ရန်ကုန်တက္ကသိုလ်ရဲ့ အီလက်ထရွန်နစ်စာကြည့်တိုက်

Friday, March 28, 2014


~


 

ရန်ကုန်တက္ကသိုလ်တွင် စာအုပ်ပေါင်း လေးသန်းကျော် ဖတ်ရှုနိုင်သည့် အီလက်ထရွန်နစ် စာကြည့်တိုက် (Resource Center) ကို  ပြီးခဲ့သည့်ရက်ပိုင်းအတွင်းက ဖွင့်လှစ်လိုက်သည်။

 
 -
ကွန်ပျူတာ ၂၅ လုံး တပ်ဆင်ထားသော ထိုစာကြည့်တိုက် ဖြစ်မြောက်ရေး အကူအညီပေးသည့် ထိုင်းအခြေစိုက် iGroup သည် အာရှ ပစိဖိတ် ဒေသရှိ ပညာရေးနှင့် ပတ်သက်ပြီး ဆောင်ရွက်ပေးနေကြောင်း သိရသည်။

iGroup မှ ဦးအောင်မော်က
“သုတေသန ပြုလုပ်ရာမှာ ဒီလိုမျိုး အီလက်ထရွန်နစ် စာကြည့်တိုက်တွေ လိုအပ်တယ်။
လောလောဆယ်တော့ သူတို့ရဲ့ ရည်ရွယ်ချက်က ရန်ကုန်တက္ကသိုလ်က Master နဲ့ PhD ကျောင်းသားတွေ အတွက် အဓိက စီစဉ်ထားတယ်။
သူတို့တွေ ရည်ညွှန်း လုပ်နိုင်အောင် ကိုးကား နိုင်အောင်လို့ပါ” ဟု ဧရာဝတီကို ပြောသည်။

ရန်ကုန်တက္ကသိုလ် သိပ္ပံဆောင် International Center of Excellence (ICoE) အီလက်ထရွန်နစ် စာကြည့်တိုက်

Online Data Base (O.B.D) ဖြင့် ချိတ်ဆက်ထားသော e-book ၂ သန်းကျော်၊
စာတမ်း ပြုစုသူများ အထောက်အကူ ဖြစ်နိုင်စေသည့် နမူနာ စာတမ်းပေါင်း ၁သန်းကျော်၊
ရှားပါး စာအုပ်ပေါင်း ၁သန်းခန့်
တနင်္လာမှ သောကြာနေ့ အထိ
နံနက် ၈နာရီမှ ညနေ ၅နာရီအထိ 

ဦးအောင်မော်က
“အခုအလှူရှင်တွေ ထပ်ပေါ်လာတယ်။ အင်တာနက်လိုင်းတွေ ပိုကောင်းအောင် ချိတ်ဆက်မယ်။
လိုအပ်တဲ့ ပစ္စည်းတွေ ထပ်ဖြည့် ပြီးရင်တော့ ရန်ကုန်တက္ကသိုလ်ထဲမှာ ရှိတဲ့ အခြားဌာနက ကျောင်းသားတွေ အားလုံး သုံးနိုင်အောင် လုပ်သွားပါဦးမယ်” ဟု   ဆိုသည်။

“ဒီစာကြည့်တိုက်မှာ တချို့ စာအုပ်တွေက ရှားပါး စာအုပ်တွေ၊ စာတမ်းတွေ အကုန် ရှိတယ်။ နိုင်ငံတကာမှာ ရှိတဲ့ ထုတ်ဝေသူတွေက ဒီလိုထွက်သမျှ စာအုပ်တွေကို e-Book လုပ်ပြီး၊ နိုင်ငံတကာမှာ ရှိတဲ့ ကျောင်းတွေ တက္ကသိုလ်တွေကို ရောင်းတယ်။
အဲဒီကနေ ပြန်ဝယ်ပြီး ဒီလို စာကြည့်တိုက် ဖွင့်တာပါ။ ဒီအတွက် ကုန်ကျစရိတ်က တနှစ်ကို ဒေါ်လာ သောင်းဂဏန်းလောက် အထိ ကုန်ကျစရိတ် ရှိပါတယ်”  ဟု သူက ဆက်ရှင်းပြသည်။

နိုင်ငံတကာ ဆက်ဆံရေး ဘာသာရပ်အား M.A တက်ရောက်နေသော ကျောင်းသူတဦးက
“ ဒီ resource center က အခုမှ ဖွင့်တယ်ဆိုတော့ သိပ်ပြီးတွင်တွင် ကျယ်ကျယ်တော့ မသုံးဖြစ်သေးဘူး။ ဒါပေမယ့် အရင်ကထက် စာရင် အများကြီး အထောက်အကူ ရမှာပါ”
ဟု  ပြောသည်။

ယခင် အစိုးရ လက်ထက်က ရန်ကုန်မြို့ IBC ခန်းမ အတွင်း အီလက်ထရွန်နစ် စာကြည့်တိုက် ပေါ်ပေါက်ရေး ဆောင်ရွက်ခဲ့သည်။
သို့သော်လည်း ကုန်ကျစရိတ် များပြားခြင်း၊ ပညာရေးဝန်ကြီး ဌာနသို့ ဘတ်ဂျတ်ငွေ ချပေးမှု နည်းပါးခြင်းတို့ကြောင့် စီမံကိန်းအောင်မြင်ခြင်း မရှိခဲ့ပါ။

ရန်ကုန်တက္ကသိုလ် ဘွဲ့နှင်းသဘင်ခန်းမအနီးရှိ  ICoE ကို အမေရိကန်နိုင်ငံ   John Hopkin တက္ကသိုလ်နှင့် ပညာရေး ဝန်ကြီးဌာနတို့ ပူးပေါင်း ဖွင့်လှစ်ထားသည်။
 မြန်မာပြည်မှ တက္ကသိုလ် ဆရာ၊ ဆရာမများနှင့် စိတ်ပါဝင်စားသူတချို့ကို နိုင်ငံတကာ ဆက်ဆံရေး ဘာသာရပ် သင်တန်းများပေးလျက်ရှိသည်။

 မင်းဗညား


 






.

1 comments :

  1. Ye Win said... :

    The best news for Burma. The university is developing steadily and now the reference library with office hour access, it is cherry on the top. Thank you.

Post a Comment

 
Copyright © 2014 Irrawaddy Publishing Group. All Rights Reserved