အစ္စရေးနိုင်ငံထုတ် Playboy မဂ္ဂဇင်း

Playboy မဂ္ဂဇင်းကို ဟီဘရူးဘာသာနဲ့ ပထမဆုံးအကြိမ် ထုတ်ဝေလိုက်ပါပြီ။
အစ္စရေးနိုင်ငံက Playboy ပရိသတ်ဟောင်း၊ ပရိသတ်သစ်တွေအတွက် အင်္ဂါနေ့က စတင် ဖြန့်လိုက်တာပါ တဲ့။

အစ္စရေးတို့ရဲ့ ကိုယ်ပိုင် အရေးအသားတွေ ပါဝင်မယ်၊ နိုင်ငံစုံမှာ တခြားဘာသာများနဲ့ထုတ်နေတဲ့ Playboy တွေကနေလည်း ဘာသာပြန်မယ်လို့ မဂ္ဂဇင်းပြောခွင့်ရ အမျိုးသမီး Danielle Peters က ပြောဆိုကြောင်း AFP သတင်းတပုဒ်မှာ ရေးပါတယ်။

အသက် အစိတ် နဲ့ လေးဆယ်ကြား ရင့်ကျက်တဲ့အမျိုးသားတွေကို ပစ်မှတ်ထားပြီး ထုတ်လိုက်တာပါ လို့ သူက ဆိုပါတယ်။

ထုတ်ဝေသူ Daniel Pomerantz ကတော့ ဒီမဂ္ဂဇင်းက အရမ်း sexy ဖြစ်လိမ့်မယ်၊ ဒါပေမယ့် sex အကြောင်းချည်းပဲ ဖော်ပြမယ့် မဂ္ဂဇင်း မဟုတ်ပါဘူး တဲ့။

အင်္ဂလိပ်လိုထုတ်တဲ့ Playboy က အစ္စရေးမှာ ဖတ်နေ (ကြည့်နေ?) ကြတာ ကြာပါပြီ။
ဒါက ပထမဆုံး ဒေသထွက် Playboy ဖြစ်ပြီး အစ္စရေးက အမျိုးသမီးတို့ရဲ့ဓာတ်ပုံတွေ ပါမယ်၊ အစ္စရေး စာရေးဆရာတို့ရဲ့ လက်ရာတွေ ပါမယ် ဆိုတော့ ပြည်တွင်းဖြစ်ကို ပိုမို အားပေးလိုသူတွေအတွက် အဆင်ပြေမှာပါ။
အရောင်းသွက်မယ့်မဂ္ဂဇင်းဖြစ်တဲ့အတွက် ထုတ်ဝေသူလည်း အင်မတန် အကျိုးအမြတ်ရဖွယ် ရှိပါတယ်။

ဒီမဂ္ဂဇင်းက မာရီလင်မွန်ရိုးပုံတွေနဲ့ ၁၉၅၃ မှာ စတင် ထွက်ပေါ်လာတာပါ။

ဝတ်လစ်စလစ်အမျိုးသမီးပုံတွေ အများအပြားပါသလို အကြောင်းအရာစုံအကြောင်း ဆောင်းပါးတွေ၊ အင်တာဗျူးတွေ၊ အထင်ကရ စာရေးဆရာများရဲ့ ဝတ္ထုတိုတွေ ပါဝင်တဲ့ လစဉ်ထုတ် မဂ္ဂဇင်းပါ။

ဖတ်စရာစုံလင်တဲ့ ဒီမဂ္ဂဇင်းကို ပွင့်ပွင့်လင်းလင်းဖော်ပြတဲ့ဓာတ်ပုံများကြောင့် အပြာစာအုပ်လို့ ယူဆသူ အများအပြား ရှိနေပါတယ်။

 

ဘာသာရေးအကဲဆတ်မှုများပြားတဲ့ အစ္စရေးမှာ ဒေသခံ  Playboy အလုပ်ဖြစ်ပါ့မလား?

ထုတ်ဝေသူကတော့ အလုပ်ဖြစ်မယ်လို့ ထင်ပါတယ် တဲ့။

"အစ္စရေးက ရှုပ်ထွေးတဲ့နိုင်ငံတခုပါ၊ ရိုးရာအစဉ်အလာနဲ့ ခေတ်ဆန်မှုတွေ ရှိတယ်၊ ပြီးတော့ အလေးအနက်ထားတာတွေ နဲ့ အပျော်အပါးကိစ္စတွေလည်း ရှိနေတယ်။ ဒါဟာ  Playboy ရဲ့ အခင်းအကျင်းနဲ့ တထေရာတည်းပါပဲ။  Playboy ဟာ ရှုပ်ထွေးနက်နဲလှပတဲ့နိုင်ငံတခုအတွက် ရှုပ်ထွေးနက်နဲလှပတဲ့မဂ္ဂဇင်းတစောင်ပဲပေါ့" လို့
ထုတ်ဝေသူက ပြောဆိုကြောင်း AP သတင်းတပုဒ်မှာ ရေးပါတယ်။

