မာလာဟင်း

~

Evy's Kitchen က တကယ့်ကို အရသာရှိတဲ့ဘလော့ပါ။ ဘလော့ရေးသူက ရန်ကုန်မှာထုတ်ဝေတဲ့ FOOD  မဂ္ဂဇင်းမှာလည်း ပါဝင်ရေးသားနေသူ ဖြစ်ပါတယ်။
ဘလော့မီးဖိုဆောင်တွေ အများကြီးရှိတဲ့ထဲ သူ့ရဲ့ ထူးခြားချက်တခုက ကျောင်းပြီးမှ အချက်အပြုတ် စတင် စမ်းသပ်ရာကနေ မီးဖိုဆောင်ကို စိတ်ဝင်စားလာတဲ့အချက်ပါ။
အခုတော့ မီးဖိုထဲမှာလည်းချက်၊ အွန်လိုင်းပရိသတ်လည်း ကြည့်လို့ရအောင် သူ့မီးဖိုဆောင်ကို ပြတင်းပေါက်ဖွင့်ထားပါပြီ။ လိပ်စာက evy-foodlover.blogspot.com

 သူ့ဘလော့မှာ ရှိတဲ့ ချက်နည်းပြုတ်နည်းတွေထဲမှာ စိတ်ဝင်စားစရာကောင်းတဲ့ဟင်းများထဲက တခုကတော့ မာလာဟင်း ပါပဲ။
မြန်မာပြည်ကမြို့ကြီးတချို့မှာ ပြီးခဲ့တဲ့နှစ်အနည်းငယ်ကစပြီး ခေတ်စားလာတဲ့ မာလာဟင်းမှာ ဘာတွေ ပါဝင်တယ်၊ ဘယ်လိုချက်တယ် ဆိုတာတွေ ရေးထားပါတယ်။ 
သူကတော့ မန္တလေးစတိုင် မာလာဟင်းကိုပဲ ကြိုက်တယ်လို့ ဆိုပါတယ်။

Evy ~

မာလာဟင်းကိုတော့ တော်တော်များများ သိပြီး မြည်းဖူးပြီးသား ဖြစ်ကြမှာပါ။ ကျွန်မကတော့ မာလာဟင်းကို အခုမှကြိုက်တတ်သွားတာ။ ဘာလို့လဲဆိုတော့ သူနဲ့ ပတ်သက်ပြီး ဆိုးဝါးတဲ့ အတွေ့အကြုံရခဲ့လို့ပါ။ ဖြစ်ချင်တော့ ၂၀၀၉ မှာ ကျွန်မနဲ့ အမျိုးသား ဗမာပြည်ပြန်ကြပါတယ်။ အဲဒီအချိန်တုန်းကတော့ ရန်ကုန်မှာ မာလာဟင်း ခေတ်စားကာစလားမသိဘူး။ သူ့အစ်ကို တစ်ဝမ်းကွဲက မာလာဟင်းလိုက်ကျွေးပါတယ်။ ဒါပေမယ့် အဲဒီမာလာဟင်းကလေ အရသာကလည်း လုံးဝမကောင်းတဲ့အပြင် နောက်ဆက်တွဲအနေနဲ့ ကျွန်မ မှာ နေမကောင်းတွေဖြစ်ပြီး သွားဖို့စီစဉ်ထားတဲ့ နေရာတွေ တစ်ခုမှကို မရောက်လိုက်ဘဲ စလုံးကိုပြန်လာခဲ့ရပါတယ်။ အဲဒီမှာတင် ဒီဟင်းကို အတော်စိတ်နာသွားခဲ့တာ။

အဲဒီကတည်း မာလာဟင်း ဆိုရင် ယောင်လို့တောင် လှည့်မကြည့်တော့ဘူး။ ပြီးခဲ့တဲ့ အောက်တိုဘာမှာ ညီမမွေးနေ့ကို အကင်ဆိုင်မှာ လိုက်ကျွေးပါတယ်။ အဲဒီဆိုင်က မာလာဟင်းကောင်းတယ် ဆိုပြီး သူတို့က မာလာဟင်းမှာကြပါတယ်။ ကျွန်မကတော့ မာလာဟင်းဆိုတာနဲ့ ရှုံမဲ့ပြီး ငါမစားဘူးနော်လို့ အကြောက်အကန်ငြင်းတာ။ သူတို့မှာတော့လည်း တို့ကနန်းဆိတ်ကနန်း လိုက်စားပြီး မဆိုးပါလားဆိုတာသိသွားတယ်။ အဲဒီဆိုင်က မာလာဟင်းက တကယ့်ကိုကောင်းပါတယ်။ မန္တလေး လက်ရာဆိုလားပဲ။ ရန်ကုန်ဆိုင်က မာလာဟင်းနဲ့တော့ အများကြီးကွာပါတယ်။ ကျွန်မလို တူးတူးခါးခါး ဖြစ်နေတဲ့လူတောင် ကြိုက်သွားတာကြည့်။

