့များ၊ ဖန်လုံအိမ်ဓာတ်ငွေ့များကို ထုတ်လုပ်ပေးနေခြင်းသာ ဖြစ်ပါသည်။

                  အမွှေးတိုင်လုပ်ငန်းသည် ကြွပ်ကြွပ်အိတ်ကဲ့သို့ပင် သဘာဝ ပတ်ဝန်းကျင်အပေါ် ဆိုးဆိုးရွားရွား ဆိုးကျိုးသက်ရောက်စေသော လုပ်ငန်းဖြစ်ပါသည်။

                  ဘုရားရှင်ကို အမွှေးရနံြ့ဖင့် ပူဇော်လိုသူတို့အား အကြံပေးလိုပါသည်။ အမွှေးရနံ့ ကြွယ်ဝသော ပန်းများဖြင့် ပူဇော်နိုင်ပါသည်။ ရေမွှေးများဖြင့် ပူဇော်နိုင်ပါသည်။ ယနေ့ခေတ်တွင် ပရုပ်ခဲကဲ့သို့သော အမွှေးခဲတို့ကိုလည်း အသုံးပြု ပူဇော်နိုင်ပါသည်။ သဘာဝပန်းများသည် အကောင်းဆုံးဖြစ်ပါသည်။ ထေရဝါဒ ဗုဒ္ဓဘာသာဝင် အများစုတို့သည် ဤသို့ပင် ပူဇော်လျက်ရှိပါသည်။
စင်စစ် အမွှေးတိုင်ဖြင့် ပူဇော်ခြင်းသည် မြန်မာ့ရိုးရာ ပူဇော်မှု မဟုတ်ပါ။ အိမ်နီးချင်း တိုင်းပြည်ကြီးနှစ်ခုမှ ကူးစက်လာခြင်း ဖြစ်ပါသည်။ ထေရဝါဒနှင့် ကိုက်ညီ၊ မြန်မာ့ရိုးရာ ထုံးတမ်းလည်းဖြစ်သော သဘာဝပန်းများဖြင့်သာ ပူဇော်ကြပါရန် အကြံပြုလိုပါသည်။

                      အမွှေးတိုင်ထုတ်လုပ်သူများ၊ ရောင်းချသူများသည် ငါးပါးသီလမြဲစွာ၊ သမ္မာအာဇီဝဖြင့် အသက်မွေးဝမ်း ကျောင်းနိုင်ကြပါစေ။

ဈေးကွက်ဂျာနယ် အွန်လိုင်း http://www.zaygwet.com/vision.php?id=52 တွင် ဖော်ပြထားသော ဆောင်းပါး ဖြစ်ပါသည်။