မိုနာလီဇာ နှစ်ကိုယ်ခွဲ

~ 

(ပုံသစ်မှာတော့ မိုနာလီဇာက အသက် ပိုငယ်နေပါတယ်။ ယှဉ်ကြည့်ရင် ဆယ်နှစ်လောက် ငယ်တယ်လို့ အင်္ဂလိပ်သတင်းတွေမှာ ခန့်မှန်း ရေးထားကြပါတယ်)

မနေ့တုန်းက ဆွစ်ဇာလန်အခြေစိုက် ဖောင်ဒေးရှင်းတခုက မိုနာလီဇာပန်းချီကားမူရင်း ဆိုတာကို အများသိအောင် ချပြလိုက်ပါတယ်။
အမေရိကန်သုတေသီတဦး၊ မှုခင်းဆေးပညာကျွမ်းကျင်သူတဦး၊ အီတလီလူမျိုး ထိပ်တန်း  ပညာရှင်တဦးကလည်း အဲဒါ ပန်းချီဆရာကြီး လီယိုနာဒိုရဲ့ လက်ရာ အစစ်ဖြစ်ကြောင်း ထောက်ခံတယ်လို့ ဆိုတယ်။
ဒါဆို ပန်းချီဆရာက မိုနာလီဇာကို ၂ ကား ဖန်တီးခဲ့တာပေါ့။

မိုနာလီဇာ ဘယ်သူလဲ
မှတ်တမ်းမှတ်ရာတွေအရ ဆိုရင် ၁၅ဝ၃ ကတည်းက မိုနာလီဇာကို ဆွဲခဲ့တယ် ဆိုတော့ ပန်းချီကားရဲ့ သက်တမ်းက နှစ် ငါးရာ ကျော်လာပါပြီ၊ ပန်းချီကားထဲကမိုနာလီဇာက အဲဒီခေတ် အီတလီကုန်သည်တယောက်ရဲ့ ဇနီး ဖြစ်တယ် တဲ့။

 မိုနာလီဇာအပြုံး
မိုနာလီဇာက ကမ္ဘာ့ အထင်ရှားဆုံးပန်းချီကား ဖြစ်နေရခြင်းဟာ အလင်း၊ အမှောင်၊ အရောင် သုံးစွဲထားပုံတွေကြောင့် မဟုတ်ဘဲ သူ့အပြုံးကြောင့်ဖြစ်ပါတယ်။

နုတ်ဆက်တဲ့အခါ၊ ဖားတဲ့အခါ၊  ချစ်ခင်ရာမှာ ပြုံးပြကြတာ တွေ့ရမှာပါ။ အပြုံးတွေက အဓိပ္ပာယ် ရှိပါတယ်။

သို့သော်လည်း တယောက်ယောက်က ဘာအဓိပ္ပာယ်နဲ့မှန်းမသိ ပြုံးပြရင် မိုနာလီဇာအပြုံးလို့ ဆိုနိုင်ပါတယ်။

မိုနာလီဇာအပြုံးက ဘာအဓိပ္ပာယ်လဲ ဆိုတာကို ထင်ကြေးအမျိုးမျိုး ပေးနေကြတာ ကြားဖူးမှာပါ။

မိုနာလီဇာက ပုံတူပန်းချီအဆွဲခံစဉ်မှာ ဒီလိုပဲ ပြုံးပြတာ ဖြစ်နိုင်ပါတယ်။ မိုနာလီဇာရဲ့ အတွင်းစိတ်ကို ပန်းချီကားထဲ ထည့်ဆွဲထားတာလည်း ဖြစ်နိုင်ပါတယ်။

မြန်မာပြည်ကအိမ်တချို့မှာ  မိုနာလီဇာ ပန်းချီကားကို ပုံနှိပ်ထားတဲ့ ပိုစတာတွေ ကပ်ထားတာ တွေ့ဖူးပါတယ်။ ဒီပန်းချီကားအကြောင်း မြန်မာစာရေးဆရာတချို့ရေးထားတဲ့ထဲက ကောက်နုတ်ရရင် -

စာရေးဆရာမဂျူနီယာဝင်းကတော့ ဒီပန်းချီကားအကြောင်းကို အတွေးအမြင် စာစောင်မှာ အခုလို ရေးထားပါတယ် -

ပန်းချီကားတွင်ထူးခြားချက်နှစ်ခုပါရှိသည်။ တစ်ခုမှာ အလွန်လှပသည်ဟု သင်္ချာပညာရှင်များသာမက အနုပညာရှင်များပင် ၀န်ခံထားသည့် golden ratios (ရွှေအချိူးများ)ကို ပန်းချီကားတွင်သုံး၍ ရေးဆွဲထားခြင်းဖြစ်သည်။ (ရွှေအချိူးဟူသည်1,1,2,3,5,8,13,21,34,55,……တို့မှ ရရှိသော အချိူးများဖြစ်သည့် 2:3,3:5,5:8,8:13, 13:21,21:34,….တို့ကို ခေါ်သည်။)
နောက်တစ်ချက်မှာ အမျိူးသမီး၏ လက်အနေအထားသည် ခန္ဓာဗေဒ (Anotomy) ပညာကို အမှန်တကယ် တတ်ကျွမ်းသူမှသာ ရေးဆွဲနိုင်သောပညာဖြစ်ရမည်ဟု ဇီဝဗေဒပညာရှင်များက ဆိုထားခြင်းဖြစ်သည်။

