ဒီတပတ်တော့ အပြောင်းအလဲလေး ဖြစ်သွားအောင် မန္တလေးမြို့က မြန်မာ့ရိုးရာစားသောက်ဆိုင်တဆိုင်နဲ့ မိတ်ဆက် ပေးချင်ပါတယ်။ ဒီဆိုင်လေးကတော့ မန္တလေးမြို့ ဗထူးအားကစားကွင်းအနောက်ဘက်မှာတည်ရှိတဲ့ “မင်္ဂလာပါ” ဆိုတဲ့ မြန်မာ့ရိုးရာထမင်းဟင်းနဲ့ မုန့်မျိုးစုံဆိုင်ပါပဲ။
“မင်္ဂလာပါ”ဆိုင်က နှစ်ထပ်အဆောက်အအုံဖြစ်ပြီး ကျွန်းသားဘောင် မှန်ပြတင်းတွေနဲ့ တည်ဆောက်ထားပါတယ်။ ဆိုင်အောက်ထပ်အပြင်ဘက် ပတ်ပတ်လည်မှာတော့ သစ်ပင်စိမ်းစိမ်းစိုစိုတွေ စိုက်ပြီးအလှဆင်ထားတာ တွေ့ရပါတယ်။ ဆိုင်အတွင်းမှာမြန်မာဆန်ဆန် အမျိုးသမီးတယောက်ရဲ့ပုံပန်းချီကားမျိုးတွေ၊ မြန်မာအဘိုးအိုတယောက်ရဲ့ပုံပန်းချီကား စတဲ့ မြန်မာ့ရနံ့သင်းတဲ့ ပန်းချီလက်ရာတွေကို ချိတ်ဆွဲထားပါတယ်။ နံရံဘက်ဆီမှာ ၀ါးလေးတွေစီတန်းရိုက် အလှဆင် ထားပြီး မျက်နှာကြက်ကိုလည်း မြန်မာ့ရိုးရာဖျာနဲ့ ကပ်ရိုက်ထားပါတယ်။ ဆိုင်အဆင်အပြင်နဲ့ပက်သတ်ပြီး မြန်မာ့ရိုးရာ အငွေ့အသက်ရစေချင်လို့ပါလို့ ဆိုင်ပိုင်ရှင် ကိုမျိုးက ပြောပါတယ်။
ဆိုင်ရဲ့ဘယ်ဘက်မှာတော့ အဆောက်အအုံတခုရှိပြီး အဲဒီအဆောက်အအုံထဲမှာတော့ ဆိုင်မှာရနိုင်တဲ့ ဟင်းတွေကို မှန်ကောင်တာအတွင်းမှာ စတီးဗန်းလေးတွေနဲ့ထည့်ထားပါတယ်။ ဟင်းတွေမအေးအောင် အန္တရာယ်မရှိတဲ့ ရေနွေးငွေ့ စနစ်နဲ့ အပူငွေ့ပေးထားတယ်လို့ ဆိုင်ရှင်က ဆိုပါတယ်။
ဟင်းတွေကတော့ အမယ်စုံလှပါတယ်။ ၀က်သားတမျိုးတည်းကိုပဲ အမျိုးမျိုးချက်ထားတာတွေ့ရတယ်။ အညာဒေသထွက် ပုဂံပုန်းရည်နဲ့ချက်ထားတဲ့ ၀က်ပုန်းရည်၊ သရက်သီးခြောက်နဲ့ချက်တဲ့ ၀က်သရက်၊ တောအလှူတွေမှာချက်တဲ့ အရသာမျိုး စားရမယ့် ၀က်သားအိုးကြီးချက်၊ စားရတာမအီတဲ့ ၀က်လက်ဖက်၊ အရည်လေးပါ သောက်လို့ရတဲ့ ၀က်မျှစ်ချဉ်၊ စတဲ့ ဟင်းလျာတွေ စုံစုံလင်လင်ရတာကိုတွေ့ရပါတယ်။ နောက်ပြီးဆိတ်သားကို ကုလားပဲနဲ့ရောချက်တဲ့ ဆိတ်ကုလားပဲ၊ ငါးခူကိုအသားလွှာပြီးရဲယိုရွက်နဲ့ချက်တဲ့ ငါးခူစင်းကောရဲယိုစတဲ့ ဟင်းလျာတွေလည်းရှိပါတယ်တဲ့။ အရံဟင်းလျာတွေ ကိုတော့ ကိုယ်ကြိုက်တာကို မှာနိုင်သလိုကိုယ်မှာတဲ့ အသားဟင်းလျာနဲ့လိုက်ဖက်အောင်လည်းချပေးတယ်လို့ ဆိုပါတယ်။ နှစ်သက်ရာအသားဟင်းတမျိုးနဲ့ အရံဟင်းစုံအပါအဝင် ထမင်းအဝစားကို ၄၀၀၀ကျပ် ကျသင့်ပါလိမ့်မယ်။
