.jpg)
လုပ်ငန်းရှင်များ၏လက်အတွင်း ကျရောက်နေသည့် ကရင်ပြည်နယ်၊ ဘားအံမြို့ မြို့မ အားကစားကွင်းကို ပြန်လည် ရယူလိုသည်ဟု ဒေသခံတို့က ပြောနေကြသည်။
ပြည်သူပိုင် ဘောလုံးကွင်းကို ကုမ္ပဏီတခု၏ အကျိုးအမြတ်အတွက် မသုံးစေလိုကြောင်း ဒေသခံတဦးဖြစ်သည့် ဦးခင်စိုးက ပြောသည်။
“ဒီကွင်းကို ပြည်နယ်လွှတ်တော်အဖြစ် အသုံးပြုမယ် ဆိုရင်တော့ ကျနော်တို့ ဒေသခံတွေအားလုံး ကျေနပ်ပါတယ်” ဟု ဦးခင်စိုးက ဆိုသည်။
၎င်းအားကစားကွင်းမှ တိုင်းအဆင့်၊ ပြည်နယ်အဆင့်၊ နိုင်ငံအဆင့် အားကစားသမားကောင်းများ ထွက်ပေါ်လာခြင်း၊
ကွင်းအနီးတွင် ဗိုလ်ချုပ်အောင်ဆန်း သမိုင်းဝင် မိန့်ခွန်းပြောကြားခဲ့ဖူးခြင်းတို့ကြောင့် အားကစားကွင်းအဖြစ်သာ မြင်တွေ့လိုသည်ဟု ဆိုကြသည်။
သံလွင်၊ ကန်သာယာ စသည့် အားကစားကွင်းများသည်လည်း မြို့မကွင်းအခြေအနေနှင့် မတိမ်းမယိမ်း ဖြစ်လာသည်ဟု သိရသည်။
“စစ်တပ်ကွင်းကလည်း အပြင်လူတွေ ဝင်လို့ မရတော့ဘူး၊ ကန်သာယာကွင်းကလည်း ရေလယ်ခေါင်ကို ရောက်သွားပြီ၊ သံလွင်ကွင်းကလည်း ကရင်ပြည်နယ်ဂေဟာ ဆောက်နေလို့ ကစားလို့ မရတော့ဘူး” ဟု ဘားအံဒေသခံတဦးက ပြောသည်။
မြို့မကွင်း လုပ်ငန်းရှင်လက်သို့ ရောက်သွားသည်မှာ ၁၉၉၅ ဝန်းကျင်ခန့်က ဖြစ်သည်။
“ပထမဆုံးပိုင်ရှင်ဖြစ်တဲ့ မြဌေးကြွယ်လင်း ကုမ္ပဏီကတော့ ဘဏ်ဆောက်မယ်လို့ သိရတယ်။
နောက်ထပ်ပြောင်းသွားတဲ့ ပိုင်ရှင်ဖြစ်တဲ့ ရောင်နီဦး ကုမ္ပဏီကကျတော့ အဆင့်မြင့်ပလာဇာ ဆောက်မယ်လို့ ကြားတယ်။
ဒါပေမယ့် ခုချိန်ထိ ဘာမှ ဖြစ်မလာသေးဘူး” ဟု အမှတ် ၃ ရပ်ကွက် ဥက္ကဋ္ဌဟောင်း ဦးခင်အောင်ထွန်းက ပြောသည်။
မြဌေးကြွယ်လင်းကုမ္ပဏီကို အငှားချခဲ့သော်လည်း နောက်ပိုင်း ထိုနေရာတွင် ရောင်နီဦး၊ ဝေမိုး စသည့် ကုမ္ပဏီ ဆိုင်းဘုတ်များ ပြောင်းလဲ ချိတ်ဆွဲခဲ့သဖြင့် လုပ်ငန်းရှင် အပြောင်းအလဲ ရှိသည်ဟု ယူဆကြောင်း ဒေသခံများက ပြောသည်။
“လွှတ်တော်ကိုယ်စားလှယ် ဦးစောအောင်ကျော်နိုင်ပြောတာကတော့ ဒီမြေစာရင်းက အခုချိန်ထိ မြဌေးကြွယ်လင်းကုမ္ပဏီ နာမည်နဲ့ပဲ ရှိနေသေးတယ်တဲ့။ ဒါပေမယ့် အဆင့်ဆင့် လုပ်နေတာတွေကတော့ ၃ ဦးလောက် ရှိနေပြီ” ဟု ဒေသခံ ဦးခင်စိုးက ဆိုသည်။
လုပ်ငန်းရှင်လက်အတွင်း အားကစားကွင်း ရောက်နေခြင်းကို ကန့်ကွက်ကြောင်း ဒေသခံ အများအပြား လက်မှတ်ရေးထိုးပြီး ဇန်နဝါရီလက အမျိုးသားလွှတ်တော်သို့ ပေးပို့ခဲ့ကြသည်ဟု သိရသည်။
ညိမ်းပြည့်စုံ ~
- ဧရာဝတီ Facebook / ဧရာဝတီ Twitter
0 comments :
Post a Comment