ရှုပ်ထွေးနက်နဲလှပတဲ့ အစ္စရေးမှာတော့ ကိုယ်ပိုင်ဟန် Playboy ပေါ်လာပါပြီ။
ရှုပ်ထွေးနက်နဲလှပတဲ့ မြန်မာနိုင်ငံမှာရော Playboy ပေါ်ပေါက်လာမယ့် အနေအထား လတ်တလောမှာ ရှိနေပြီလား။

Playboy ရဲ့ ခြေဖျားကို မီလုမီခင်အနေအထားမှာရှိတယ်လို့ တချို့က ယူဆကြတဲ့ ညှို့မဂ္ဂဇင်းကတော့ တကြိမ်ထွက်ပြီး ရပ်သွားပါတယ်။
ပရိသတ် အားမပေးလို့တော့ မဟုတ်ပါ။
ရေမြေအနေအထားနဲ့မကိုက်ညီလို့ ရပ်သွားတာပါ။

"ညှို့" က "မာယာ" ဆိုပြီး မကြာသေးခင်က အမည်ပြောင်း ထွက်လာပြန်တယ်လို့ ယူဆရပါတယ်။

ပြန်ကြားရေးဝန်ကြီးဌာနက "မာယာ" နဲ့ ပတ်သက်ပြီး စိတ်မသက်မသာ ဖြစ်နေကြောင်း http://burma.irrawaddy.org/archives/34781 မှာ ရေးထားတာ ဖတ်ရပါတယ်။

မာယာမဂ္ဂဇင်း အတွဲ(၁) အမှတ်(၁)သည် ကျန်းမာရေး မဂ္ဂဇင်းအဖြစ်ထုတ်ဝေခွင့် ပြုထားသော်လည်း မျက်နှာဖုံးပုံနှင့် အတွင်း၌ ပါရှိသည့် ဓာတ်ပုံ ပန်းချီ အချို့မှာ သက်ဆိုင်ရာ ကဗျာ ဆောင်းပါးတို့နှင့် ဆက်စပ်မှုမရှိသော အမျိုးသမီးပုံများဖြစ်ပြီး ပုံအချို့မှာ ဟီရိသြတ္တပ္ပကင်း၍ အဆိပ်အတောက် ဖြစ်စေသောပုံများ ဖြစ်သဖြင့်ထုတ်ဝေသူအား ခေါ်ယူသတိပေးရန် ဆုံးဖြတ်ခဲ့ကြောင်း လို့ အဲဒီမှာ ရေးထားပါတယ်။

မာယာ တစောင်တည်း "ဟီရိသြတ္တပ္ပ" ကင်းမဲ့တာ မဟုတ်ပါဘူး တဲ့။

စာပေစိစစ်ရေးစနစ်ကို ရုပ်သိမ်းလိုက်ပြီးတဲ့နောက်မှာ စာနယ်ဇင်းတွေက "မြန်မာ့ယဉ်ကျေးမှုနှင့် မလျော်ညီသော" ဓာတ်ပုံတွေ အများအပြား ဖော်ပြလာကြပြီ လို့  ပြန်ကြားရေးဝန်ကြီး ဦးအောင်ကြည်က ပြောလိုက်ပါတယ်.

ဝန်ကြီးက ပုံနှိပ်ခြင်းနှင့်ထုတ်ဝေခြင်း လုပ်ငန်း ဥပဒေကြမ်းကို  ပြည်သူ့လွှတ်တော်မှာ တင်သွင်းစဉ် ပြောကြားလိုက်တာဖြစ်ကြောင်း သောကြာနေ့ထုတ် သတင်းစာများက ရေးပါတယ်။

"မြန်မာ့ယဉ်ကျေးမှုနှင့် မလျော်ညီသော ဟီရိသြတ္တပ္ပတရားကင်းသည့် ရေးသားချက်များနှင့် ရုပ်ပုံ၊ ဓာတ်ပုံများ ဖော်ပြခြင်းများကို ဂျာနယ်၊ မဂ္ဂဇင်း အမျိုးအစား (၄၆) မျိုး၊ ထုတ်ဝေမှု  (၅၈) ကြိမ်နှင့် ထုတ်ဝေသည့် စောင်ရေ စုစုပေါင်း  (၂၁၁ ၄ဝဝ)အထိ ရှိကြသည်ကိုလည်း စိစစ်တွေ့ရှိရပါကြောင်း" လို့ ဝန်ကြီးက ပြည်သူ့လွှတ်တော်မှာ ပြောလိုက်ပါတယ်။

ဒါကြောင့် မြန်မာပြည်မှာတော့ ပြည်တွင်းဖြစ် Playboy ရှိလာဖွယ် မမြင်သေးပါ။
နိုင်ငံခြားဖြစ် Playboy တွေ ပုန်းလျှိုးကွယ်လျှိုး ရောက်လာတာတွေကိုပဲ ဆက်လက် ဖတ်ရှုနေကြဖွယ်ရှိပါတယ်။