အသက် ၁၈ နဲ့ ၂၅ ကြား လူငယ်လုပ်ငန်းရှင်တို့ စိတ်ဝင်စားမယ့် ဖိတ်ခေါ်ချက်

 ~




တယ်လီနောရဲ့ ကမကထပြုမှုနဲ့ နော်ဝေနိုင်ငံ သွားရောက် လေ့လာနိုင်မယ့် အခွင့်အရေးကို မြန်မာပြည်က လူငယ်လုပ်ငန်းရှင် ၂ ဦး ရပါလိမ့်မယ်။
 

• ရန်ကုန်မြို့ တယ်လီနောရုံး (ဓာတ်ပုံ – ဂျေပိုင် / ဧရာဝတီ)

ဒါဟာ မြန်မာလူငယ်တွေကို နော်ဝေမှာလုပ်မယ့် နိုင်ငံတကာတွေ့ဆုံပွဲတက်ဖို့ ပထမဆုံးအကြိမ် ဖိတ်ခေါ်ခြင်းပါပဲ တဲ့။ အသက် ၁၈ နဲ့ ၂၅ ကြား လူငယ်တွေ
www.telenor.com/youthsummit ကတဆင့် လျှောက်ထားနိုင်တယ်လို့ ဆိုထားတဲ့ တယ်လီနောဆက်သွယ်ရေးကုမ္ပဏီရဲ့ ထုတ်ပြန်ချက်ကို ဖော်ပြပေးလိုက်ပါတယ်။

တွေ့ဆုံပွဲဟာ နော်ဝေရဲ့ အထင်ကရဖြစ်တဲ့ နိုဗဲလ်ငြိမ်းချမ်းရေးဆုပေးပွဲကာလနဲ့လည်း တိုက်ဆိုင်နေပါတယ် တဲ့။

• မိုဘိုင်းဆက်သွယ်ရေးအား လူမှုပတ်ဝန်းကျင်ကောင်းကျိုးအတွက် အသုံးချခြင်း

မြန်မာလူငယ် စီးပွားရေးလုပ်ငန်းရှင်များ နော်ဝေးတွင် Youth Summit တက်ရောက်နိုင်မည်

 ရန်ကုန်မြို့ - ၂၀၁၄ ခုနှစ်၊  သြဂုတ်လ ၁၃ - တယ်လီနောမှ နှစ်စဉ်ကျင်းပသည့် Youth Summit အား မြန်မာနိုင်ငံကိုယ်စားပြုတက်ရောက်မည့် ဆန်းသစ်တီထွင်မှု ရှိသော လူမှုစီးပွားရေး လုပ်ငန်းရှင် လူငယ် ၂ ဦးကို ရှာဖွေလျက်ရှိပါသည်။  ယခုကဲ့သို့ နော်ဝေးနိုင်ငံတွင် တွေ့ဆုံမှုသည် မိုဘိုင်းချိတ်ဆက်မှု နှင့် ဒစ်ဂျစ်တယ် ဆက်သွယ်ရေးနည်းပညာမှ လူမှုဆိုင်ရာ ပြောင်းလဲမှုအတွက် မည်သည့် အခန်းကဏ္ဍမှ ပါဝင်မည်ကို သိရှိနိုင် မည်ဖြစ်ပြီး အားလုံးအတွက် အခွင့်အလမ်းများကို ဖန်းတီးနိုင်မည်ဖြစ်ပါသည်။

 တယ်လီနောသည် လာမည့် ဒီဇင်ဘာလတွင် နော်ဝေးနိုင်ငံ၏ မြို့တော် Oslo မြို့တွင် နှစ်ပတ်လည် Youth Summit ကို ကျင်းပမည်ဖြစ်ပါသည်။  တယ်လီနောမိုဘိုင်းမိသားစုတွင် မြန်မာနိုင်ငံသည် စက်တင်ဘာလမှ စတင်ပါဝင်တော့မည်ဖြစ်၍ မြန်မာနိုင်ငံမှ လူငယ်နှစ်ဦးအား ယခုလို နိုင်ငံတကာတွေ့ဆုံပွဲတွင် ပထမဦးဆုံးအကြိမ်အဖြစ် ဖိတ်ကြားခြင်းဖြစ်ပါသည်။ 

