အော်ရီဒူး လာပြီ

-


 

သောကြာနေ့က ရန်ကုန်မြို့လယ်မှာတော့ အော်ရီဒူးက ရုတ်တရက် ထုတ်ရောင်းလိုက်တဲ့ တယ်လီဖုန်းဆင်ကတ် ဝယ်သူတွေနဲ့ ပျားပန်းခပ်နေပါတယ်။
အော်ရီဒူး ဆင်ကတ်ရောင်းတဲ့ဆိုင်တွေမှာ အုံနေတဲ့၊ တန်းစီနေတဲ့သူတွေ အများအပြားပါပဲ။

ဒီအကြောင်းကို ဧရာဝတီအင်္ဂလိပ်ပိုင်းစာမျက်နှာမှာလည်း Call Me, Maybe? Rangoon Becomes SIM City ဆိုပြီး ရေးပါတယ်။
http://www.irrawaddy.org/burma/call-maybe-rangoon-becomes-sim-city.html မှာ အပြည့်အစုံ ဖတ်နိုင်ပါတယ်။

မကြာသေးခင်ကအထိတော့ ဆင်ကတ် ဆိုရင် ဈေးကွက်ကို လက်ဝါးကြီးအုပ် မောင်ပိုင်စီးထားတဲ့ MPT ပဲ ရှိတာပါ။
MPT ကတ်တွေကို လစဉ် ကံစမ်းမဲဖောက်ပေးလို့ ပျော်ရွှင်ရသူတွေလည်း အများအပြားပါပဲ။
ခုတော့ အော်ရီဒူး လာပါပြီ။

အော်ရီဒူးက မြန်မာပြည်မှာ ဆက်သွယ်ရေးလုပ်ငန်းလုပ်ကိုင်ခွင့် လိုင်စင်ကို နော်ဝေအခြေစိုက် တယ်လီနောနဲ့အတူ မနှစ်က ရရှိပါတယ်။
ဒါကြောင့် ပြီးခဲ့တဲ့ ၁၃လလုံးလုံး သူတို့က တာဝါတိုင်တွေထောင်ဖို့၊ သူတို့တံဆိပ် ဈေးကွက်ထဲပေါက်ဖို့ လုပ်ခဲ့ကြတာပါ။

ဒီရက်ပိုင်းအတွင်း အော်ရီဒူးက သူ့ဆင်ကတ်တွေ ထုတ်ပြလိုက်တာကြောင့် မြန်မာပြည်ရဲ့ ဆက်သွယ်မှုတော်လှန်ရေး တခု အစပြုတယ်လို့လည်း ဆိုနိုင်ပါတယ်။

ဒါကြောင့် ဆက်သွယ်ရေးကဏ္ဍ အားအနည်းဆုံးနိုင်ငံတခုဖြစ်တဲ့ မြန်မာပြည်မှာ ဆင်ကတ်တွေကို ပထမဆုံး ဈေးကွက်ထဲ အရောင်ပို့နိုင်တဲ့ နိုင်ငံခြားကုမ္ပဏီက အော်ရီဒူး ဖြစ်လာပါတော့တယ်။

တယ်လီနောကတော့ သူ့ဆင်ကတ်တွေကို ဒီနှစ်နှောင်းပိုင်း ဈေးကွက်ထဲ ဖြန့်မယ်လို့ ဆိုထားတဲ့အတွက် သူလည်း မကြာခင် လာမယ်ဆိုတဲ့သဘော ရှိပါတယ်။

ဆင်ကတ်ဝယ်တဲ့အခါ ကျပ်ထောင့်ငါးရာထက် ပိုမပေးဖို့  အော်ရီဒူးက သူ့ဖေ့စ်ဘုတ်မှာ ကြေညာပါတယ်။
မည်သို့ပင် ကြေညာစေ သတ်မှတ်ထားစေကာမူ ဝယ်ယူအားပေးသူ များပြားလွန်းတဲ့အတွက် ဆိုင်တွေမှာတော့ ၂,ဝဝဝ၊ ၃,ဝဝဝ၊ ၅,ဝဝဝ စသဖြင့် ရောင်းကြတာကို ရန်ကုန်မြို့လယ်မှာ တွေ့ရမှာပါ။

