တာချီလိတ် ဒေသမှာ အာဏာပိုင်တို့က ကုန်သည်တွေကို ၂ လ ကြာခန့် စစ်ဆေး ပညာပေးတဲ့နောက် အခုတော့ ထိထိရောက်ရောက် အရေးယူလျက်ရှိပါတယ်။
ပညာပေးကာလ ပြီးဆုံးသွားပြီ ဆိုသော်လည်း တရားဝင် ကုန်သွယ်မှု လုပ်ဆောင်ရာမှာ
စာရွက်စာတမ်းကိစ္စ နဲ့ ရုံးလုပ်ငန်းပိုင်းဆိုင်ရာများကို ကျင့်သားမရကြသေးကြောင်း တာချီလိတ်မြို့ ဒို့ညီနောင် ကားဂိတ်မှူး ကိုဝင်းမောင်က ဧရာဝတီကို ပြောပါတယ်။
“အခွန်ဆောင်မယ်ဆိုရင် ဘဏ်သွားရမယ်။ အခွန်ဦးစီးသွား ရမယ်ပေါ့နော်။
အဲဒါတွေက လုပ်လက်စ မရှိတဲ့အခါကြတော့ ပြည်သူတွေက အခက်အခဲ တွေ့နေတာ”
ဒီလို အခက်အခဲတွေ့တာဟာ ပညာပေးလုပ်ငန်းမှာ ဘာများ အားနည်းချက် ရှိခဲ့ပါသလဲ။
“သူတို့က ကုန်သည်တွေကို လွယ်လွယ်ကူနဲ့ ချောချောမွေ့မွေ့ဖြစ်အောင် ကုညီပေးတာ တော့ ပေးပါတယ်။
ဒါပေမယ့် ပြည်သူတွေနားလည်တဲ့ စကားလုံးတွေနဲ့ အလုပ်တွေကို လုပ်မပြနိုင်တဲ့ အခါကြတော့ ပြည်သူတွေ ယောင်တောင်ပေါင်တောင် ဖြစ်နေတာပေါ့ဗျာ”
ဒါကတော့ ကုန်သည်တွေနဲ့ နီးစပ်ထိတွေ့နေသူတဦးရဲ့ အမြင် ဖြစ်ပါတယ်။
Mobile Team လို အတိုကောက် ခေါ်ဆိုကြတဲ့ တရားမဝင် ကုန်သွယ်မှု တားဆီးထိန်းချုပ်ရေး ဗဟိုကော်မတီ၏ ရွေ့လျားစစ်ဆေးရေးအဖွဲ့က ဒေသတွင်း ကုန်စည် စီးဆင်းတဲ့ လမ်းကြောင်းများမှာ ကြပ်ကြပ်မတ်မတ် လုပ်ဆောင်နေပါတယ်။
အခွန်မဆောင်ဘဲ သယ်နေတဲ့ ကုန်စည်ပစ္စည်းများကို အရေးယူတာနဲ့ ပတ်သက်ပြီး မေးကြည့်ရာမှာတော့ တာချီလိတ်မြို့ နယ်စပ်ကုန်သွယ်ရေးစခန်း ညွန်ကြားရေးမှူး ဦးသိန်းထွန်းဦးကို
သူတို့ကို အထက်က ပြောပိုင်ခွင့် မပေးထားဘူး၊ ဒီကိစ္စနဲ့ ပတ်သက်ပြီး အကောက်ခွန်ဌာနကိုသာ မေးလိုက်ပါ လို့ ညွန်မှူးက ပြန်လည်ဖြေကြားခဲ့ပါတယ်။
- ITC ကတ်
စီးပွား ကူးသန်း ဝန်ကြီးဌာနက တခြားသော နယ်စပ် ကုန်သွယ်ရေးစခန်းများလိုပဲ တာချီလိတ်မှာလည်း ITC ကတ် ဆိုတာကို ထုတ်ပေးထားပါတယ်။
အဲဒါက တဦးချင်း ကုန်သွယ်မှု လုပ်ငန်းရှင် မှတ်ပုံတင်ကတ် (Individual Trading Card) ဆိုတာကို နယ်စပ်ဒေသတွေမှာ အတိုကောက် ခေါ်ကြတာပါ။
ဒေသခံ ကုန်သည်လေးတွေ၊ ပို့ကုန် သွင်းကုန် လုပ်ငန်းလုပ်တဲ့ အသေးစား အလတ်စား ကုန်သည်တွေ