ကြိုက်မိတော့လည်း ထုံးစံအတိုင်း လိုက်လုပ်ကြည့်ရမှ စိတ်ကျေနပ်တာမို့ မာလာဟင်း ချက်နည်းတွေကို သိသမျှဘလော့တွေထဲမှာ မွှေတော့တာပါဘဲ။ နောက်ဆုံး မမလု ရဲ့ နည်းနဲ့ ချက်မယ်လို့ ဆုံးဖြတ်ပြီး ချက်လိုက်ပါတယ်။ မမလု လောက်တော့ အမယ်မစုံဘူး။ ကြိုက်တာတွေကို ကြိုက်သလိုစုပြုံထည့်လိုက်တာပါဘဲ။ မာလာဟင်းကို အဓိကကောင်းစေတာက မြေပဲထောင်းလို့ထင်တယ်။ မြေပဲထောင်း ထည့်တာကို သိပ်မနှစ်သက်ကြတဲ့လူလည်း ရှိမှာပါ။ ကျွန်မကတော့ အဲဒါလေးပါမှ ဆိမ့်ဆိမ့်လေးနဲ့ စာကောင်းလို့ ပိုသဘောကျပါတယ်။

လုပ်နည်း (အိမ်မှာ ချက်သောနည်း - ၂ ယောက်စာအတွက်)

• ပဲပြား - သေးသေးလှီးထား
• မုန်ညှင်းရွက်အသေး - ရေဆေးထား
• မုန်လာဥနီ တစ်ဝက် - ပါးပါးလှီး
• ပြောင်းဖူးသေးသေး ၄ခု- အရှည်လိုက်လှီးထား
• ကြွက်နားရွက်မှို - ရေစိမ်ထား
• ကျောက်ပွင့် အဖြူ - ရေစိမ်ထား
• ရွှေပဲသီး ၁၀ခု
• မုန်ညှင်းထုပ်အဖြူ- ၁လက်မလောက်လေးတွေလှီးထား

အနှစ်အတွက်

- မောရှမ်းမြေ မာလာဟင်း အနှစ် တစ်ဝက်

- ကြက်သားမှုန့် ၁ဇွန်း

- ငံပျာရည် - သင့်သလို

- ကြက်သွန်နီ အ၇ွယ်တော် တစ်လုံး - နုတ်နုတ်စဉ်းထား

- ကြက်သွန်ဖြူ ၃၊ ၄ မွှာ-  - နုတ်နုတ်စဉ်းထား

- မြေပဲထောင်း လက်တစ်ဆုပ်စာ

1. ပထမဆုံး ရွှေပဲသီး၊ မုန်ညှင်း စတဲ့ အသီးအရွက်တွေကို ရေနွေးဆူဆူမှာ ၁ မိနစ်ခန့်ပြုတ်ပြီး ရေခဲရေထဲမှာ စိမ်ထားလိုက်ပါ။ အဲဒါမှာ အသီးအရွက်တွေ အရောင်မ၀ါသွားပဲ ကြွပ်ကြွပ်ကလေးဖြစ်မှာ။ နောက် မှိုတွေကိုလည်း ၁မိနစ်ခန့်ပြုတ်ပေးပီး ဆယ်ထားလိုက်ပါ
2. ဟင်းအနှစ်အတွက် ဆီ ထမင်းစားဇွန်း ၅ ဇွန်း ၊ နှမ်းဆီမွှေး ထမင်းစားဇွန်း ၁ ဇွန်းကို အပူပေး၊ ကြက်သွန်ဖြူ၊နီ ထည့်ပြီး ဆီသတ်ပါ။ ကြက်သွန် နွမ်းရင် မာလာဟင်း အနှစ်ကိုထည့် ၊ ပြောင်းဖူး မုန်လာဥနီနဲ့ မှို၊ ကျောက်ပွင့်ကို ထည့်မွှေပေးပါ။ အဖုံးအုပ်ပြီး ၁ မိနစ်ခန့်ထားပါ။ ဟင်းခတ်မှုန့်များကိုလည် ထည့်မွှေပါ
3. ပြီးရင် မြေပဲမှုန့်ထည့်မွှေပေး ပြီး ဟင်းရွက်အားလုံးကို နောက်ဆုံးမှထည့်ပြီး မီးပြင်းပြင်းနဲ့ ၁မိနစ်လောက်ကြော်ပါ။  ပြီးမှ ပြောင်းဖူးမှုန့်ကို ရေဖျော်ပြီး လောင်းထည့်ပေးလိုက်ပါ။ အပျစ်အကျဲကတော့ စိတ်ကြိုက်ချိန်ပါ။ မိနစ်ဝက်လောက်နေရင် မီးပေါ်မှ ချလို့ရပါပြီ။

အရမ်းကောင်းလွန်းလို့ ထမင်းလွတ် ၂ပွဲစားလိုက်တယ် :D

 

ဧရာဝတီ Facebook / Twittert

~