ကင်ဂျုံအန်းကို သရော်ထားတဲ့ The Interview ရုပ်ရှင် ခိုးယူဖောက်ထွင်းခံရ

Thursday, December 4, 2014


မြောက်ကိုရီးယား ခေါင်းဆောင် ကင်ဂျုံအန်းကို သရော်ထားတဲ့ ရုပ်ရှင်ဟာ ထုတ်ဝေဖြန့်ချီမယ့် ရက်မတိုင်ခင်မှာပဲ ခိုးယူခံလိုက်ရပြီး အင်တာနက်ပေါ် ရောက်သွားခဲ့ပါတယ်။ အဲဒီ ဆိုက်ဘာ ပြစ်မှုကြီးကတော့ ပြီးခဲ့တဲ့သတင်းပတ်က ဖြစ်ပွားခဲ့ရတာပါ။ 




ဆိုနီရုပ်ရှင် ကုမ္ပဏီရဲ့ ကွန်ပျူတာ စနစ် ဖောက်ထွင်းခံရပြီး အဲဒီ The Interview ဆိုတဲ့ ရုပ်ရှင် အွန်လိုင်းပေါ် ရောက်သွားမှုကို   စုံစမ်းစစ်ဆေးနေတယ်လို့ ဘီဘီစီ သတင်းတပုဒ်က ဆိုပါတယ်။ 

အဲဒီ ဟာသ ရုပ်ရှင်ဇာတ်ကားကို ပိတ်ပင်ပေးဖို့ မြောက်ကိုရီးယားနိုင်ငံက အမေရိကန်
ပြည်ထောင်စုနဲ့ ကုလသမဂ္ဂတို့ကို ဇွန်လက တောင်းဆိုခဲ့တယ်လို့လည်း သတင်းမှာ ဖော်ပြပါတယ်။ 

ဆိုနီရုပ်ရှင် ကုမ္မဏီရဲ့ ကွန်ပျူတာ စနစ်ကို ဖောက်ထွင်းတဲ့ ဆိုက်ဘာပြစ်မှုမှာ မြောက်ကိုရီးယားနိုင်ငံ ပါဝင် ပတ်သက်ဖွယ် ရှိတယ်လို့ သံသယ ဖြစ်ကြပေမယ့် မြောက်ကိုရီးယားဘက်ကတော့ ၀န်ခံ မထားသလို မပတ်သက်ဘူးလို့လည်း မပြောပါဘူး၊ ဒီကိစ္စ စောင့်ကြည့်ဖို့သာ အစိုးရပြောခွင့်ရ အရာရှိတယောက်က ဆိုထားပါတယ်။ 

သတင်းမှာရေးထားတာက မြောက်ကိုရီးယားတွေဟာ ဒီဆိုက်ဘာတိုက်ခိုက်မှုရဲ့ နောက်ကွယ်မှာ ရှိနေတယ် ဆိုရင် ဒါဟာ ပထမဆုံးတော့ မဟုတ်ပါဘူး တဲ့။

 ပြီးခဲ့တဲ့ ၂၀၁၂ ခုနှစ်ကလည်း သူတို့ရဲ့ ဒစ်ဂျစ်တယ် တပ်မတော်ဆိုတာက တောင်ကိုရီးယား စီးပွားရေး လုပ်ငန်းတွေနဲ့ အစိုးရ အင်တာနက် စာမျက်နှာပေါင်း သုံးထောင်လောက်ကို ဖောက်ထွင်း ခဲ့တယ်လို့ ယုံကြည် ရတဲ့အကြောင်း တောင် ကိုရီးယား  Police Policy Institute ရဲ့ ပညာရှင် တွေက ပြောဆိုထားပါတယ်။

လူအများ စိတ်ဝင်တစား မျှော်လင့်နေတဲ့ The Interview ဟာသရုပ်ရှင်ဇာတ်ကား နမူနာကို ဆိုနီ ရုပ်ရှင် ထုတ်လုပ်ရေး ကုမ္ပဏီက အွန်လိုင်းမှာ  တင်ထားပါတယ်။

အဲဒီ နမူနာကို  ဧရာဝတီ ပရိသတ်  ခံစားနိုင်ဖို့ တင်ပေးလိုက်ပါတယ်။ အင်တာနက် လိုင်းကောင်းသူတွေကတော့ ဒီ ယူကျူ နမူနာရုပ်ရှင်ကို ကြည့်လို့ ရနိုင်ပါလိမ့်မယ်။ 


ဇာတ်လမ်းကတော့ မြောက်ကိုရီးယား ခေါင်းဆောင် ကင်ဂျုံအန်းနဲ့ အင်တာဗျူး ရခဲ့သူတဦး ဘာတွေ ကြုံတွေ့ခဲ့ရသလဲ ဆိုတာကို ဟာသ ဆန်ဆန် ရိုက်ကူးတင်ဆက်ထားတာဖြစ်ပါတယ်။


  


အိမ့်သံစဉ် ~ 


 မူရင်းသတင်းလင့်ခ်

http://www.bbc.com/news/blogs-echochambers-30284896


 

0 comments :

Post a Comment

 
Copyright © 2014 Irrawaddy Publishing Group. All Rights Reserved