ဟင်းကောင်တာရဲ့ဘေးမှာတော့အသုပ်စုံကောင်တာရှိပါတယ်။ အသုပ်စုံမှာ ရာသီအလိုက်ပေတဲ့အရွက်သုပ်တွေလည်း ရပါတယ်။ ဆောင်းတွင်းဖက်ဆိုမြူရွက်သုပ်၊ အခုလို နွေဦးပေါက်ဆို ထနောင်းရွက်သုပ်တို့လည်း ရပါတယ်။ လက်ဖက်သုပ်၊ ဂျင်းသုပ်၊ ရှောက်သီးသုပ်၊ ကုက္ကိုရွက်သုပ်၊ ညောင်ချဉ်ဖူးသုပ် စတဲ့ အသုပ်စုံတွေလည်းရပါတယ်။အသုပ်စုံကတော့ တပွဲကို ၁၅၀၀ကျပ်ပါ။ အသုပ်စုံရဲ့ဘေးမှာတော့ ရာသီပေါ်သီးနှံဖျော်ရည်တွေ ရရှိနိုင်ပါတယ်။
နောက်ပြီးထမင်းစားပြီးရင် အချိုတည်းဖို့ မြန်မာ့ရိုးရာမုန့်မျိုးစုံကိုလည်း လှေတစင်းပေါ်မှာ မှန်ကောင်တာနဲ့ ခင်းကျင်း ရောင်းချပေးတာတွေ့ရပါတယ်။ မုန့်ပဲဆုပ်၊ မုန့်လိပ်ပြာ၊ ဘိန်းမုန့်၊ ထန်းသီးမုန့်၊ မုန့်သိုင်းခြုံ၊ ကန်စွန်းဥပေါင်း၊ ပဲလိပ်ပြာ၊ သကြားလိပ်ပြာစတဲ့ မုန့်မျိုးစုံပါ။ အဲဒီမုန့်မျိုးစုံကို မုန့်လေးမျိုးပါ ပွဲသေးကို ကျပ်တထောင်၊ မုန့်(၈)မျိုးပါ ပွဲကြီးကို ကျပ်နှစ်ထောင်ဆိုပြီးရောင်းချပေးတယ်လို့ ဆိုပါတယ်။
မြန်မာ့ရိုးရာမုန့်တမျိုးဖြစ်တဲ့မုန့်လင်မယားကိုလည်း ပူပူနွေးနွေးစားနိုင်အောင် ချက်ချင်းလုပ်ပေးပါတယ်တဲ့။
အစားအစာတွေမှာပြီးတော့ ဆိုင်အပေါ်ထပ်ကိုတက်ခဲ့ပါတယ်။
ဆိုင်အောက်ထပ်မှာက မိသားစုလိုက်စားနိုင်တဲ့ အသင့်အတင့်ကျယ်တဲ့စားပွဲတွေ၊ နှစ်ယောက်တွဲဒါမှမဟုတ် တယောက်တည်းသီးသန့် စားနိုင်မယ့်နေရာမျိုးလေးတွေ ဖန်တီးပေးထားပါတယ်။ အပေါ်ထပ်မှာတော့ ရုံး အဖွဲ့တွေ၊ လူအုပ်များများနဲ့လာစားကြမယ့်သူတွေအတွက် စားပွဲကျယ်ကျယ်တွေနဲ့ ဖွဲ့စည်းထားပါတယ်။ ဆိုင်ကစားပွဲခုံနဲ့ ထိုင်ခုံတွေကို ကျွန်းသားတွေနဲ့ ပြုလုပ်ထားတာတွေ့ရပါတယ်။
