ဗဟန်း၊ ဥယျာဉ်လမ်းထဲကဂျပန် Ramen ခေါက်ဆွဲဆိုင် YAMAGOYA

Monday, March 9, 2015



ဓာတ်ပုံများ - တင်ထက်ပိုင်/ The Irrawaddy

ဂျပန်အစားအစာလို့ ဆိုလိုက်ရင် အများစုက ဂျပန်ဆူရှီထမင်းလိပ်ကိုပဲ ပြေးမြင်မိကြမှာပါ။ ဆူရှီက ဂျပန်နိုင်ငံတခုတည်းမှာပဲ မဟုတ်ပါဘူး၊ အမေရိကန်လို နိုင်ငံမျိုးမှာတောင် ဆူရှီဆိုင်တွေ အများအပြားရှိပြီး ဆူရှီကို ကျန်းမာရေးအတွက် သင့်တော်တဲ့ ပင်လယ်စာ၊ ရေညှိတို့နဲ့ ပြုလုပ်ထားတာကြောင့် လူမျိုး၊ဘာသာမရွေး စားသုံးကြပါတယ်။

ရန်ကုန်မြို့မှာဆိုရင်လည်း ဂျပန်အစားအစာရောင်းတဲ့ဆိုင်တွေမှာ ဆူရှီကို လွယ်လွယ်ကူကူပေါပေါများများ စားသုံးနိုင်ပေမယ့် Ramen လို့ခေါ်တဲ့ ဂျပန်ခေါက်ဆွဲပြုတ်ကို ရောင်းချတဲ့ဆိုင်တွေကတော့ ဆူရှီဆိုင်တွေနဲ့ စာရင် ခပ်ရှားရှားပါ။ Ramen ဆိုတာဟာ ဂျပန်ခေါက်ဆွဲပြုတ်တမျိုးဖြစ်ပြီး တရုတ်စတိုင် လက်လုပ် ဂျူံခေါက်ဆွဲကိုမှ အသားတမျိုးမျိုး၊ ဒါမှမဟုတ် ငါးတမျိုးမျိုးကို ပဲငါးပိဆော့စ်၊ ပါးပါးလှီးထားတဲ့ ဝက်သား၊ ရေညှိအစရှိတာတွေနဲ့ ဖွယ်ဖွယ်ရာရာ ပြင်ဆင်ထားတဲ့ အစားအစာတမျိုးပါ။



 ဒီတပတ် The Irrawaddy ရဲ့ Restaunant Review ကဏ္ဍကနေ ဂျပန်အစားအစာတွေထဲက တခုဖြစ်တဲ့ ဂျပန် လက်လုပ်ခေါက်ဆွဲ Ramen တွေချည်း သီးသန့်ရောင်းချတဲ့ ရန်ကုန်မြို့၊ ဗဟန်းမြို့နယ်၊ တက္ကသိုလ်ရိပ်သာ လမ်းသစ်၊ ဥယျာဉ်လမ်းထဲမှာရှိတဲ့ “YAMAGOYA RAMAN” ဂျပန်စားသောက်ဆိုင်လေးနဲ့ မိတ်ဆက် ပေးချင်ပါတယ်။

တက္ကသိုလ်ရိပ်သာလမ်းသစ်၊ ဆရာစံပလာဇာ မျက်စောင်းထိုးလောက်မှာရှိတဲ့ ဥယျာဉ်လမ်းအတွင်းကို ဝင်လိုက်တာနဲ့ လမ်းရဲ့ညာဘက်အခြမ်းမှာ ဂျပန်စာလုံးနီနီရဲရဲနဲ့ ဆိုင်းဘုတ်ထိုးထားတဲ့ ဂျပန် ခေါက်ဆွဲဆိုင်လေးကို မြင်နိုင်ပါတယ်။

