ဧရာဝတီတိုင်းလွှတ်တော် အရင်လိုမဟုတ်တော့ပါ…

Sunday, April 28, 2013

လုံခြုံရေးအခြေအနေကြောင့်ုရွှေ့ဆိုင်းထားတဲ့ ဧရာဝတီတိုင်းဒေသကြီးလွှတ်တော် ဆဋ္ဌမပုံမှန် အစည်း အဝေး ကို မနေ့က ပြန်လည်ကျင်းပခဲ့ရာမှာ လွှတ်တော်သက်တမ်းတလျှောက် တကြိမ်တခါမှ မဖြစ်ခဲ့ဘူးတဲ့ ကိစ္စတွေ ဖြစ်ပွားခဲ့ပါတယ်။ 

  
အဲဒါကတော့ နိုင်ငံတော်သမ္မတဦးသိန်းစိန်က ဧပြီလ ၂ ရက်နေ့ရက်စွဲနဲ့ ပေးပို့ထားတဲ့သ၀ဏ်လွှာကို လွှတ်တော်မှာ ဖတ်ကြားခဲ့ရာမှာ ပြည်တွင်း၊ ပြည်ပကသတင်းမီဒီယာကိုမှ သတင်းယူခွင့်မပေးဘဲ တံခါးပိတ်ပြီး ဖတ်ကြားခဲ့တဲ့ကိစ္စ ဖြစ်ပါတယ်။ 

မြန်မာနိုင်ငံက ပြည်နယ်နဲ့ တိုင်းဒေသကြီးလွှတ်တော်တွေထဲမှာ အထင်ကရဖြစ်နေတဲ့ ဧရာဝတီတိုင်း လွှတ်တော်သက်တမ်းတလျှောက်မှာ လွှတ်တော်ပုံမှန်အစည်းအဝေးတွေဆိုရင် သတင်းမီဒီယာတွေကို တလေးတစားနဲ့ အမြဲဖိတ်ကြားလေ့ရှိသလို လွှတ်တော်ထဲကိုလည်း တံခါးမရှိ ဓားမရှိ လွပ်လပ်စွာ ၀င်ထွက် သွားလာ သတင်းယူခွင့်ရရှိခဲ့ပါတယ်။ 



မနေ့ကကျင်းပတဲ့ ဆဋ္ဌမအကြိမ်မြောက် လွှတ်တော်ပုံမှန်အစည်းအဝေးမှာ အရေးကြီးကိစ္စ ရှိတယ်ဆိုတဲ့ အကြောင်းပြချက်နဲ့ လွှတ်တော်ထဲမှာသတင်းယူနေတဲ့ သတင်းမီဒီယာသမားတွေအပြင် အစိုးရအဖွဲ့ရုံးက မှတ်တမ်းတင် ဗီဒီယိုသမား၊ ကင်မရားသမားနဲ့ အသံပိုင်းဆိုင်ရာထိန်းချုပ်တဲ့ စက်ခန်းက ၀န်ထမ်းတွေကိုပါ အပြင်ထွက်ခိုင်းခဲ့ပါတယ်။ 

အဲ့လိုထွက်ခိုင်းပြီးတော့မှ လွှတ်တော်အစည်းအဝေး မနက်ပိုင်းအစီအစဉ်တွေကို ကျင်းပခဲ့ရာမှာ နိုင်ငံတော် သမ္မတပေးပို့တဲ့ သ၀ဏ်လွှာကို ဖတ်ကြားမှတ်တမ်းတင်တဲ့အစီအစဉ်ပြီးသွားမှပဲ သတင်းထောက်တွေ လွှတ်တော်ထဲကို ပြန်ဝင်ခွင့်ရခဲ့ပါတယ်။ 

လွှတ်တော်ကိုယ်စားလှယ်တွေကို ပြန်လည်မေးမြန်းကြည့်တော့ သမ္မတရဲ့သ၀ဏ်လွှာမှာ တိုင်းအုပ်ချုပ်ရေး မှူး ဦးအေးကျော်ဟာ ရာထူးကိုအကြောင်းပြုပြီး အဂတိလိုက်စားမှုတွေ၊ အာဏာအလွန်အကျွံ သုံးစွဲမှုတွေ 
ပြု လုပ်နေကြောင်း ယခင် တိုင်းလွှတ်တော်ဥက္ကဋ္ဌ ဦးဆန်းဆင့်က နိုင်ငံတော်သမ္မတထံ သ၀ဏ်လွှာပေးပို့ပြီး တင်ပြခဲ့တယ်။ 

