လည်ပြန် လှည့် မကြည့်ချင်တော့ပါ

 နိုင်ငံရေးအကျဉ်းသားဟောင်း ဘလော့ဂ်ဂါ နေဘုန်းလတ်

နေဘုန်းလတ်~

ကျနော်တို့ တိုင်းပြည်ရဲ့ ဒီမိုကရေစီ ခရီးစဉ်ကို နောက်ပြန်လှည့်သွားမှာ တကယ်ကိုပဲ စိုးရိမ်ကြတယ် ဆိုရင်ဖြင့် ၂၀၀၈ ဖွဲ့စည်းပုံအခြေခံ ဥပဒေထဲက အရေးပေါ်ကာလဆိုင်ရာ ပြဠာန်းချက်များဆိုတဲ့ အခန်း (၁၁) ကိုတော့ နည်းနည်းဖြစ်ဖြစ် လေ့လာကြည့်ကြစေချင်ပါတယ် ...။ 

ပုဒ်မ ၄၁၂၊ (က) 
  
တိုင်းဒေသကြီး တခုတွင်ဖြစ်စေ၊ ပြည်နယ် တနယ်တွင်ဖြစ်စေ၊ ပြည်ထောင်စု နယ်မြေ တခုတွင်ဖြစ်စေ၊ ကိုယ်ပိုင် အုပ်ချုပ်ခွင့်ရ စီရင်စု တခုတွင်ဖြစ်စေ၊ ယင်းတို့၏ တစ်စိတ် တစ်ဒေသတွင်ဖြစ်စေ ပြည်သူများ၏ အသက်အိုးအိမ် စည်းစိမ်ကို ထိပါးအန္တရာယ်ပြုမည့် အရေးပေါ်အခြေအနေပေါ်ပေါက်လျှင် သို့မဟုတ် ထိုသို့ ပေါ်ပေါက်ရန် လုံလောက်သော အကြောင်းရှိကြောင်း သိရှိလျှင်သော်လည်းကောင်း၊ ထိုသို့ 
ပေါ်ပေါက်ရန် လုံလောက်သော အကြောင်းရှိကြောင်း သက်ဆိုင်ရာဒေသ အာဏာပိုင်အဖွဲ့အစည်းက တင်ပြလျှင်သော် လည်းကောင်း နိုင်ငံတော်သမ္မတသည် အမျိုးသားကာကွယ်ရေးနှင့် လုံခြုံရေးကောင်စီနှင့် ညှိနှိုင်းပြီး ဥပဒေ ကဲ့သို့ အာဏာတည်သည့် အမိန့် ထုတ်ပြန်၍ အရေးပေါ်အခြေအနေကြေညာနိုင်သည်။ 

(ခ) ပုဒ်မခွဲ(က)အရ နိုင်ငံတော်သမ္မတသည် အမျိုးသားကာကွယ်ရေးနှင့် လုံခြုံရေးကောင်စီနှင့် ညှိနှိုင်းရာ တွင် အဖွဲ့ဝင်များ စုံညီစွာတက်ရောက်နိုင်ခြင်းမရှိပါက အဖွဲ့ဝင်များဖြစ်သော တပ်မတော် ကာကွယ်ရေး ဦးစီးချုပ်၊ ဒုတိယ တပ်မတော်ကာကွယ်ရေးဦးစီးချုပ်၊ တပ်မတော် ကာကွယ်ရေးဝန်ကြီးဌာန ဝန်ကြီး၊ ပြည်ထဲရေး ဝန်ကြီးဌာနဝန်ကြီး တို့နှင့် ညှိနှိုင်းပြီး အရေးပေါ်အခြေအနေကို အချိန်မီ ထုတ်ပြန်ကြေညာနိုင်သည်။ 

ယင်းသို့ ထုတ်ပြန်ကြေညာချက်ကို အမျိုးသားကာကွယ်ရေးနှင့် လုံခြုံရေးကောင်စီသို့ အမြန်ဆုံးတင်ပြ အတည်ပြုချက်ရယူရမည်။ 