MPT ကတ်တွေကို ထောင့်ငါးရာနဲ့ ကံစမ်းမဲ ဖောက်ပေးပေမယ့် မဲမပေါက်သူတွေအများအပြား ရှိနေပါတယ်။ တနည်းဆိုရရင်
မြန်မပြည်သား သန်းပေါင်းများစွာဟာ ၂၁ ရာစုထဲ ရောက်နေပေမယ့်၊ ကမ္ဘာလွှမ်းပတ်ဆက်နွယ်မှုခေတ်ထဲ ရောက်နေပေမယ့် ဖုန်းကို ကိုယ်ပိုင်မသုံးနိုင်သူ အများအပြား ရှိနေပါတယ်။

ဒါကြောင့် တန်ဖိုးနည်းပြီး အများပြည်သူ လက်လှမ်းမီတဲ့ ဈေးနှုန်းနဲ့ အော်ရီဒူးက ဈေးကွက်ကို မိတ်ဆက်ပေးလိုက်တော့ အင်မတန် လှုပ်လှုပ်ရှားရှား ဖြစ်သွားခြင်းပါ။

စနေနေ့က ရန်ကုန်မှာ ပြုလုပ်တဲ့ အော်ရီဒူးရဲ့ ရှင်းလင်းပွဲမှာ ဆင်ကတ်တွေကို သတ်မှတ်ဈေးနှုန်း ထောင့်ငါးရာထက် ပိုပေးပြီး မဝယ်ဖို့ အော်ရီဒူးမြန်မာရဲ့ အမှုဆောင်အရာရှိချုပ် (အပေါ်ပုံ) က   တကြိမ်ထက်မက တိုက်တွန်းသွားပါတယ်။

လတ်တလော အနယ်နယ်အရပ်ရပ်မှာ အရောင်းကိုယ်စားလှယ်ဆိုင်ပေါင်း ၆,၅ဝဝ ရှိတယ်လို့ သိရပါတယ်။
အဲဒီဆိုင်တွေမှာ နိုင်ငံသားစိစစ်ရေးကတ်ပြပြီး ဝယ်နိုင်ပါတယ်။

တခြားသောနိုင်ငံတွေလိုပါပဲ၊ မြန်မာပြည်မှာလည်း နိုင်ငံသားစိစစ်ရေးကတ်ပြပြီး ဆင်ကတ်ကို ဝယ်ယူရပါတယ်လို့ ပြောပါတယ်။

ထိုင်းနိုင်ငံမှာလည်း  ဒီလို ကန့်သတ်ထားခဲ့ဖူးပါတယ်။
အခုတော့ ထိုင်းမှာ ဒီလို မကန့်သတ်တော့ပါဘူး။ ဒီအတိုင်း ဝယ်နိုင်ပါပြီ။ အရေအတွက်လည်း မကတ်သတ်တော့ပါ။
အခမဲ့ဝေတဲ့နေရာတွေမှာလည်း ကတ်တွေကို ဒီအတိုင်း ပုံထားပါတယ်။
ကြိုက်သလောက် ကောက်ယူရုံပါ။

အလကားရတာပဲ ဆိုပြီး စုပြုံ ကောက်ထည့်သွားတာမျိုးတော့ မတွေ့ဖူးပါဘူး။
ဆင်ကတ်ကို သုံးတယ် ဆိုကတည်းက ငွေဖြည့်ကတ် ထပ်ဝယ်ရပါတယ်။
ဒါကြောင့် အလကားရတဲ့ ဆင်ကတ်ကို မလိုအပ်ဘဲ မယူကြခြင်းဖြစ်ပါတယ်။

မြန်မာပြည်မှာတော့ MPT က လက်ဝါးကြီးအုပ်ထားတဲ့အတွက် ဆင်ကတ်က ထီးသုံးနန်းသုံးလို ဖြစ်ခဲ့ရခြင်းပါပဲ။

အခုတော့ အသစ်စက်စက် ပြိုင်ဘက်များထဲက တခုက ရှေ့ခြေတလှမ်းပြီးတလှမ်း တိုးလာပြီ လို့ ဆိုရမှာ ဖြစ်ပါတယ်။

• Call Me, Maybe? Rangoon Becomes SIM City

http://www.irrawaddy.org/burma/call-maybe-rangoon-becomes-sim-city.html

• အော်ရီဒူး ဖုန်းကတ်များ ဈေးကွက် အတွင်း သတ်မှတ်နှုန်းထက် ပိုပေးရမှုများ ရှိနေ

 http://burma.irrawaddy.org/news/2014/08/01/62665.html

• ဧရာဝတီ Facebook / ဧရာဝတီ Twitter