မြောင်းမြမြို့နယ်တွင် မဲပြဿနာမျိုးစုံဖြစ်ပွား

မန္တလေး မဟာအောင်မြေမှာ သန်းခေါင်စာရင်းရှိပြီး မဲစာရင်းထဲ မပါလို့ စိတ်ပျက်နေကြသူများ (ဓာတ်ပုံ - မန်းသားလေး/ဧရာဝတီ)

ကျော်ခ၊ ဧပြီ၊ ၁၊ ၂၀၁၂

ဧရာဝတီတိုင်း၊ မြောင်းမြမြို့နယ်တွင် မဲဝယ်ခြင်း၊ ကြိုတင်မဲ၊ မဲပေးခွင့်ဆုံးရှုံးမှုပြဿနာများဖြစ်ပွားနေကြောင်း ဒေသခံ မဲဆန္ဒရှင်များနှင့် မြောင်းမြမြို့နယ် မဲအောင်နိုင်ရေးအဖွဲ့တို့ထံမှ ဧရာဝတီက စုံစမ်းသိရှိရသည်။

ပုသိမ်နည်းပညာ တက္ကသိုလ် (GTC) ကျောင်းတွင် တက်ရောက်နေသည့် ဒုတိယနှစ်ကျောင်းသား မောင်ထက်ကျော်ခိုင် သည် နေရပ်ရင်း မြောင်းမြမြို့ သဗ္ဗာန်ချိုင်းရပ်ကွက်၌ ၎င်း၏ မိဘများနှင့်အတူ မဲသွားပေးရာ၊ မဲစားရင်းတွင် ကြိုတင်မဲ ပေးပြီး ဖြစ်နေသဖြင့် ကိုယ်တိုင်မဲပေးခွင့် မရရှိခဲ့ကြောင်း ဖခင်ဖြစ်သူက ဧရာဝတီသို့ ပြောသည်။

“ကျနော်တို့ ဒီကမိသားစုနဲ့ မဲသွားထည့်ရော။ မဲသွားထည့်တဲ့အခါ ဟိုရောက်တော့ ကျနော်တို့ မိဘနှစ်ပါးကထည့်ပြီးရော သားအလှည့် ကြတော့ သူမဲပေးရမယ့် စီနီယာ နံပတ်က ၃၅၂၉ ခင်ဗျ။ ဒီမဲက ကြိုတင်မဲဒီမှာရောက်ပြီးနေပြီတဲ့။ ထည့်ပြီး ပြီပြောတော့ မထည့်ခဲ့ရတော့ဘူးပေါ့ဗျာ” ဟု မောင်ထက်ကျော်ခိုင် ၏ ဖခင် ဦးမြင့်စိုး က ပြောသည်။

ယခုလ ၁၈ ရက်နေ့က ပုသိမ်နည်းပညာတက္ကသိုလ်တွင် အတန်းပိုင် ဆရာများ၏ ညွှန်ကြားချက်ဖြင့် GTC ကျောင်းသားများမှာ စာရွက်ပေါ်တွင် ကိုယ်ရေးအချက်အလက်များ ဖြည့်စွက်ခဲ့ရကြောင်း၊ ဖြည့်စွက်ရသည့်အကြောင်းရင်းအား ဆရာ၊ ဆရာမများထံ ကျောင်းသားများက မေးမြန်းမှုကိုလည်း အကြောင်းပြန်ခြင်းမရှိဟု သိရသည်။

နှစ်သက်သော ပါတီအား မဲပေးရွေးချယ်မှုနှင့်ပါတ်သက်၍ မောင်ထက်ကျော်ခိုင် ၏ ဖခင် ဦးမြင့်စိုး က “ကျနော်တို့ကတော့ လူထုနဲ့ အနီးစပ်ဆုံးပါတီ၊ ကျုပ်တို့ရင်ထဲ နှလုံးသားထဲက ပါတီ ဖြစ်တဲ့ NLD ကိုပဲ တအိမ်လုံး မဲပေးကြတယ်။ ကျနော့်သားလည်း ပေးမလို့ပဲ။ ခုလိုဖြစ်သွားတော့ ကြံ့ခိုင်ရေးမဲဖြစ်သွားတော့မှာပေါ့” ဟု သူက ဆက်ပြောသည်။

