အခရိုင်းလစ် ပန်းချီဆေးနဲ့ ပန်းချီရေးကြမယ်

Monday, July 20, 2015

ကလေးတို့ရေ..

ပန်းချီရေးတဲ့အခါ အခြေခံက Line (မျဉ်ကြောင်း)၊ Tone (အသွေး)၊ Colour (အရောင်)နဲ့ Perspective (နီးဝေးအမြင်) စတာတွေကအရေးကြီးပါတယ်။ အခုဖော်ပြမှာက အခရိုင်းလစ် ပန်းချီဆေးကိုသုံးပြီး အရောင်တွေနဲ့ ပန်းချီကားလေးတွေ ဖန်တီးဖို့ ရေးသားတင်ပြမှာ ဖြစ်ပါတယ်။

တကယ်တော့ အခရိုင်းလစ် ပန်းချီဆေးက ယနေ့ခေတ်မှာအသုံးများလာတဲ့ မီဒီယံဖြစ်ပြီး အသုံးတွင်ကျယ်လာတာလည်း တွေ့ရပါတယ်။ သူ့ရဲ့ အားသားချက်တွေက ရေနဲ့ရောစပ်ပြီး ပန်းချီရေးလို့ရသလို ရေဆေးအဖြစ်လည်း သုံးစွဲလို့ရတာကြောင့်ပါ။ သတိပြုရမှာကခြောက်သွေ့မြန်တယ် ဆိုတာပါပဲ။ ခြောက်သွေ့မြန်တာကြောင့် မိမိရေးဆွဲချင်တဲ့ ပန်းချီကိုအချိန် အများကြီးမယူဘဲ ပြီးမြောက်အောင် ရေးဆွဲဖို့ပါ။ကလေးစိတ်ပညာရှင် ပန်းချီဆရာ Jeanette Nyberg ရဲ့ နည်းစနစ်တချို့ကိုကလေးတို့အတွက် ဖော်ပြလိုက်ပါတယ်။

ပထမဆုံးပြောပြမှာကရေဆေးအဖြစ်အသုံးပြရေးဆွဲတဲ့ အခါ (Wet-on-wet) အရောင် အစိုပေါ် အစိုထပ်ပြီးအရောင်တွေရောနှော ပြေပြစ်သွားအောင် ဖန်တီးယူတာပဲ ဖြစ်တယ်။ အောက်ပါ ပန်းချီပုံကို ကြည့်ပါ။ အစိုပေါ် အစိုထပ်ဆင့်ပြီးရေးဆွဲထားတာပါ။ အဲသလိုပဲကလေးတို့ အနေနဲ့ တခြားအရောင်တွေ သုံးပြီး        ကိုယ်နှစ်သက်သလိုအရောင်တွေခြယ်နိုင်ပါတယ်။

surface: watercolor paper

နောက် ဒုတိယနည်းက Wet-on-dry လို့ခေါ်တဲ့ ခြောက်ပြီးသား ဆေးအပေါ် အစိုဆေးတမျိုး ထပ်တင်ရေးဆွဲတာလည်း ရှိပါသေးတယ်။ ဒီနှစ်မျိုးကို  စိတ်ကြိုက်ရေးဆွဲနိုင်ဖို့ ပြောပြလိုက်ပါတယ်။

တတိယနည်းက ပုံဆွဲစာရွက်ကို ခေါက်ပြီးဆေးအစိုနဲ့ ရေးထားတဲ့ ပုံသဏ္ဌာန်ကိုကပ်ယူနည်းပါပဲ။ အောက်မှာဖော်ပြထားတဲ့ ပုံကို ကြည့်ပါ။ ပုံဆွဲစာရွက်ကိုခေါက်ပြီးဖန်တီးယူထားတာပါ။


စတုတ္ထနည်းတခုဆက်ပြောပါဦးမယ်။ အဲသလိုဆေးအစိုနဲ့ စာရွက်ကိုခေါက်ပြီး ဖန်တီးထားတဲ့ ပုံခြောက်သွားပြီဆိုရင်တော့ ရေဆေးကျဲကျဲနဲ့ အောက်ပါ အတိုင်းထပ်မံပေါင်းဆင့် ဖန်တီးယူနိုင်ပါတယ်။


ပဉ္စမနည်းကိုလည်းပေါင်းဆင့် အသုံးပြုပါဦး။ အဲဒါကတော့ ခြောက်သွားတဲ့ ပုံပေါ်မှာပက်စတယ်နဲ့ လိုင်းလေးတွေ ရေးခြယ် ဖန်တီးယူတာပါ။ အောက်ပါပုံကို ကြည့်ပါ။


ဆဋ္ဌမနည်းကလည်း အသုံးပြုရတာလွယ်မှာပါ။ ရေဆေးကျဲကျဲနဲ့ ရေးထားတဲ့ နောက်ခံအပြာရောင်ပေါ်မှာ ပက်စတယ် အနီနဲ့ အောက်မှာဖော်ပြထားသလိုလည်းဖန်တီးရေးဆွဲနိုင်ပါတယ်။

သတ္တမနည်းကလည်း စိတ်ဝင်စားစရာကောင်းပါတယ်။ အဲဒါကတော့ အ၀ိုင်းလေးတွေ၊ ဒါမှမှဟုတ် လေးထောင့်ပုံလေးတွေ ဖောက်ထားတဲ့ ကတ္ထူ စက္ကူနဲ့ ရေးဆွဲပါ။ ကတ္ထူစက္ကူပေါ်မှာကလေးတို့ ကြိုက်နှစ်သက်တဲ့ ပုံလေးတွေ ဖောက်ယူပြီး ပန်းချီကားပေါ်တင်ပြီးဆေးနဲ့ သပ်တင်ရေးဆွဲတဲ့ အခါ အဲပုံလေးတွေ ပန်းချီကားပေါ် ထင်ကျန်နေမှာ ဖြစ်ပါတယ်။ အောက်မှာ ပြထားတာကတော့ အ၀ိုင်းလေးတွေပဲ ပြထားတာပါ။ ဉာဏ်ကောင်းတဲ့ ကလေးတို့ကတော့ ကတ္ထူပေါ်မှာကလေးတို့ စိတ်ကြိုက်ပုံလေးတွေ ဖောက်ပြီးရေးဆွဲဖို့ပါကွယ်။


အဲဒီနည်းတွေကိုကလေးတို့ စိတ်ကူးရှိသလိုသုံးပြီးပန်းချီကားတွေ အများကြီး ဖန်တီးပျော်ရွှင်နိုင်ပါတယ်။ အောက်မှာနမူနာပန်းချီကားလေးတွေ ဖော်ပြပေးလိုက်ပါတယ်။



နိုင်စွမ်း




0 comments :

Post a Comment

 
Copyright © 2014 Irrawaddy Publishing Group. All Rights Reserved