ကချင်ဒေသ၊ ရှမ်းဒေသမှာ မိုးထဲရေထဲရောက်နေတဲ့ စစ်ပြေးဒုက္ခသည်တွေကို ထောက်ပံ့မှု အခြေအနေ ဘယ်လို ရှိပါသလဲ။
ကူညီရေးအဖွဲ့ငယ်တွေ စိတ်သွားတိုင်း ကိုယ်ပါနိုင်ကြရဲ့လား။
ဒီအကြောင်း ဧရာဝတီသတင်းထောက် ညိမ်းပြည့်စုံက
ကချင်ပြည်နယ်၊ လိုင်ဇာမြို့ရောက် စစ်ပြေးဒုက္ခသည်တချို့ (ဓာတ်ပုံ - ဧရာဝတီ)
ကချင်နဲ့ ရှမ်းပြည်နယ်မြောက်ပိုင်း ဒေသများမှာ နယ်မြေလုံခြုံရေးအရ နေရပ်စွန့်ခွာ ရွှေ့ပြောင်းနေထိုင်တဲ့ ဒုက္ခသည်တို့ကို ကူညီရေးမှာ
ဘတ်ဂျက်အခက်အခဲ ရှိနေတယ်လို့ ဒုက္ခသည်တွေနဲ့ တိုက်ရိုက် ထိတွေ့နေကြတဲ့ ပြည်တွင်း NGO အဖွဲ့တွေက ပြောနေပါပြီ။
ဒီအဖွဲ့တွေ လိုအပ်တဲ့ ရန်ပုံငွေကို ကုလသမဂ္ဂ နဲ့ INGO အဖွဲ့အစည်းကြီးတွေက ပေးတယ်၊ သို့သော်လည်း
၈၀% သာ အရင်ပေးတယ်၊ ကျန် ၂၀ % ကိုတော့
လုပ်ငန်းပြီးဆုံးလို့ အစီရင်ခံစာ တင်ပြီးတဲ့အခါ သူတို့ ရွှေသဘောတော်ကျရင် ပေးတယ်၊ မကျရင် မပေးဘူးလို့ ဆိုပါတယ်။
ဒီအကြောင်းကို ပြီးခဲ့တဲ့ရက်ပိုင်းအတွင်း ရန်ကုန်မြို့မှာ တွေ့ဆုံခဲ့တဲ့ အဖွဲ့အစည်း ၇ ခုက ထုတ်ဖော်ပြောကြားကြတာပါ။
အဖွဲ့အစည်း ၇ ခု
Kachin Baptist Convertion
Kachin Relief and Development Committee
Karuna Myanmar Socil Services
မေတ္တာဖောင်ဒေးရှင်း
ရှလုံဖောင်ဒေးရှင်း
Wunpawng Ninghoi
BRIDGE
ရန်ကုန်မှာ ဒီအသင်းတွေဟာ အစိုးရနဲ့ နိုင်ငံတကာအဖွဲ့များကို တွေ့ဆုံ၊ အခမ်းအနားတခုလုပ်ပြီး အသံထုတ်ကြတာပါ။
“ဒုက္ခသည် တွေအတွက် ရန်ပုံငွေ ပိုလိုအပ်နေပြီး အဲဒါကို အလျင်အမြန်ဆောင်ရွက်ပေးဖို့ အရေးတကြီး လိုအပ်နေတယ် ဆိုတာကို ကုလသမဂ္ဂအဖွဲ့အစည်းတွေနဲ့ သံရုံးတွေက တာဝန်ရှိသူတွေ သိစေချင်လို့ဖြစ်ပါတယ်” လို့ ရှလုံဖောင်ဒေးရှင်းမှ ဒေါ်မေရီဒွန်က အခမ်းအနားရည်ရွယ်ချက်ကို ရှင်းပြပါတယ်။
လူသားချင်း စာနာထောက်ထားမှု အကူအညီတွေ ရောက်ရှိမှု နည်းနေတယ်၊ အဲဒီနေရာတွေအတွက်လည်း ဦးစားပေးလုပ်ဆောင်ကြရဦးမယ်လို့ ဆိုပါတယ်။
လုပ်စရာ အများအပြားအတွက် မူဝါဒတချို့ ပြုပြင်ပေးဖို့ ဒီအဖွဲ့တွေက နိုင်ငံတကာကို တောင်းဆိုနေကြတာပါ။
“ရန်ပုံငွေလျှောက်တဲ့အခါမှာ အခုလက်ရှိသုံးနေတဲ့ မူဝါဒတွေကို ဖယ်ပေးဖို့နဲ့ ဒေသခံ အဖွဲ့တွေကို ရန်ပုံငွေ တိုက်ရိုက်ပံ့ပိုးခြင်းတွေ၊ ပံ့ပိုးမှုရအောင် ဦးစားပေး လုပ်ဆောင်ပေးဖို့ကို အလှူရှင်တွေနဲ့ တခြား သက်ဆိုင်ရာ ဆက်နွယ်ပတ်သက်တဲ့ အဖွဲ့အစည်းအားလုံးကို မေတ္တာရပ်ခံပါတယ်” လို့ မေတ္တာဖောင်ဒေးရှင်းမှ ဒါရိုက်တာဦးစိုင်းစမ်းခမ်က ပြောပါတယ်။
လောလောဆယ်တော့ နိုင်ငံတကာအဖွဲ့တွေဆီက တုံ့ပြန်ချက် ထွက်မလာသေးပါ။
ကချင်ပြည်နယ်နှင့် ရှမ်းပြည်နယ်မြောက်ပိုင်းဒေသများမှာ IDP လို့ အလွယ် ခေါ်ကြတဲ့ နယ်မြေလုံခြုံရေးအရ နေရပ်စွန့်ခွာ ရွှေ့ပြောင်းနေထိုင်သူပေါင်း ၈ သောင်း နဲ့ ၁ သိန်းကြား ရှိကြောင်း၊ ဒီ ဒုက္ခသည်များကို ကူညီထောက်ပံ့ဖို့ ဒီနှစ်အတွက် ဒေါ်လာ ၇ သန်းခန့် လိုအပ်မယ်လို့ ခန့်မှန်းထားကြကြောင်း သိရပါတယ်။
.
0 comments :
Post a Comment