 Youth Summit သည် အနာဂတ် လူမှုစီးပွားရေးလုပ်ငန်းရှင်များကို ကျွမ်းကျင်ပညာရှင်များ ရှေ့ဆောင် တွေးခေါ်ပညာရှင်များ နှင့် အခြားဖိတ်ကြားထားသည့် နိုင်ငံအသီးသီးမှ ဆန်းသစ်တီထွင်မှုနှင့် တက်ကြွမှု အပြည့်အဝရှိသော လူငယ်များဖြင့် တွေ့ဆုံဆွေးနွေးပွဲ ဖြစ်ပါသည်။  ယင်းတွေ့ဆုံပွဲသည် မိုဘိုင်း၊  ဒစ်ဂျစ်တယ်ဆက်သွယ်ရေးနည်းပညာမှ လူနေမှုဘဝတိုးတက်ရေးနှင့် လူမှုအသိုင်းအဝိုင်းဖွံ့ဖြိုး ပြောင်းလဲနိုင်စွမ်းကို မည်သို့ ပေးအပ်နိုင်ကြောင်း မျှဝေဆွေးနွေးနိုင်သည့် နေရာတစ်ခုဖြစ်ပါသည်။

 လျှောက်ထားလိုသူများသည် အသက် ၁၈ နှစ်မှ ၂၅ နှစ် အတွင်းရှိ မြန်မာနိုင်ငံသားဖြစ်ရပါမည်။  www.telenor.com/youthsummit မှ တဆင့် လျှောက်ထားနိုင်မည်ဖြစ်ပါသည်။  နော်ဝေး နိုင်ငံ သို့သွားရောက်ခြင်း ခရီးစဉ်တစ်ခုလုံးအား တယ်လီနောမှ အပြည့်အဝထောက်ပံ့ပေး မည်ဖြစ်ပါသည်။

 ကျွန်တော်တို့ စက်တင်ဘာလမှာ မြန်မာနိုင်ငံကို မိုဘိုင်းချိတ်ဆက်မှု စတင်ပေးတဲ့အချိန်မှာ ဒီ Youth Summit က ရရှိလာတဲ့ အခွင့်အလမ်းနဲ့ စိတ်ကူးအတွေးအခေါ် အသစ်တွေက တဆင့် လူမှုအသိုင်း အဝိုင်းအတွက် ရေရှည်အကျိုးရှိစေမယ့် ထိရောက်မှုကို ရရှိမှာပါ။  မြန်မာနိုင်ငံကို ကိုယ်စားပြုပြီး တက်ရောက်မယ့်သူ ပြီးတော့ အပြုအဘောဆောင်တဲ့ ပြောင်းလဲမှုတွေကို ဒစ်ဂျစ်တယ် ဆက်သွယ်ရေးနည်းပညာ နဲ့ မိုဘိုင်းချိတ်ဆက်မှုက ဘယ်လိုဆောင်ကျဉ်းနိုင်တယ်ဆိုတာကို ဖော်ဆောင်ပြသနိုင်မယ့် ဥာဏ်ရည် ထက်မြက်တဲ့ လူငယ်စီးပွားရေးလုပ်ငန်းရှင် နှစ်ဦးကို ရှာဖွေနေပါတယ်။ ” ဟု တယ်လီနောမြန်မာ အမှုဆောင်အရာရှိချုပ် Mr. Petter Furberg က ပြောကြားခဲ့ပါသည်။

 ပြီးခဲ့သောနှစ်မှ ဆွေးနွေးပွဲတွင် မလေးရှားနိုင်ငံမှ တက်ရောက်ဆွေးနွေးသူ Gwen Yi သည် ဆရာ/ဆရာမ များကြား သင်ကြားမှု အထောက်အကူပြု ကိရိယာများနှင့် အကြံဥာဏ်များကို မျှဝေ နိုင်သည့် မိုဘိုင်း app ကို ပြသနိုင်ခဲ့ပါသည်။  ဆားဘီးယားနိုင်ငံမှ Bojana Stajic ကလည်း သမိုင်းဝင် အဆောက်အအုံများ တည်ရှိခဲ့သည့် နေရာများကို သွားရောက်လည်ပတ်သည့်အခါ အတိတ်တွင် တည်ရှိခဲ့သည့် ထိုသမိုင်းဝင် အဆောက်အဦးများကို ပြသပေးနိုင်သည့် app ကို ထုတ်ဖော်ပြသနိုင်ခဲ့ပါသည်။