မောင်ထက်ကျော်ခိုင် ကဲ့သို့ပင် GTC ဒုတိယနှစ် ကျောင်းသူ မဝင့်ဝါခိုင်မှာလည်း ၎င်းတို့၏ ကျောင်းမှ ကြိုတင်မဲထားပြီးဖြစ်သဖြင့် ကိုယ်တိုင်ပေးလိုက်ရခြင်းမရှိဟုဆိုသည်။

မြောင်းမြမြို့ပေါ်ရှိ ဂုံနီစက်ရုံ ရပ်ကွက်တွင် ကြံ့ခိုင်ရေး ပါတီ စည်းရုံးရေးမှူး ကိုထွန်းအောင် က မဲတစ်မဲလျင် ကျပ်ငွေ ၂၀၀၀ ကျပ် နှုန်းဖြင့် လိုက်လံဝယ်ယူနေကြောင်း၊ ယင်းလုပ်ရပ်အား မြောင်းမြ NLD က အထောက်ထားများနှင့်တကွ ရရှိထားပြီး ခရိုင် ကော်မရှင် ရုံးသို့ ယနေ့တိုင်ကြားသွားမည်ဖြစ်ကြောင်း မြို့နယ်မဲအောင်နိုင်ရေးအဖွဲ့ တာဝန်ရှိသူ ဦးဝင်းဆွေက ပြောသည်။

“သူကလိုက်ပြောတယ်လေ။ ကြံ့ခိုင်ရေးကိုထည့်ရင် မဲတပြား ၂၀၀၀ ပေးမယ်ဆိုပြီးလိုက်လုပ်နေတာ။ အခုလက်ပူးလက်ကြပ် မိတာ” ဟု ဦးဝင်းဆွေက ဧရာဝတီသို့ပြောသည်။

မြောင်းမြမြို့နယ် ကျွန်းကလေးကျေးရွာတွင် မြို့နယ်ကော်မရှင် ဦးသိန်းတန်နှင့် အဖွဲ့ဝင် ၂ ဦးက မဲရုံအမှတ် ၁ နှင့် ၂ တို့မှ မဲစာရင်းများကိုယူကာ ကျေးရွာအုပ်ချုပ်ရေးမှူးအိမ်သို့ ထမင်းစားထွက်သွားကြသည်ဟု ဆိုသည်။ ထို့အတူ မရမ်းကုန်း ရပ်ကွက် ရွာသာယာရွာက မဲစာရင်းထဲတွင် ပါဝင်သည့် လူ ၃၂ ဦးမှာ ယင်းရွာတွင်မရှိကြောင်း ရွာခံများက NLD ကိုတိုင်တန်းသည်ဟု ဆိုသည်။

“မဲစာရင်းထဲမှာပါတဲ့နာမည်တွေဟာ ဒီကမိသားစုတွေထဲမှာ လျှောက် ထည့်ထားတယ်။ အဲဒီအိမ်ရှင်တွေကိုတိုင် အဲဒီလူတွေကို မသိဘူး” ဟု ဦးဝင်းဆွေ က ပြောသည်။ မရမ်းကုန်းကျေးရွာ အမှတ် ၄ မဲရုံတွင်၊ လုံခြုံရေးတာဝန်ကျ မီးသတ်ရဲဘော် ဦးထုံးဗူး ကလည်း မဲဆန္ဒရှင်များ၏ မဲပြားများကို တောင်းယူကာ ကြံ့ခိုင်ရေးပါတီအတွက် အမှတ်ခြစ်ပေးခဲ့သည်ဟု သိရသည်။

မြောင်းမြမြို့ပေါ် ဂုံနီစက်ရုံရပ်ကွက် မဲရုံတွင် မဲစာရင်းများထုတ်ပြန်စဉ်က မဲပေးခွင့်စာရင်းတွင် ပါရှိခဲ့သူ ၇၀ ကျော်မှာ ယနေ့ သွားရောက်မဲပေးရာတွင် စာရင်းအတွင်း၌ ပါဝင်မှုမရှိဟုဆိုကာ မဲပေးခွင့်မရခဲ့ကြောင်း မဲဆန္ဒရှင်များက ဧရာဝတီသို့ ပြောသည်။