ပုဒ်မ ၄၁၃။ ပုဒ်မ ၄၁၂ အရ အရေးပေါ်အခြေအနေ ကြေညာသည့်ကိစ္စရပ်တွင် - 

(က) အရေးပေါ် အခြေအနေကြေညာချက် အကျိုးသက်ရောက်သည့်နယ်မြေဒေသအတွင်း မူလ အခြေ အနေသို့ အမြန်ပြန်လည်ရောက်ရှိစေခြင်းငှာ ဒေသဆိုင်ရာ အာဏာပိုင်အဖွဲ့အစည်းများ၊ ယင်းအဖွဲ့အစည်း ဝင်များ၊ နယ်ဘက်ဆိုင်ရာ ဝန်ထမ်းအဖွဲ့အစည်းများ၊ ယင်းအဖွဲ့အစည်းဝင်များက တည်ဆဲဥပဒေများနှင့် အညီ တာဝန်ထမ်းဆောင်ရာတွင် ထိရောက်မှုရှိစေရန် တပ်မတော်၏ အကူအညီကို ရယူဆောင်ရွက်နိုင်သည်။ 

(ခ) နိုင်ငံတော်သမ္မတသည် လိုအပ်ပါက စစ်အုပ်ချုပ်ရေးအမိန့်တစ်ရပ် ထုတ်ပြန်နိုင်သည်။ ယင်း စစ်အုပ်ချုပ်ရေး အမိန့်တွင် တပ်မတော်ကာကွယ်ရေးဦးစီးချုပ်အား အုပ်ချုပ်ရေးဆိုင်ရာ လုပ်ပိုင်ခွင့်နှင့် တာဝန်များကို လည်းကောင်း၊ ရပ်ရွာအေးချမ်းသာယာရေးနှင့် တရားဥပဒေစိုးမိုးရေးနှင့် သက်ဆိုင်သည့် တရားစီရင်ရေးဆိုင်ရာ လုပ်ပိုင်ခွင့်နှင့် တာဝန်များကိုလည်းကောင်း သတ်မှတ်ပေးရမည်။

တပ်မတော်ကာကွယ်ရေးဦးစီးချုပ်သည် ယင်းလုပ်ပိုင်ခွင့်နှင့် တာဝန်များကို မိမိကိုယ်တိုင် ကျင့်သုံးဆောင် ရွက်ခြင်း သို့မဟုတ် သင့်လျော်သည့် စစ်ဘက်အာဏာပိုင်တစ်ဦးဦးကို ကျင့်သုံး ဆောင်ရွက်စေခြင်း
ပြုနိုင်သည်။ 

ဒါက အရေးကြီးတဲ့ ပုဒ်မ ၄၁၂ နဲ့ ၄၁၃ တို့ ကိုပဲ ထုတ်နှုတ်ပြထားတာပါ ...။ 

သေချာသဘောပေါက် ချင်တယ်ဆိုရင်တော့ အခန်း ၁၁ တစ်ခန်းလုံးမှာပါတဲ့ ပုဒ်မ (၄၁၀) ကနေ ပုဒ်မ (၄၃၂) အထိကို သေချာလေ့လာရမှာပါ ...။ 

ပုဒ်မ ၄၁၂ ပုဒ်မခွဲ(ခ) မှာ Bold လုပ်ပြထားတာတွေကိုကြည့်မယ်ဆိုရင် ... 

လူပုဂ္ဂိုလ်ငါးဦးရဲ့ သဘောတူညီချက်နဲ့ အရေးပေါ်အခြေအနေထုတ်ပြန်လို့ရနေတာကို တွေ့ရပါလိမ့်မယ်။ တစ်ခုရှိတာက တိုင်းပြည်တည်ငြိမ်အေးချမ်းနေရင်တော့ ... အရေးပေါ်အခြေအနေထုတ်ပြန်ဖို့ ခက်ပါလိမ့် မယ်။ 

