မြစ်ခြေဆေးရုံကို ဒဏ်ရာရသူ ၂၁ ယောက် ရောက်လာပြီး သေဆုံးသူ အလောင်း ၂ လောင်းလည်း ပါဝင်တယ်လို့ တာဝန်ကျ ဆရာဝန်တဦးက ပြောပါတယ်။
ပခုက္ကူဆေးရုံကိုတော့ ဒဏ်ရာရသူ ၆၀ ကျော်ရောက်လာပြီး သေဆုံးသူတွေလည်း ရှိတယ်လို့ သိရပါတယ်။ ဒေသခံ အာဏာပိုင်တွေကို ဆက်သွယ်ကြည့်ရာမှာတော့ ဒဏ်ရာရသူ သေဆုံးသူစာရင်းတွေ ကောက်နေဆဲပဲ လို့ပဲ သိရပြီး အသေးစိတ်ကို ပြောဆိုဖို့ ငြင်းဆန်သွားပါတယ်။
ရေနံခိုးမှုနဲ့ ဖမ်းဆီးခံရမှာစိုးလို့ အိမ်မှာပဲ ကြိတ်ပြီးကုတဲ့သူတွေလည်း ရှိနေသေးတယ်လို့ ဒေသခံတွေက ပြောပြပါတယ်။ ဧရာဝတီက ကနဦးရထားတဲ့ စာရင်းကတော့ ၈ ဦးသေ ၇၀ ကျော် ဒဏ်ရာရကြပါတယ်။ အသက်အန္တရာယ် စိုးရိမ်ဖွယ်ရာ ဒဏ်ရာပြင်းထန်သူတွေလည်း ရှိလို့ သေဆုံးသူ တိုးလာနိုင်တယ်လို့ ပြောဆိုကြပါတယ်။
ရေနံပိုက်ပေါက်တဲ့နေရာကို ပိတ်ထားပြီး သက်ဆိုင်ရာက ပိုက်ပေါက်ကို ပိတ်လိုက်ပြီး မီးကိုလည်း ငြှိမ်းသတ်နေတယ်လို့ ဒေသခံတွေကပြောပါတယ်။ မီးလောင်ရတဲ့ အကြောင်းရင်းကိုတော့ မသိရသေးပါဘူး။
ဒေသခံတွေကတော့ ရေနံတွေကို ယူနေချိန်မှာ ဆေးလိပ်သောက်တာမျိုး၊ ရေနံစက်ရုံတွေကနေ ရေနံတွေ ပိုက်လိုင်းထဲ တွန်းပို့တဲ့အချိန်မှာ အရှိန်နဲ့ပွတ်တိုက်ပြီး ပတ်ဝန်းကျင်က အပူရှိန်နဲ့ မီးထတောက်မျိုး ဖြစ်နိုင်တယ်လို့ သုံးသပ်ပြောဆိုနေကြပါတယ်။
မြန်မာနိုင်ငံ အလယ်ပိုင်းက ရေနံထွက်တဲ့ ဒေသတွေဖြစ်တဲ့ အရာတော်ရေနံမြေ၊ မန်းရေနံမြေ၊ ချောက်ရေနံမြေ စတဲ့နေရာတွေမှာ ဒေသခံတွေရော တခြားဒေသကလာတဲ့သူတွေကပါ ရေနံပိုက်လိုင်းတွေကို ဖောက်ပြီးရေနံခိုးယူတာတွေ၊ ဒီလို ပိုက်ဖောက်လိုက်တာကို ပြန်မပိတ်တာ၊ ပြန်ပိတ်တဲ့နေရာက ပိုက်တွေပေါက်ပြီး ထွက်လာတဲ့ ရေနံတွေကို ခပ်ယူတာတွေက မကြာခဏ ဖြစ်နေတဲ့ ပြဿနာတွေပါ။
ရေနံစိမ်း တပေပါကို ရေနံစိမ်းရဲ့ အဆင့်အလိုက် အနည်းဆုံး ကျပ် ၅ သောင်းကနေ တသိန်းနီးပါးအထိ ရတတ်ကြတာမို့ စီးပွားဖြစ် ခိုးယူသူတွေကတော့ ပေပါလိုက် ခိုးယူကြပါတယ်။ တချို့ကျတော့လည်း အိမ်သုံးဖို့ဆိုပြီး တနိုင်တပိုင် ဆိုင်းထမ်းတွေနဲ့ ခပ်ယူတတ်ကြပါတယ်။
ပိုက်လိုင်းဖောက်ခိုးသူက ပိုက်တွေ ဖောက်ပြီးရင် သေချာ ပြန်ပိတ်တဲ့သူရှိသလို တချို့ကျတော့လည်း သေချာပြန်မပိတ်တာကြောင့် ရေနံတွေ ယိုစီးနေတာတွေလည်း မကြာခဏ ဖြစ်လေ့ရှိပါတယ်။ တနိုင်တပိုင် ခပ်ယူသူတွေကတော့ အဲ့လို ပိုက်ပေါက်နေရာတွေမှာ သွားပြီး ရေနံခပ်ယူကြပါတယ်။
အရင်ကလည်း ရေနံမြေတွေက ရေနံခပ်သူတွေ မီးလောင်မှု ဖြစ်ခဲ့ဖူးပြီး အဲ့ဒီတုန်းကတော့ တယောက်စ နှစ်ယောက်စပဲ ဒဏ်ရာရကြတာမို့ အခုတခေါက် ဖြစ်တာကတော့ အဆိုးဝါးဆုံးပဲလို့ ပြောကြပါတယ်။
ရေနံပိုက်လိုင်းတွေကနေ ရေနံခိုးယူခြင်း၊ ရေနံခပ်ယူခြင်းတွေ လုပ်ရင် ထောင်ဒဏ်၊ ငွေဒဏ်တွေ ကျခံရမယ်လို့ အာဏာပိုင်တွေက ထုတ်ပြန်ထားပါတယ်။
0 comments :
Post a Comment