ဆိုင်ရဲ့ အတွင်းအပြင်အဆင်က တခြားဂျပန်ရိုးရာစားသောက်ဆိုင်တွေလို ဂျပန်ရိုးရာစတိုင်လ် တင်ပျဉ်ခွေ ထိုင်တာမျိုးတို့၊ စက္ကူတံခါး၊ ဝါးပင်အစရှိတဲ့ အခန်းတွင်းအပြင်အဆင်တွေကို မတွေ့ရပေမယ့် ဆိုင်မှာဖွင့်ထားတဲ့ ဂျပန်သီချင်းနဲ့ ဘေးပတ်ပတ်လည် နံရံတွေမှာ ချိတ်ဆွဲထားတဲ့ ဆိုင်ရဲ့မီနူးပါ ဂျပန်ခေါက်ဆွဲပုံတွေကြောင့် ဂျပန်အစားအစာဆိုင်လို့တော့ ခံစားမိစေပါတယ်။

မတ်တပ်ထိုင်ခုံတွေနဲ့ပဲ ရိုးရိုးရှင်းရှင်း ပြင်ဆင်ထားတဲ့ ဆိုင်ထဲကိုအရောက် အစားအသောက်တွေ မှာယူဖို့ Menu ကို ကြည့်တဲ့အခါ Ramen အမျိုးမျိုး ဖြစ်နေပြီး Ramen နဲ့ အတူတွဲစားဖို့ တန်ပူရာလို အကြော်တွေ၊ ဖက်ထုပ်၊ အကင်ဆာတေးတွေနဲ့ Salad အသုပ်တွေ ရရှိနိုင်တာကို တွေ့ရပါတယ်။

ပထမဦးဆုံးဆိုင်မှာ အမှာများဆုံးလည်းဖြစ် ဆိုင်ရဲ့Signature လိုလည်းဖြစ်နေတဲ့ MukashiSpecail Ramen (မူကာရှီခေါက်ဆွဲပြုတ်) ကိုအရင်ဆုံးမှာလိုက်ပါတယ်။ အဲဒီနောက်မှာတော့ နောက်ထပ်ရနိုင်တဲ့ Ramen တွေထဲက တခြားမြည်းစမ်းကြည့်ချင်မိတဲ့ Miso Ramen (မီဆိုခေါက်ဆွဲပြုတ်) ၊ Kimchi Ramen (ကင်မ်ချီခေါက်ဆွဲပြုတ်) တို့နဲ့ အတူ Seafood (ပင်လယ်စာ)နဲ့ ပြုလုပ်ထားတဲ့ Chan Pong Ramen (ချန်ပေါန် ခေါက်ဆွဲပြုတ်) တို့ကို မှာလိုက်ပါတယ်။


 Ramen ဂျပန်ခေါက်ဆွဲတွေနဲ့အတူ တွဲဖက်ပြီးအရံအဖြစ် စားသုံးဖို့ ဂျပန်လို Gyoza လို့ခေါ်တဲ့ ဂျပန် ဖက်ထုပ်ကြော်နဲ့ Potato Salad (အာလူးသုပ်) တို့ကိုပါ ထပ်မံမှာယူလိုက်ပါတယ်။ ဆိုင်မှာရရှိနိုင်တဲ့ အစားအသောက်အားလုံးနီးပါးဟာ ဝက်သားနဲ့ ပြုလုပ်ထားတာလို့လည်း သိရပါတယ်။

အစားအသောက်တွေကို မြည်းစမ်းကြည့်တဲ့အခါ မူကာရှီခေါက်ဆွဲပြုတ် (Mukashi Ramen) ရဲ့ အရသာက နို့စိမ်းခေါက်ဆွဲတို့၊ အုန်းနို့ခေါက်ဆွဲတို့လို အရည်အရသာမျိုးနဲ့ ခပ်ဆင်ဆင်ပါ။ ဒါပေမယ့် သူ့အရည်က အုန်းနို့အရည်လိုခပ်ပျစ်ပျစ်နဲ့ လေးပင်တဲ့အရသာမျိုးမဟုတ်ဘဲ အရသာက ခပ်ပေါ့ပေါ့လေးနဲ့ အသင့်အတင့် ချိုပါတယ်။

မီဆိုခေါက်ဆွဲပြုတ် (Miso Ramen) ကို မြည်းစမ်းကြည့်တဲ့အခါမှာတော့ အရသာက Miso ဂျပန်ပဲငါးပိနဲ့ ခေါက်ဆွဲကို ပြုတ်ထားတဲ့အတွက် အရသာနည်းနည်းလေး ပြင်းတယ်လို့ ဆိုချင်ပါတယ်။

