မိုးဖျက်လို့ ပုသိမ်မီးမျှောပွဲကို ရက်ရွှေဆိုင်း

မိုးဖျက်လို့ ရွှေ့ဆိုင်းလိုက်ရတဲ့ ပုသိမ်မီးမျှောပွဲ (ဓာတ်ပုံ-ဆလိုင်းသန့်စင်/ဧရာဝတီ)

 ရာသီဥတုဆိုးဝါးနေလို့ ဧရာဝတီတိုင်းအစိုးရက ပုသိမ်မြို့မှာ ဒီကနေ့ကျင်းပဖို့စီစဉ်ထားတဲ့ ဆီမီးတသိန်းမျှောပွဲကို မကျင်းပတော့ပဲ ရာသီဥတုကောင်းမွန်တဲ့ နောက်ရက်မှသာ ကျင်းပဖို့ ရွှေ့ဆိုင်းလိုက်ပါတယ်။

 ဒီကနေ့ တန်ဆောင်မုန်းလပြည့်နေ့မှာ ရှင်ဥပဂုတ္တကိုယ်တော်ကို ပုသိမ်မြို့ င၀န်မြစ်အတွင်းမှာ ဆီးမီးတသိန်းမျှောပြီး ပူဇော်ဖို့ စီစဉ်ထားတာပါ။ ဒါ့အပြင်  မြန်မာ့ရိုးရာလှေပြိုင်ပွဲ၊ စတုဒီသာကျွေးပွဲနဲ့ မီးပုံးပျံလွှတ်ပွဲတွေ ကျင်းပဖို့ ကိုလည်း ဧရာဝတီတိုင်းအစိုးရအဖွဲ့က စီစဉ်ထားပါသေးတယ်။

 ဒါပေမယ့် ပုသိမ်မြို့မှာ နိုဝင်ဘာလ ၃ ရက်နေ့ကစလို့ ဒီကနေ့အထိ တောက်လျှောက်မိုးရွာနေတဲ့အတွက် ပွဲကျင်းပဖို့အချိန်ကို ရွှေ့ဆိုင်းလိုက်ရတာဖြစ်တယ်လို့ ပုသိမ်မြို့နယ် အုပ်ချုပ်ရေးမှူး ဦးချစ်ကိုကိုက ဧရာဝတီကို ပြောပါတယ်။

 “မီးမျှောပွဲလုပ်ဖို့ ကျနော်တို့ အကုန်လုံးပြင်ဆင်ထားပြီးပါပြီ။ ဒါပေမယ့် မိုးကတောက်လျှောက်ရွာနေတော့ အဆင်မပြေဘူးဆိုပြီး ဒီကနေ့မနက်ပိုင်းမှာပဲ ပွဲကျင်းပမယ့်အစီအစဉ်ကို ရွှေ့ဆိုင်းလိုက်တာ ဖြစ်ပါတယ်။ အခုက မိုးရွာနေတော့ မိုးလေကင်းလွတ်သွားချိန်ကျတော့ ပြန်ကျင်းပမှာပါ”လို့ သူက ပြောပါတယ်။

 ပုသိမ်မြို့မှာ ဆီးမီးမျှောပွဲကို ၂၀၁၁ ခုနှစ်ကတည်းက ကျင်းပလာခဲ့တာ အခုဆိုရင် စတုတ္ထအကြိမ်မြောက် ကျင်းပဖို့ ပြင်ဆင်ထားတာပါ။

အရင်နှစ်တွေကဆို ဆီမီးမျှောပွဲနဲ့အတူ ပုသိမ်မြို့က စေတနာရှင်တွေနဲ့ ဌာနဆိုင်ရာအသီးသီးက ကမ်းနားလမ်းမှာ စတုဒီသာကျွေးပွဲကိုပါ ပူးတွဲကျင်းပကာ ကရင်ဒုံးယိမ်းအက၊ ဆင်အက၊ ဗမာအကတွေနဲ့ ကပြဖျော်ဖြေလေ့ရှိလို့ မီးမျှောပွဲကျင်းပချိန်ဆို ပုသိမ်မြို့ ကမ်းနားလမ်းဟာ တိုးမပေါက်အောင် စည်ကားလေ့ရှိပါတယ်။

ဒီနှစ်မှာတော့ ခါတိုင်းနှစ်နဲ့မတူဘဲ အသက်အရွယ်မရွေး ၀င်ပြိုင်နိုင်တဲ့ အလွတ်တန်းလှေပြိုင်ပွဲနဲ့ တောင်ကြီးမြို့က မီးပုံပျံ ပညာရှင်တွေပါ ဖိတ်ခေါ်ပြီး မီးပုံးပျံလွှတ်ဖို့ စီစဉ်ထားခဲ့ပေမယ့် အခုကတော့ မိုးဖျက်လို့ ပွဲကို ရွှေ့ဆိုင်းခဲ့ရတာပါ။

ဒါ့ထက် နာမည်ကျော် ရွှေမန်းသား ဖိုးချစ်ဇာတ်အဖွဲ့ကို ဗလာပွဲအနေနဲ့ ကန်သုံးဆင့်ကွင်းထဲမှာ ဖိတ်ခေါ် ကပြခဲ့တာ မိုးရွာနေလို့ နိုဝင်ဘာ ၃ ရက်နေ့တညသာ ကပြနိုင်ခဲ့ပြီး ၄ ရက်နေ့ည ကမယ့်အစီအစဉ်ကို ဖျက်သိမ်းခဲ့ရပါတယ်။


ဆလိုင်းသန့်စင်

မိုးရေထဲက ဖျော်ဖြေရေး မဏ္ဍပ် (ဓာတ်ပုံ- ဆလိုင်းသန့်စင်/ ဧရာဝတီ)

ရှင်ဥပဂုတ္တ ဖောင်တော်ကိုဆွဲမယ့် ဟင်္သာညီနောင် (ဓာတ်ပုံ- ဆလိုင်းသန့်စင်/ ဧရာဝတီ)