အရင်းအနှီး နည်းနည်းနဲ့ တရားဝင် ကုန်သွယ်နိုင်ကြဖို့ ရည်ရွယ်ချက်နဲ့ ဒီကတ် ထုတ်ပေးထားတာပါ။
နှစ်စဉ် ကျပ်ငါးသောင်း ပေးသွင်းပြီး လုပ်ရပါမယ်။
ကုမ္ပဏီထောင်စရာ မလိုပါဘူး။ ကိုယ်တတ်နိုင်တဲ့ အရင်းအနှီးနဲ့ လုပ်နိုင်ပါတယ်။
ဒီနည်းနဲ့ နိုင်ငံအတွက် ဝင်ငွေ၊ အခွန်ငွေ နစ်နာစေတဲ့ မှောင်ခိုသယ်၊ ခိုးသယ်၊ အခွန်မဆောင်ဘဲသယ်တာတွေ လျော့နည်းသွားမှာဖြစ်ပါတယ်။
ဒီကတ် ကိုင်ဆောင်ပြီး လုပ်ဆောင်ခြင်းဟာ တနိုင်တပိုင်ကုန်သွယ်ခွင့်ဖြစ်တဲ့အတွက် ကုန်သည်ကြီးတွေလို အချီကြီးလုပ်ခွင့်တော့ မရှိပါ။
ငါးရက်ကို သိန်း ၅၀ ဖိုးအထိ သယ်ယူခွင့်ရှိပါတယ်။
- FDA ထောက်ခံစာ
တာချီလိတ်မှာ ITC ကတ် ကိုင်ဆောင်ပြီး အခွန်ဆောင်၊ တရားဝင် လုပ်ကိုင်နိုင်တဲ့အတွက် ကုန်သည်လေးတွေ အဆင်ပြေပါတယ်။
သို့သော်လည်း အဆင်မပြေတဲ့အပိုင်းကတော့ တချို့စားသောက်ကုန်စည်တွေ သယ်ဆောင်ခြင်းပါပဲ။ အဲဒါအတွက် အစားအသောက်နှင့် ဆေးဝါး ကွပ်ကဲမှု ဗဟိုဌာန (FDA) ရဲ့ ထောက်ခံစာပေးမှသာ သယ်ဆောင်ခွင့် ရှိတာပါ။
ထိုင်းဖြစ်၊ တရုတ်ဖြစ် စားသုံးကုန်တို့အတွက် FDA ထောက်ခံစာရဖို့ အတွက် အခက်ခဲများစွာ ရှိနေတယ်လို့ တာချီလိတ်မြို့ ကုန်သည်တွေက ဆိုပါတယ်။
တာချီလိတ်မြို့နေ ကုန်သည်တဦးက “စားသောက်ကုန်နဲ့ ပတ်သက်လို့ နို့ချဉ်၊ အိုဗာတင်း၊ ပဲနို့ရည်တို့ပေါ့၊ ဒီဟာတွေကို ကျနော်တို့က လွယ်လွယ်ကူကူ အခွန်ဆောင်လို့ မလွယ်ဘူး။
FDA က ကျတော်တို့ဆီက နမူနာတွေယူပြီးမှ နေပြည်တော်ကို ပို့ရတာပေါ့နော်။
နောက်ပြီး ယိုးဒယားဘက်က လာတဲ့ စားသောက်ကုန်တွေဆိုရင် သူတို့ကုမ္ပဏီရဲ့ စာရွက်စာတမ်းတွေ ကျနော်တို့ လက်ထဲ ရောက်မှ ကျနော်တို့က FDA ရဲ့ ထောက်ခံစာကို ယူလို့ရတာပေါ့။
ဒါကို ကုန်သည်တွေဘက်က နားလည်သဘောပေါက်တာတွေ မရှိဘူး၊ လုပ်နေကျလည်း မဟုတ်တော့ ပြဿနာတွေ တက်နေတာပေါ့”
လို့ ဆိုပါတယ်။
ထိုင်းကုမ္ပဏီစာရွက်စာတမ်း နဲ့ FDA ထောက်ခံစာရွက် ကိုင်ဆောင်ထားသူက အဆင်ပြေပါတယ်။
ထောက်ခံစာကို တဆင့်ခံ ပြန်လည်ရောင်းချမှုလည်း ရှိတဲ့အတွက် ကုန်ပစ္စည်းတန်ဖိုး ပိုပြီးမြင့်တက်မှုတွေ ရှိနေတယ်လို့လည်း ကုန်သည်တွေက ဆိုပါတယ်။