ကင်မ်ချီခေါက်ဆွဲပြုတ် (Kimchi Ramen) ကတော့ ကိုးရီးယားကင်မ်ချီနဲ့ ဂျပန်ခေါက်ဆွဲပြုတ်တို့ ရောစပ်ထားတဲ့ အရသာချဉ်ချဉ်စပ်စပ်လေးနဲ့ စားလို့ကောင်းပါတယ်။ ဒီခေါက်ဆွဲကိုတော့ နေမကောင်းဖြစ်ပြီးခါစ နလန်ထ လူမမာတွေ စားမယ်ဆိုရင်တော့ ချက်ချင်းလန်းဆန်းသွားနိုင်မယ့် အရသာမျိုးပါပဲ။ အရသာက ဘယ်လိုပြောရမလဲဆိုတော့… “Oishiပေါ့၊ အရမ်းကောင်းပါတယ်”



 ပင်လယ်စာ (Seafood) နဲ့ လုပ်ထားတဲ့ ချန်ပေါန် (Chan Pong) ခေါက်ဆွဲပြုတ်ကတော့ တရုတ်ခေါက်ဆွဲကြော်ကိုဟင်းရည်ရော ပြုတ်ထားသလို ချိုတဲ့အရသာမျိုးပါ။ ဆိုင်မှာလာစားတဲ့ ဧည့်သည်တွေထဲမှာ မြန်မာလူမျိုးစားသုံးသူတွေက အရသာပူပူစပ်စပ် ခေါက်ဆွဲပြုတ် Spicy Ramen ကို မှာစားကြတာများတယ်လို့ သိရပါတယ်။ ကျနော်တို့ ရောက်နေတဲ့အချိန် အတွင်းမှာတော့ ဂျပန်လူမျိုး ဖောက်သည်တွေ အလာများကြတာကိုတွေ့ရပါတယ်။

ဆိုင်မှာရတဲ့ ဂျပန် ဂျုံခေါက်ဆွဲဖတ်တွေကိုတော့ ကိုယ်တိုင်ပြုလုပ်တာဖြစ်ပြီး ခေါက်ဆွဲကိုပြုတ်တဲ့ အရည်အတွက် ဝက်ခြေထောက်ပြုတ်ရည်ကို အသုံးပြုထားတယ်လို့ သိရပါတယ်။ ခေါက်ဆွဲပြုတ်နဲ့အတူ တွဲဖက်စားဖို့ မှာယူထားတဲ့ ဂျပန်ဖက်ထုပ်ကြော်နဲ့ အာလူးသုပ်တို့ကို မြည်းစမ်းကြည့်တဲ့အခါ ဖက်ထုပ်ကြော်ကတော့ စားနေကျ ဖက်ထုပ်ကြော်တွေလိုပဲ အရသာက အထွေအထူးပြောစရာမရှိပေမယ့် အာလူးသုပ်ကတော့ အနည်းငယ် ဆန်းတယ်လို့ ဆိုချင်ပါတယ်။

အားလူးသုပ်ရဲ့ အရသာကစားရတာ ပါးစပ်ထဲမှာအေးနေပြီး ပြုလုပ်ထားပုံကတော့ အာလူးကိုပြုတ်၊ ထောင်း၊ ကြက်ဥ၊ Mayonnaise (မရောနိစ်)၊ ငရုတ်ကောင်းမှုန့်၊ မုန်လာဥနီ၊ သခွားသီးအစရှိတာတွေနဲ့ သေချာ ရောနှောလို့ လုံးနယ်ပြီး ရေခဲသေတ္တာထဲ အအေးခံထားတာမျိုးပါ။
“ဂျပန်လူမျိုးတွေကခေါက်ဆွဲပြုတ်လိုအစားအစာမျိုးကိုသာပူပူနွေးနွေးစားကြပေမယ့် အသုပ်ကိုတော့ အအေးပဲစားကြတယ်” လို့ ဆိုင်မန်နေဂျာက ဆိုပါတယ်။
ဆိုင်က ဟင်းလျာတွေမှာ အသုံးပြုတဲ့ ဟင်းအနှစ်၊ ဆော့စ်၊ ငံပြာရည် အစရှိတာတွေကို ဂျပန်နိုင်ငံကနေ မှာယူချက်ပြုတ်တာလို့ သိရတယ်။ ဆိုင်မှာရရှိတဲ့ ခေါက်ဆွဲပြုတ်တွေက တပွဲကို ပျမ်းမျှဈေးနှုန်းကျပ် ၆၀၀၀ ကျော်ပါ။ အသုပ်၊ ဆာတေး၊ ဖက်ထုတ် အစရှိတာတွေကတော့ ကျပ် ၁၅၀၀ ကနေ ကျပ် ၅၀၀၀ ကျော် အထိ အစားစားရှိပါတယ်။

