ထောင်ထဲက နိုင်ငံရေးသမား

~




~

မနေ့က ရက်စွဲနဲ့ ထုတ်ဝေတဲ့ Hot News ဂျာနယ်က သုံးသပ်ချက်

နိုင်ငံရေးအကျဉ်းသား ဆိုတဲ့ ဝေါဟာရကို အစိုးရမင်းတို့က ခံတွင်းမတွေ့ပါဘူး။
နိုး၊ ဟင့်အင်း ... ဒို့ဆီမှာ နိုင်ငံရေးအကျဉ်းသား ရှိပါဘူး၊ အမှုဖြစ်လို့ ဖမ်းထားတာပဲ ရှိတယ် တဲ့။
ဒီအဆိုကို ထောက်ခံသူလည်း ရှိပါတယ်။ (ဦးတင်ဝင်း) ဆိုသူက Hot News ဂျာနယ်မှာ ထောက်ခံ ရေးသားထားပါတယ်။
ယုံကြည်ချက်ကြောင့်အကျဉ်းကျသူ ဆိုတဲ့ ဝေါဟာရကို သူ မနှစ်သက်ပါဘူး တဲ့။

ဒီဝေါဟာရတွေဟာ မြန်မာ့နိုင်ငံရေးအကြောင်းသတင်းတွေမှာ မကြာခဏ သုံးနေကြပါတယ်။
ပရိသတ်တချို့က ဒီစကားလုံးတွေ မကြိုက်ဘူး ဆိုရင် ဘယ်လို သုံးရပါ့မလဲ။

ထောင်ထဲမှာတော့ ထောင်အရာရှိတွေက အထူးအကျဉ်းသား လို့ သုံးပါတယ်။ ဒီစကားလုံး သုံးရင် ဆင်ဆာလူကြီးမင်းတို့ နှာခေါင်းရှုံ့ကောင်း ရှုံ့ကြလိမ့်မယ်။

ဇာဂနာကတော့ သူတို့ ထောင်ထဲနေခဲ့ရတဲ့ဘ၀ဟာ ဆိုမာလီ ပင်လယ်ဓားပြတွေလက်ထဲ ရောက်နေရသူတွေလိုပါပဲ တဲ့။ ဒီတော့ ဓားစာခံ ပေါ့။ အင်း ... ဒီဝေါဟာရက စာပေစိစစ်ရေးရှေ့ရောက်ရင် ဓားနဲ့ခုတ်ခံရမှာ သေချာတယ်။

ထောင်ထဲက နိုင်ငံရေးသမားတွေအတွက် ဝေါဟာရက ပေါပါတယ်။ ဒီတော့ နေရာဒေသလိုက်ပြီး အဆင်ပြေသလိုရေး၊ လွတ်လွတ်ကင်းကင်းဖြစ်အောင်ရေး၊ နားဝင်ချို အမြင်လှအောင် ရေးရုံပေါ့။

ကဲ ... နိုင်ငံရေး အကျဉ်းသား အရေအတွက် ဘယ်လောက် ရှိသလဲ။ ဂဏန်းကတော့ အမျိုးမျိုးပါပဲ။
NLD က တမျိုး၊ AAPP က တမျိုး၊ အကျဉ်းသားမိသားစုကွန်ရက်က တမျိုး။

အစိုးရဆီကထွက်လာမယ့် ဂဏန်းက ပိုတိကျမှာပေါ့။ သူတို့ဖမ်းထားတာမို့ သူတို့ပဲ သိမှာပါ။

ဒါပေမယ့် အစိုးရက ရူးချင်ယောင်ဆောင်နေတော့ ဘာဂဏန်းမှ ထွက်မလာဘူး။

လောလောဆယ် AAPP က စာရင်း ထွက်လာပါတယ်။ နိုင်ငံရေး၊ လူ့အခွင့်အရေး၊ စစ်ရေး စသဖြင့်တို့နဲ့ နွယ်ပြီး အာဏာပိုင်တွေ ထိန်းသိမ်းထားသူတွေရဲ့ အရေအတွက် အနည်းဆုံး ၁၅၇၂ ဦး ရှိတယ် တဲ့။ အဲဒီထဲက ၉၁၈ ဦး ဘယ်ထောင်မှာ ရှိနေတယ်ဆိုတာကို စုံစမ်းသိရှိထားတယ် တဲ့။ မနေ့က ထုတ်ပြန်လိုက်တာပါ။

ဒီလူတွေ ဘယ်တော့ လွတ်လာမလဲ ဆိုတာ AAPP ရဲ့ ထုတ်ပြန်ချက်ထဲမှာ ခန့်မှန်းမထားပါဘူး။

မခန့်မှန်းနိုင်တာလည်း မထူးဆန်းပါ။

ဒီလူတွေကို ဘယ်တော့လွှတ်ပေးရမလဲ ဆိုတာကို အစိုးရမင်းတို့ စဉ်းစားနေဆဲပဲ မဟုတ်လား။

~