အဲ့လိုတင်ပြတဲ့အတွက် ပြည်ထဲရေးဝန်ကြီး ဒု ဗိုလ်ချုပ်ကြီးကိုကို အမိန့်နဲ့ အထူးစုံစမ်းစစ်ဆေးရေးဌာန (စစစ) က ဒုတိယညွှန်ကြားရေးမှူးချုပ် ဦးဆောင်တဲ့အဖွဲ့က ဧရာဝတီတိုင်းကိုလာရောက်ပြီး ဦးအေးကျော် ကို စစ်ဆေးခဲ့ပါတယ်။ 

စစ်ဆေးမှုရလာဒ်တွေကို နိုင်ငံတော်သမ္မတထံတင်ပြလာတဲ့အတွက် သမ္မတက တိုင်းလွှတ်တော်ဆီ သ၀ဏ်လွှာ ပေးပို့ပြီး ဦးအေးကျော်နဲ့ပတ်သတ်တဲ့ကိစ္စကို ရှင်းလင်းခိုင်းတာ ဖြစ်ကြောင်း သိလာရပါတယ်။ 

သ၀ဏ်လွှာမှာ အချက် ၁၂ ချက်ပါဝင်ပြီးတော့ အဲဒီအထဲက ၂ ချက်ကတော့ ဦးအေးကျော်အနေနဲ့ ဥပဒေနဲ့ငြိစွန်းနေလို့ သက်ဆိုင်ရာဌာနတွေက ဆက်လက်စုံစမ်းစစ်ဆေး သင့်တယ်လို့ ပါရှိပါတယ်။ 

ကျန်တဲ့အချက်တွေကတော့ သံသယနဲ့တိုင်ကြားတဲ့အချက်တွေပါလို့ ရေးသားထားကြောင်း သိရပါတယ်။ ဒါကလည်း ကိုယ့်ဘာသာ လွှတ်တော်ကိုယ်စားလှယ်တွေကို အပင်ပန်းခံ လိုက်လံမေးမြန်းခဲ့လို့ သိခဲ့ရတာပါ။ 

အဲတော့ လွှတ်တော် တံခါးပိတ်အစည်းအဝေးလို့ ကြိုတင်ကြေညာခြင်းလည်း မရှိ၊ လွှတ်တော်ရဲ့ တနေ့တာ အစီအစဉ်မှာလည်း ထူးထူးခြားခြား ဘာမှရေးထားတာမရှိဘဲနဲ့ ဘာကြောင့် ဒီသ၀ဏ်လွှာကို တံခါးပိတ် ဖတ်ကြားခဲ့တာပါလဲ။ 

ဘာကြောင့်သတင်းထောက်တွေကို အပြင်ထွက်ခိုင်းပြီး သတင်းအမှောင်ချခဲ့ရတာပါလဲ။ လွှတ်တော်ဥက္ကဋ္ဌ ဦးတင်စိုးကတော့ သတင်းထောက်တွေကို အပြင်ထုတ်ဖို့ သူမခိုင်းပါဘူးလို့ ပြောပါတယ်။ 

“မီဒီယာတွေကို လွှတ်တော်အပြင်ဘက်ထွက်ဖို့ ကျနော်မခိုင်းခဲ့ပါဘူး။ ဒီသ၀ဏ်လွှာကိစ္စကို ကျနော့်အနေနဲ့ ဘာမှဖုံးကွယ်စရာအကြောင်းမရှိသလို မီဒီယာတွေကိုလည်း မရေးပါနဲ့လို့ တားမြစ်စရာ မရှိပါဘူး”လို့ ဦးတင်စိုးက ဧရာဝတီကို ပြောပါတယ်။ 

တိုင်းဒေသကြီးနဲ့ပြည်နယ်လွှတ်တော်ဆိုင်ရာ နည်းဥပဒေ အပိုဒ် ၁၆၀ မှာ “လွှတ်တော်အစည်းအဝေးကို တံခါးပိတ်ကျင်းပမည်ဟု ဥက္ကဋ္ဌက ကြေညာလျှင် ဥက္ကဋ္ဌက ခွင့်ပြုထားသောသူများမှအပ ကျန်ပုဂ္ဂိုလ်များမှာ အစည်းအဝေးခန်းမအတွင်းမှ ထွက်ခွာပေးရမည်”လို့ ပါရှိပါတယ်။ 

