အမုန်းများရပ်ဖို့ ဦးဆောင်သူ ၃ ဦးကို ပုသိမ်မှာ အမှုဖွင့်

 ~



 

 ပုသိမ်မြို့မှာ   ကမ္ဘာ့ငြိမ်းချမ်းရေးနေ့ အထိမ်းအမှတ် အဖြစ် အမုန်းများရပ် ဆိုတဲ့ခေါင်းစဉ်နဲ့ လှုပ်ရှားမှုကို  ဦးဆောင်ခဲ့သူ ၃ ဦး တရားစွဲခံရပါပြီ။

 သက်ဆိုင်ရာ နယ်မြေခံရဲစခန်းက ပုဒ်မ ၁၈ နဲ့ အမှုဖွင့် တရားစွဲဆိုလိုက်ခြင်းပါ။

 စက်တင်ဘာလ ၂၁ ရက်နေ့ မနက်ပိုင်းက ကျင်းပခဲ့တဲ့ ငြိမ်းချမ်းရေးပွဲနဲ့ ပတ်သက်ပြီး တရားစွဲခံရသူတွေကတော့  နိုင်ငံလုံးဆိုင်ရာ လူငယ်ကွန်ယက်အဖွဲ့မှ မနန်း၊ ပုသိမ်ခရိုင်လူငယ်ကွန်ရက်မှ ကိုတင်ထွန်းနိုင်နဲ့ မြောင်းမြခရိုင်လူငယ်ကွန်ရက်မှ ကိုဘိုဘိုတို့ ဖြစ်ကြပါတယ်။

 သူတို့ ၃ ဦးကို နယ်မြေခံ ပုသိမ်မြို့ အသည်ကြီးရဲစခန်းက ပြစ်မှုအမှတ် ၂၀၁/၂၀၁၄။ ပုဒ်မ ၁၈ နဲ့ ရဲအရာရှိတဦးက တရားလိုပြုလုပ်ပြီး တနင်္ဂနွေနေ့က အမှုဖွင့်ခဲ့တာဖြစ်ကြောင်း သိရပါတယ်။

"ပြည်ထောင်စုအဆင့် ခွင့်ပြုချက်ပါတယ်ဆိုပေမယ့် လူအစုအဝေးနဲ့ ပွဲတခုလုပ်တော့မယ်ဆိုရင် သက်ဆိုင်ရာဒေသရဲ့ ခွင့်ပြုချက် လိုအပ်ပါတယ်။
 သူတို့က ဒေသရဲ့ခွင့်ပြုချက် မရရှိဘဲလုပ်ခဲ့တဲ့အတွက် အခုလို ဆောင်ရွက်ရတာ ဖြစ်ပါတယ်” လို့ အသည်ကြီးရဲစခန်းက တာဝန်ရှိသူတဦးက ပြောပါတယ်။

 ပွဲစီစဉ်သူတွေကတော့ ငြိမ်းချမ်းရေးနေ့နဲ့ ပတ်သတ်တဲ့ လှုပ်ရှားမှုတွေကို ပြည်ထောင်စုအဆင့်ကနေ လွပ်လပ်စွာ ခွင့်ပြုပေးထားပြီးဖြစ်ကြောင်း၊ စက်တင်ဘာ ၂၀ ရက်နေ့က ဧရာဝတီတိုင်းအစိုးရအဖွဲ့၊ လူမှုရေးဝန်ကြီး ဒေါ်ခင်စောမူနဲ့ သက်ဆိုင်ရာ ရဲတပ်ဖွဲ့ရုံးများကို အကြောင်းကြားပြီးမှ လုပ်ဆောင်ခြင်း ဖြစ်ကြောင်း၊ ပွဲမစခင်မှာ ပုသိမ်ခရိုင် ရဲတပ်ဖွဲ့မှူးက ခေါ်ယူပြီး ခွင့်ပြုချက်တင်ဖို့ပြောတဲ့အတွက် ခွင့်ပြုမိန့် တင်ခဲ့ကြောင်း ပြောဆိုပါတယ်။

“ပုသိမ်ခရိုင် ရဲမှူးကြီးက ခွင့်ပြုမိန့် တင်ပြီးတာနဲ့ အစီအစဉ်တွေကို ဆက်လုပ်လို့ ရပါတယ်လို့ပြောလို့ လှုပ်ရှားမှုကို ဆက်လုပ်ခဲ့တာပါ။
 အဲဒီလိုပြောပြီးမှ အခုလို တရားစွဲတယ်ဆိုတော့ ကျမတို့လည်း နားမလည်နိုင်တော့ဘူး” လို့ နိုင်ငံလုံးဆိုင်ရာ လူငယ်ကွန်ယက်အဖွဲ့မှ မနန်းက ပြောပါတယ်။

 ပုသိမ်မြို့က  အမုန်းများရပ်လှုပ်ရှားမှုမှာ နိုင်ငံလုံးဆိုင်ရာ လူငယ်ကွန်ရက်၊ ဧရာဝတီလူငယ်ကွန်ရက်၊
 ပုသိမ်ပညာဒါနကျောင်းက လူငယ်တွေ၊ မြို့ခံကဗျာဆရာတွေနဲ့ ငြိမ်းချမ်းရေး လိုလားသူတွေ ပါဝင်ခဲ့ကြပြီး မြန်မာပြည် ငြိမ်းချမ်းရေး အတွက် ကဗျာများ ရွတ်ဆိုခြင်း၊
 ငြိမ်းချမ်းရေးသီချင်းများ ၀ိုင်းဖွဲ့သီဆိုခြင်းနဲ့ ငြိမ်းချမ်းရေးအတွက် ဗီနိုင်း ပိုစတာများ ကိုင်ဆောင်ပြီး ငြိမ်းချမ်းရေးနဲ့ ပတ်သက်တဲ့ သဘောထားတွေ ဖော်ထုတ်ခဲ့ကြပါတယ်။

 ငြိမ်းချမ်းရေးနေ့မှာ အမုန်းများရပ် လှုပ်ရှားမှုကို ရန်ကုန်၊ ပြည်နဲ့ ပုသိမ်မြို့တွေမှာ အသီးသီး လုပ်ဆောင်ခဲ့ကြ ပေမယ့် တခြားမြို့တွေမှာ ပုဒ်မ ၁၈ နဲ့ တရားစွဲဆိုတဲ့သတင်းတွေ မတွေ့ရဘဲ ပုသိမ်တမြို့တည်းမှာသာ ငြိမ်းချမ်းရေးပွဲလုပ်ဆောင်သူ ၃ ဦး ပုဒ်မ ၁၈ ကျည်ဆန် ထိမှန်သွားခဲ့တာ ဖြစ်ပါတယ်။

 ဆလိုင်းသန့်စင်

ပုသိမ်မှာတွေ့ရတဲ့ အမုန်းများရပ် လှုပ်ရှားမှု

 http://blog.irrawaddy.org/2014/09/blog-post_362.html
 

• ဧရာဝတီ Facebook / ဧရာဝတီ Twitter

.