မြန်မာ့တပ်မတော် အသွင်ပြောင်းလဲမှသာ...

~


 မြန်မာပြည်မှာ အပြောင်းအလဲတွေ အမှန်တကယ် ဖြစ်ပေါ်ဖို့၊ ရေရှည်တည်တံ့တဲ့ငြိမ်းချမ်းရေး ဖြစ်ပေါ်ဖို့ ဆိုရင် မြန်မာ့တပ်မတော်ရဲ့ အနေအထားကို ပြုပြင်ပြောင်းလဲမှဖြစ်မယ်လို့ ဒီကနေ့ ထွက်ပေါ်လာတဲ့ အစီရင်ခံစာတစောင်မှာ ဖော်ပြထားပါတယ်။
 

 “ငြိမ်းချမ်းရေးနှင့် ပဋိပက္ခစစ်ပွဲများဆိုင်ရာ မြန်မာ့ စီးပွားရေးအခြေအနေ” လို့ အမည်ပေးထားတဲ့ အစီရင်ခံစာမှာ အဲဒီလို ဖော်ပြထားတာပါ။

"တပ်မတော်ကို နည်းပညာကျွမ်းကျင်မှုဖြင့် လုပ်ဆောင်သည့် ခေတ်မီကာကွယ်ရေးတပ်မတော် (Professional Army)တစ်ရပ် အဖြစ်သို့ အသွင်ပြောင်းလဲမှသာ" ငြိမ်းချမ်းရေး တကယ်ရမယ်၊ ပြုပြင်ပြောင်းလဲရေး တကယ် ဖြစ်ထွန်းပါမယ် တဲ့။

စစ်တပ်က စစ်တပ်အလုပ်ကိုပဲ ဦးစားပေးလုပ်ပါလို့ ဆိုလိုဟန် တူပါတယ်။

မြန်မာဘာသာနဲ့ ထုတ်ဝေတဲ့ ဒီအစီရင်ခံစာမှာ စာမျက်နှာ ၇၀ ကျော် ပါဝင်ပါတယ်။

ဒီအစီရင်ခံစာအကြောင်း မိတ်ဆက် ရှင်းလင်းပွဲကို ဒီကနေ့ နေ့ခင်းပိုင်းက ရန်ကုန်မြို့မှာ ပြုလုပ်ခဲ့တဲ့အတွက် မနက်ဖြန်ထုတ် သတင်းစာများမှာ ဒီအကြောင်း ဖတ်ရှုရဖွယ် ရှိပါတယ်။ ဧရာဝတီ ပင်မ စာမျက်နှာမှာတော့ ဒီအစီရင်ခံစာနဲ့ ပတ်သက်ပြီး သတင်းတပုဒ် ရေးထားပါတယ်။ စီးပွားရေး မဖွံ့ဖြိုးမှု ငြိမ်းချမ်းရေးနှင့် ဆက်စပ်  ဆိုတဲ့  သတင်းကို http://burma.irrawaddy.org/news/2013/10/28/50182.html မှာ ဖတ်နိုင်ပါတယ်။ သတင်းထောက် နန်းဆိုင်နွမ် ရေးသားတဲ့သတင်းဖြစ်ပါတယ်။

နိုင်ငံတကာမြန်မာ့သတင်း-BNI အဖွဲ့ နဲ့ Myanmar Peace Monitor တို့ ပူးတွဲ ထုတ်ပြန်တဲ့ အစီရင်ခံစာပါ။

 ဖွံ့ဖြိုးရေးစီမံကိန်းကြီးများကြောင့် စစ်တပ်အင်အား တိုးချဲ့ချထားခြင်း နှင့် အကြမ်းဖက်မှုများ ဖြစ်ပေါ်ခြင်း
သဘာဝအရင်းအမြစ်များအပေါ် ပိုင်ဆိုင်မှုနှင့် စီမံခန့်ခွဲခွင့် အာဏာ ကင်းမဲ့နေခြင်း
မြေယာသိမ်းပိုက်မှုများနှင့် အခွင့်အရေးများ
 ဖွံ့ဖြိုးရေးစီမံကိန်းကြီးများကြောင့် ဒေသခံပြည်သူများ၏ သဘာဝပတ်ဝန်းကျင်နှင့် လူမှုရေးအပေါ် ထိခိုက် သက်ရောက်မှုများ
တိုင်းရင်းသားလူမျိုးစုများ၏ ဒေသများတွင် ဆင်းရဲမွဲတေမှုနှင့် ဖွံ့ဖြိုးရေးနောက်ကျနေမှု
တိုင်းရင်းသားအုပ်စုများအကြား ဈေးကွက်အရ ပြိုင်ဆိုင်မှုများ

စတဲ့ စတဲ့ အကြောင်းအရာများကို အသေးစိတ် တင်ပြအစီရင်ခံထားတာ တွေ့ရပါတယ်။

စာမျက်နှာ ၁၅ မှာ ဆိုရင် မြန်မာ့တပ်မတော်ရဲ့ စီးပွားရေးလုပ်ငန်းကြီးများ၊ "ခရိုနီများပိုင်ဆိုင်သည့်  ကုမ္ပဏီများ" ဆိုတဲ့ အချက်အလက်တွေကို ဖတ်ရမှာပါ။

အစီရင်ခံစာကို http://www.mmpeacemonitor.org/ မှာ ရှိတဲ့ PDF ဖိုင်ကို ဒေါင်းလုတ်လုပ်ပြီး ဖတ်နိုင်ပါတယ်။ ဒေါင်းလုတ်လုပ်ဖို့ဆိုရင် အင်တာနက်မြန်နှုန်းမြင့်မှ ဖြစ်ပါလိမ့်မယ်။

အစီရင်ခံစာ ပြုစုတဲ့ BNI အဖွဲ့မှာ သတင်းဌာန ၁၂ ခု ပါဝင်ပါတယ်။ အများစုကတော့ တိုင်းရင်းသားသတင်းဌာနများပါပဲ။

လွတ်လပ်သောမွန်သတင်းအေဂျင်စီ-IMNA
ကချင်သတင်းဌာန-KNG
ကုလားတန် သတင်းဌာန-KALADAN PRESS

ကန္တာရ၀တီတိုင်း(မ်) (ကရင်နီ)
ရွှေဟင်္သာသတင်းဌာန
ကေအိုင်စီ(ကရင်)

ခိုနူမ်းထုန် သတင်းဌာန(ချင်း)
မဇ္ဈိမသတင်းဌာန
နိရဉ္စရာ သတင်းဌာန(ရခိုင်)

သတင်းနှင့်မီဒီယာကွန်ယက်
သျှမ်းသံတော်ဆင့်သတင်းဌာန
သံလွင်တိုင်း(မ်) 

အစီရင်ခံစာကို ပူးတွဲ ပြုစုတယ် ဆိုတဲ့ Myanmar Peace Monitor ဆိုတာကတော့ BNI အဖွဲ့ရဲ့ စောင့်ကြည့်လေ့လာရေးအလုပ်အဖွဲ့တခု ဖြစ်ပါတယ်။

• ဧရာဝတီ Facebook / ဧရာဝတီ Twitter

.