ဗိုလ်ရာညွန့်လမ်းထဲက ဆူရှီဆိုင်

Monday, April 14, 2014

~


 
ဂျပန်လို SHIAWASE (ရှိအဝစဲ) ဆိုတာက  ပျော်ရွှင်ဝမ်း မြောက်ခြင်းလို့ အဓိပ္ပာယ်ရပါတယ်၊ အဲဒီလို အဓိပ္ပာယ်နဲ့ သပ်သပ် ရပ်ရပ် ဆိုင်အပြင်ဆင်၊ ဈေးနှုန်းအသင့်အတင့်နဲ့ အရသာပိုင်းကို အဓိကထားပြီး စားသုံးသူတွေကို ဆွဲဆောင်နေတဲ့ ဂျပန်စားသောက်ဆိုင် တဆိုင် ရှိပါတယ်။
 -

     -
(ဓာတ်ပုံများ - ဂျေပိုင် / ဧရာဝတီ)

အဲဒီဆိုင်ကတော့ ဒဂုံမြို့နယ်၊ ဗိုလ်ရာညွန့်လမ်းထဲမှာရှိတဲ့  SHIAWASE SUSHI ဆိုင်ဖြစ်ပါတယ်၊ ဂျပန်နိုင်ငံမှာ အစားအသောက်ပညာ လေ့လာခဲ့တဲ့ ဇနီးမောင်နှံက ကိုယ်တိုင် စားဖိုမှူး လုပ်ပြီး ရောင်းချနေကြတာဖြစ်ပြီး ဆိုင်ဖွင့်ထားတာ ၁ နှစ်ခွဲ နီးပါး ရှိပါပြီ။

စားပွဲမှာ စပြီး ထိုင်လိုက်ပြီ ဆိုတာနဲ့ ကြွေခွက် ထဲထည့်ထားတဲ့ ရေနွေးကြမ်းအေးတခွက်ကို  ဝန်ဆောင်မှုပေးပါတယ်။ မီးနူးထဲမှာတော့ ဟင်းအမျိုး အစားပေါင်း ၁၂၀ ကျော် ရှိပြီး ဂျပန်အစားအစာတွေချည်း ဖြစ်ပါတယ်။

ဆိုင်ရဲ့ စားဖိုမှူးကတော့ ဂျပန် နိုင်ငံမှာ ၁၈ နှစ်ကျော် အစားအသောက်ပညာလေ့လာခဲ့တဲ့သူဖြစ်ပြီး ဦးမင်းနိုင် လို့ခေါ်ပါတယ်၊ သူကတော့ ဆိုင်ကိုတည်ထောင်တဲ့သူလို့လည်းပြောလို့ရပါတယ်၊ တည်ထောင်သူကိုယ်တိုင် ချက်ပြုတ်ပြီး ရောင်းချနေတဲ့ စားသောက်ဆိုင်တဆိုင်လို့ ဆိုရမှာပါ။

ဆိုင်ရဲ့ ဟင်းလျာတွေဖြစ်တဲ့ ဂျပန်  Shimej မှိုနဲ့ ဝက်သားကြော်၊ ဝက်သားလုံးကင် ဂျပန်အချို ရည်ဆမ်း (Niku Danko)၊ တူနာငါးထမင်းလုံး    (Tuna Nikiri)၊ ပဲစိမ်း (Eda Mame)စတဲ့ ဟင်း လျာတွေက မြန်မာလူမျိုးတွေ အတွက် အကြိုက်တွေ့နိုင်ပါတယ်။

 -
 -
တူနာငါးအသားကို မိရောနိစ်နဲ့ နယ်ထားတဲ့ အနှစ်ကို ရေညှိထမင်းလိပ်ပေါ်မှာ တင်ထားပေးတဲ့ တူနာငါး ထမင်းလုံးဟင်းလျာက ခပ်ဆိမ့်ဆိမ့်၊ ချိုမြမြ အရသာကိုပေးပြီး ဆော့စ်ရည်ဖြစ်တဲ့  Soy Beans ဆော့စ်နဲ့ တွဲဖက်စားမယ် ဆိုရင်တော့ အငန်ဓာတ် အနည်းငယ်ကိုပါ ရနိုင်မှာပါ။
ဆယ်လမွန်ထမင်းလုံး၊
ငါးပါးနီထမင်းလုံး၊
ပြည်ကြီး ငါးထမင်းလုံး၊
ကြက်ဥထမင်းလုံး မိရောနိစ်ဆမ်း
စတဲ့ ထမင်းလိပ်တွေက အဆာပြေ၊ နေ့လယ်စာ စသည်ဖြင့် စားလို့ကောင်းမယ့် ဟင်းလျာတွေဖြစ်ပါတယ်။

 ဂျပန်လူမျိုး၊ မြန်မာလူမျိုး အားလုံး အဆင်ပြေပြေ စားလို့ရမယ့် အနေအထားကို လုပ်ထားတယ်လို့
ဆိုင်ရှင်ဖြစ်တဲ့ ဒေါ်စိုးစိုးသန့်က ပြောပြပါတယ်။

