(ဓာတ်ပုံများ - Reuters)
ဥရောပခရီးစဉ်တလျှောက်လုံး နိုင်ငံတကာက အာရုံစိုက်ခဲ့ရတဲ့ ဒေါ်အောင်ဆန်းစုကြည် ဒီမနက်မှာ ရန်ကုန်ပြန်ရောက်ပါပြီ။
သူဟာ ပြီးခဲ့တဲ့ အနှစ် ၂၀ ကျော် ကာလ တလျှောက်လုံး အထိန်းသိမ်းခံခဲ့ရ၊ ကျန်တဲ့အချိန်တွေမှာလည်း ပြည်ဝင်ခွင့်မရမှာစိုးရိမ်လို့ ပြည်ပခရီးမထွက်ဖြစ်ခဲ့သူပါ။
ဒေါ်အောင်ဆန်းစုကြည်ကို ထောက်ခံသူတွေ၊ NLD အဖွဲ့ဝင်တွေ အများအပြား ဒီမနက် ရန်ကုန်လေဆိပ် အတွင်းဘက်၊ အပြင်ဘက်မှာ သွားရောက်စောင့်ဆိုင်းခဲ့ကြတာပေါ့။
အပြန်ခရီးဟာ လေယာဉ်က ပုံမှန်အချိန်မှာ မဆိုက်ဘဲ နာရီအနည်းငယ် နောက်ကျပြီးမှ ရောက်လာတာတခုကလွဲလို့ အဆင်ပြေပုံရပါတယ်။
ဒေါ်အောင်ဆန်းစုကြည် အိမ်ပြန်မယ့်လမ်းမှ လေဆိပ်အထွက်က စတင်ပြီး ပြည်လမ်းတစ်လျှောက်မှာ သူ့ကို ထောက်ခံသူများ၊ ဒေသခံများက NLD အလံငယ်တွေ ကိုင်ဆောင်ပြီး ကြိုဆိုခဲ့ကြတာပါ။
ဗဟန်းမြို့နယ် တက္ကသိုလ်ရိပ်သာလမ်း နေအိမ်ဝန်းကျင်မှာ သွားရောက် စောင့်ကြိုသူတွေလည်း မနည်းမနောပါပဲ။
NLD က အထင်ကရတွေဖြစ်တဲ့ ဦးဝင်းတင်၊ ဦးအုန်းကြိုင် ၊ ဒေါ်ဖြူဖြူသင်း၊ ဒေါ်မေ၀င်းမြင့်၊ ဦးစိုးဝင်း၊ ဦးသိမ်းဆွေ တို့လည်း လေဆိပ်မှာ သွားကြိုကြပါတယ်။
ကြိုဆိုသူများထဲမှာ သျှီ၊ ထွန်းအိန္ဒြာဗို၊ ကြည်ဖြူရှင်၊ လူမင်း စတဲ့ ဂီတ၊ ရုပ်ရှင်လောကသား အကျော်အမော်များလည်း ပါပါတယ်။
ပြည်ထောင်စုရွေးကောက်ပွဲကော်မရှင်ကတော့ သူ ရန်ကုန်မရောက်ခင် ရက်ပိုင်းအလိုမှာပဲ စာတစောင်ပေးပို့တဲ့နည်းနဲ့ ကြိုဆိုခဲ့ပါတယ်။
ဥရောပ ၅ နိုင်ငံကို တရစပ် ခရီးထွက်ခဲ့၊ အရေးကြီးတဲ့ အခမ်းအနားတွေ၊ တွေ့ဆုံမှုတွေကို ဆက်တိုက် တက်ရောက်ခဲ့၊ လေယာဉ်တွေ တစီးပြီးတစီး နာရီအတန်ကြာအောင် စီးနင်းခဲ့ရတဲ့ အသက် ၆၇ နှစ်အရွယ် ဒေါ်အောင်ဆန်းစုကြည်ဟာ အင်မတန် ပင်ပန်းနေမှာ အသေအချာပါပဲ။
သေသေချာချာ အနားယူဖြစ်မယ် ဆိုရင်တော့ လာမယ့် ၄ ရက်အကြာ ဗုဒ္ဓဟူးနေ့မှာ ပြန်အစပြုမယ့် လွှတ်တော်အစည်းအဝေးတက်ဖို့ နေပြည်တော်ကို သွားနိုင်မှာ ဖြစ်ပါတယ်။
ရန်ကုန်လေဆိပ်က ကြိုဆိုသူတယောက်
အိုးစည်ဗုံမောင်းနဲ့ ကြိုဆိုသူတွေထဲက တယောက်
0 comments :
Post a Comment