ထိုင်ပြီးမကြာခင်မှာပဲဟင်းတွေရောက်လာတယ်။ မြန်မာဆန်ဆန် စဥ့်ထည်ပုံစံကြွေပန်းကန်တွေကိုအသုံးပြုထားပါတယ်။ လေးထောင့်စပ်စပ် ကြွေပန်းကန်ပေါ်မှာငါးပိရည်ဖျော်အိုးလေးနဲ့အတူတို့စရာအစုံလာချပေးတယ်။ နောက်ပြီးမှာထားတဲ့ ငါးဟင်းနဲ့အတူပဲစိမ်းချက်၊ ကြက်ဟင်းခါးသီးချက်၊ ရွှေဖယုံသီးချက်၊ မှိုချက်နဲ့ တစောင်းခါးသီးချက်လိုအရံဟင်းတွေ ရောက်လာပါတယ်။
နည်းနည်းခါးသက်သက်အရသာရှိတဲ့တဇောင်းခါးသီးကရာသီဥတုအကူးအပြောင်းမှာဖြစ်တတ်တဲ့ ရောဂါတွေအတွက် ကောင်းပါသတဲ့။
ပဲစိမ်းချက်ကတော့ ခပ်ဆိမ့်ဆိမ့် အရသာရှိပါတယ်။ ဆောင်းတွင်းမှာသာ ပေါပေါများများ စားရတတ်တဲ့ ဟင်းလျာတမျိုးပါ။ ကြက်ဟင်းခါးသီးဟင်းကလည်း လုံးဝ မခါးသလောက်ပါပဲ။ ပုဇွန်ခြောက်နဲ့နှပ်ပြီးချက်တာကြောင့် အခါးဓါတ် ပျောက်ပြီး အချိုဓါတ်ရောက်လာတာလို့ ဆိုင်ဝန်ထမ်းက ဆိုပါတယ်။ မှိုချက်ကတော့ ဆီလည်ရေလည်လေး ချက်ထားပြီး ငရုတ်သီး စိမ်းလေးနဲ့ ချက်ထားတာမို့ မွှေးနေပါတယ်။ မှိုဟင်းရည်က ကြက်သားဟင်းရည်လိုချိုပြီး ထမင်းပေါ်ဆမ်းစားလို့လည်း မိုက်ပါတယ်။ ရွှေဖယုံသီးချက်ကတော့ သိပ်မစားတတ်တာမို့ မတို့ဖြစ်တော့ဘူး။
ထမင်းစားပြီးတော့လက်ဖက်အုပ်နဲ့ ဆွမ်းအုပ်အသေးစားလေးတခု လာချပေးပါတယ်။ ဆွမ်းအုပ်အသေးလေးထဲမှာတော့ မြန်မာမုန့်တမျိုးဖြစ်တဲ့ မုန့်သြဇာလေးတွေ ထည့်ပေးထားပါတယ်။ ဒီနှစ်ခုကတော့ ဆိုင်ရဲ့ မေတ္တာလက်ဆောင် ပါတဲ့။ နောက်ထပ် မြန်မာမုန့်ရှစ်မျိုးပါတဲ့ ပန်းကန်လည်းလာချပေးတယ်။ မြန်မာမုန့်တွေကတော့ မြို့ပေါ်မှာစားချင်ရင် ဘုရားပွဲဈေးတွေမှာသာ ရနိုင်တော့တဲ့မုန့်တွေပါ။
မြန်မာထမင်းဟင်းနဲ့မုန့်မျိုးစုံအပြင် မနက်(၆)နာရီနဲ့ (၁၁)နာရီအတွင်းမှာဆိုမုန့်ဟင်းခါး၊ ဆီထမင်း၊ အကြော်စုံ၊ မြီးရှည်၊ မုန့်တီ၊ ရွှေတောင်ခေါက်ဆွဲစတာတွေလည်းရပါတယ်တဲ့။လက်ဖက်ရည်သောက်ချင်သူတွေ အတွက်လည်း အဖျော်ဆရာ သီးသန့် စီစဉ်ထားတယ်လို့သိရပါတယ်။
ဒါကြောင့် မန္တလေးရောက်လို့ မြန်မာထမင်းဟင်းကိုစားပြီးမြန်မာမုန့်မျိုးစုံနဲ့ အချိုတည်းချင်တယ်ဆိုရင် ၇၁လမ်း၊ ၂၈လမ်းနဲ့ ၂၉လမ်းကြားမှာဖွင့်ထားတဲ့ “မင်္ဂလာပါ” ဆိုင်ကိုဝင်ရောက်မြည်းစမ်းကြည့်ဖို့ ညွှန်းလိုက်ရပါတယ်။
အောင်သပြေ
0 comments :
Post a Comment