“ဆိုင်ကို ကြော်ငြာအားမကိုးဘဲနဲ့ တဆင့်စကားနဲ့ပဲ လူသိလာတယ်၊ ဂျပန်လူမျိုးတွေ လာစားတဲ့အခါ ကျရင် အစားအသောက်တွေက အဆင်ပြေကြောင်း ပြောပြတယ်၊ မြန်မာလူမျိုးတွေဆီကတော့ တုံ့ပြန်တဲ့ အသံ သိပ် မလာဘူး”
 
-
 

 
-
ငရုတ်ပွအစိမ်းအပါအဝင် ငရုတ်သီးနီ၊ ကင်း မွန်နဲ့ အစာပလာ တချို့ထည့်ထားတဲ့ ကင်းမွန်အစပ်သုပ်၊ ဆလတ်ရွက်၊ ခရမ်းချဉ်သီး၊ ခရမ်းရောင်ဂေါ်ဖီ စတဲ့အရွက်တချို့နဲ့ ပင်လယ်စာ အစုံအလင်ပေါ်ကို ဆော့စ်ရည်ဆမ်း ထားတဲ့ ပင်လယ်စာအသုပ်၊ ဂျပန် တို့ဟူးကို ရေညှိနဲ့ အရသာတချို့ ရောစပ်ထားတဲ့ တို့ဟူးဟင်းချို၊ ယန်းစိမ်း၊ Soy Beans ဆော့စ် တို့နဲ့ တွဲဖက် စားသောက်ရတဲ့ ဆယ်လမွန်ငါးအသားလွှာ၊ တူနာငါးအသားလွှာ၊ ငါးပါးနီ အသားလွှာစတဲ့ အသား စိမ်းဟင်းလျာတွေကလည်း စားသုံးသူအကြိုက်ဖြစ်နိုင်မယ့် ဟင်းအမည်တွေပါ။
 
-
 


 -
ဆော့စ်ရည်ဆမ်းထားတဲ့ ပင်လယ်စာအသုပ်
 
- ဆိုင်ရဲ့ ဟင်းလျာစာရင်းကိုတော့ စားသုံးသူတွေ ရိုးမသွားအောင်လို့ဆိုပြီး ၆ လ တကြိမ်လောက် ပြောင်းလဲတယ်လို့ သိရပါတယ်။

ဆိုင်ဝန်ထမ်းတွေကလည်း ဟင်းလျာမှာတဲ့ အခါ၊ ဂျပန်လူ မျိုးတွေလာပြီး စားသောက်တဲ့အခါမျိုးမှာ ဂျပန် စကားနဲ့ ပြောဆိုတတ်အောင် သင်ပေးထားပါသေးတယ်။

“သူတို့နိုင်ငံရဲ့ အစားအသောက်ကို ရောင်းနေတဲ့ ဆိုင်အပေါ် ယုံကြည်မှုရှိစေချင်တယ်လေ၊ ဘယ်ဟင်းလျာက ပိုရောင်းရတယ်လို့ မဟုတ်ဘူး၊ အားလုံးက မျှမျှတတနဲ့ ရောင်းနေရတာပဲ” လို့ ဒေါ်စိုးစိုးသန့်က ရှင်းပြပါတယ်။
 
-
 

ဆယ်လ်မွန် ဆာရှီးမီ 
-
SHIAWASE SUSHI ဆိုင်က ဖွင့်လှစ်ထားတာ ၁ နှစ်ခွဲ ကျော် ရှိပါပြီ၊ ဆိုင် စဖွင့်ကတည်းက ကြော်ငြာ အားမကိုးဘဲ အစားအသောက်အရသာနဲ့ပဲ စားသုံးသူကို ဆွဲဆောင်နေတဲ့ ဂျပန်အစားအစာ ဆိုင်တဆိုင်လို့ သူက ဆိုပါတယ်။

နိုင်ငံတကာမှာဆိုရင်လည်း ထိုင်း၊ တရုတ်အစားအသောက်တွေလိုမျိုး ဂျပန်အစားအသောက်ဟာလည်း လူကြိုက်များတဲ့ ရိုးရာအစားအသောက်ဖြစ်ပါတယ်၊ ဒါကြောင့် မို့လို့ ဂျပန်စတိုင်လ်၊ ဂျပန်အရသာ ရှိတဲ့ အစားအသောက်တွေကိုစားချင်သူများအတွက် SHIAWASE SUSHI ဂျပန်အစားအသောက်ဆိုင်ကို လမ်းညွှန်လိုက်ပေးလိုက်ပါတယ်။

 
မေစစ်ပိုင်
(မတ်လ ၂၃ ရက်နေ့ထုတ် The Irrawaddy ဂျာနယ်မှာ ပါဝင်တဲ့ SHIAWASE မှာ ဂျပန်စာ မြည်းကြရအောင် ဆိုတဲ့ စားသောက်ဆိုင်ဝေဖန်ချက်ကို ကူးယူ ဖော်ပြပါတယ်။ အဲဒီဂျာနယ်PDFဖိုင်ကို http://burma.irrawaddy.org/journals မှာ ရယူ ဖတ်ရှုနိုင်ပါတယ်)

 


 


 
.

0 comments :

Post a Comment

 
Copyright © 2014 Irrawaddy Publishing Group. All Rights Reserved