ပန်းချီကားထက် စိတ်ဝင်စားစရာ ပိုကောင်းတာက ပန်းချီဆရာ ဖြစ်ပါလိမ့်မယ်။
ပန်းချီဆရာ လီယိုနာဒိုဒါဗင်ချီ အကြောင်းကိုလည်း ဂျူနီယာဝင်းက ဟောဒီလို ရေးထားပါတယ် -

ဝိဇ္ဇာသိပ္ပံ ပညာမျိူးစုံကို စွယ်စုံတတ်ကျွမ်းသောပုဂ္ဂိုလ်တစ်ဦးဖြစ်သည်။ --- သူက ပန်းချီ ဆရာ၊ ပန်းပုဆရာ၊ ဗိသုကာပညာရှင်၊ အင်ဂျင်နီယာတို့ဖြစ်ရုံမက ထိုပညာရပ်များအားလုံးတွင်လည်း တဘက်ကမ်းခတ် တတ်မြောက် ကျွမ်းကျင်သူဖြစ်လေသည်။

မိုနာလီဇာပန်းချီကား နောက်ခံလျှို့ဝှက်ချက်

မိုနာလီဇာဆိုတာ မိန်းမတစ်ယောက် မဟုတ်ပါဘူး။ အဲဒီပန်းချီကားဟာ လီယိုနာဒိုဒါဗင်ချီကိုယ်တိုင် သူ့ပုံတူကိုသူ မိန်းမအ၀တ်အစားတွေ ၀တ်ပေးပြီး အမျိုးသမီးပုံပေါက်အောင် ဆွဲထားတာပါ။ လီယိုနာဒို ဒါဗင်ချီဟာ တခါတခါ မိန်းမစိတ်ပေါက်နေတဲ့ Homosexual တစ်ယောက်ပါပဲ။ မိုနာလီဇာဟာ အများထင်ထားသလို၊ ဖရန်ဆက်စကို ဂျီယိုကွန်ဒါဆိုတဲ့ ကုန်သည်တစ်ဦးရဲ့ ဇနီး မဟုတ်ပါဘူး။ အဲဒီ မှတ်ချက်ကို ပေးသွားတဲ့ ဗာစရီဆိုတဲ့ ဝေဖန်ရေးဆရာဟာ သူ့တစ်သက်မှာ မိုနာလီဇာ ပန်းချီကားကို တခါမှ မြင်ဖူးခဲ့တဲ့လူ မဟုတ်ပါဘူး။

 

 ဒါတွေဟာ ပန်းချီနဲ့ ပက်သက်တဲ့ ကိစ္စမဟုတ်ဘဲ ခရစ်တော်မပေါ်ခင်ခေတ်လောက်က ကိုးကွယ်ခဲ့တဲ့ ဘာသာရေးအယူအဆ ဟောင်းတွေ ပါ။ အဖိုဓာတ်ကို ကိုယ်စားပြုတဲ့ ဆိတ်ဦးခေါင်းနွားချို နှစ်ခုနဲ့ အီဂျစ်နတ်ဘုရား AMON၊ အမဓာတ်ကို ကိုယ်စားပြုတဲ့ အီဂျစ်နတ်ဘုရားမ L'ISA ...အဲဒီနှစ်ခုပေါင်းခြင်းကနေ A ကို MON နောက်ကိုပို့လိုက်တဲ့အခါ MONALISA မိုနာလီဇာ ဖြစ်လာပါတယ်။ အဖို အမဓာတ်နှစ်ခုပေါင်းစပ်ထားတဲ့ ဂမ္ဘီရ ပန်းချီကားဖြစ်ပါတယ်။

မင်းခိုက်စိုးစန်ရဲ့ သူရဲဘောကြောင်တဲ့ လူညံ့ ဆိုတဲ့ ၀ထ္ထုထဲက ကောက်နုတ်ချက်ပါ တဲ့။ http://www.younggun.co.cc/2009/08/blog-post_16.html မှာ ရေးထားပါတယ်။

နိဂုံး
မနေ့က ဆွစ်ဖောင်ဒေးရှင်းရဲ့ ထုတ်ပြန်ချက်ကြောင့် ပန်းချီကား ၂ ခုထဲမှာ အသက်ကွာတဲ့ မိုနာလီဇာ ၂ ယောက် တွေ့နေရပါပြီ။
မိုနာလီဇာ အပြုံးတခုတည်းကို အဓိပ္ပာယ်ဖွင့်ရ အတော်ခက်ခဲနေကြတာ အခု အပြုံး ၂ ခု ဖြစ်လာပြီ ဆိုတော့ အဓိပ္ပာယ်ဖွင့်ရ ပိုခက်သွားပြီလို့ ဆိုနိုင်မယ် ထင်ပါတယ်။

ဧရာဝတီ Facebook / Twittert

-