“ကျနော်ဒီနေ့သွားကြည့်တော့ မဲပေးမယ့်စာရင်းထဲမှာ ကျနော်တို့ မိသားစုမပါဘူး။ အံ့သြဖို့ကောင်းတယ်။ အခြားမိသားစုတွေလဲ၊ အဲလိုဖြစ်တဲ့လူတွေ မနည်းဘူး။ ဥက္ကဋ္ဌ သွားပြောတော့ သူကိုယ်တိုင်ထည့်ပေးလိုက်တာပဲတဲ့။ အခုဒီထဲမှာ မပါဘူးဆိုရင်တော့ မဲထည့်လို့မရဘူးတဲ့” ဟု မဲမပေးလိုက်ရသူ ကိုစိုးမြင့်ကြည် ကပြောသည်။

အဆိုပါမဲဆန္ဒရှင်များသည် NLD ပါတီအား မဲထည့်ရန်ဆုံးဖြတ်ထားကြသူများဖြစ်ကြောင်း ကာယကံရှင်များက ဧရာဝတီသို့ ပြောသည်။

မြောင်းမြမြို့နယ်အတွင်းရှိ ကိုးလောင်းမဲကျောအုပ်စု မဲရုံအမှတ် ၁ တွင် မဲရုံမှူး ကျောင်းအုပ်ဆရာမကြီး ဒေါ်သန်းမေစီ က လာရောက်မဲပေး သူမဲဆန္ဒရှင်များ၏ မဲပြားများကို ယူကာ ကြံ့ခိုင်ရေးပါတီ မဲပြားပေါ်တွင် အမှတ်ခြစ်ပေးမှုများ ပြုလုပ်ခဲ့ကြောင်း မဲဆန္ဒရှင်များ၏ တိုင်တန်းချက်များကို ကိုးကား၍ ဦးဝင်းဆွေက ပြောသည်။

ကြားဖြတ်ရွေးကောက်ပွဲ၌ မြောင်းမြ မဲဆန္ဒနယ်တွင် ကြံ့ခိုင်ရေးပါတီမှ ဦးဖြိုးကိုကိုတင့်ဆန်း၊ NLD ပါတီမှ မန်းဂျော်နီနှင့် အမျိုးသား ဒီမိုကရေစီအင်အားစု ပါတီမှ ဦးအောင်မျိုးလှိုင်တို့ ဝင်ရောက် ရွေးချယ်ခံကြမည်ဖြစ်သည်။ ကြံ့ခိုင်ရေး ပါတီ၏ ကိုယ်စားလှယ်လောင်း ဦးဖြိုးကိုကိုတင့်ဆန်း သည် ဟိုတယ်နှင့် ခရီးသွားလာရေး ဝန်ကြီးဌာနနှင့် အားကစားဝန်ကြီး ဌာန ပြည်ထောင်စုဝန်ကြီး ဦးတင့်ဆန်း၏ သားဖြစ်သည်။

ဖေဖော်ဝါရီ ၇ ရက်နေ့က NLD ဥက္ကဌ ဒေါ်အောင်ဆန်းစုကြည် ၏ မြောင်းမြမြို့ စည်းရုံးရေး ခရီးစဉ်၌ စည်းရုံးဟောပြောမည့် ဘော လုံးကွင်းများကို ငှားရမ်းအသုံးပြုရန် တောင်းဆိုရာတွင် ဦးတင့်ဆန်းက တားမြစ်၊ ပိတ်ပင်ခဲ့သေးသည်။ သားဖြစ်သူ ဦးဖြိုးကိုကိုတင့်ဆန်းသည် ရွေးကောက်ပွဲမဲဆွယ်ကာလ၌ မဲဆွယ်ပွဲများတွင် ကျပ်ငွေ ၅၀၀၀ တန်နှင့် ၁၀၀၀ တန်များကို ကျဲဖြန့်၌ စည်းရုံးမှုများပြုလုပ်ခဲ့သည်။

ပြည်ထောင်စုရွေးကောက်ပွဲကော်မရှင်က ကြားဖြတ်ရွေးကောက်ပွဲ လွတ်လပ်ပြီး တရားမျှတရမည်ဟု ပြောဆိုထားသော်လည်း ရွေးကောက်ပွဲပြုလုပ်သည့် နေရာအများစုတွင် ခြိမ်းခြောက်မှုများ၊ မဲမသမာမှုများ ဖြစ်ပွားနေကြောင်း ရွေးကောက်ပွဲ သတင်း များကို စောင့်ကြည့် ထုတ်ပြန်နေသော ပြည်တွင်း ရွေးကောက်ပွဲ စောင့်ကြည့်ရေးကွန်ရက်အဖွဲ့က ပြောဆိုသည်။