.jpg)
မြန်မာပြည်၏ နိုင်ငံရေးအကျဉ်းသားစာရင်းတွင် လူသစ်တဦး ယနေ့ တိုးလာဖွယ် ရှိသည်။
နိုင်/ကျဉ်း လွတ်မြောက်ရေး လှုပ်ရှားမှုတွင် ဦးဆောင် ပါဝင်ခဲ့သူ၊ အာဏာပိုင်တို့၏ ဝရမ်းထုတ်ခြင်း ခံထားရသူ Generation Wave အဖွဲ့မှ ကိုဝေဖြိုး ယနေ့ နံနက်ပိုင်းက ပြည်မြို့တွင် ဖမ်းဆီးခံလိုက်ရသောကြောင့်ဖြစ်သည်။
“သူတို့ (အာဏာပိုင်တို့) ဘယ်လောက်ပဲ နိုင်ငံတကာကို ဘယ်လိုအော်အော်၊ အောက်ခြေမှာ လှုပ်ရှားတက်ကြွသူတွေကို မတရား ဖိနှိပ်ဖမ်းဆီးတုန်းပဲလို့ ကျနော်ပြောချင်တယ်” ဟု ကိုဝေဖြိုးက အချုပ်ခန်းအတွင်းသို့ မရောက်မီတွင် ဧရာဝတီသို့ ပြောသည်။
သူ့ကို ထိန်းသိမ်းလိုက်ခြင်းနှင့်ပတ်သက်ပြီး သူက အောက်ပါအတိုင်း ဆက်လက်မှတ်ချက်ပြုလိုက်သည်။
“နိုင်ငံရေးလုပ်သူတွေ၊ လူ့အခွင့်အရေးနဲ့ ဒီမိုကရေစီ ဖွံ့ဖြိုးတိုးတက်ဖို့အတွက် လှုပ်ရှားတက်ကြွသူတွေဟာ အခုထိ အဖမ်းခံ နှိပ်ကွပ်ခံနေရတုန်းပဲ။
ဒီကိစ္စတွေနဲ့ ပတ်သက်လို့ မတရားတဲ့ ဥပဒေတွေ စွဲချက်မျိုးစုံတွေနဲ့ နောင်တချိန်မှာလည်း အချိန် မရွေး ဖမ်းနိုင်တယ်”
၂၀၁၁ ခုနှစ် ဇူလိုင်လက အကျဉ်းထောင်တွင် ကျန်ရှိနေသေးသည့် အကျဉ်းသားများ ပြန်လည်လွတ်မြောက်လာရန် ကိုဝေဖြိုးနှင့် လုပ်ဖော်ကိုင်ဘက်၂ ယောက် ဦးဆောင်ကာ နိုင်ငံရေး အကျဉ်းသားများ၏ အမည်နှင့် ဓါတ်ပုံများကို ပိုစတာထုတ်ကာ ပြုလုပ်ဆောင်ရွက်ခဲ့သည့်အတွက် ယခု ကိုဝေဖြိုးအား ဥပဒေပုဒ်မ ၁၇ (၁) ပုံနှိပ်အက်ဥပဒေဖြင့် ဖမ်းဆီးခြင်းဖြစ်ကြောင်း သိရသည်။
“သူတို့ အဲလိုလုပ်လုပ်ချင်းကတည်းက ဖမ်းတယ်။ ကိုဝေဖြိုးကတော့ လွတ်သွားတယ်။ ကျန်တဲ့ ၂ ယောက်ဖြစ်တဲ့ ကိုဇာနည်နဲ့ ကိုဝေဖြိုးအောင်ကိုတော့ မိသွားတယ်။ ပြစ်ဒဏ်လည်း ပေးခဲ့တယ်။ ကိုဝေဖြိုးကို အခုမှ ပြန်ဖမ်းမိတာပေါ့ ဒါကြောင့် အခုမှ ဖမ်းဆီးလိုက်တာပါ” ဟု ပြည်မြို့ အမှတ် ၁ ရဲစခန်းမှ တပ်ကြပ်ကြီး သိန်းဦးက ဧရာဝတီသို့ ပြောသည်။
