မြန်မာပြည်ဖုန်းဈေးကွက်မှာ CDMA 450 ရှားပါးနေ

~



ရွက်စိမ်း ~

    CDMA 450 ဟန်းဆက်များ ဈေးကွက်အတွင်းမှာ ရှားပါးနေပြီး Touch Screen နဲ့ ကိုင်ချင်သူတွေအတွက်ကတော့ ဈေးကြီးကြီး ပေးဝယ်ရတဲ့ အခြေအနေ ဖြစ်နေပါတယ်။

    ဟန်းဆက်ဆိုင်တွေမှာ GSM, WCDMA, CDMA 800 စတဲ့ ဖုန်း ဟန်းဆက်တွေက ၇၀,၀၀၀ သောင်း ၈၀,၀၀၀ ကျော် ပေးရုံတင် ဟန်းဆက်
ကောင်းကောင်း ရနိုင်ပေမယ့် ၄၅၀ အတွက် ဟန်းဆက်ကတော့ ငွေကျပ် တစ်သိန်းကျော် ပေးရတာတောင် ပုံစံ လှလှလေးတွေ မဟုတ်တဲ့အပြင် အန့်ဒရိုက် ဆော့ဖ်ဝဲလ်နဲ့  မရနိုင်ပါဘူး။

    ၄၅၀ ဖုန်းကို အရင်က နေပြည်တော်ဖုန်းလို့ ခေါ်ပြီး လိုင်းဆွဲအား ကောင်းပြီး ဘယ်နေရာမဆို သယ်ဆောင် သွားလို့ ရတာကြောင့် ငွေကျပ်
ငါးသိန်းကျော်လောက် ပေးပြီး လူအများ ၀ယ်ယူခဲ့ကြတာပါ။ ဒါပေမယ့် အခုအချိန်မှာ GSM နဲ့ WCDMA, ရန်ကုန်ဖုန်းလို့ ခေါ်တဲ့ ၈၀၀ CDMA  ဖုန်းတွေ ကိုသာ
 အသုံးပြုမှု များတာကြောင့် ၄၅၀ ဟန်းဆက် တင်သွင်းမှု နည်းပါးလာပါတယ်။

    လသာ လမ်းမကြီးပေါ်က RH Mobile ဆိုင်ကတော့ “CDMA 450 က ဟန်းဆက်က တော်တော့်ကို ရှားပါတယ်။ GSM လို ပုံလှလှလေးတွေ
သိပ်မထွက်ဘူး။ Touch Screen နဲ့ ဆိုရင်တော့ ၃ မျိုးလောက်ပဲ ရှိတယ်။ အဲဒါကလည်း ဈေးက နည်းနည်း မြင့်နေတော့ သိပ်ရောင်းမကောင်းဘူး” လို့ ပြောပါတယ်။

    ၄၅၀ ဟန်းဆက်ကို အန့်ဒရိုက် ဆော့ဖ်ဝဲလ်နဲ့က တရုတ်က လာတဲ့ GMG ဟန်းဆက် တစ်မျိုးထဲသာ ရနိုင်ပြီး မော်ဒယ် နှစ်မျိုးနဲ့ ၀င်ရောက်လာတာကို တွေ့ရပါတယ်။

နှစ်မျိုးလုံးအတွက် ငွေကျပ် နှစ်သိန်းကျော် ကျသင့်ပါတယ်။
HTC နဲ့ ၀င်လာတာ ရှိပေမယ့် JAVA software နဲ့ ဖြစ်နေပြီး  ငွေကျပ် နှစ်သိန်းဝန်းကျင် ဖြစ်နေတာကြောင့်  HTC ထက် GMG ကို ပဲ ၀ယ်ယူမှု များပါတယ်လို့ RH Mobile  ဆိုင်က ပြောပါတယ်။

    Nokia Touch Screen ဟန်းဆက်ရှိပေမယ့်  လူကြိုက်နည်းပါတယ်။ ဈေးနှုန်းကြောင့် မဟုတ်ပါဘူး။ အရင် တုန်းကပုံစံနဲ့  JAVA ဆော့လ်ဝဲကြောင့်  ဖြစ်တယ်လို့ ဆိုပါတယ်။

တခြား ဟန်းဆက်တွေကတော့ ရိုးရိုး keypad နဲ့ပဲ ရှိပါတယ်။
CDMA 450 ကို ဖုန်းဝယ်မှုအနေနဲ့ အခုနောက်ပိုင်းမှာ အင်တာနက်လည်း မရတာကြောင့် မ၀ယ်သလောက် ရှိနေတယ်လို့ မိုဘိုင်း အရောင်းဆိုင်တွေက ပြောပါတယ်။

CDMA 450 ဖုန်းကိုင်ဆောင်ထားသူ တစ်ဦးကတော့ “အရင်က CDMA ခေတ်ဆိုတော့ ငါးသိန်းခွဲလောက်ကို ပေးပြီး ၀ယ်လိုက်ရတယ်။ အခုနောက်ပိုင်းမှာ Touch Screen လေးတွေ ပေါ်လာတော့ ကိုင်ချင်လို့ သွားစုံစမ်းတဲ့အခါ နှစ်သိန်းကျော်လောက် ကျသင့်ပြီးနှစ်မျိုး သုံးမျိုးလောက်ပဲ ရှိတယ်။ သိပ်ပြီး ရွေးစရာ မရှိဘူး” လို့ ရှင်းပြပါတယ်။

“နှစ်သိန်းကျော်ဆိုတာ အခု ဆိုရင် GSM ဖုန်း တစ်လုံးတောင် ၀ယ်လို့ရနေပြီ။ ဒါပေမယ့် အရင် ၅သိန်းကျော် ပေးဝယ်ရတဲ့ ဖုန်းက အလကားဖြစ်သွားမှာ စိုးလို့ နှစ်သိန်းကျော်တန် ပဲ ပေးဝယ် ကိုင်ရတယ်” လို့ သူက ဆက်ပြောပါတယ်။

ဧရာဝတီ Facebook / Twitter

-