အခုက လွှတ်တော်ဥက္ကဋ္ဌကလည်း မခိုင်း၊ တံခါးပိတ်ကျင်းပမယ်လို့လည်း မကြေညာဘဲနဲ့ လွှတ်တော်ထဲမှာ သတင်းယူဖို့ရောက်နေတဲ့ သတင်းထောက်တွေကို ဘယ်သူက ကိုယ့်သဘောနဲ့ကိုယ် လွှတ်တော်ခန်းမ အပြင်ဘက်ကို ထုတ်ပစ်လိုက်တာပါလဲ… သတင်းထောက်တွေမှာ သမ္မတရဲ့သ၀ဏ်လွှာဖတ်ကြားမှုကို နားမထောင်လိုက်ရတဲ့အတွက် တိုင်းအစိုးရအဖွဲ့ အတွင်းရေးမှူး ဦးအေးကျော်နဲ့ပတ်သတ်ပြီး သတင်းရေးဖို့ အသံဖိုင်သက်သေအထောက်အထား မရခဲ့ကြသလို လွှတ်တော်ကိုယ်စားလှယ်တွေကို ပြန်မေးရတဲ့ အချက် အလက်တချို့နဲ့ပဲ သတင်းတည်ဆောက် ရေးသားခဲ့ရပါတယ်။ 

ပုသိမ်ခရိုင်အတွင်းက အမည်မဖော်လိုသည့် တိုင်းဒေသကြီး လွှတ်တော် ကိုယ်စားလှယ်တဦးကတော့ “နိုင်ငံတော်သမ္မတကြီးက သူ့ဝန်ထမ်းကို တိုးတိုးတိတ်တိတ်အရေးယူချင်ရင် နေပြည်တော်ကိုခေါ်ပြီး ဌာနတွင်း အရေးယူလိုက်လို့ ရပါတယ်။ 

အဲဒီလိုမဟုတ်ဘဲ ပွင့်လင်းမြင်သာမှုရှိရှိနဲ့ အများပြည်သူသိစေဖို့ လွှတ်တော်ကို သ၀ဏ်လွှာပေးပို့ ဖတ်ကြားစေ ခဲ့တာကို သတင်းမီဒီယာတွေ သတင်းယူလို့မရအောင် ဟန့်တားပိတ်ပင်ခဲ့တာက မလုပ်သင့်တဲ့အရာပါ။

 အောက်ခြေအဆင့်တွေမှာ ပွင့်လင်းမြင်သာမှု ရှိသင့်နေပါပြီ”လို့ ယင်းလွှတ်တော် ကိုယ်စားလှယ်က ပြော ဆို ခဲ့ပါတယ်။ 

 နောက်ထပ် ထူးခြားတဲ့ဖြစ်ရပ်တခုကတော့ သမ္မတသ၀ဏ်လွှာ ပထမပိုင်းကို လွှတ်တော် ဥက္ကဋ္ဌက ဖတ်ကြားခဲ့ပြီး သ၀ဏ်လွှာဒုတိယပိုင်းကို လွှတ်တော် ဒု ဥက္ကဋ္ဌ ဒေါက်တာထိန်ဝင်းကို ဖတ်ကြားစေခဲ့ ပါတယ်။ 

ဧရာဝတီတိုင်းက လယ်သမား၊ ရေလုပ်သားပြည်သူတွေ တခဲနက် အားပေးထောက်ခံခဲ့တဲ့ ယခင် ဥက္ကဋ္ဌ 
ဟောင်း ဦးဆန်းဆင့်နဲ့ လက်တွဲညီခဲ့တဲ့ လွှတ်တော် ဒု ဥက္ကဋ္ဌ ဒေါက်တာထိန်ဝင်းဟာ သ၀ဏ်လွှာ မှာရေး ထားတဲ့ အတိုင်း မဖတ်ဘဲနဲ့ တိုင်းအုပ်ချုပ်ရေးမှူး ဦးအေးကျော်ရဲ့နာမည်ကို ချန်လှပ်ပြီးတော့ ဖတ်ကြားခဲ့ ပါတယ်။ 

 “ဒု ဥက္ကဋ္ဌက သ၀ဏ်လွှာအစပိုင်းမှာ ဦးအေးကျော်နာမည်ကို ကျော်ဖတ်နေတော့ လွှတ်တော်ဥက္ကဋ္ဌက ဒု ဥက္ကဌကြီး နာမည်ကို ကျော်မဖတ်ပါနဲ့။ နာမည်ကိုပါ ထည့်ဖတ်လို့ ခိုင်းတော့မှ ဦးအေးကျော် နာမည်ကို ထည့်ဖတ်ခဲ့တာ”လို့ ဖျာပုံခရိုင်မှ လွှတ်တော်ကိုယ်စားလှယ်တဦးက ပြောပါတယ်။ 

ဒါကတော့ ယခင်ကနဲ့မတူ တမူထူးခြားလာတဲ့ ဧရာဝတီတိုင်းဒေသကြီးလွှတ်တော်က အဖြစ်အပျက် တချို့ကို စာဖတ်သူများသိရှိအောင် ရေးသားတင်ပြလိုက်ရခြင်း ဖြစ်ပါတယ်။ 

ဆလိုင်း သန့်စင်

0 comments :

Post a Comment

 
Copyright © 2014 Irrawaddy Publishing Group. All Rights Reserved