၂၀၁၁ ခုနှစ်က ဖမ်းဆီးခံခဲ့ရသည့် Generation Wave မှ ကိုဇာနည်နှင့် ကိုဝေဖြိုးအောင်တို့ကို ပြည်မြို့ရှိ အကျဉ်းထောင် တွင် ၇ လ ဖမ်းဆီးထိန်းချုပ်ခဲ့ပြီး ၂၀၁၂ ခုနှစ် ဖေဖဝါရီလတွင် ငွေဒဏ် ၃ သောင်း ဖြင့် ပြစ်ဒဏ်ချမှတ်ခဲ့ကြောင်း၊ ယခု ကိုဝေဖြိုးကို ဖမ်းဆီးထိန်းသိမ်းခြင်း မပြုလုပ်နိုင်ခဲ့သည့်အတွက် ဝရမ်းထုတ်ထားခဲ့ကြောင်း သိရသည်။
“ကိုဝေဖြိုးကို ပြည်မြို့မှာ ဝရမ်းထုတ်ထားခဲ့ပေမယ့် သမ္မတဦးသိန်းစိန် တက်လာပြီးနောက်ပိုင်းမှာ ကိုဝေဖြိုးတို့က ပြည်မြို့ ဘက်ကို ပြန်လည်အသွားအလာတွေ လုပ်ခဲ့တယ်။ ဒါပေမယ့် ဘယ်သူမှ ဘာမှ မလုပ်ကြဘူး။ ဘာပြသနာမှလည်း မရှိဘူး။ အခုတခေါက်မှ ဖမ်းတာ။ ဒီအမှုကို တရားရုံးမှာ တင်မယ်လို့ ကြားထားတယ်။ နောက်ပြီး အာမခံလည်း မပေးဘူး” ဟု Generation Wave မှ ဥက္ကဋ္ဌဖြစ်သူ ကိုမိုဃ်းသွေးက ဧရာဝတီကို ဆိုသည်။
ကိုဝေဖြိုးသည် ယခုတကြိမ်တွင် ပြည်မြို့ရှိ Street Golden Land Hotel ၌ လူ့အခွင့်အရေးနှင့် ပတ်သက်သည့် သင်တန်း ပို့ချပေးရန် သွားရောက်ခဲ့ခြင်းဖြစ်ကာ ကိုဝေဖြိုးအား ယနေ့ နံနက် ၁၁ နာရီခွဲ ခန့်တွင် ပြည်မြို့ အမှတ် ၁ ရဲစခန်းမှ ရဲမှူး အောင်လင်းက ဦးဆောင်၍ ဖမ်းဆီးသွားခြင်းဖြစ်ကြောင်း သိရသည်။
ကိုဝေဖြိုးအား ဖမ်းဆီးထိန်းသိမ်းခဲ့သည်အတွက် ရှေ့နေများ ငှားရမ်းနေသည့်အပြင် လိုအပ်သည်များကို ပြင်ဆင် ဆောင်ရွက်နေကြောင်း၊ အမှန်တကယ်အားဖြင့် ယခုကဲ့သို့ ဖမ်းဆီးရာတွင် အာမခံပေးသင့်သော်လည်း အာမခံ မပေး ကြောင်း၊ ကိုဝေဖြိုးအား ပြည်မြို့ အမှတ် ၁ ရဲစခန်းတွင် ယနေ့မှ စ၍ အနည်းဆုံး ၁၄ ရက် ဖမ်းဆီး ထိန်းသိမ်းနိုင်ရန် အာဏာပိုင်တို့က လုပ်ဆောင်ထားကြောင်း ကိုမိုးသွေး၏ ပြောပြချက်များအရ သိရသည်။
