ရှမ်းပြည်နယ်၊ ညောင်ရွှေမြို့နယ်က အင်းလေးဖောင်တော်ဦးဘုရား
ရွှေဆိုင်းဌာနကို ဖောက်ထွင်းခဲ့သူကို
ရဲတပ်ဖွဲ့ဝင်တွေက ဖမ်းဆီးရမိခဲ့ပြီလို့ သိရပါတယ်။
 |
| ဓာတ်ပုံ- ဆလိုင်းသန့်စင် |
အင်းလေးဖောင်တော်ဦးဘုရား ရင်ပြင်တော်ပေါ်မှာရှိတဲ့ ရွှေဆိုင်းဌာနဟာ
နိုဝင်ဘာ ၂၆ ရက်နေ့က ဖောက်ထွင်းခံခဲ့ရပြီး ရွှေ၊ ငွေ၊ လက်ဝတ်ရတနာတွေနဲ့
ငွေစက္ကူတွေအပါအ၀င် ကျပ်သိန်း ၁၀၀ ကျော် ပျောက်ဆုံးခဲ့တာ ဖြစ်ပါတယ်။
ညောင်ရွှေမြို့နယ် ရဲတပ်ဖွဲ့ဝင်တွေဟာ ရွှေဆိုင်းဌာနဖောက်ထွင်းခဲ့သူကို
ဖမ်းမိနိုင်ရေး လှုပ်ရှားဆောင်ရွက်ခဲ့တာ နိုဝင်ဘာ ၂၇ ရက်နေ့ည ၁၁
နာရီမှာ ဖောက်ထွင်းသူကို ဖမ်းဆီးရမိခဲ့တယ်လို့ နန့်ပန်ရဲစခန်းက
တပ်ကြပ်ကြီး ခင်မောင်စီက ဧရာဝတီကို ပြောပါတယ်။
“ဖောက်ထွင်းတဲ့ကောင်လေးနာမည်က ကောင်းကောင်း ဖြစ်ပါတယ်။ မိတ္ထီလာကနေ
အင်းလေးက ဘုရားပွဲကို ဈေးလာရောင်းတဲ့ ၁၂ ပွဲဈေးသည်ပေါ့။ ကျနော်တို့လည်း
အစောပိုင်းကတည်းက သူ့တယောက်ထဲကို မသင်္ကာဖြစ်ထားတာနဲ့ မိတ္ထီလာ ရဲတပ်ဖွဲ့နဲ့
ချိတ်ဆက်ပြီး လှုပ်ရှားခဲ့ရာမှာ မိတ္ထီလာရဲတပ်ဖွဲ့က သူ့ကို ဖမ်းဆီး
ပေးခဲ့တာ ဖြစ်ပါတယ်။ ပါသွားတဲ့ပစ္စည်းတွေလည်း အများကြီးမလျော့ပဲ ပြန်လည်
သိမ်းဆည်းရမိထားပါတယ်”လို့ သူက ပြောပါတယ်။
ဖောက်ထွင်းသူဟာ အင်းလေးဖောင်တော်ဦးဘုရား ရွှေဆိုင်းဌာနရဲ့ သံဗီဒိုကို
သော့တူနဲ့ဖွင့်ပြီး ရွှေ၊ ငွေ၊ ရတနာပစ္စည်းနဲ့ ငွေကြေးတွေကို
ဖောက်ထွင်းသွားခဲ့ပြီး ညောင်ရွှေမြို့ကနေ မိတ္ထီလာမြို့ကို
ပြန်ရောက်တဲ့အချိန်မှာ မိတ္ထိလာ ရဲတပ်ဖွဲ့က ဖမ်းဆီးခဲ့တာ ဖြစ်တယ်လို့
သိရပါတယ်။
“ဒီမှာက သီတင်းကျွတ်ပွဲတော်ပြီးရင် တန်ဆောင်တိုင်ပွဲတော်၊ အင်းသားများ
ဆုံဆည်းရာပွဲတော်၊ ဆွမ်းဆန်စိမ်း လောင်းလှူပွဲတော်ဆိုပြီး ပွဲတော်တွေက
ဆက်နေတယ်။ ဒီကောင်လေးက ဒီမှာဈေးရောင်းရင်း ပွဲတော်က မပြတ်ဖြစ်နေတော့
မပြန်ကြဘဲနေရင်းကနေ အခုလို လုပ်သွားတာပေါ့။ ပထမဆုံး သူက အလှူခံနေရာမှာ
ဝင်ရောတယ်။ နောက်တော့ ရွှေဆိုင်းဌာနကို ၀င်ရောပြီး လှုပ်ရှားသွားတာ”လို့
တပ်ကြပ်ကြီး ခင်မောင်စီက ပြောပါတယ်။
ပြည်တွင်းမှာသာမက ပြည်ပမှာပါ ကျော်ကြားတဲ့ အင်းလေးဖောင်တော်ဦးဘုရားမှာ
အခုဖြစ်သွားတဲ့ ဖောက်ထွင်းမှုဟာ ဘုရားသမိုင်းသက်တမ်းတလျှောက်
ပထမဆုံးဖြစ်ပွားခဲ့တဲ့ ဖောက်ထွင်းမှုဖြစ်ပါတယ်။
ဆလိုင်းသန့်စင်
0 comments :
Post a Comment