ဆိုင်ကို ဖွင့်လှစ်ထားတာ တနှစ်ကျော်ပဲ ရှိပါသေးတယ်။ “YAMAGOYA RAMEN” ဆိုင်တွေက ဂျပန်နိုင်ငံမှာ ဆိုင်ပေါင်း ၁၆၀ ကျော်ရှိပြီး ဖိလစ်ပိုင်၊ မလေးရှား၊ ထိုင်း၊ မက္ကာအို၊ ထိုင်ဝမ် အစရှိတဲ့ နေရာတွေမှာလည်း Franchise (လုပ်ငန်းလုပ်ပိုင်ခွင့်) ယူပြီး ဖွင့်ထားတဲ့ ဆိုင်တွေရှိပါသတဲ့။ တကမ္ဘာလုံးအတိုင်းအတာနဲ့ ဆိုင်ပေါင်း၂၀၀ ကျော် ရှိတယ်လို့ ဆိုင်မန်နေဂျာ Mr.GynSyanMang (ဂင့်ရှင်းမန်) က ပြောပါတယ်။

အခု ဒီဆိုင်ကတော့ မလေးရှားကနေ Franchise ယူဖွင့်ထားတဲ့ဆိုင်ဖြစ်ပြီးဆိုင်မှာရှိတဲ့ စာဖိုးမူးတွေနဲ့ ဝန်ထမ်းတွေက မလေးရှားက ဆိုင်မှာသုံးနှစ်ကျော် တာဝန်ထမ်းဆောင်ထားတဲ့ ဝန်ထမ်းတွေ ဖြစ်တယ်လို့ သိရပါတယ်။

ဆိုင်ဖွင့်ချိန်ကတော့ မနက် ၁၁ နာရီကနေ ညနေ ၃ နာရီ၊ ညနေ ၆ နာရီကနေ ည ၁၀ အထိ ဖြစ်ပြီး စနေ၊ တနင်္ဂနွေလို နေ့မျိုးတွေမှာဆိုရင်တော့ တနေကုန်နီးပါးဖွင့်တယ်လို့ သိရပါတယ်။ ဆိုင်ဖွင့်ခါစ ကာလတုန်းကတော့ ဆိုင်ကိုလာစားတဲ့ ဧည့်သည်အများစုဟာဂျပန်လူမျိုးတွေ ဖြစ်ပြီးအခုအချိန်မှာတော့ မြန်မာ၊ တရုတ်၊ ထိုင်းလူမျိုးဖောက်သည်တွေလည်းအများအပြားရှိနေပြီလို့ မစ္စတာဂင့်ရှင်းမန်ကဆိုပါတယ်။

အဆီမပါသလောက်ဖြစ်ပြီး ကျန်းမာရေးနဲ့ ညီညွတ်လှတဲ့ ဂျပန်အစားအစာတွေရဲ့ အရသာကို နှစ်ခြိုက်ပြီး ဆူရှီလည်းမဟုတ်တဲ့ အခြားအပြောင်းအလဲလေးတခုခုကို မြည်းစမ်းချင်တယ် ဆိုရင်တော့ ဆရာစံပလာဇာနားက ဥယျာဉ်လမ်းထဲမှာရှိတဲ့ YAMAGOYA RAMEN ဂျပန် လက်လုပ်ခေါက်ဆွဲဆိုင်မှာ သွားရောက် မြည်းစမ်းကြည့်နိုင်ကြပါတယ်။


သီဟတိုး
“အပတ်စဉ်ထုတ် ဧရာဝတီဂျာနယ် အတွဲ ၂ အမှတ်စဉ် ၁၀ မှ ကူးယူဖော်ပြသည်”

0 comments :

Post a Comment

 
Copyright © 2014 Irrawaddy Publishing Group. All Rights Reserved