အစိုးရလုပ်ဆောင်နေသည့် ပြုပြင်ပြောင်းလဲမှုများကို မိမိတို့ အနေဖြင့် မည်သို့မျှ ယုံကြည်၍ မရသေးကြောင်း၊ မိမိတို့ နိုင်ငံရေး လှုပ်ရှားသူများသည် ယခုအချိန်ထိ ဘဝအတွက် အာမခံချက် တစုံတရာ မရှိသေးကြောင်း၊ သမ္မတ ဦးသိန်းစိန် အပါအဝင် အုပ်ချုပ်ရေး အာဏာပိုင်များက လူ့အခွင့်အရေးနှင့် ပတ်သက်သည်များ ဒီမိုကရေစီ အသွင် ကူးပြောင်းရေးနှင့် ပတ်သက်သည်များကို မည်သို့ ကူးပြောင်းမည်ဟု ဆိုထားစေကာမူ လက်တွေ့တွင် အဆင့်ဆင့်သော ဖိနှိပ်ချုပ်ချယ်မှုများ ရှိနေသေးကြောင်း ကိုဝေဖြိုးက ဆိုသည်။
သမ္မတအပြင် ပြည်ထောင်စု ဝန်ကြီးများ၊ အုပ်ချုပ်ရေး အာဏာပိုင်များက ဒီမိုကရေစီ အသွင်ကူးပြောင်းရေး ကာလအတွက် နိုင်ငံရေး အကျဉ်းသားများကို အကျဉ်းထောင်မှ ပြန်လည်လွှတ်ပေးမည်၊ လွတ်လပ်စွာ ပြောဆိုခွင့်ပေးမည်၊ ပွင့်လင်းမြင်သာမှု ရှိစေရမည် စသည့် ကတိစကားများ ပြောထားသော်လည်း ယခုကဲ့သို့ အောက်ခြေတွင် ရှိသည့် နိုင်ငံရေး လှုပ်ရှားသူများကို ၎င်းတို့ လုပ်ချင်သလို လုပ်နေကြကာ ဖမ်းဆီးနေခြင်းများသည် အလွန်ရုပ်ဆိုး အကျဉ်းတန်ကြောင်း နိုင်ငံရေးလှုပ်ရှားသူ အများစုက ပြောသည်။
နိုင်ငံရေး တက်ကြွလှုပ်ရှားသူများအား နိုင်ငံတော်ကို အကြည်ညိုပျက်စေမှုဖြင့် တရားစွဲခြင်း၊ ဖမ်းဆီးထိန်းချုပ်ခြင်းသည် အမှန်တကယ်အားဖြင့် အုပ်ချုပ်ရေးအာဏာပိုင်များ၏ ယခုကဲ့သို့ ပြုလုပ်နေမှုများကသာ အကြည်ညို ပျက်စေလျက် ရှိကြောင်းကို နိုင်ငံတော်အစိုးရနှင့် အုပ်ချုပ်ရေး အာဏာပိုင်များကို သိစေလိုကြောင်း ကိုမိုဃ်းသွေးက ပြောသည်။
“ကျနော်တို့ ဘာကိုမှ ဖောက်ခွဲဖျက်ဆီးနေတာ မဟုတ်သလို မီးရှို့ဖျက်ဆီး လူသတ်နေတာလည်း မဟုတ်ဘူး။ နိုင်ငံတော် ကောင်းရာကောင်းကြောင်းအတွက် ကြိုးပမ်းနေတဲ့ လူငယ်တွေပဲ ဖြစ်တယ်။ ဒါကြောင့် မလုပ်သင့် မလုပ်အပ်တဲ့ အခုလို နည်းတွေနဲ့ မနှိပ်ကွတ်ပါနဲ့လို့ ပြောချင်တယ်။ ဒီလိုအတားအဆီးတွေကို ဆက်လုပ်နေမယ်ဆိုရင် တိုင်းပြည်အတွက် မကောင်းဘူး။ ပြည်သူလူထုရဲ့ ပူးပေါင်းပါဝင်မှုတွေ လျော့ကြသွားစေနိုင်တယ်”ဟု ကိုမိုဃ်းသွေးက ဆိုသည်။
.
0 comments :
Post a Comment