ရန်ကုန်ရောက် အိုဘားမားကြောင့် လမ်းဘေးဈေးသည်တွေ ဈေးရောင်းခွင့်ပိတ်၊ လမ်းပိစိလေးတွေလည်း ပိတ်၊ လမ်းမကြီးတွေလည်း ပိတ်။
ရန်ကုန်မြို့လယ်က လမ်းသွယ်တခုကို စတင် ပိတ်ဆို့ဖို့ ပြင်နေတဲ့ မြင်ကွင်း (ဓာတ်ပုံ - စည်သူလင်း/ဧရာဝတီ)
ရာသီဥတုလည်း အင်မတန် ပူတဲ့အချိန် လူတွေက ဟိုနားဒီနားမှာ ပိတ်မိ။
အိုဘားမားကို ကျိန်ဆဲကြသူတွေ ရှိနိုင်သလို အဖြစ်သဲလွန်းတဲ့ လုံခြုံရေးဆိုင်ရာတွေကို ကျိန်ဆဲသူတွေလည်း ရှိနိုင်ပါတယ်။
ရန်ကုန်ရောက် အိုဘားမားကြောင့် လမ်းပိတ်ဆို့မှုနဲ့ အကြီးအကျယ် ရင်ဆိုင်ရတာကတော့ ရန်ကုန်သူ ရန်ကုန်သားတွေပါပဲ။
သူလာမယ့်လမ်းများ ဆက်စပ်လမ်းများကို ပိတ်လိုက်တာက နာရီအနည်းငယ် ဆိုသော်လည်း သတင်းထောက်တယောက်က ဒီလို ရွဲ့ပါတယ် -
"ရန်ကုန်မြို့လယ်မှာ အလုပ်ဆင်းရသူတွေ လမ်းကို ၃ မိုင်ထက်မနည်း လျှောက်နေကြရပြီ။ ရုံးထဲ ထိုင်နေရတာမျိုးမဟုတ်ဘဲ လေ့ကျင့်ခန်းနည်းနည်းပါးပါး လုပ်ခွင့်ပေးတဲ့အတွက် ကျေးဇူးတင်ပါတယ်" တဲ့။
သတင်းသမားတယောက်ကလည်း... အိုဘာမားလုံခြုံးရေးအတွက် ပြည်သူတွေဒုက္ခခံစေတဲ့ အစိုးရကို နဂိုကတည်းက အမုန်းတရားအခံနဲ့ဆိုတော့ ဘယ်လိုကြည်ဖြူနိုင်တော့မလဲလို့ ဆိုတယ်။
အိုဘာမား လာလို့ မြန်မာနိုင်ငံမှာ အပြောင်းအလဲတွေ ဖြစ်ကုန်ပြီလား လို့ တချို့က မေးတယ်။
အိုဘားမားကြောင့်
ညဖက် ဧည့်စာရင်း အစစ်ခံရတယ်။
ရန်ကုန်မြို့ လမ်းတချို့မှာ ရှိတဲ့ ချိုင့်လေးတွေ ကောင်းသွားတယ်
မြက်တွေနဲ့ ပိတ်နေတဲ့ ၀န်ကြီးများရုံးလည်း ရှင်းသွားတယ် လို့ အကြီးတန်းသတင်းထောက်တယောက်က မြင်တယ်။
ဝန်ကြီးများရုံးဘေးမှာရှိတဲ့ အနော်ရထာလမ်းတလျှောက် အိုဘားမား မလာခင် မြင်ကွင်း။ ဒီလမ်းက ရန်ကုန်မှာ ယာဉ်ကျောအပိတ်ဆုံးလမ်းမကြီးတွေထဲ ပါပါတယ်။ အိုဘားမားကြီး လာခါနီးတော့ ကားတွေကို ရှင်းထုတ်လိုက်တာပါ (ဓာတ်ပုံ - စည်သူလင်း/ဧရာဝတီ)
သွားရေးလာရေး အခက်အခဲနဲ့တွေ့ပြီး အလုပ်အကိုင်တွေ ပျက်သွားကြသူတွေဟာ သောကြာမနက် အလုပ်ဆင်းချိန် လမ်းတွေ ပိတ်မယ်ဆိုတာကို ကြိုမသိခဲ့ကြပါဘူး။
ရန်ကုန်မြို့တော်ဝန် ဆိုတာက ရွေးချယ်တင်မြောက်ထားတာ မဟုတ်ဘဲ မိုးကျရွှေကိုယ်ဖြစ်တာကြောင့် မြို့သူမြို့သားတွေရဲ့ အခက်အခဲတွေ၊ အစီအစဉ်တွေ၊ ပူပန်သောကတွေကို ဂရုမစိုက်တာဖြစ်မယ်လို့ ယူဆရပါတယ်။
အခုတော့ လူတဦးတယောက် သွားလာရေး အဆင်ပြေဖို့အတွက် လူပေါင်းများစွာ အဆင်မပြေမှုနဲ့ ကြုံခဲ့ရပါပြီ။
နေပူပူ ကားကြပ်ကြပ်ထဲမှာ အချိန်ကြာကြာ မတ်တပ်ရပ်ရ၊ ဘယ်တော့လာမယ်မှန်းမသိတဲ့ ဘတ်စ်ကားကို စောင့်ရ ဆိုင်းရ၊ အလုပ်အကိုင်တွေ တလွဲတချော်ဖြစ်ရ။
ဝန်ကြီးများရုံးဟောင်း အပါအဝင် ရန်ကုန်မြို့ သုံးလေးနေရာကို အိုဘားမား ဒီကနေ့ လာသွားခဲ့ပါတယ်။
အိုဘားမားကြီးရဲ့ ဒီတခေါက် ခရီးစဉ်ကိုတော့ ရန်ကုန်မှာနေထိုင်သူအများအပြား ကောင်းကောင်းကြီး အမှတ်ရနေကြမှာ သေချာပါတယ်။
.
0 comments :
Post a Comment