အဲဒီ့တော့ ကျနော့်အမြင်အရ ကျနော်တို့ အားလုံး စိုးရိမ်နေကြတဲ့ နောက်ပြန်လှည့်သွားမယ့် အခြေအနေ တစ်ခုကို ... ပြန်ရောက်ချင်နေတဲ့သူတွေရှိမယ်ဆိုရင် သူတို့ရဲ့ ပထမဆုံး အလုပ်က တိုင်းပြည်ကို မတည်မငြိမ်ဖြစ်အောင်၊ ဆူဆူပူပူတွေဖြစ်အောင် လှုံ့ဆော်ရမယ့်အလုပ်ပါပဲ ...။ 

ဒါမှလည်း ... ပုဒ်မ ၄၁၂ ပုဒ်မခွဲ(က) အရ ... အရေးပေါ်အခြေအနေကြေညာနိုင်မှာပါ ... 

အဲဒီ့အခါမှာ တိုင်းပြည်ရဲ့အုပ်ချုပ်ခွင့်အာဏာက တပ်မတော်ကာကွယ်ရေးဦးစီးချုပ် (သို့မဟုတ်) စစ်ဘက် အာဏာပိုင်တစ်ဦးဦး လက်ထဲကို ပြန်ရောက်မှာပါ။ ပြည်နယ်တစ်ခုခု၊ တိုင်းဒေသကြီးတစ်ခုခု ဒါမှမဟုတ် ကိုယ်ပိုင်အုပ်ချုပ်ခွင့်ရဒေသတစ်ခုခုမှာ ဖြစ်တဲ့ ပြဿနာတွေကို အဲဒီ့ဒေသတွေမှာတင်မဖြေရှင်းနိုင်ပဲ တစ်နိုင်ငံလုံးအတိုင်းအတာကူးစပ်လာပြီး ... မငြိမ်မသက်မှုတွေ တစ်နိုင်ငံလုံးမှာ ပေါ်ပေါက်လာပြီ ဆိုရင်တော့ ... အဲဒီ့အခြေအနေဟာ နောက်ပြန်ဆုတ်ချင်နေသူတွေ အကြိုက်ဖြစ်သွားမှာပါပဲ။ 


သမ္မတလဲ အဲဒီ့အချိန်ရောက်မှတော့ ဘာမှ တတ်နိုင်တော့မှာ မဟုတ်ပါဘူး။ ဖဆပလ ခေတ်တုန်းက ဝန်ကြီးချုပ်ဦးနုဟာ တိုင်းပြည်ကို ဦးနေဝင်းလက်ထဲ ဒီလိုပဲ ထိုးအပ်ခဲ့ရဖူးပါတယ် ...။

သွေးထိုးလှုံ့ဆော်မှုတွေ ဘယ်လောက်ပဲများများ ... ပြဿနာတွေကို တစ်နိုင်ငံလုံးအတိုင်းအတာအထိ ကူးစပ်မလာအောင်ဝိုင်းထိမ်းဖို့ ကျနော်တို့အားလုံးမှာ တာဝန်ရှိပါတယ်။

အခု လက်ရှိပြဿနာ တွေနဲ့ပတ်သက်ပြီးတော့လဲ ... မွတ်ဆလင်တွေ၊ ရခိုင်တွေ၊ ကချင်တွေ၊ ဗမာတွေ ဆိုတာကို ခဏထားလိုက်ပြီး ကျနော်တို့ တကယ် စည်းခြားရမှာက အကြမ်းဖက်သမားနဲ့ ငြိမ်းချမ်းရေး လိုလားသူ လို့ ထင်ပါတယ် ...။ 

တကယ်လို့များ ကိုယ်က သိသိနဲ့ ဖြစ်စေ မသိလိုက်ဘဲ ဖြစ်စေ ပြဿနာကို ပိုမိုကြီးထွားလာစေ ဖို့ 
သွေးထိုးလှုံ့ဆော်မိသူတွေ ဖြစ်မှန်းမသိ ဖြစ်နေခဲ့ကြမယ် ဆိုရင် အဲဒီ အဆင့်ကနေပြီး ... ပြဿနာကို တကယ်ပြေလည်သွားအောင် ဖြေရှုင်းပေးနိုင်ကြသူတွေဆိုတဲ့ အဆင့်ကို တက်လှမ်းနိုင်ကြပါစေ။