 မြန်မာနိုင်ငံမှ တက်ရောက်လိုသူမျာကို ၄င်းတို့ ရေးသားတင်ပြသော စာစီစာကုံး (submission essay) အပေါ်မူတည်၍ ဆန်ကာတင်ရွေးချယ်သွားမည်ဖြစ်ပြီး Project Hub နှင့် စနေ၊ တနင်္ဂနွေ အလုပ်ရုံ ဆွေးနွေးပွဲသို့ တက်ရောက်ရန် ဖိတ်ကြားသွားမည်ဖြစ်ပါသည်။  Project Hub သည် မြန်မာနိုင်ငံတွင် စွန့်ဦးတီထွင် လုပ်ငန်းများကို ပထမဦးဆုံး ကူညီဆောင်ရွက်ပေးသူဖြစ်ပါသည်။  Project Hub အလုပ်ရုံ ဆွေးနွေးပွဲတွင် မိမိတို့၏ စိတ်ကူးစိတ်သန်းများကို ဆွေးနွေးနိုင်ပြီး မိုဘိုင်းချိတ်ဆက်မှု၏ စွမ်းအားကို အသုံးချကာ ၄င်းတို့၏ အတွေးအခေါ်စိတ်ကူးများကို လက်တွေ့ဆက်လက် အကောင်အထည်ဖေါ်နိုင်ရန် ကူညီဆောင်ရွက်အကြံဥာဏ်ပေးသွားမည် ဖြစ်ပါသည်။

 အလုပ်ရုံဆွေးနွေးပွဲအပြီးတွင် Mr. Petter Furberg အစရှိသည့် တယ်လီနောမှ အကြီးတန်းအရာရှိ များ နှင့် ပြည်တွင်းလက်တွဲဖော်များဖြစ်သည့် Project Hub, MIDO နှင့် ICT for Development Organization တို့ပါဝင်သည့် စိစစ်ရေးကော်မတီ မှ ဆန်ကာတင်နှစ်ဦးကို ရွေးချယ်သွားမည်ဖြစ်ပါ သည်။  ရွေးချယ်ရေး အဖွဲ့တွင် လွန်ခဲ့သောနှစ်က ထိုင်းနိုင်ငံမှ တက်ရောက်ဆွေးနွေးခဲ့သူ Onravee Tangmeesang လည်းပါဝင်မည်ဖြစ်ပါသည်။  ၄င်းသည် မြန်မာနိုင်ငံအပေါ်ထားရှိသော ၄င်း၏ စိတ်အားထက်သန်မှုကြောင့် ၂၀၁၃ Youth Summit တွင် ပါဝင်ခွင့်ရရှိခဲ့ခြင်းဖြစ်ပါသည်။

 Summit ကို တယ်လီနောအဖွဲ့၏ President နှင့် CEO Mr. Jon Fredrik Baksaas မှ ဦးစီဆောင်ရွက်ခြင်းဖြစ်ပြီး Nobel Peace Center နှင့် ညှိနှိုင်းစီစဉ်ခြင်းဖြစ်ပါသည်။  ပွဲကို နော်ဝေးနိုင်ငံ၊  Oslo မြို့တွင် ဒီဇင်ဘာ ၉ ရက်နေ့မှ ၁၀ ရက်နေ့အထိကျင်းပမည်ဖြစ်ပြီး ထိုအပတ်ထဲတွင် Nobel Peace Prize ပွဲတော်များကို လည်းကျင်းပသွားမည်ဖြစ်ပါသည်။ 

လွန်ခဲ့သောနှစ်က Summit အကြောင်းနှင့် ဓာတ်ပုံများကို ကြည့်ရှုလိုပါက www.telenor.com/youthsummit သို့မဟုတ် www.facebook.com/telenoryouthsummit တွင်ကြည့်ရှုနိုင်ပါသည်။
 

• ဧရာဝတီ Facebook / ဧရာဝတီ Twitter

.