ဝယ်ယူစားသုံးသူတို့ရဲ့ ကျန်းမာရေးအတွက် စားသောက်ကုန်ကို စိစစ်ရတယ်၊ ဒါကြောင့် စာရွက်စာတမ်းကိစ္စ အထိုက်အလျောက် ပိုများမယ် ဆိုတာကို ကုန်သည်တွေ သဘောတူ၊ သဘောပေါက်ဖို့တော့ လိုပါသေးတယ်။
- Mobile Team
ဒီနှစ်ပိုင်းမှာ ပေါ်လာတဲ့ Mobile Team က ကုန်သည်တွေ၊ သူတို့နဲ့ ဆက်စပ်လုပ်ကိုင်နေသူတို့အတွက် ဆက်ဆံရခက်တဲ့အပိုင်း ရှိနေပါသေးတယ်။
“ကျနော်တို့ ပုံမှန်သွားနေတာပါ။ ဂိတ်ရောက်တတာချီလိတ် နဲ့ တောင်ကြီး ကားအငှားဆွဲသူ ကိုကျော်ဝင်းစိန်က နဲ့ ဂိတ်တာဝန်ရှိသူတွေက ကားကို တန်ချိန်တယ်။ ပြီးရင် ဈေးဖြတ်တယ်။ အဲလိုပဲ သွားလာနေတာ။
ဒီ Mobile Team ရောက်လာတာနဲ့ အခွန်မဆောင်ရင် ကားပေါ်က ပစ္စည်းတွေ အားလုံး ဆွဲချတော့တာပဲ” လို့ ပြောပါတယ်။
တာချီလိတ်မြို့ နေ မသက်က တရုတ်နိုင်ငံထုတ် အမျိုးသမီးအဝတ်အထည်တွေ အခွန် ဆောင်မထားဘဲ မကြာသေးခင်က သယ်ခဲ့ပါတယ်။
တာချီလိတ်မြို့အထွက် မယ်ယန်းဂိတ်မှာ ကုန်ပစ္စည်း သိန်း ၂ဝ ဖိုးလောက် အသိမ်းခံလိုက်ရတယ်လို့ ဧရာဝတီကို ပြောသည်။
“ဂျူတီမဆောင် လို့ ပစ္စည်းသိမ်းတာ တဲ့။
ဂျူတီကိုသက်ဆိုင်ရာကို ပြောပြီးလုပ်ခဲ့၊ ဂျူတီပါရင် (ပြန်)ထုတ်ပေးမယ် ဆိုတော့ ... ကျမလည်း အဲဒီနေ့ ညနေ ချက်ချင်းဘဲ အကောက်အခွန်ရုံးကို သွားပြီး ဂျူတီ လုပ်တယ်။
ဂျူတီလည်းရရော မယ်ယန်းဂိတ်ကို ပြန်လာတယ်။ ဂျူတီ ပါလာပြီ၊ ကျမပစ္စည်းတွေ ပြန်ပေးပါလို့ ပြောတော့ ဦးစီးအရာရှိက နင် မြန်မာ စကား နားမလည်ဘူးလား။ နေပြည်တော် ကို အမှုတွဲ တင်လိုက်ပြီ။
နင့်ပစ္စည်းတွေ ပြန်မရတော့ဘူး တဲ့”
မိုးတွင်းဖြစ်တဲ့အတွက် တာချီလိတ်မြို့မှာ ခရီးသည် ပါးနေချိန်ပါ။
အစားအသောက် ကုန်သွယ်သူတွေလည်း စာရွက်စာတမ်းကိစ္စ အခက်အခဲ ရှိတာကြောင့် သိပ်အလုပ်မဖြစ်ပါဘူး။
ခရီးသည်၊ ကုန်သည်တို့ကို အမှီပြုနေရတဲ့ ကားသမား၊ ကားပိုင်ရှင်တွေလည်း ကားမထွက်ရရင် အခက်တွေ့မှာ ဖြစ်ပါတယ်။
ပွင့်လင်းရာသီရောက်၊ စာရွက်စာတမ်းကိစ္စ ကျင့်သားရရင်တော့ ကုန်သွယ်လမ်းကြောင်း စည်ပင်လာမှာဖြစ်တယ်လို့ ဆိုရပါမယ်။
ငြိမ်းဇော်
.
0 comments :
Post a Comment